لاكين ياخي انت ما بتتخيّل كم المعاناة الأنا عانيتها في السطاشر سنة الفاتت دي في أمريكا ... عشان اتخلص من تركة الجهل الجيت شايلها معاي من عالمك التالت دا ... والحالة انا ود علوية همرور ... يعني اجتماعيًا وأسريّاً كدا كان متاح ليّ براح معرفي ما متاح للبروفيسيرات الدرسوك يا ود أيّاً كان اسمها ... وبعد عانيت نص عمرك عشان افصل المساحة المعرفية بيني وبينك ... وجايي انت الليلة تحكم على قرايتي بإنها فجّة؟
انت بتعرف عن قرايتي شنو؟ وبتخلي عن الهجوم الشخصي وتقبل تصحيح المعلومات بتواضع أمام العلم متين؟ ماهو انت الجبت طرح مبني على نظريات غلط ... وانت البتقول كلام يخلي الزول يوقفك ويمدرسك ويصححك ... نعمل ليك شنو وانت شابكنا "ابستيمي" ومدخّل لينا الختمية والثورة المهدية كطرفي نقيض في سياق تاريخي ما كانوا فيهو معادلات موضوعية لبعضهما ... وشايت ضفاري من طرف في كل شي ... لا بتتريث على عندك منهجية اختبار صحة معطيات ... لا عندك منهجية تفكيك بنيوي ... ياخي انت حسبت غنا "الهداي" بتاع الفور سلم خماسي تبع الرحط الناصل الطارحو دا ومعاهو الإسكستا بتاعة الأمهرة ... بينما حسبت "الدليب" سلم سباعي ذو نزوع متوسطي ... بالله في بني آدم عاقل وقاعد مع موسيقيين اعضاء في المنبر دا يقول معلومات مغلوطة غلط قدر دا؟ يا ارحم نفسك من الجهل دا عملت لينا صداع نصفي ...
موسيقى الشعوب الإنت بتتكلم عنها دي النوريك:
الدكتوراة بتاعة عاصم قرشي في استراليا الشغال فيها هسى ليهو قريب التمانية سنين مبنية على انو اغلب مزازيك المجموعات السودانية لا يستوعبها النظام الغربي للسلالم الموسيقية أصلاً ... بما انو فيها خطوط بتتطابق فوق بعص لى سلالم خماسية صرفة وسلالم لا قياسية زي نموذج "ألوازا" (بالهمزة) في النيل الأزرق فتنتج سلالم فيها نكهة خماسية محلية ... أو مناطق تانية تستخدم سلالم لا قياسية فقط زي الحقيبة ...
موسيقى الحبش لغاية الليلة ما عندها علاقة بنظام النوتة الموسيقية الغربي أصلاً ... يعني ما بيعرفوا خماسي وسباعي زاتو ... وبيكتبوا الموسيقى وبيتعلموها بى نظام كتابة خاص بالموسيقى ابتدعوا موسيقار اسمو "قدوس ياريد" قبل أن يغزو أبرهة الحبشي مكة:
ولو مشينا ليك على "مالي" وباقي مناطق الرحط الناصل بتاعك دا ... نظريتك بتاعة سلم خماسي وسلم سباعي دي ما بتصمد ثانية ... ياخي في تاريخ الموسيقى الشعبية في أمريكا هنا ... "البلوز" وهو الموسيقى الشعبية الغارقة في المحلية ... تنسب أصولها للموسيقى المالية ورحل ديوك ألينتون إلى "تمبكتو" بالإضافة للإرث القادم من غرب أفريقيا مع الرقيق المستقدمين لأمريكا ... يا زول نحن بنقرا في كلامك ونتمحن نخت الخمسة في الاتنين ... في زول نصيح بيقول: إيقاع "الدليب" سلم سباعي؟
هسي نرجع بيك للبداية ....
طيب ... نبدا معاك من الاول ... انت قلت الحزام السوداني حزام ثقافي ما حزام سياسي .. وذو نزوع زنجية (ما كوشية) ... وعلى قطيعة ثقافية مع الشريط النيلي ذو النزوع متوسطية (وكأن النيل ينبع في المتوسط ويصب في هضاب القرن الأفريقي) ... وتفكيكك البنيوي شنو كدا ما تعرف ... داير "تفكك البنى الثقافية" عشان تسحب جماعات الشريط النيلي إلى الحزام الأفريقي بحرمانها من قاعدتها الثقافية ...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة