Quote: كان من الممكن - وإن كان لابد من ذكر تاج السر لجملته هذه - كان من الممكن أن يقول " عاصم البنا من الذين يجيدون وبجدارة أداء أغاني خوجلي عثمان " أو أى شئ من هذا القبيل فيفتح بذلك الباب للآخرين - على الأقل الموجودين معه في الحلقة - بدلاً عن إغلاق الباب
اجدع سلااام و تحية لعمنا و الدفعة حسن الطيب يس و ييين ياخ شوق الشوق ورمضان كريم ياخ قنبلة!!! أنت ماسمعته الاجدا منها!!!؟
يا عماد أحمد و ود العباسية و الله ما عدمنناكم ياخ.
يا وليد شايف لياقتك واقعه وليك حق تصدق مافي شئ مشجع نهائي !
يا طارق يا ابو الفن ملاحظتك سليمة 100% و تصدق أنا ذكرتها فوق كنت بالتحديد منتظرك أنت أو ضياء ميرغني تعلقو ... واهو الحمد لله كلامي طلع صح .... شكراً ياخ .
دكتور الصادق عبد الله أيمن دياب أنتو الكلام دا بتجيبوهو من يييين !!؟ و متاكدين!!؟ هاهاهاهاهاها لووول الحقنا بالحيثيات طيب .
07-28-2012, 06:10 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
بدات الحلقة فهيمة تغني اغنية ما فهمتها ههههههه و اغنية ننساك انت انت بتتنسي ابضرس و شريف و افراح الشعب شغالين في الأغنية دي كويس وهي من اغاني المجموعات بس افراح دي بالجد ترحم فسها ياخ !! صوته بروح كلو كلو
07-28-2012, 06:35 PM
عزيز
عزيز
تاريخ التسجيل: 04-12-2002
مجموع المشاركات: 3290
الحلقة اظنها عن الاغاني بالبتتكلم عن النسيان فرفور و رائعة حسن عطية لو أنت نسيت آداء تطريبي وجيد من فرفور سايقه سواقه ممتازه .
شموس لحسن عطية الماحبينا غيرو شموس صوت جيد حفظ جيد آداء جيد.
أنا ما بنساك انت لو نسيت الناس منار و آداء فوق الوسط .
انساني وانا انساك حسين الصادق حسين الصادق دا بالجد يشوف شغله تانية و الأغنية دي بعد السواها فيها عمار السنوسي مفروض مافي زول يقرب مها . الغريبة فرزق برعي شكلو مبسوط من آداء حسين !!؟ الغريبة حسين حافظ الأغنية صاااح . انساني ياااااخ أنااساااااك .
شكل الفرقة الموسيقية مزبوط الليلة لانو ببساطة شكل الالحان اضحة في الاغننيات (يعني مازي اغاني هييييييييع و كع كرع ديك بتاعة حوش باننقا و دلوكة كبوشية)
07-28-2012, 07:48 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
Quote: لا ادري هل أرواحنا اصبحت باهتة ام هي حلقات برنامج أغاني وأغاني ليس لديها روح
الشباب يغنون وكأنهم دمي بدون احساس.
والتغير الذي تم لم يكن موفقاً بحلقات الفن الشعبي والاختيار له صلة بالعلاقات الشخصية للمرددين.
ليس في البرنامج ما يدهش.
اتمنى ان يكون هذا إحساسي وحدي ويخالفني الجميع هذا الشعور.
كامل الأمنيات بالتوفيق في قادم الحلقات.
كلامك صاااح يا فنان رح باااهتة شديد و مافي إي معايشة للأغاني آداء شبه تقريري حتي الغيير بتاع الغناء الشعبي بتاع العلاقات الشخصية دا سقطوا فيهو سقوط مروع ! و الله يستر من القادم.
07-28-2012, 11:34 PM
Yasier Elsayed
Yasier Elsayed
تاريخ التسجيل: 02-27-2008
مجموع المشاركات: 3401
Quote: Quote: أفراح عصام يجب ابعادها من البرنامج ومنعها من الغناء مدى الحياه...ده رأي شخصي ..
وصباح عبدالله كذلك.. وكفاية مجاملات..
والله انا ماقادر استوعب انو حسين الصادق دا فنان ياخى دا عمل فى الاغنية عمائل وبهدلة وبعد كدة السر قدور والكلام الفارغ البيقول فيهو
يا اخوى سفيان هذا البرنامج لا يستاهل منك كل هذا الاجتهاد والتقيم لانو اصلا مافى حاجة وحقيقة هذا البوست فى تقيمى امتع واجمل وافيد من البرنامج نفسه وانا شخصيا اصبحت مواظب على البوست اكتر من البرنامج لمتعة البوست وجماله
الى اللقاء يا صديقى
07-28-2012, 11:13 PM
عبير خيرى
عبير خيرى
تاريخ التسجيل: 02-12-2004
مجموع المشاركات: 2440
صديقي سفيان دخلت عشان انزل لي بوست دسم عن الراحل ( زيدان ابراهيم ) فلقيت البوست الدسم ده بتحليلات المتداخلين الرائعة فقلت اشارك واترك بوست ( زيدان ) لما بعد العيد ، سفيان اول حاجة رسل رقم موبايلك في الخاص لأنو عندي احتمال جية للسودان بعد العيد الحلقة الأولى والثانية : لم استطع متبعتها لكمية الوجع والوجع الفينا مكفينا افراح عصام : زي حكومة الانقاذ مفروضة علينا فرض الليلة يقرب يغمى عليها في أغنية ابن البادية ( رحلة عيون ) غايتو تخليك تشعر بأنك عايز تستفرغ وصوتها بضرس عديل صباح عبدالله : جابوك من وين ومن وين جلبوك غايتو أنا ما شفتها إلا في البرنامج ده أمكنيات صفر والله الصافي ود سنار الكان بغني في الأهلية ولمن نعلق يوقف الغناء ويشاكلنا أحسن منها مليون مرة فهيمة : دي غايتو ( بت قضيم ) صوت حبوبات وصوت ضعيف امكانياتو محدودة شريف الفحيل : كرهتنا الغناء ياخي شوف ليك شغلة تانية حسين الصادق : اخير يركب الهمر ويغني بيت الكل ولا يرجع لمديحو طه سليمان : ود غناي بس ما مكتشف امكناتو لو ركز شوية مع الغناء وخلى ناس حرامي القلوب تلب حيكون ليهو شأن فضل ايوب : من زمن غنى في نجوم الغد ( غيرة ) لسيد خليفة وضّح أنو قادم بقوه بس يترك الكسل ومكانو شاغر فرفور : مازال ادؤاه سخلي وبخرب غناء الأخرين وبتدخل في إي أغنية وكأنو البرنامج ده حقو عاصم البنا : نوعا ما ما بطال بس ما دام عامل الحقيبة حقتهم يفترض أنو يذاكر كويس سميرة دنيا : كأنها بتتونس معاك صوت شجي خاصة في أغنيات الملك عثمان حسين بس شكلها ما ادوها راحتها ريماز ومنار : محلك سر مافي اي تطور رغم أنهم ما بطلات شموس : صوت رخيم وجميل واحترام للغناء حفظ شديد بس ما يودها دبي حسين شندي وتمتام : كان احسن يجيبو واحد منهم يعني تمتام كفاية انصاف مدني : ياريت يجيبهو بالدلوكة لانها مميزة فيها لدرجة قف السر قدور : حيضحك ضحكاتو دي وما حيجتهد في تقديم معلومات تفيد المشاهد وحيرفض اي تصحيح معلومات لانو زي ما قال بتكلم من رأسو وفي معلومات مغلوطة كتير برددها غايتو مادام بيقبض 100 مليون بالقديم من تسجيل البرنامج ده ويرجع القاهرة ويجي السنة الجاية حقو يجتهد شوية أغاني وأغاني : مكررة وغير مفيدة لكن بقت ادمان وكان ممكن تتطور بقليل من الجهد في الابتكار وإضافة شباب قدموا اعمال مميزة في نجوم الغد ( أحمد المامؤن - محمد خير - أحمد محمد الامين - شذى عبدالله - ميادة وأخرين ) ومن وجهة نظري الخاصة أن ( سلمى سيد ) في زورق الألحان بتقدم معلومات ثرة مع ودالامين وقبلها مع الراحل وردي
شكراً سفيان
07-29-2012, 03:02 AM
Moawia Mohammed
Moawia Mohammed
تاريخ التسجيل: 10-24-2006
مجموع المشاركات: 3777
Quote: انساني وانا انساك حسين الصادق حسين الصادق دا بالجد يشوف شغله تانية و الأغنية دي بعد السواها فيها عمار السنوسي مفروض مافي زول يقرب مها . الغريبة فرزق برعي شكلو مبسوط من آداء حسين !!؟ الغريبة حسين حافظ الأغنية صاااح . انساني ياااااخ أنااساااااك .
أخونا الحبيب سفيان والطاقم المعاون من فنيين و موسيقيين و معلقين ومحبي غنانا الجميل رمضان كريم و كل سنة و إنتم طيبين
طبعا النيل الأزرق دي ما عندنا و البرنامج ذاتو ممل و السر قدور دا كيسو فاضي و ما عندو حاجة جديدة نستفيد منها
تصور يا سفيان البوستات البتعملوها كل سنة دي مفيدة أكثر من البرنامج و نحن بنجي نعاين من بره بره و ما بنتداخل
و الله بعد زمن طويل يا سفيان جابتني أنساني و أناأنساك الأغنية دي بتهبشني في اللحم الحي بسمعها كل يوم مرات بصوت سيدها الشفيع و مرات بصوت عمار السنوسي
طبعا الأغنية من كلمات عبد المنعم عبد الحي و الحان برعي محمد دفع الله عشان كدا ود برعي كان مبسوط لأنو أكيد إتذكر والده
رغم سوء أداء حسين الصادق عموما لكنه في الأغنية دي بالذات كان حافظ كويس و ثابت و يبدو أنه تغني بها كثيرا من قبل ( يعني فرمالة ) غايتو الأغنية دي حسب إمكانياته الما قدر دا أنا شايفو إتقطع فيها
أنا مالى فى الغنا دا ... بس داير أسأل هل الناس كان حا تستحمل كلام زى الفوق دا لو كتبو أى زول غير من يكتب بأسم دينا خالد...؟؟؟ أو قصد بيه زول غير ناس شندى؟؟؟
ليس مستغرب بس بيعجبنى لما عبارة صغيرة فى موضوع ترفيهى تقعد اللى بيشوفها فى السهلة أو يعمل ما شافها من أصلو..
07-29-2012, 06:17 AM
Emad Ahmed
Emad Ahmed
تاريخ التسجيل: 08-12-2009
مجموع المشاركات: 12705
طريقة جديده للسمع عشان اوريكم ما بتعرفوا تسمعوا ابدا ابدا ابتكرتها انا اسمها ( الخيال السمعي ) يعني بدل ما الناس تمرض نفسها وتجي تقول الزول دا مابعرف يغني والزول دا صوتو ضعيف طريقتي بتقول نتركه يغني حتى ولو حرك شفتيه فقط ولكن لازم تعيش في نفس اللحظة مع الفنان الاصل صاحب الصوت نفسه موش بقولو حلو الغناء في خشمي سيدو اها فكرتي دي كيف اكيد ح تلاقي عندكم نجاح جربوها هسه لمن احضر اغاني واغني يغني فرفورللكاشف اسرح ليك مباشرة في الكاشف سي الاسم .. ياجماعه انصحكم ( بالخيال السمعي )
. . سفيان والله كنت عايز ارفع ليك صوره هنا من الارشيف لاحول الله هدية ليك ولي ملك التوثيق صديقي عماد احمد
07-29-2012, 09:13 AM
الشيخ سيد أحمد
الشيخ سيد أحمد
تاريخ التسجيل: 07-14-2008
مجموع المشاركات: 2725
وليد لقيت فهيمه كيف لمن غنت مرت الايام(عبدالدافع عثمان)...طبعا سفيان بيكون الوقت داك قفل باب الغرفه عشان مايجي زول داخل عليه من شدة الطرب هههههههههههه.
كامل الود.
07-29-2012, 10:25 AM
داليا حافظ
داليا حافظ
تاريخ التسجيل: 06-06-2008
مجموع المشاركات: 5055
Quote: طريقة جديده للسمع عشان اوريكم ما بتعرفوا تسمعوا ابدا ابدا ابتكرتها انا اسمها ( الخيال السمعي ) يعني بدل ما الناس تمرض نفسها وتجي تقول الزول دا مابعرف يغني والزول دا صوتو ضعيف طريقتي بتقول نتركه يغني حتى ولو حرك شفتيه فقط ولكن لازم تعيش في نفس اللحظة مع الفنان الاصل صاحب الصوت نفسه موش بقولو حلو الغناء في خشمي سيدو اها فكرتي دي كيف اكيد ح تلاقي عندكم نجاح جربوها هسه لمن احضر اغاني واغاني يغني فرفور للكاشف اسرح ليك مباشرة في الكاشف سي الاسم .. ياجماعه انصحكم ( بالخيال السمعي )
هوي يا وليد بطل حركات ..خيالنا ده نوسعوا لشنو ونخلي شنو هو خيالنا ده فاضي كدة ..،بعدين سفيان ده يقفل دكانو ده ولا كيف ..والتنظير ده نخلي لمنو..ابييينا..هههههه
مرض مرض ..قحة قحة
الورم الجواي ده اوديهو وين يعني..
بسم الله
نبدا من فكرة "الدفار " أوعا يكون فاتكم انو الاستديو ديكورو على شكل دفار ..وعمك قدور يا الكمساري ياكرسي السواق بالقلبة ..قعدة بايخة ومابتخلي الناس يقعدوا كويس لحدي الليلة ما شفت وش سميرة دنيا لأنها ماسكة بالجنبة وخايفة تقع ..
بعدين ليه في حلقة للجُلل وحلقة للبلي
اللهم اني صايمة
بجي صادة بعدين ..
وسلام يا سفيان ورمضان كريم عليك وعلى كل المتداخلين وربنا يعيدو وسودانا أحلى ..
ما لاحظته في برنامج هذا العام 1433هـ:- 1- جوطة الموسيقى ... حيث تمّ زيادتها بكمنجتين وساكس وأكورديون مع الاستغناء عن آلة العود الهادئة ... عشان كدة يا عزيزي لو لاحظت شكل الموسيقى حاجة كدة جايطة زي موقف المواصلات عزّ الزحمة ...
2- حلقات الشباب تجمع بين ثلاث فئات بعد استثناء فرفور وعاصم وعصام الفئة الأولى: فئة الموهوبين وهم:- (فهيمة - شموس - حسين الصادق - منار صديق) يعني ديل غنايين موهبة ساكت كدة .. يعني لو قحّوا ساي غنايين ... الفئة الثانية: فئة موهبتها وسط وهم:- (طه سليمان - ريماز ميرغني) الفئة الثالثة: فئة أقل موهبة من الفئة الثانية وهم:- (شريف الفحيل - صباح عبدالله - أفراح عصام) ...
دمتم بخير ،،،
07-29-2012, 10:46 AM
وليد عبد اللطيف
وليد عبد اللطيف
تاريخ التسجيل: 08-09-2009
مجموع المشاركات: 6733
هههههههههههههههههههههههههههههههههههه داليا بالطريقة دي ح تفطّري ليك زول عارفه بس في الناس الجلل ديل على قولك في اصوات اي طبقات اصوات مكرره في اكثر من شخص اين التنوع ياقدور ام هي مجرد مجامله
Quote: وليد لقيت فهيمه كيف لمن غنت مرت الايام(عبدالدافع عثمان)...طبعا سفيان بيكون الوقت داك قفل باب الغرفه عشان مايجي زول داخل عليه من شدة الطرب هههههههههههه.
ياخي البت دي صوتها مبالغه والله عندها بحه عجيبه كثيرا ما يشككوني الناس في امكانياتها وتاني ارجع عشانهم واسمعها كويس برضو تطربني وفعلا كما قال السر قدور انها مصيبه وانا اقول انها ظاهره في ناس بتقول صوتها ضعيف والمستمع لايريد شي غير ان يطرب للصوت وياثره ويسبح به في فضاءات الجمال
احكي ليك بمناسبة الاصوات الضعيفة مابين الفنان الكاشف والفنان احمد المصطفى رحمة الله عليهم اها حفلة قال ليك يازول في مسرح بورتسودان ومعلقين المكرفونات اها طبعا عمك الكاشف بتاع مقالب قال لبتاع المكرفونات عطل المكرفون واعتذر للناس اها قام ورط ليك الفنان احمد المصطفى وقتها ولم يتسطيع ان يصعد معه المسرح والكاشف لحس العداد كامل . . الانيق شيكو والاخت داليا تصومو وتفطرو على خير
07-29-2012, 03:02 PM
فاروق أبوحوه
فاروق أبوحوه
تاريخ التسجيل: 07-26-2008
مجموع المشاركات: 2242
أها السنه دي داخلين معاكم بي حسين الصادق أنا ما تابعت لكن قالوا (مجضِّم الكَـفَـر)
الحمد لله صباح صاحبة الصوت المفندر ما صادفتها تغني تب ههههه طبعاً جات هنا عملوا حفله هي و حسين الصادق.. و الله كل ما تغني يا سفيان أتذكرك و أقول والله صدقت يا سفيان هههه
المهم لمتكم دي بالدنيا براها ربنا يجمعكم في الخير
كل الود
07-29-2012, 03:13 PM
الليندي
الليندي
تاريخ التسجيل: 05-27-2002
مجموع المشاركات: 1188
بتبالغ ياخي صورة الطاهر دي نكشتها من وين والله ياعمدة حسب معلوماتي أن الطاهر محمد عثمان من ابناء مدينة الحديد والنار وهو أكثر شاعر غنى ليهو ابوداؤود لكن كم عد الأغنيات التى تغنى بها ابوداوؤد للطاهر ماعارف وكذلك تغنى له العطبراوي يعني ياريت ياشاب لونبذة كافية عن الشاعر ( الطاهر محمد عثمان )
،،،،،
07-29-2012, 05:16 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
يا سلاااام البوست جاب ناصر عز الدين صاحبي وفردتي ليك و حشة الدار دارك و حلل على كيف كيفك .
تحيات كبييير للمعلم معاوية و يا معاوية شفته عمار بعذبه كيف ؟ بالمناسبة انا حفظته لحسين الصادق حقو في الحفظ .
و حباب ياسر كرار و طالبني تلفون طوويل
غايتو في عرس حمودي بنجيب صباح أو افراح!
يا سيف مصطفي حبابك مافهمته قصدك ممكن تشرح!؟ رمضانك كريم .
عماد احمد بالله اردم التواثيق
ياوليد قلته ل الخيال السمعي الله صعبتها هههههههههه و منتظرين الهدية .
الشيخ سيد أحمد رمضان كريم ياخ
داليا حافظ سلام و سنتك طيبة شفتي البهدلة كيف !! تلاته مجموعات اشكال و اللوانات عجيبة حسين شندي مبالغه في اللبس غايتو اسكتي سااااي قلتي لي الاستديو دفااار ههههههه لااااااحااااظه
صبري العرررريس و الله مقصر معاك يا صاحبي الف مبروك
ملاحظتك في (1) سليمة بس (2) بنختلف اختلاف شديد بيجيب دكشمان ذاتو هاهاهاها فاروق ابو حوه يا قريبك رمضان كريم و شوق الشوق
بس لو مشاركتك بحسين الصادق حتتعب معانا شد حيلك لووووول حسين تعبااااان تعب الموت ياخ
07-29-2012, 06:51 PM
الليندي
الليندي
تاريخ التسجيل: 05-27-2002
مجموع المشاركات: 1188
حلقة اليوم مع الجلل زي ما قالت ( داليا حافظ ) كانت جيدة ابدع فيها عوض الكريم عبدالله في رائعة بطران ( عقلي انشغل بهواك ) ويبدو لي لم يحس أحد بعدم وجود فرفور عموماً نحاول أن نسرد ما فات علي السرقدور عوض الكريم عبدالله أظهر أغنية حتى ظن الناس أنها ملكه وهي أغنية ( مستحيل عن حبك اميل ) وغنوها لاحقاً ( البلابل ) وهي أول أغنية كتبها الشاعر ( محمد علي عبدالله الامي ) في عام 1928 والحان ( الحاج محمد احمد سرور ) وكذلك اظهر أغنية ( عبيد عبدالرحمن ) التى كتبها في حفل ( عثمان عيسى ) ( للقوز مانسينا وللقوز كيف نجهل ) وكذلك أغنية ( عمر البنا ) ( في الليل الهاجع غرد يا ساجع ) من الحان كرومة وكذلك أغنية الشاعر ( يوسف الرباطابي ) ( قلبي مالو اليوم من جسمي فر وراح )
07-29-2012, 07:07 PM
الليندي
الليندي
تاريخ التسجيل: 05-27-2002
مجموع المشاركات: 1188
كنت أتمنى أن يعر ج السر قدور ولو بنبذة بسيطة عن الشاعر الراحل ( خضر حسن سعد ) ما دام أصر أن يقنعنا بأن لعوض الكريم عبدالله الفضل في اظهار أغنية ( ما شقيتك ) رغم أن الفرق بين ظهور ( حسن سليمان الهاوي وعوض الكريم عبدالله ) لم يكن أكثر من 15 عام وأغنية ماشقيتك من الأغنيات المضيئة التى تجرح القلب لحناً ونصاً وهي من الأغنيات التي ترجمها المستشرق البريطاني ( وليم فاركستون ) في كتابه ( الشعر العامي العربي ومراعاة الواقع العربي ) فقد استمع المستشرق البريطاني ( وليم فاركستون ) لأغنية ( ما شقيتك ) أثناء زيارته للسودان وحضوره لختام فعاليات مؤتمر أكاديمي بجامعة الخرطوم وكان من ضمن ختام الفعاليات الخاصة بالمؤتمر غناء سوداني بصوت الفنانين عبد العزيز محمدداود وحسن سليمان الهاوي الذي تغنى بما شقيتك وأعجب بها( وليم فاركستون ) وقال أنها من الأغنيات ذات الأجراس الموسيقية العالية الثأثير لحناً وكلماتاً وطلب من صديقه الدكتور ( حسن عباس صبحي ) أن يقوم بترجمتها لكي ينشرها في كتابه المذكور اعلاه وقد كان لم يذكر السر قدور أن اغنية ( ما شقيتك ) من ألحان الفنان ( حسن عطية ) فحسن عطية واحسن سليمان والشاعر ( خضر حسن سعد ) ابناء حي المراسلات واصدقاء طفولة علي العموم لحن ( حسن سليمان ) أغنية ( محبوبي لاقاني ) وفي نفس الوقت كان حسن عطية قد أخذ من الشاعر ( خضر حسن سعد ) أغنيته الخالدة ( ما شقيتك ) ولحنها وعندما استمع ( حسن سليمان لأغنية ( ماشقيتك ) أعجبته لأن خضر حسن سعد كتب مأساته في هذه القصيدة فألح أن يأخذ الأغنية بلحنها وقد كان ورداً لجميل صديقه الفنان ( حسن عطية ) وبعد أن استأذن من شاعرنا ( حميدة أبوعشر ) أعطى ( حسن عطية ) أغنية ( محبوبي لاقاني )
07-29-2012, 07:40 PM
عزيز
عزيز
تاريخ التسجيل: 04-12-2002
مجموع المشاركات: 3290
اولاً. اود ان احي الاخ وليد عبداللطيف وأشكره على جميل تعقيبه على مداخلتي الاولى ويا وليد يا حبيب احياناً أعض على أصابع الندم على ضياع عمر في دراسة الموسيقى والتخصص (صوت-بيانو) عندما استمع لأصوات لا ترقى للغناء ولا يعرف أصحابها ابسط قواعد استخراج الصوت والنفس وأداء الحليات (التطريب).
ثانياً. التحية لليندي لقد كفاني ما دخلت لكتابته فتحليلة موفق ويدلل على حس وذوق ومعرفة رفيعة في مجال الغناء.
اصبح برنامج أغاني وأغاني أشبه بجلسات خاصة او كما نسميه بالقعدات. ليس فيها ما هو متفرد وما يجعلك تردد الاغنية بعد انتهاء الحلقة كما فعلت أسرار في أغاني عثمان حسين او كما ترك الأثر عصام في أغاني وردي وآخرها طه في اغنية التاج مكي.
الاغاني تؤدى بإحساس مفقود وروح ميته وأصوات باهته. ولو فقد البرنامج بوصلته فالأفضل ان يكون هذا هو عامه الاخير.
لأول مرة منذ أن بدأ برنامج أغاني وأغاني ، أزهد في متابعته ومشاهدته.. شاهدت بعض ما أنزله ولدنا ودالعباسية، فعافت النفس كما يقول القطريون.. برنامج غير جدير بالمشاهدة..
إنتهى البرنامج خلاص ببح، نقطة سطر جديد.. على السر قدور والشفيع عبدالعزيز يشوفوا ليهم موضوع تاني..
07-29-2012, 08:08 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
شكراً الاستاذ ( عبدالعزيز خطاب ) وفي انتظار التحليل الاكاديمي للأصوات لأن نحس فقط بأن هناك اصوات رديئة تشارك برؤية مجاملتية فقط وشكراً لشهادتك فهي قلادة وأتمنى أن اكون كما ذكرت
،،،،
07-29-2012, 08:30 PM
الليندي
الليندي
تاريخ التسجيل: 05-27-2002
مجموع المشاركات: 1188
ساحاول أن القي الضو علي شاعر أغنية ما شقيتك الشاعر خضر حسن سعد عاش تجربة عاطفية مريرة في زمان لايعترف بالحب وقد عاني خضر كثيراً جراء حبه لفتاة رفض اهلها تزويجه لها فاصيب بداء وعندما اشتد به المرض نقل الي مستشفى الخرطوم وكان خضر ذو علاقة وثيقة بمدير المستشفى دكتور عبدالحليم محمد وعندما أتى حسن سليمان وحسن عطيه لزيارته رفض الدكتور عبدالحليم محمد السماح لهم بزيارته وقال لهم الم تسمعوا بأغنية ( ما شقيتك ) أن صديقي خضر حسن قد نعى نفسه بهذه الأغنية ، كتب خضر لحسن عطية ( يحيا الحب) و ( طال الليل بالمسافر ) كما تنسب أغنية عثمان حسين ( طيبة الاخلاق ) لخضر وقد سجلت باسمه في الاذاعة لكن في الحقيقة أن أغنية ( طيبة الاخلاق ) كتبتها فتاة ( حجة الشيخ ) من منطقة الخرطوم 3مؤاساه لصديقتها المريضه واتت بها لخضر حسن سعد فهذب كلماتها .
،،،
07-29-2012, 08:57 PM
الليندي
الليندي
تاريخ التسجيل: 05-27-2002
مجموع المشاركات: 1188
أغنية ما شقيتك تغنى بها الكثير من الفنانين فحسن عطية كان يتغنى بها في الجلسات الخاصة وكذلك الفنان الشعبي ( عوض الكريم عبدالله ) ومن ثم لاحقاً تغنى بها الفنان ( حمد الريح ) والاستاذ ( مصطفى سيد أحمد ) ولكن حمد الريح تفرد بأن وضع لأغنية ( ما شقيتك ) مقدمة من قصيدة للشاعر الفلسطيني الراحل ( يوسف الخطيب ) جأت على نساق الأغنية حتى تخالها أن جزء من الأغنية نفسها .
اتراك مثلي يا رفيقي تمر في الزمن عبر المهالك والليالي السود والمحن اتراك مثلي تقتدي خمارة الشجن وتزرو بقية عمرك الصادي بلا ثمن لكأن في عينيك بعض اللمح من وطني واكاد المح في وجومك لون ماساتي جرحي وملحمتي وتشريدي واهاتي انا هاهنا يا صاحبي اقضى عشياتي ارثي بجانب حورة الشلالي امواتي وجعلت صدري كهف اشباح وامواتي كمخالب عصبية تستشرف الآهاتِ
هناك مقطع في أغنية ( ما شقيتك ) لم يتغنى به ( حسن سليمان الهاوى ) وقد ذكر ( حسن سليمان الهاوي ) في لقاء خاص أنه بعد وفاة خضر لم يستطع أن يتغنى بهذا المقطع ولاادري الم يلاحظ احد أن هذا المقطع يوضح مدى ثقافة شعراؤنا في تلك الحقبه واطلاعهم فخليل فرح افندي تغنى برائعة عمرو بن ربيعة ( اعبدة ما ينسى مودتك القلب ) بينما نلاحظ التشابه الكبير في المقطع الذى لم يغنيه ( حسن سليمان الهاوي ) في أغنية ( ما شقيتك ) لشاعرنا خضر حسن سعد بمقطع من معلقة ( قيس بن الملوح ) حتى في الخيال .
بينما قال شاعرنا خضر حسن سعد في (ماشقيتك) ماالخضاب الحنن يداك وما الابار الدقن شفاك هل خطيباً طالب يداك ولا زينك قلبوهو شين وقيس بن الملوح كتب رداً وتبريراً للخضاب بلسان ليلى
فقــالت معــاذ الله ، ذلـك مـا جــرى ولكننــى لمــا رأيتـــــك راحــــــــــلاً بكيـت دمــاً حتـــــى بللت به الثـــرى مسحـــت بأطــراف البنــان مدامعى فصــار خضــــاباً بالاكف كمـــا ترى وايضاً خضر حسن سعد كتب رداً وتبريراً بلسان فتاته للخضاب والابار
الخضاب الحنن يداي والابار الدقن شفاي ما خطيبا طالب يداي كفي تمسح صبحي ومساي ذاك اثر البكا يامناي بئس حالي بين الانام
بقى أن اشير أن مقطع ( قيس بن الملوح ) قد تغنى به الفنان ( الطيب عبدالله ) كمقدمة لأغنية ( السنين ) التي صاغ كلماتها بنفسه
،،،،،
07-29-2012, 11:21 PM
الليندي
الليندي
تاريخ التسجيل: 05-27-2002
مجموع المشاركات: 1188
أغنيةالختام ( في رونق الصبح البديع ) التي صاغ كلماتها الشاعر ( محمد بشير عتيق ) هذه الأغنية وضع لحنها ( كرومة ) بليل في نادي الهلال بالشهداء امدرمان في نفس يوم رحيل الشاعر ( مصطفى بطران )وكان كرومة قد نعى بطران صباحاً بلحن اشبه بالمناحة بالقصيدة التي صاغها ( بطران ) نفسه
يا شادي قول للبى زيل وأنعش حياة جسمي الهزيل واذكر بعاد لبنى وسعاد واهديلهم الشوق الجزيل
الليندى يا رجل يا جميل أتمنى أن تبحث عن تسجيل اغنية ما شقيتك بصوت الفنان خضر بشير فقد أحببت هذة الاغنيه وحفظتها وانا صغيرا بهذا الصوت النشيج واتمنى من اى من الاخوات والاخوان تنزيل هذه الاغنيه اذا توفرت لديه بصوت الراحل خضر بشير عليه الرحمه احتراماتى
07-30-2012, 02:31 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
Quote: الفنانة افراح عاصم انا بحس انها بتغنى بصوت الرأس فقط بدون استعمال البطن والحجاب الحاجز هذا بيضر صوتها وحنجرتها و بيؤثر على جمهورها
و لا أنا غلطان
غلطااااااااااااااااااان و الله !!! كيف يعني تطلق على افراح دي فنانة!!!! غلطااااان شديد ياا شاب !!!
بخصوص سؤالك لخطاب غايتو عايز اقول ليك الزولة دي بتغني بالحلِق ساااي و لحظة الهواء جوة حلِقه يخلص اهو بنشوف جنس الفرفير البتسوي فيهو دا ... العيون يتنططو ... الحواجبن يتطايرو ... والوش تكرفس ... و تحس بيها عايزه تفارق الروح هسسسي دي ... ودا كلو لانها لا اتدربت على الصوت ولا تكنيكه و كيف أن النفس الطووويل و اختزان الهواء في الحجاب الحاجز و خروجه بحساب دقيق يتحك فيها خيال الفنان للحن و يتخذ الصدر عبور للهواء ليعطي كل حرف حقها ودي درجة عجيبة بين الحجاب الحاجز و الصدر و الفيصل فيها لرأس الفنان الذي يعر ف كيف يستخد عقله لتوظيف هذا الهواء توظيف صاااح .
و ياخطاب يا فنان راجي افادتك وراجي كل حديثك عن الصوت .
07-30-2012, 05:49 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
اغنية أنة المجروح لسيد عبد العزيز وفردتنا عاصم وفي بداية الأغنية في حاجة كدا حصلت من المجموعة عاصم عالجه سريع باستمراره ف الأغنية فضل ايوب صوته الباص ظاهر في الأغنية بطريقة جميلة.
قدور يتكلم عن اهتمام سرور بالايقاع نموذج غزال البر ا راحل و نموذج اخر جاروا اهلك (دي اغنية عجيبة لو سمعتوها من خدر) .
اغنية جارو اهلك آداء فضل أيوب آداء جيد جداً من فضل بتطريب جميل
والله البعرفو الوفى ما ندر
07-30-2012, 06:14 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
يا سلام يا حسين شندي يا سفيان ياخ تعود لمسالمتك سالم دي حاجه تانيه كلو كلو يا سلام حليل زمن الصبا عاصم .. هذه هي الحياة تأخذ بقدر ما تعطي وتعطي بقدر ما تأخذ
07-30-2012, 07:12 PM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
Quote: غلطااااااااااااااااااان و الله !!! كيف يعني تطلق على افراح دي فنانة!!!! غلطااااان شديد ياا شاب !!!
بخصوص سؤالك لخطاب غايتو عايز اقول ليك الزولة دي بتغني بالحلِق ساااي و لحظة الهواء جوة حلِقه يخلص اهو بنشوف جنس الفرفير البتسوي فيهو دا ... العيون يتنططو ... الحواجبن يتطايرو ... والوش تكرفس ... و تحس بيها عايزه تفارق الروح هسسسي دي ... ودا كلو لانها لا اتدربت على الصوت ولا تكنيكه و كيف أن النفس الطووويل و اختزان الهواء في الحجاب الحاجز و خروجه بحساب دقيق يتحك فيها خيال الفنان للحن و يتخذ الصدر عبور للهواء ليعطي كل حرف حقها ودي درجة عجيبة بين الحجاب الحاجز و الصدر و الفيصل فيها لرأس الفنان الذي يعر ف كيف يستخد عقله لتوظيف هذا الهواء توظيف صاااح .
و ياخطاب يا فنان راجي افادتك وراجي كل حديثك عن الصوت .
العزيز سفيان
خلينى اذكر ليك القصة دى
فى سهرة قديمة بتلفزيون السودان ضمت حنان النيل وآمال النور وقتها كانت حنان بلوبلو ماسكة الجو قال المذيع فى سؤال موجه لآمال النور رأيك شنو فى اغانى حنان بلوبلو وهل حنان فنانة فاجابتو آمال النور مستنكرة انتو تعريف الفنان عندكم شنو طبعا حنان بلوبلو فنانة طالما عندها جمهور معجب بيها
لذا انا اخذت بهذه القاعدة وهذا الكلام ينطبق على افراح عصام لانو عندها جمهور وعندها اغنيات خاصة بيها مثل اغنية مجنونة الخ
تسلم ياحبيب وفى انتظار عزيز خطاب
07-30-2012, 10:24 PM
الليندي
الليندي
تاريخ التسجيل: 05-27-2002
مجموع المشاركات: 1188
Quote: الليندى يا رجل يا جميل أتمنى أن تبحث عن تسجيل اغنية ما شقيتك بصوت الفنان خضر بشير فقد أحببت هذة الاغنيه وحفظتها وانا صغيرا بهذا الصوت النشيج واتمنى من اى من الاخوات والاخوان تنزيل هذه الاغنيه اذا توفرت لديه بصوت الراحل خضر بشير عليه الرحمه احتراماتى
العزيز ياسر
حسب علمي أن الاستاذ ( خضر بشير ) لم يتغنى بأغنية الراحل ( خضر حسن سعد ) ( ماشقيتك ) ولكن قد يكون تغنى بها ولم استمع لها فقط أود أن اشير أن هناك خلط بين أغنية ( ماشقيتك ) وأغنية ( خدعوك وجرحو سمعتك ) وفي كثير من المنتديات وأيضاً في بوست هنا بسودانيز اون لاين كتب أن أغنية ( خدعوك ) من كلمات الشاعر ( خضر حسن سعد ) وأنها كتبت في ( ممرضة ) غرر بها بها أحد الدكاترة ووعدها بالزواج ولكن لم يفي وقد يكون للمأساة الموجوده في الأغنيتين ولكن المثبت هو أن أغنية ( خدعوك ) هي من كلمات الشاعر ( حسين محمد حسن ) من منطقة ( بري ) وقد كتب الكثير من الأغنيات للراحل ( خضر بشير )
،،،،
07-30-2012, 11:13 PM
الليندي
الليندي
تاريخ التسجيل: 05-27-2002
مجموع المشاركات: 1188
حلقة اليوم كانت مملة ورتيبة ومجحفة في حق عميد الغناء الحاج ( محمد احمد سرور ) فلا نبذة ذاتية عن ( سرور ) ولا الكيفية التى بدأ بها ( سرور الغناء ) السر قدور قام بنمرة أربعة طوالي بأغنية ( سايق الفيات ) ولم يتتبع سرور تاريخياً 1 - من المعروف أن ( سرور ) هو والعبادي الأباء الشرعيين ( للأغنية السودانية الحديثة ) وهما من أخرجا الفن من الطمبور وكان ذلك في حفل زواج التاجر ( بشير الشيخ )في عام 1920 الذى شهد أول أضراب في تاريخ الغناء السوداني ذلك الأضراب الذى قادة الطمباري ( عبدالغفار الماحي ) فعندما هم الحاج محمد احمد سرور بالغناء كانو الطنابرة قد حزموا امرهم ورفضوا الغناء بحجة أن سرور بقوة صوته يطغي علي اصواتهم ودائماً ما يضعهم علي الرف وهنا طلب المستمعون أن يغني سرور دون طمبور فغني سرور وسانده الامين برهان ورقصن الفتيات على الانغام الجديدة وكان ذلك اعلاناً بانتها فترة الطمبور وبدء فترة الاغنية الحديثة فكانت ميلاد أول أغنية سودانية من كلمات ( ابراهيم العبادي )
ببكي وبنوح وبصيح للشوفتن بتريح
2 - يعتبر سرور أول من استخدم آلة الرق في الغناء السوداني حيث اتى به سرور من مصر فى الثلاثينات 3 - يعتبر سرور أول من كون فرقة موسيقية وكانت فرقته تتكون من ( عطا محمد (رق) ، عبد الرءوف عطية (مثلث) ، وعلي (الأكورديون) عبدالوهاب جعفر الشهير بوهبة وهووالد لاعب المريخ ( بشرى وهبه ) ولاحقاً أنضم لهم عازف (الكمان ) (السر عبدالله )
4 - يعتبر سرور هو أول مطرب سودانى يخوض تجربة الانتاج الخاص فى عام 1932 بالقاهرة حيث سجل اسطوانة تحتوي (برضى ليك المولى الموالى، سيدة و جمالها فريد ، متى مزارى اوفى نذارى، ايجلى النظر يا صاح ، شموس عفة) 5 - يعتبر سرور هو اول مطرب سودانى تنشر اسطواناته خارج حدود لذا نلاحظ أن الكثير من الأخوة الأرتريين يسمون أبنؤهم ( سرور ) 7 - يعتبر سرور أول من تغنى في الإذاعة السودانية عام 1940 وذلك عندما أرادت الدارة البريطانية اجتذاب السودانيين للوقوف معها في الحرب العالمية الثانية فغنى أول أغنية له وهي أغنية ( المتطوعات ) من كلمات الشاعر ( عبيد عبدالرحمن )
،،،،،
07-30-2012, 11:43 PM
الليندي
الليندي
تاريخ التسجيل: 05-27-2002
مجموع المشاركات: 1188
الأغنية التى ابتدر بها البرنامج كانت أغنية ( سايق الفيات ) وهي من كلمات ( ابراهيم العبادي ) وألحان (سرور ) هذا الأغنية التي كتبت في أواخر الثلايثينات كان من الممكن أن نتقبل الابتدار بها لو حدثنا السر قدور عن قصتها التى اوردها الشاعر الراحل ( مبارك المغربي ) في سفره القيم (رواد شعراء الأغنية السودانية ) إن سرور كان سائقا ومعه أمين نابرى وزين العابدين كوكو وقد تحركوا من سنار إلى سنجة في عربة فيات خاصة عن طريق الرماش كمااورد ( معاوية حسن يسن في ( كتابه الغناء والموسيقى في السودان ) أن سرور خرج مع الخواجة مستر برسى لورين المندوب السامي في مصر ا لرحلة صيد في سيارة من سيارات شركة الفيات العاملة في السودان في ذلك الوقت إلى سنجةوتخلف منهم سرور وانضم إلى العبادى والأمين برهان في ضيافة زين العابدين كوكو نائب المأمور و انضم لهم محمد البنا وأمين نابرى وكان سايق الفيات سرور وأن العبادى كان يعمل في حسابات المقاولات المرتبطة بأشغال خزان مكوار (سنار) وحلّ عليه الأمين برهان ضيفا فتحركوا جميعا إلى سنجة مع سرورالمهم ان القصيدة قيلت بين سنار وسنجة
،،،،
07-31-2012, 01:28 AM
عبير خيرى
عبير خيرى
تاريخ التسجيل: 02-12-2004
مجموع المشاركات: 2440
الأغنية الثانية كانت بمثابة الفضيحة فأنة المجروح من أكثر الأغنيات التى رددها الفنانين في مختلف الحقب التاريخية للغناء السوداني ويكاد أن تكون محفوظة لأغلب المتابعين لحراك الغناء لكن للأسف لاعاصم البنا حافظ للأغنية ولا السر قدور عارف المطرة صابا وين وواضح ذلك بقوله أن اصل مقطع ( مصرية في السودان ) هو ( حورية في السودان ) فأغنية ( أنة المجروح ) صاغ كلماتها في عام 1933 الشاعر الراحل ( سيد عبدالعزيز ) ولحنها وغناها عميد الغناء السوداني الحاج ( محمد احمد سرور ) وهذه القصيدة كتبت في فتاة سورية اسمها ( عدله هلال ) ابنة أحد التجار السوريين والقصيدة بها مقطع تغير ثلاثة مرات فالمقطع في اصل القصيدة
سورية في السودان بي حبي ليك ابوح ياعنب جناين الشام اتمني منو صبوح
لكن في 1935 اقيم حفل بالفندق الكبير علي شرف زيارة البعثة التجارية الاقتصادية المصرية للسودان فغير الفنان ( سرور ) المقطع احتفاء بالمصريين و في نفس العام سجلها سرور في اسطوانة من انتاج شركة ميتشان وثبت المقطع
مصرية في السودان بي حبي ليك ابوح ياعنب جناين النيل اتمني منو صبوح
وقد تغني عدة فنانين بأنة المجروح منهم ( محمد ميرغني – عبدالعزيز المبارك واخرين ) وتم تغير المقطع الي
حورية في السودان بي حبي ليك ابوح ياعنب جناين النيل اتمني منو صبوح
بالله كدي اسمعوا نموذج من أغنية ( أنة المجروح ) بصوت الأستاذ ( أبوعركي البخيت ) في بداياته الفنية وشوفوا صوتوا ده كان زي الكمان كيف
يـا أنة الـمجروح يـا الروح حياتك روح الحب فيك يا جميل معني الجمال مشروح للحب ده نار في الجوف زي الزناد مقدوح منه الجبابره تلين لصوت بلابل الدوح وتـصاحب الـنسمات تـفضل مـعاها تروح بين نغمة الاشواق ومحاسن الممدوح الـناس تـحب رؤياك بالخاطر المشروح ياملفت الأنظار يا بسمة المفروح وأنا أهدي ليك الحب حب من فؤاد مجروح حب الشحيح للمال حب ال######## للروح سورية في السودان بحبي ليك ابوح ياعنب جناين الشام اتمني منو صبوح أنـا لـو ضـمنت رضـاك أكون سعيد ممنوح يا من تسر رؤياك تفرح تنسى النوح تكسي النهار بجمال خديك جمال ووضوح منه العزاله تقيف في موقف المفضوح من الوله للقاك دمعى العزيز مسفوح ناقم على الأيام مع أنه طبعى صفوح انا والخيال فى جدال وانت بنداك منفوح كل ما النسيم يغشاك زى الحديقة تفوح رايق كحيل نعسان انسان رقيق وجموح ساحر العيون بجمال في سواك ما ممنوح ان كان تميس بنميس ان كان تموح بتموح عدل الطبية جعل جور الحبيب مسموح
،،،،،
07-31-2012, 02:44 AM
الليندي
الليندي
تاريخ التسجيل: 05-27-2002
مجموع المشاركات: 1188
الأغنية الثالثة ( جا روا أهلك ) غناها ( فضل أيوب ) بتطريب عالي ومن وجهة نظري هي الاشراقة الوحيدة غي هذه الحلقة بالأضافة لأغنية ( زمن الصبا ) التى أداها ( حسين شندي ) بطريقة جميلة وكالعادة السر قدور كبر اللفة وما ذكر أسم شاعر الأغنية وحقيقة شعر ( سيد عبدالعزيز ) وشعر ( عبيد عبدالرحمن ) صعب فرزوا لكن قدور ده لو ما متذكر ما بذاكر ( فأغنية جاروا أهلك ) تعتبر من بدايات ( سيد عبدالعزيز ) وكتبها في فتاة تسكن بالقرب منهوعندما كبرت الفتاة قليلاً حبسها في المنزل ثم رحلوا بعد ذلك من الحي
جارو اهلك وجورم أمـر بالبعـاد والأمـر الأمـر في ديارم حجبـو القمـر البديع السحـر الفكـر بالجمال والحياء إنسكـر حسو يرمي الزول في وكر شوفتو تسكر من غير سكر للقلوب ياصاحي إحتكـر شيء يخلف خالـد الذكـر مفخر الأجيـال والدهـر حسنو معجز على ماظهر في خدودو الحياء إزدهـر والطبيعه تناجـي الزهـر تدي منظر جـذاب بهـر زي نجوم السماء في النهر نـورو للبدريـن إحتقـر البهيـج النضـر الاغـر يـزدري البـراق بالثغـر المحشـم مـن الصـغـر منّو كل الناس فـي بغـر فيه شارد الحسن إستقـر من عيونو أين المفـر جيدو جيد الظبي النفـر محيو فيـه البـدر السفـر كم بأفئده واعيـات ظفـر هو اللحاز الحسن الوفر زول يوازن مليون نفـر لو يحجبو الأمـر الصـدر مابحجبوا دمعي اللي انحـدر وكل شي إن صفا أو كـدر في أيادي القضـا والقـدر أما دهري إن صد أو غدر البعرفـوا الوفـاء مانـدر حبي هاك القـول الأبـر العيان يغنيك عن خبـر كم نظرت في دهري العبر نظرة الـي الحيـاة إختبـر الجزع في الناس والصبـر شفنا طوع القضاء إنجبـر
،،،،
07-31-2012, 02:55 AM
الليندي
الليندي
تاريخ التسجيل: 05-27-2002
مجموع المشاركات: 1188
الأغنية الأخيرة ( حليل زمن الصبا ) وهي من كلمات ( عبيد عبدالرحمن ) كتبها عندما كان يزين شعره عند أحد الحلاقين وفي أثناء الحلاقة شاهد الحلاق شيبة علي رأس ( عبيد ) فقال لهكبرت يا عبيد فرد عبيد كيف فقال له الحلاق توجد شيعرة بيضاء فكتب عبيد ( حليل زمن الصبا ) وزي ما قالت العزيزة ( عبير خيري ) عذبتنا يا السر قدور معقولة الأغنية تكون من ألحان الكاشف ، طيب لوفرضنا أنك نسيت اللحنا منو ونجرت معقول تنجر بالكاشف لو لحنا الكاشف كيف يكون غناها سرور؟ غايتو جنس غايتو نتابع بقية الحلقات العن ( سرور ) ونشوف حيجيب الأغنيات المضيئة جداً ولا حيكبر اللفة، طبعاً حسين مجيد في أداء الأغنية دي من زمان ملاحظة : والله يا عبير أنا كنت متخيل أنها من الحان ( سرور )يعني أحسن حبتين من السر قدور
،،،،
07-31-2012, 03:50 AM
عبير خيرى
عبير خيرى
تاريخ التسجيل: 02-12-2004
مجموع المشاركات: 2440
رمضان كريم...يعني تخلينا نجي جارين وراك في بوست ود نابري.
كامل الود
الحبيب الشيخ سيد احمد
رمضان كريم وجعلك الله من عتقائه إن شاء الله
متابعين إبداعاتك بهناك وانت لمن بتكون نازل في الحلبة نحن بنكون ناس قراية ساي.
تقديري واحترامي.
Quote: Emad Ahmed
بتبالغ ياخي صورة الطاهر دي نكشتها من وين والله ياعمدة حسب معلوماتي أن الطاهر محمد عثمان من ابناء مدينة الحديد والنار وهو أكثر شاعر غنى ليهو ابوداؤود لكن كم عد الأغنيات التى تغنى بها ابوداوؤد للطاهر ماعارف وكذلك تغنى له العطبراوي يعني ياريت ياشاب لونبذة كافية عن الشاعر ( الطاهر محمد عثمان )
الشاعر الطاهر محمد عثمان من أبناء مدينة عطبرة وتغنى له حسن خليفةالعطبرواي بأغنية القلوب مرتاحة.
كما تعاون مع عبد العزيز محمد داود في الأغنيات التالية :
طولت مارديت, صباح النور, نسيت وماودعت, حكم ضميرك. توسل, أنا من شجوني ياناس دلوني
07-31-2012, 06:56 AM
Emad Ahmed
Emad Ahmed
تاريخ التسجيل: 08-12-2009
مجموع المشاركات: 12705
سلام للجميع وشكرا كتير على افاداتكم الاهم من البرنامج ذاتو ..
ما عارفة ..لكن في حاجة مفقودة الموسم ده ..في فتور ..الإحساس ما عالي ؟ولا ما شتغلوا على نفسهم ما طوروا ادواتهم ..، ولا مافي روح منافسة ..ولا أعتبروا نفسهم خلاص وصلوا ..ده بالنسبة للبلي ..
الجلل أكبر مشكلة فيهم سميرة دنيا فرغم اني بحبها جدا لكن بحب أسمعها بس ..لأنها بتنعسني لو شفتها فهي عاملة جو خامل من غير ما تقصد او طبعها كدة ما عارفة لكن سميرة دي لو عندها تفاعل ندى القلعة مثلا كانت قعدت كل الفنانات في بيتهم
يا اخونا مادايرين نزعل زول مننا ..
07-31-2012, 06:10 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
و حلقة جديدة مع الفنان عبد القادر سالم و اغية البداية مكتول هواك و صباح وحسين ودا يضربو بيهو داك صباح دي زي ما قلته ليكم زمااااان صوته (مفندر) اصلو ما صوت مجموعه و عدها اربعة اصوات تانية بظهروا كل صوت في حرف براهو و حسين الصادق استغفر الله بس و حاول شريف يعالج طبزه كتلو الاغنية و مستواهم منتهي .
الليلة الله يستر غايتو حيكتلو الاغاني الجميلة بتاعة عبد القادر
أغنية غاب تومي آداء شموس بداية مبشرة و قوية لشموس و الله يا شموس ما شاء الله آداء ممتاز و مسنكفه الزمن 100% و اضح أنو شموس هي الوحيدة الحافظه صاح المزيكا طبعاً ظاااابطه اهو كدا عرفتو الناس ما حااافظة!!! لانو الاستاذ هو الوحيد البلحق شموس . نهاية الاغنية جاطت و ما عرفو ينهوها صاح .
اهو طلع النغم سباعي و شوية شوية ماشين الاندلس .
فهيمة و الاغنية الشعبية لما قلته أغني يا سلااااام على الاغية دي يا نااااس حاجة عجيبة لحن و توزيع و كلمات صراحة كدا أنا بقيت مابفرز مخارج الكلمات من فهيمة (شي اعرفو وشي يروح و مني) بس و اضح أنها حافظة الأغية دي .
07-31-2012, 06:35 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
أغنية حليوة يابسامة عوض أحمودي و نقرشات العود منار تستهل الأغنية و بعدها ريماز و عبد القادر يبداها منار و ريماز ما منسجمات ابداً شريف الفحيل دا يستغفر الله حقو الفرقة مبسووطة و الله عبد الله الكاظم بالغ في الأغنية
و صفقو لروحهم .
لميون بارا و كمان من محمدية شريف الفحيل يستهل الاغنية و عبد القادر يتداخل و الضرس يستلم ويعيده لشريف و التلاته يتجادعوها والضرس يتلاعب بحلى صوته حاجة تمام محمدية اخر انبساااط أحمودي يديها نقزات شريف تعبااااان و الضرس دا فنان إي زول يقول غير كدا يراجع نفسو شريف دا مش قلته ليكم حقو يستغفر اها طلع ليهو (صفارة) كلهم و قفوا فووق .
شفتو الكشر الجم حسي الصادق !؟ كشر السواد
هاهاهاها شفتو القعاد في الكراسي كيييف
كرررررررررب لوووووووووووووول ياخد ديل بقعو و قعان ذكرني نكتت المرآة الركبت المواصلات اول مرة في حياته هاهاهاهاها.
أنتهت الحلقة بحمد الله
07-31-2012, 07:05 PM
الليندي
الليندي
تاريخ التسجيل: 05-27-2002
مجموع المشاركات: 1188
حلقة الليلة يعني أنا طبعاً بتعاطف مع الاستاذ ( عبدالقادر سالم ) رغم أنو صوتو تعبان لكن مجتهد وكملحن واستاذ موسيقى مافي كلام زي ما قال سفيان صاحبي الأغنية الأولي عوع صباح وحسين الصادق ديل المفروض يشيلوا واحد فيهم يطقوا بالتاني عشان نرتاح يا خي ده منتهى الفتور وصباح دي احسن تمشى تعمل دعاية البامية ما ياها معقولة فرق الزمن ده تجر لينا نمشيهو في رمل الدرووووووووووووووووب لمن تنقطع وفي كردفان تمشى كسلا اها ألغنية ( الليلة غاب تومي ) رغم أنو السر قدور ودانا برشلونة لكن شموس معلمة عديل مافي كلام البت دي المكسب بتاع أغاني وأغاني الأغنية الثالثة ( لما قلت أغني ) غايتو بختلف معاك يا صاحبي انا ( بت قضيم ) دي في نهاية كلو مقطع بتعمل جرات عجيبة ذكرتني بكاء الشفع ( واع ، واع ، واع ) وكمان جابت ليها غميض عيون غايتو بتفق معاك أنو حافظة الأغنية الرابعة ( حليوة يا بسامة ) لوووول غنوها ( منار وريماز ) يعني ما بطالة رغم أنو منار ما حافظ وده خلى الأنسجام تعبان لكن عمك السر قدور قالوا بنشكر بناتنا ( ريماز ومنار وأفراح ) والله افراح الحلقة قاعدة في السهلة شيله ما قادرة تشيلا غايتو يا عمك الخيل تجقلب زي الشراء في القندول الأغنية الخامسة ( ليمون بارا ) زي ما بقول السعوديين ( ذبحتنا ياشريف ) غايتو أنا بقترح أنك تشتغل كمساري بصفارتك العجيبة عايز تتمها لينا موية يعني غايتو بشتنت الليمون ولو لا طه سليمان بدخلاتو الجميلة كان راحت في حق الله البلي دي حقوا يخلوا منهم ( طه وشموس ونعوع ما منار وريماز ) والباقي كلوا يودهو الكوشة
،،،،،،
08-01-2012, 01:05 PM
ودالعباسية
ودالعباسية
تاريخ التسجيل: 10-28-2002
مجموع المشاركات: 2442
وحلقة كانت مميزة من اغانى واداء للاوركستراء ،،محترف ،،واخر انسجام انا سمعته 3 اغانى فقط ،،، ولكن ياخوانا ،، الشباب ديل ما قصرو ما دام غنو الاغانى دي ،، اداء جميل لى فهيمة من حفظ وتطريب ،، واداء مميز ،، ريماز ومنار برضو كانو دويتو حلو ،،
وكذلك ليمون بارا ،،، اداء رائع من الفرقة والشباب ،،
بصراحة حلقة متعوب عليها من ناحية البروفات شكلو ،، وحلقة حلوة
08-01-2012, 05:10 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
الحلقة الليلة عن الخاال محمد أحمد عوض بحضور الفنان مصطفي بخيت (ود أم بلينة) و حضور عثمان ولد الخااال على ايقاع الدنب واول اغنية (و الله القسمة) آداء فضل ايوب و آداء جيد وتطريب جيد لفضل . فرفور انبساااط جد بالرق .
08-01-2012, 06:08 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
ود أ بلينة و يلا عدينا هجيج الجن آدا اقنااااع استل الاستديو كلوو الود بتاع هجيج شديد
حسين شندي فر دتنا حبيبي وين انت فردتنا بخر لحسين في اضانو الرق الله يحلو ا ليلة آداء وسط للاتنين زرياب انبساااط شديد يغني فرفر دا في زول شاااغل بالو؟! العازفه برضو اخر انبساااط طر ب
احسن حلقة الى الان في نظر ى .
دي حلقة فنان الشعبي الاول جد .
اسف الكيبور د كعب
08-01-2012, 06:50 PM
الليندي
الليندي
تاريخ التسجيل: 05-27-2002
مجموع المشاركات: 1188
والله يا سفيان الجلل ديل احسن مليون مرة من البلي غايتو حقو يودوا فرفور بغادي ويجيبوا لينا طه وشموس بجاي حلقة جميلة جداً والخلاها جميلة أنها كانت عن ملك الغناء الشعبي قريبنا ( محمد احمد عوض ) ويا سفيان ما تتصلبط محمد احمد عوض ده من منطقة اسمها ( سالي ) في دنقلا بس اهلوا جوا امدرمان بدري فضل أيوب ده بقى يريحني في حناني ذاتو تطريبوا عالي ورايق ومعلم تمتام برضوا كان ممتاز ودنيا اسمها ( سميرة ) غناية جد والليلة اتفاعلت يا اخوانا سميرة دي خلوها أنشاء الله تنوم ذاتو بس لمن تصحي بتقعد لينا الغناء وده يكفي حسين شندي وود البنا ضبطوا الأغنية رغم أنو شندي ما حافظ والبنا شففوا ( بتاع الكامير بايخ شديد ) لكن ما حسينا بلخبطة في الأغنية ود بخيت ده وقف الاستديو كلوا واصلوا الأغنية بتاعت هجيج فروفور النسخة المكبرة من شريف الفحيل ( ذبحتنا ) انت برضو ، ياخي ود بخيت ما اتهنا بالرق الجابو معاهو ولا حتى هو بغني ، الليلة عاد الصراخ المنتظر والغريبة فروفور بتعابط مع الكاميرا والله ما فضل الا يأشر لينا بيدو و يمد لينا لسانو في طفاية لبنية قاعدة في التربيزة
08-01-2012, 07:08 PM
Ahmed al Qurashi
Ahmed al Qurashi
تاريخ التسجيل: 08-28-2006
مجموع المشاركات: 4263
Quote: أغنيةالختام ( في رونق الصبح البديع ) التي صاغ كلماتها الشاعر ( محمد بشير عتيق ) هذه الأغنية وضع لحنها ( كرومة ) بليل في نادي الهلال بالشهداء امدرمان في نفس يوم رحيل الشاعر ( مصطفى بطران )
الأخ العزيز / ناصر الليندي
رمضان كريم وكل سنة وانت طيب ، طولنا ما سمعنا صوتك
أغنية في رونق الصبح البديع هي من كلمات الشاعر محمد بشير عتيق كما ذكرت
ولكن لحنها الشاعر عبدالرحمن الريح وليس كرومة
كرومة فقط تغنى بهذه الأغنية لكنه لم يلحنها وهي من أغاني سنة 1942
لك كل الود والتقدير
08-01-2012, 09:22 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
ياللندي ياخ محمد احمد عوض زولكم تب بس أنا شخصياً المتوسطة كلها ساعة الفطور كنت بشتغل معاهو جوة الكشك و تلاته سنة بفطر معاهو عدى يوم الجمعة فقط و العُطل الرسمية لوووووول و الله راجل تحفة و فاكهة عجييييب مفروض يضيفوهو لناس الهادي الضلالي و كمال سينا و جحا هاهاهاها هسي بكتب ليك و بتذكر ليهو قصص و طرايف تكتل بالضحك
سميرة (الهي دنيا) الليلة نازل منها رسممي و لعبت صااااح
اها مصطفي ود أم بلينة دا دفعة ابتدائي و لعاااااب في الكورة شديد و لعب في اشبال الهلال زمن عاكف و تنقا الصغير و عمر عبدالله و انور قش و عقيد و واصل لحدي لعب في التاج الأمدرماني بس من الابتدائية كان ممتعنا بالاغاني بتاعة الخال في فسحة الفطور و فسحة الصلاة ال5 دقائق ديييك و كان عندو فرقة من الدفعة بقيادة جمال (الناقش) زمممممن عجيييييب .
فرفور باااااالغ هاهاهاها
الحلقة كانت ممتاااااازه شديد و الله
ياود القرشي عليك الله قدور دا هسي برنامجوا دا توثيقي!!! الزول دا اكل الخال في تاريخ حقو رسمممممي ياخ !!! و شبكنا طلب اغاني ساااااي!!!
08-01-2012, 09:38 PM
Ahmed al Qurashi
Ahmed al Qurashi
تاريخ التسجيل: 08-28-2006
مجموع المشاركات: 4263
أغنية في رونق الصبح البديع هي من كلمات الشاعر محمد بشير عتيق كما ذكرت
ولكن لحنها الشاعر عبدالرحمن الريح وليس كرومة
كرومة فقط تغنى بهذه الأغنية لكنه لم يلحنها وهي من أغاني سنة 1942
لك كل الود والتقدير
الله أكرم يا أستاذ ومتلومين معاك فقط خلي زنقة رمضان والشغل الكتير الفيهو ده ينتهى ونزعجك بالتلفونات
أستاذي - احمد القرشي
مكانك شاغر ولو في توثيق صحيح البرنامج ده مفترض تقدموا أنت ولا الأستاذ ( عوض بابكر ) لكن نعمل شنو مع السودان الحكاية فيهو مجاملات وشيلني وأشيلك بالنسبة لأغنية عتيق ( في رونق الصبح البديع ) فأنا خلطت وبعتذر لكل المتداخلين ويبدو أنو الكبر علي الأبواب فالأغنية اللحنها ( كرومه ) في نفس يوم وفاة الشاعر ( مصطفى بطران ) ليلاً هي أغنية ( عتيق ) ( اذكري أيام صفانا ) وليست أغنية ( في رونق الصبح البديع ) ومعذرة للجميع علي هذا اللبس وشكراً أستاذي أحمد القرشي علي التصويب .
،،،،
08-02-2012, 07:35 AM
داليا حافظ
داليا حافظ
تاريخ التسجيل: 06-06-2008
مجموع المشاركات: 5055
ملك الأغنية الشعبية محمد أحمد عوض من روائعه التي رفد بها مكتبة الأغنية السودانية :
توبة يا أحباب, كفاية نوح, رغم بعدي برسل سلامي, ياعصافير, أبوي ماتقول ليهو لا, مفارق كيف, عندي كلمة, أغالب دمعي, مع السلامة, أخوان الجميع, ليك مدة مابنت, سالم الناس, القسمة مامعروفة, المعلمة, القلم طاوعني, أيام مرت, فاكرك معايا, جوبا مالك علي, عشمتيني في حبك ليه, ياريت ياحبيبي, ملكة الطرحة, أيامي أنا, البوسطجي, ضربت ليك في التلفون, لو فؤادك, يامراكبي, ياراحل بدون إنذار, ليك حق, درب العاشق. بقيت في الدنيا متغرب, عشان ألقاك, الصوت النادر, يالرقت في نظري, حسدوني في حبك, سبب الخصام, مبروك ياشعبي.
أغنيات حقيبة كان يتغنى بها : الرشيم الاخضر, نغيم فاهك.
08-02-2012, 12:48 PM
وليد عبد اللطيف
وليد عبد اللطيف
تاريخ التسجيل: 08-09-2009
مجموع المشاركات: 6733
ههههههههه ياخي صاحبنا دا امس كان مدستر عديل عشان الناس ديل هبشو ليهو حاجاتو التي كان يتمتع ويمتع الناس بها كان فرحان وماسكاهو ام فريحانه حركات جمال دي طبعا كلها نفسيه بالمناسبه لكي يغطي خجله وهذا طبع فيهو طبعا بس نرجع نقول نجاح اول شريط لي فرفور هو كان به اغنيه يامراكبي عدينا وعلى توتي ودين ا وهي كانت من اجمل الاغاني التي عملت على ظهوره . . بس ياجماعه قبل يومين كان في ملاحظة ابدا مافي توافق بين عاصم البنا وياسر تمتام مع الفرقه الموسيقيه يعني كان في خرمجه وااااااااضحه حتى اخونا ياسر في نهاية الاغنيه ظهر عليه التعجب من الفرقة الموسيقيه
. . امس فضل دا كان بغني شنو والله ماعارف لان طبيعة محمد احمد عوض هي التصديح بصوت عالي وفضل بعمل كتمه للغناء مابطلع الحروف وبظهرها صوت جميل ولكن لم يوفق في الاداء . . سميره دنيا دي اسالوني منها انا لمن تصحى بتكون دنيا الجمال كله ولمن تنوم مساخه بالكوم . . عاصم قبل يومين شاهدته وهو بغني اغنية لي ابوداؤود لم يوفق رغم اني سمعته وهو بغني لي ابوداود في منتهى الروعه بالعود يظهر الفرقه الموسيقة وعدم التحضير جيدا هي السبب . . البرنامج عامه بقى زي غنانا زمان في الحجر والسهلة او في حافلة لمن نكون ماشين الى احدى المباريات جوطه مبالغه الغناء لايختلف عن اشرطة القعدات والجلسات الخاصه مافيهو اي تنظيم وترتيب مسبق
Quote: ملك الأغنية الشعبية محمد أحمد عوض من روائعه التي رفد بها مكتبة الأغنية السودانية :
توبة يا أحباب, كفاية نوح, رغم بعدي برسل سلامي, ياعصافير, أبوي ماتقول ليهو لا, مفارق كيف, عندي كلمة, أغالب دمعي, مع السلامة, أخوان الجميع, ليك مدة مابنت, سالم الناس, القسمة مامعروفة, المعلمة, القلم طاوعني, أيام مرت, فاكرك معايا, جوبا مالك علي, عشمتيني في حبك ليه, ياريت ياحبيبي, ملكة الطرحة, أيامي أنا, البوسطجي, ضربت ليك في التلفون, لو فؤادك, يامراكبي, ياراحل بدون إنذار, ليك حق, درب العاشق. بقيت في الدنيا متغرب, عشان ألقاك, الصوت النادر, يالرقت في نظري, حسدوني في حبك, سبب الخصام, مبروك ياشعبي.
أغنيات حقيبة كان يتغنى بها : الرشيم الاخضر, نغيم فاهك.
وانت ملك التوثيق حبيبنا عماد نشكرك لهذه المعلومات الجميله كما نشكر الدكتور ومرجعنا ود القريش واللندي لاثراء هذا البوست ببعض النفحات والتوضيح . . . عماد احمد ياخي انا اكتر اغنيه بحبها ( سالم الناس إلا لي ما مدّ إيدو ماهو عارف ماهو حاسي كيفن بريدو ) وفي يوم طلبت منه هذه الاغنيه في جلسه في بيت ناس الفنان الشاعر الممثل الكبير الفاضل سعيد متعني متعه جد جد
08-02-2012, 04:57 PM
عاطف عمر
عاطف عمر
تاريخ التسجيل: 11-26-2004
مجموع المشاركات: 11152
إستمتعت جداً بمعلوماتك الثرة عن مسيرة الأغنية السودانية ، وأعجبتني كذلك سماحتك وأنت ترجع للصواب متى ما وجدت المعلومة الأصوب لكن وآه ثم آه من لكن ( حرف الإستدراك ) هذا لم يعجبني رأيك الذي أحسه ( متعجلاً ) في أداء الفنانة الشابة فهيمة عبدالله قديماً شهدت الساحة الفنية أبان رئاسة أستاذ الفنانين الراحل المقيم العاقب محمد حسن للجنة إجازة أصوات الفنانين شهدت ( رسوب ) فنانين كثر ظن الناس أنهم ناجحين لا محالة ، والحال هكذا خرج الأستاذ العاقب للناس بتصريح ( معياري ) قال فيما معناه " اللجنة غير معنية بإجازة الأصوات الجميلة فقط ، فآلاف الناس أصواتهم جميلة ، اللجنة معنية بإجازة الأصوات التي مع جمالها تكون أصواتاً ( بصمة ) لا تشبه أصواتاً أخرى في الساحة الفنية " بهذا ( المعيار ) فهيمة هى مشروع فنانة وفنانة كبيرة لم تؤدي في البرنامج بصورة جيدة .... جائز مخارج الحروف غير واضحة ..... جائز غير منسجمة مع الفرقة الموسيقية .... جائز لا بد أن نعطيها الـ ( بينيفت أوف داوت ) فنانة صغيرة ... يا دوبك متخرجة من ( نجوم الغد ) ، تجد نفسها في أشهر برنامج غنائي وسط مجموعة سبقتها ( تجانساً ) حتى ( العيوب ) التي رأيتها ووافقك عليها بعض الزملاء ليست عصية على المعالجة لذلك يقولون أن العلم يصقل الموهبة وفهيمة في بدايات بداياتها لا يجب أن نغتالها معنوياً هكذا ومن أول مواجهة ( حقيقية ) جماهيرية لها
الصوت البصمة عملة نادرة فلنحافظ عليه إن نحن ظفرنا به نعلمه دون أن نحطمه نصقله دون أن نهز ثقته في نفسه
___________________
وليد عبداللطيف
سلامات يا أبو النسب
08-02-2012, 06:07 PM
مازن الجمّال
مازن الجمّال
تاريخ التسجيل: 02-08-2008
مجموع المشاركات: 797
بدأت الحلقة شموس سايقة الناس بمذاج و تغني (ليه ليه يا ظالم) البت غانية غني السنين و راكزة و حافظة و شغاله تطريب و تجمع وتطرح وفرفور الليلة مصحصح شديد شوس دي وطه فعلاً مفروض يموشو بهناك مع (الجُلل) فعلاً لما شموس غابت الموسم الفات طلعنا مظاهرات يا اللندي بداية موفقه للحلقة خالص .
ولد سيد خليفة الليلة قااعد
حسين و شريف (ظلموني الحبايب) العاقب كان حاضر كان كتلكم الاتنين شريف دا مستواهو بقى في الارض عدييل كدا وحسين الصادق دا (تعبااانه ليه زيو زي دعاية الدقيق ديك) ياخ دا حرف في اللحن و بيحاول يهرمن في اي حته !!! ياعزيز خطاب و ياضياء و يا ابو الفن طارق انتو الفايبريشن دا في المزيكا ولا في الصوت !!!
و ترحيب بمنتصر سيد خليفة منتصر يترحم على نادر خضر بالجد لفتة محترمه منو . الاغنية دي نفسها غناها في ذات البرنامج في مشاركته السابقة (تظلني ليه ماليك حق) ياسلا عليهو ياخ بعرف لمسرحة الاغنية ودا نفس اسلوب والده الراحل . الاستديو يتفاعل مع منتصر وطريقته و الفرقة زابطه مزيكا صح و البيز ماسك زمن عجييييب . (سامعين صوت صباح مفندر كيييف!!؟ البت دي كلمتكم ما زولة غناء في مجوعة ولا تغني براها ذاتو).
08-04-2012, 10:32 AM
وليد عبد اللطيف
وليد عبد اللطيف
تاريخ التسجيل: 08-09-2009
مجموع المشاركات: 6733
Quote: إستمتعت جداً بمعلوماتك الثرة عن مسيرة الأغنية السودانية ، وأعجبتني كذلك سماحتك وأنت ترجع للصواب متى ما وجدت المعلومة الأصوب لكن وآه ثم آه من لكن ( حرف الإستدراك ) هذا لم يعجبني رأيك الذي أحسه ( متعجلاً ) في أداء الفنانة الشابة فهيمة عبدالله
فعلا اخونا اللندي يعتبر اضافه الى هذا الجمع ولكنه اجحف في حق فهيمه طبعا دا حسب راي انا المتواضع بقول كل البنات وكل النساء والبنات بغنن ولكن اياض يوجد التفرد والتميز من بينهم يعني اصوات لايمكن تجاوزها امثال عشع الفلاتيه ومنى الخير وام بلينه وسميره دنيا وزهره مان وحنان النيل وامال النور ومنار و اخيرا فهيمه .. دي اصوات بالجد تختلف عن الباقين يعني الان شموس خطيره فنانه متمكنه زمنها ميه الميه ولكن برضو في فرق في صوتها مع الاصوات المذكوره يعني ممكن صوتها يتكرر في السنين القادمه فهميه صوتها نادر والان محتاجه لتدريب لان برنامج نجوم السر قدور دا حتى فشل ناس فرفور وعاصم البنا وياسر تمام الشغله اصبحت جوطه في جوطه لان لايمكننا ان نحكم على فهيمه من هذا البرنامج ولا يكون لها معيار للحكم عليها يعني كان ملاحظ فرق كبير عندما كانت تغني مع الفنان عبد القادر سالم فعلا صوتها كان ضعيف شديد ومطربه ولم تستطيع اخراج الحروف تمام وتظهرها برضو زي ماقال اخونا عاطف للان لم تصبح دوليه وتغني مع الكبار لان هذه برضو عايزه ممارسها وعمر طويل
08-02-2012, 06:13 PM
mohmed khalail
mohmed khalail
تاريخ التسجيل: 06-14-2007
مجموع المشاركات: 4509
Quote: اها مصطفي ود أم بلينة دا دفعة ابتدائي و لعاااااب في الكورة شديد و لعب في اشبال الهلال زمن عاكف و تنقا الصغير و عمر عبدالله و انور قش و عقيد و واصل لحدي لعب في التاج الأمدرماني بس من الابتدائية كان ممتعنا بالاغاني بتاعة الخال في فسحة الفطور و فسحة الصلاة ال5 دقائق ديييك و كان عندو فرقة من الدفعة بقيادة جمال (الناقش) زمممممن عجيييييب
يا سفيان سلام ياخ مصطفى ود ام بلينا كان عندو اخو مصيبة كده اسمو محمد بخيت (ود ام بلينا) والمصيبة التانية انو كان صاحبي ياخ ده اغني لابن البادية تقول ده هو زاتو اغني لمحمد احمد عوض اجيد ,الجابري كان عندو مقدرة على التقليد ما عادية اختفي وين المخلوق ده عندك فكرة؟
08-02-2012, 06:37 PM
سفيان بشير نابرى
سفيان بشير نابرى
تاريخ التسجيل: 09-01-2004
مجموع المشاركات: 9574
Quote: يا سفيان سلام ياخ مصطفى ود ام بلينا كان عندو اخو مصيبة كده اسمو محمد بخيت (ود ام بلينا) والمصيبة التانية انو كان صاحبي ياخ ده اغني لابن البادية تقول ده هو زاتو اغني لمحمد احمد عوض اجيد ,الجابري كان عندو مقدرة على التقليد ما عادية اختفي وين المخلوق ده عندك فكرة؟
يا محمد خليل سلااام اصلاً في مداخلتي الجابتك دي كان مفروض اكتب انو الزول البغني في الاساس هو محمد بخيت أخ مصطفي الاكبر بس ماكتبته كدا و محمد قاااعد ياخ دا اجمل زول هاهاها عجيب خلاص .
قدور اتذكر عثمان حسين و ابدع في ذكراه في مداخلة صغيرة و مدهشة انطرب ليها فرفور خالص
طه الضرس (ظلموني الاحبه) - اغنية من الكباار- يا جماعة طه دا فناااان و خيالو ممتاز بيعرف يتعامل مع صوته بدماغه كويس شديد(ما طلقيبه) ساي آدا جيد جداً من الضرس . طه ضحك لينا ضحكت الحوت الليلة و بشر بنفس طريقة الحوت (و الله فضل ليهو يعمل الاكس لوووول) الضرس ساق الاغنية دي سواقة معلم رغم صعوبتها. كل ما الذكرى طافت قلبي سعيرو شبا.
الحلقة بتاعة البلي الليلة احسن حلقة .
08-02-2012, 08:30 PM
mohmed khalail
mohmed khalail
تاريخ التسجيل: 06-14-2007
مجموع المشاركات: 4509
يا سلام عليك ياشموس بلي في مصاف الجلل والله ده الغناء ولا بلاش والله قعدت ليك أغنية ( ود القرشي ) بصورة عجيبة كمان مع القجة الفوق حاجه تمام بس فرفور ده الله يبعدوا من البرنامج زول صراخ
حسين و شريف زي ما قال سفيان غنوا ( ظلموني الحبايب) والله ما حضرتهم شالتني نومة في الدعايات الكتيرة وممكن كمان غناء شموس يكون أثر فيني ومن شدة الطرب نمت لأنو زمان كنت بنوم بأغنية ( جميلة ومستحلية عشان كده أى وقت ناس البيت يزهجوا مني كان بشغلوهاغايتو أنا متأكد أنو البت الصغيرة الزمان ديك الغنت في نجوم الغد ( يا طير يا طاير وظلموني الحبايب ) بتكون غنتا أحسن منهم الغنية يا تسمعا عند العاقب يا الطيب مدثر ، شريف وحسين وافراح وصباح ومعاهم فرفور قوموا لفوا .
،،،،،
08-02-2012, 10:43 PM
الليندي
الليندي
تاريخ التسجيل: 05-27-2002
مجموع المشاركات: 1188
ها ها ها والله كوميديا عديل صحتني المدام مع الفطقة قريبا الاسمو ( منتصر سيد خليفة ) والله لمن سألتني مالك الحاصل شنو ياخي ده همبول والله البركة في طه سليمان بمسكوا الزمن كويس ياخ انا ما عارف يا سفيان الزول عجبك كيف ياخي في مسابقة أحسن مؤدي لسيد خليفةالزول ده فشل فشل زريع وفاز ( ياسر عبدالوهاب ) وتاني جابوا لينا السنة الفات وبرضو فشل وتاني هسه قاموا جابوا سيرة البحر والله جاني مجرد خيال أنو هو وافراح يغنوا ديتوا قربت تجيني ذبحة قال منتصر وانا قلبي بدق ياخي يدقوك دق العيش صوتك تعبان وفارق شوف ليك شغلة تاني نحن سيد خليفة ذاتو عندنا رأي في صوتوا اها احكي حاجة يا سفيان مرة أنا راجع من الجامعة للديم لقيتك حفلة بسيد خليفة وقفت مع الواقفين يازول ختما لينا باودعكم وشبكنا ليك حظر التجول ما بقدر والعازفين عملوا لينا جلكسة ووي ووي ووي صوت النجدة معقولة ياخ ده غناء ولا مسرحية مدرسة المشاغبين.
،،،،،
08-02-2012, 10:52 PM
الليندي
الليندي
تاريخ التسجيل: 05-27-2002
مجموع المشاركات: 1188
بالله يا عباسية ياولدنا بعدين جيب لينا أغنية ( ظلموني الأحبة ) من بداية حديث السر قدور عشان تشوفوا قدور ده بيألف كيف ياخي السر قدور ما ممكن يستعين بصديق ولا يعدي الحلقة بدون ما يدينا معلومة خطأ الزول ده قار ( ظلموني الأحبة في شرع المحبة ) من كلمات ( احمد ابراهيم الطاش) بالغ عديل كده الأغنية معروفة أنها من كلمات ( حميده ابوعشر ) وحميده كتب ليهو ست أغاني لكن تساوي ستة مليون أغنية ( وداعاً روضتي الغناء للكاشف - غضبك جميل زي بسمتك ورمز الضياء لعبدالحميد يوسف - ومحبوبي لاقاني لحسن سليمان الحولا لحسن عطية- وظلموني الأحبة للملك عثمان حسين - والحجل بالرجل لحسن عطية ) غايتو الله يجازيك يا السر قدور طبعاً طه سليمان غناها بصورة ممتازة وباداهو الخاص وكل يوم طه ده بثبت لي أنو فنان فنان فنان
،،،،
08-02-2012, 10:54 PM
إبراهيم عبد الحليم
إبراهيم عبد الحليم
تاريخ التسجيل: 10-31-2008
مجموع المشاركات: 3563
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة