جات القوافل والمواكب صلت عشق ارضك فرض وبعدو النوافل جات المراكب مكتحه بى غبار الموج مخربشة بالعنا تغنى تدوبى لى جاه الأرض فترانه تنده للجروف شرت مقاديف الحنين خاتاهو فوق ضل الحراز جات المواكب طربانه تلهج بالحروف مليانه بالناس العزاز والبلود بالفيها بطرانه مطمورة ماليها الغنا لا الفجه الفيكى عطشانه والبحر ما كان ضنين جات المواكب دافره من كل الجهات من الشرق بالسعيه وبالحلال وبالعروق الدمها موية دميره جاتا تاره من الشمال والوشوش الطيبة سمحات السمات جاتك عابره من نص الجزيره مشوارا يا عز العمر خطواتا يا حر الجمر
مشتوله ارضك يا نضيره بالحكايات القديمه صلينا فرضك يا كبيره بالترانيم القسيمة والصباح إسم الشمس ساقينا نبضك من تفاصيل الرواية من عويناتا الوسيمه
جات المراكب وولدك بعيد جناك حزين شايلك حجاب شاقى الهويد نص البلود اليابسه ديمه لاميكى فى بطن الحشا الواقد حنين كايس لى وجيهك فى متهات السنين خوفو بس من الهزيمه يا نديه يا وفيه يا الفى صقيعة الروح مبتقه قايمه نيمه
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
أبوذر بابكر
فيس بوك
تويتر
انستقرام
يوتيوب
بنتيريست