|
|
|
 Re: يا ناس الشمالية بتبالغو (توجد قراصة) (Re: حمد عبد الغفار عمر)
|
ما بحبها مثلها مثل المعجنات والبتزا الخ
أمس أسلط علي شايقي قال لي عازمك تفطر معاي
وأمشي ألقى ديك يا القراصة سمكها حوالي 2 سم (20 مم)
صراحة الدمعة حلوة عشان كدا أسرفت فيها والأسوأ ختمتها بسمبوسة (برضها ما بريدا لكن مرات بأكلها)
بعدها قمت شربت الموية
لا إله إلا الله
شعرت بطني وكأنو دخلها حجار ما أكل
وكل شوية ماشة تشد كأنو بتقرط في صامولة
المهم تاني ما أكلت حاجة لحد الآذان شغال موية (زرقاء) ساي بس
وأول مرة ما أقدر أنوم إلا الساعة 6 صباحا (بعد ما فكت) وهو صحيت جعان ومبهدل والله يتم لينا اليوم دا بس
غايتو شكيتك على الله يا الشايقي
السؤال في محلو جد بتأكلوها 3 مرات في اليوم؟
| |
 
|
|
|
|
|
|
|
|
Re: يا ناس الشمالية بتبالغو (توجد قراصة) (Re: حمد عبد الغفار عمر)
|
حمد ..سلامات ورمضان كريم ياحبيب ...
| Quote: انتو برضكم ياها القراصة دي ولا عندكم حاجة تانية |
عندنا القراصة لكن طريقتها تختلف ..فالقراصة عندنا تتأكل براها بدون دمعة او اى ملاح
بيعملوها بالسمنة بدل الزيت وبعد داك تمسحها بالعسل او السكر حسب المتوفر والمقدور
ممكن تاكلها براها او مع شاى الصباح ..
لكن ياحمد عندنا في مقابل القراصة دي العصيدة ام دخن او اى دقيق غير الفيتريته ويتكب عليها لبن رايب او زابادي مع سمن بلدى ومنهم من يضيف شطة على السمن ..
نحن غايتو دي نتسحر بيها ..
تحياتي ..
| |
|
|
|
|
|
|
|
|
Re: يا ناس الشمالية بتبالغو (توجد قراصة) (Re: فايزودالقاضي)
|
الله أكرم يا فايز
Quote: عندنا القراصة لكن طريقتها تختلف ..فالقراصة عندنا تتأكل براها بدون دمعة او اى ملاح
بيعملوها بالسمنة بدل الزيت وبعد داك تمسحها بالعسل او السكر حسب المتوفر والمقدور
ممكن تاكلها براها او مع شاى الصباح .. |
عليك نووور ودي زاتا ما شبع للطيش كدا
غايتو يافايز يا إنتو من الجزيرة يا نحنا من الجزيرة
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: حمد عبد الغفار عمر)
|
Quote: عليك نووور ودي زاتا ما شبع للطيش كدا
غايتو يافايز يا إنتو من الجزيرة يا نحنا من الجزيرة |
ياحمد انا مؤمن تماما وبحسب الثابت من التاريخ ان الارض الممتدة بين النيل والبحر من جنوب النوبة وحتى اخر نقطة في شرق السودان هي شعوب واحدة باعتبار هذه الارض تاريخيا هي ارض بيجاوية اختلطت وتصاهرت فيها القبائل العربية مع البجا لذلك نجد تشابه كبير في اللبس والاكل والعادات والتقاليد ...
ياحمد كل العرب الساكنين في المنطقة دي هم بجا زعلانين ..
تحياتي ،،
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: فايزودالقاضي)
|
هلا فايز
Quote: ياحمد انا مؤمن تماما وبحسب الثابت من التاريخ ان الارض الممتدة بين النيل والبحر من جنوب النوبة وحتى اخر نقطة في شرق السودان هي شعوب واحدة باعتبار هذه الارض تاريخيا هي ارض بيجاوية اختلطت وتصاهرت فيها القبائل العربية مع البجا لذلك نجد تشابه كبير في اللبس والاكل والعادات والتقاليد ...
ياحمد كل العرب الساكنين في المنطقة دي هم بجا زعلانين .. |
يا فايز الجانب العرقي دا ما مشكل ثقافات الناس ومن ضمنها ثقافتهم الغذائية بصورة كبيرة لأنو حكاية العرق دي في السودان ملخوخة لخ تقيل
المهم الثقافات الغذائية في السودان شكلتها موارد المادة الغذائية نفسها - ناس الشمال ما بزرعوا الذرة بصورة واسعة بعتمدوا على القمح والتمر كعناصر أساسية للغذاء (القراصة) - تجي ناس الجزيرة ذرة مع قليل من القمح (الكسرة) (خلي الرغيف بعيد كعنصر مشترك للجميع) تمشي ناس الغرب بتلقى الذرة والدخن (الكسرة وعصيدة الدخن) الشرق القمح
وفي النهاية المسألة تعويدة انا لما جيت السعودية الخبز المفرود دا ما كان راكب لي في رأسي كلو كلو بالتدريج هسة بقيت ما بشتري صامولي مفرود بس
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: فايزودالقاضي)
|
Quote: .فالقراصة عندنا تتأكل براها بدون دمعة او اى ملاح
بيعملوها بالسمنة بدل الزيت وبعد داك تمسحها بالعسل او السكر حسب المتوفر والمقدور
ممكن تاكلها براها او مع شاى الصباح .. |
لاحولي الله دا شنو يا ود القاضي
دا ما لقيمات يقمن صلبه
او زلابية
والله عالم تحير
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: ود الباوقة)
|
يا حمد ياخوي الفرق شنو بين السمبوسة والقراصة ؟؟
بعدين قلت لي نوع من انواع المعجنات؟ كدي اليسمعنك الشايقيات
وانا متأكد انو القراصة العملا ليك الشايقي دي معدلة لانها لو جاية من البلد ترانسيت حرم زي نضميك دا ما كنت حتقدر تنضمو
لا هو انت جايي من وين يا حمد؟
عارف ناس الشمالية امكن يكون ما بياكلوها 3 مرات في اليوم بس في الفطور بياكلو قراصة وفي الغداء كسرة وفي العشاء فطير بي لبن
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: ود الباوقة)
|
ياراجـــــــــــــــــل ... قراصة !!!!
وبى دمعة كمان !!!!!
اقسم بالله .. لقد بالغ فى اكرامك .. ووهى علامة علو شأنك عنده ..
ياخ انت محسود عديــــــــــــــــــــــل ..
ــــــــــــــــ
يا حليلك يا تاج راسى وأم عيالى ..
رمضان كريم يا حمد ...
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: منال)
|
Quote:
هسة بالله عيبو لي دي
الرشيقة الخفيفة اللطيفة
أحب الوسط |
عصيدة بتاع فنيلتك ..
نحن كنا ناس قنقر متلك , لكن حولنا للقراصة فالناس على طعام ملوكهم .
أقعد اتغزل في العصيدة كدا لمن يلحقوك كرم الله عباس وصوامع الفتريتة بتاعتو .
قوم لف عامل عصيدتك الحنكوشة ده , يا اخي العصيدة يا فتريتة حمرا , أو ودمرغني او طابت او دقيس أو ودالفحل او قصابي يا بلاش
وحبذا لو كان فيها بتاب .
معاي ضيف جاي من البلد عمرة وريتو صورة عصيدتك قال والله دي إلا تكون تحلية . ولو علقنا بي عيشا لحمار ما بهنق .
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: خضر الطيب)
|
يا الخير رمضان كريم
Quote: وانا متأكد انو القراصة العملا ليك الشايقي دي معدلة لانها لو جاية من البلد ترانسيت حرم زي نضميك دا ما كنت حتقدر تنضمو
لا هو انت جايي من وين يا حمد؟ |
طبعا دي هسة أن عارف انها قراصة حناكيش وديك لو اكلتها فعلا كنت تعتبت ياخ أنا أمس السجاير بباصر فيهو مباصرة
لكن قراصتكم حقت البلد ديك عليك الله غير الإنقلابات العسكرية جابت لينا شنو ؟
أولادكم ديل تقوم بيهم القراصة الواحد فيهم القى أقرب دبابة يركبها وبكرة نلقى البلد مقلوبة دا كلام دا
قراصة الدناقلة اتخيل لي خفيفة شوية نميري ما اتعبنا كدا
لكن قراصة الجعليين والشوايقة دي وبالذات الشوايقة لا حولا ااا
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: الشاذلى خيرى عبد الله)
|
يا شاذلي
رمضان كريم
Quote:
وبى دمعة كمان !!!!!
اقسم بالله .. لقد بالغ فى اكرامك .. ووهى علامة علو شأنك عنده ..
ياخ انت محسود عديــــــــــــــــــــــل ..
ــــــــــــــــ
يا حليلك يا تاج راسى وأم عيالى ..
|
ياخ انت كبيت جاز عديل يا خيري هسة البكاء دا كلو في القراصة دي؟ فعلا بتبالغو ياخ دي أمس عايزة توديني التوج للساعة ستة ص حتى نمت
كرم الشايقية ما عندنا فيهو كلام تب ، رغم أنهم بحبوا القروش واجد لكن رجاجيل
ربنا يلمك بأم العيال ببركة هذا الشهر ويلمني أنا برضو بأم عيالي انتو قايلين براكم المعذبون في الأرض
| |
|
|
|
|
|
|
|
|
 Re: يا ناس الشمالية بتبالغو (توجد قراصة) (Re: حمد عبد الغفار عمر)
|
إحنا ناس قوميين
بناكل القراصة والعصيدة والكسرة
والكول والكيموت
ومع المصريين بناكل المحشي في رمضان
والطبيخ والرز
ومن سنتين صمت جزء من رمضان في بيت صاحبتي قطرية
ودي لازم أحكي عن الفطور في بيتهم بالتفصيل
ثابت وكل يوم بتتعمل شوربة بالصلصة فيها كمية من الخضروات
كوسة وبامية وفاصوليها وباذنجان وتتخدم خدمة تمام
وبعدين تتسقى في رقاق ودي الوجبة اليومية
تاني اللحمة والرز
تتسلق اللحمة وتتحمر ويتعمل رز بشوربتها ويتزين بالمكسرات والبيض المسلوق
السلطات كم نوع من السلطات
وبلح وعصاير كدا انتهى الفطور
في ميني ساندوتشات وفطاير ومملحات بتتختى في غرفة المعيشة مع التحلية (لقمة القاضي وبسبوسة وكنافة وقطايف) والشاي والقهوة
والفواكه دي قصة براها
وبالمناسبة هناك تبادل أطباق بينهم وبين الجيران وبينهم وبين الاهل
ولاتخلو سفرتهم من تلاتة اطباق من الحلة على الاقل
جا وقت العشاء يقولو للبت الشغالة سخني باقي الفطور جيبيهو
جا وكت السحور
يقولو جيبو التلفون نطلب
يطلبو اكل لما تتحير
واخوهوم يجي من برة شايل ومحمل
زوجة اخوهم تطلب براها
وإتخيل منظري وأنا ضيفة وهم كرما جدا
آها أنا بعد يومين وهم بيحلفوا فيني كدا
بكيت
والله بكيت من كتر الاكل
__________
رمضانكم كريم كلكم وربنا يعيدو عليكم بالخير
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: الشفيع وراق عبد الرحمن)
|
جنابو عمر رمضان كريم
Quote: يومين وراء بعض امبارح واول امبارح بنفطر بي قراصة بي ملاح اخضر
جوعتونا والله ............ |
وهسة شديد تحمد سيدك ؟ مبالغة
بس بيني وبينك الملاح الأخضر لا يقاوم
تعرف مع العصيدة تحديدا ما كويس لكن مع الكسرة
أها شرط
ياخ الشاعر قال: أحب الخدار ولو كان عدار
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: حمد عبد الغفار عمر)
|
والله ياحمد والشاذلي وود الارباب شكلكم دايرين تفطرونا بالضحك...
تعرف يا حمد انا كان ما فطرت قراصة بالويكة تحديدا بعتبر صيامي محتاج كفارة...
بعدين شنو ..القراصة تكون زي سجايرك البتباصر فيها دي يعني بعد ما تبلعا الدخان يكون
لسة طالع من يديك وخشمك..
وطبعا محتاج زول يقول ليك خلاص كدا انت شبعت حتى تقش دموعك وتقوم:)
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: حمد عبد الغفار عمر)
|
حباب الأرباب رمضان كريم
Quote: عصيدة بتاع فنيلتك ..
نحن كنا ناس قنقر متلك , لكن حولنا للقراصة فالناس على طعام ملوكهم .
أقعد اتغزل في العصيدة كدا لمن يلحقوك كرم الله عباس وصوامع الفتريتة بتاعتو .
قوم لف عامل عصيدتك الحنكوشة ده , يا اخي العصيدة يا فتريتة حمرا , أو ودمرغني او طابت او دقيس أو ودالفحل او قصابي يا بلاش
وحبذا لو كان فيها بتاب . |
آي بتاعة فنيلتي وقميصي ذاتو
ياخي حدي يشعر بالسعادة ويمشي يختار العذاب من عصيدة لقراصة
ياخي دي زي الواحد يكون شغال في سفارة قطر في السعودية وينقلوه سفارة تشاد في السودان
انا عكسك تماما كنا ناس قراصة جينا محل العصيدة وبعدين ملوك شنو يا أخوي كان قصدك عمر البشير إندبغ بالكسرة والعصيدة ديل في صراصر لما قال بس
بعدها مشى كوبر وما عارفو بعد كافوري حيمشي وين
الفتريتة الحمراء وطابت ديل ما حقات الفطر وزول جاي مكروب من ضحوة، أما العصيدة الفوق دي حقت رمضان وأعراس بس
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: الشفيع وراق عبد الرحمن)
|
غايته جيتني في مكاني يا اخ حمد... والله انا بشكي مُر الشكية من الكورس الاجباري بتاع رمضان ده!
ناس الشمالية ديل ببالغوا... قراصة اربعة بوصة، والله عشان اقلبها ساي عملته عضلات، واصابعي اتشوشون... بعداك معاها دمعة دجاج او دمعة لحمة او ويكة بي بصلة كتييييييييرة ومخدّعة.. اول يوم رمضان، اكلتها (طفسه عاد اعمل شنو!)... بطني جننتني يومين!
احنا اهلنا ناس كسرة وعصيدة.... والعصيدة زاتها ما شدييييد عليها.... القراصة بناكلها في الفطور، وبتكون حلاااااتها صغيرونه ورشيقة... حتتتتتته وتبقى الخبز اللبناني!
المشكلة اني out numbered.. اولادي الاتنين بحبو العصيدة والكسرة والقراصة... بالتالي، بنقوم نعتمد حق الحكومة بما انه الاولاد بياكلوه وبحبوه.. وانا اقعد انقّد في باقي الحاجات.. مرات دناوة منّي بمد إيدي، لو زودّته العيار، ياني المورّطه!
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: مريم بنت الحسين)
|
حمد
رمضان كريم يا فنان
يا حمد انا زيك لا احب القراصة, و اول مرة شفتها تتذكر لمن انعدم الرغيف في الجامعة? اشتريناها من عمك صالح و ما عجبتني كلو كلو!
بس ما ازيك, انا لا احب العصيدة برضو, و لو اكلت عصيدة بعد ساعة بكون جعان زي قبل ما اكلها!
انا زول كسرة!
و مرات مرات باكل الرغيف!
للتوقعني يا حمد, زوجتي جنها قراصة- ما عندها اي علاقة بالشمالية- و لما أكلها بحس بحجار في بطني ههههههههه
ياخ القمح ذاتو طعمه كيف كيف!
المايو و الفتريتة وييييييييييي زي ما قال قريبي كيكي التفكيكي!
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: بدر الدين احمد موسى)
|
حمد أخوى سلامات ..
| Quote: ياخ انت كبيت جاز عديل يا خيري هسة البكاء دا كلو في القراصة دي؟ |
انت عارف لمن اطلع من البيت زعلان من أم عيالى .. بتجى داخل البيت بتلقى مجهزين ليك الستة بوصة دى ..
اها بتقع فيها لمن تغمر .. بعد داك بنبداء الاعتذار .. نقعد نعتذر .. نعتذر .. نعتذر
حتى يقولو ليته سكت 
مع انو انا الزعلان
| Quote: والله ياحمد والشاذلي وود الارباب شكلكم دايرين تفطرونا بالضحك... |
حسين مسكاقمى ..
ياخ حمد ده مستهون الشغلة دى شديد خلاس ..
عليك أمان الله لو ما القراصة دى الواحد زماااااااااان كان رجع بيت ابوهو
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: Salah Abdulla)
|
خضر الطيب
رمضان كريم
| Quote: وكم دمعه سالت فى خدود الشمعه ... |
وضوت للعيون الفي السهر مجتمعة
غايتو دمعة خطير بس كان عايزة ليها خبز أوكسرة خميرة شوية كدا
تعرف يا خضر واحد من مشاكل القراصة انها ما بتمتص الملاح المعاها يعني بتخش الخشم وتكون انت لسة قاعد تلوك في القراصة
و الدمعة قبيييل دخلت البطن
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: محمد عبد الماجد الصايم)
|
أهلين راوية العباسي رمضان كريم
Quote: إحنا ناس قوميين
بناكل القراصة والعصيدة والكسرة
والكول والكيموت
ومع المصريين بناكل المحشي في رمضان
والطبيخ والرز
ومن سنتين صمت جزء من رمضان في بيت صاحبتي قطرية
ودي لازم أحكي عن الفطور في بيتهم بالتفصيل |
طبعا لازم تكوني قومية انت أصلك قراصة وفصلك عصيدة وكسرة
بس اتخيل لي الكسرة أكثر.
وبعدين الأكل بتاع صاحبتك القطرية دي، في السودان المتعافي ما بقدر يكررو يومين وراء بعض
ياخ أنا هنا بكيت خليك انت الناس ديل في رمضان دا بحيروا ناس الأسواق البشتروا منهم ذات نفسهم
بمناسبة الكول والكيموت
الكيموت دا ما عرفتو انت قاصدة المِرس ؟
وهنالك الكجيك ايضا
| |
|
|
|
|
|
|
|
|
 Re: يا ناس الشمالية بتبالغو (توجد قراصة) (Re: حمد عبد الغفار عمر)
|
مرحب الشفيع رمضان كريم
اQuote: القراصة الجد جد يا حمد اسمها 4 بوصة
تاكل وما تدي الجنبك
علي الحلال في رمضان ناكلها فطور وسحور وننوم زي الترتيب |
4 بوصة دي يودوها وين
تعرف دي منها 4 بوصة مكعبة بتكفيني خالص يعني (4×1×1)
تأكلها فطور وسحور وتنوم زي الترتيب؟
قبلكم وقبالكم
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: حمد عبد الغفار عمر)
|
| Quote: تعرف يا خضر واحد من مشاكل القراصة انها ما بتمتص الملاح المعاها يعني بتخش الخشم وتكون انت لسة قاعد تلوك في القراصة |
انا فهمتا المشكله ياحمد .. يعنى ذى الترجمه على الشريط
طيب انت تقوم تمص القراصه اول وتلحقا الملاح بعد داك هم بتفاهمو جوا 
تعرف ياحمد انحنا فى ثقافتنا العلفيه ماعندنا قراصه
لكن شاءت الظروف فى السنوات الاخيره دى انى اتعرفتا على اهل القراصه الاصليين اسياد الشى ذاتو
فى البدايه كان عندى نفس مشكلتك دى
بس كنت بشوف الناس ديل بياكلو المصيبه دى كيف
المهم اتعلمتا ومن ديك وعييك .. هسى لما القى قراصه تانى مابعاين للاكل الجنبها
وكمان اتعلمتا اعملا وبقيت محترف
من لايملك قوته لايملك قراره .. والله صحى
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: حمد عبد الغفار عمر)
|
مراحب يا نوباتيا رمضان كريم
Quote: تعرف يا حمد انا كان ما فطرت قراصة بالويكة تحديدا بعتبر صيامي محتاج كفارة...
|
ياخي انتو محتاجين ليكم لمصحات تعالجكم من الإدمان دا
بس يا حسن قراصتكم انتو بتختلف خفيفة وأقرب للكسرة في قوامها
أنا اكلتها كثير بالملوحة مع جماعة أصحابنا كنا ساكنين سواء بس المشكلة إنهم مصرين إنك تأكلها ساخنة تلوي زي حكايتك القلتها دي
والأكل لو ساخن شديد خالص بفقدك متعة التذوق. ما عارف الفهم في الحتة دي شنو؟
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: MOHAMED EL-BEELI)
|
مرحبتين مريم بنت الحسين رمضان كريم
Quote: احنا اهلنا ناس كسرة وعصيدة.... والعصيدة زاتها ما شدييييد عليها.... القراصة بناكلها في الفطور، وبتكون حلاااااتها صغيرونه ورشيقة... حتتتتتته وتبقى الخبز اللبناني!
المشكلة اني out numbered.. اولادي الاتنين بحبو العصيدة والكسرة والقراصة... بالتالي، بنقوم نعتمد حق الحكومة بما انه الاولاد بياكلوه وبحبوه.. وانا اقعد انقّد في باقي الحاجات.. مرات دناوة منّي بمد إيدي، لو زودّته العيار، ياني المورّطه! |
أبقي قريبة ما دام ناس كسرة وعصيدة هسة شوفي ناس القراصة حاطوني كيف في البوست دا ، حتى ود الارباب نكرنا حطب البركة شوية في راوية
وانصحك حاولي قدر الإمكان قللي من القراصة هي ذاتها ولا سمحة
الأولاد سلطانهم قوي مرات بشعروك انو هم اسياد البيت جد جد وانك لا أكثر من تمومة عدد فعلا
ربنا يخليك ليهم ويخليهم ليك
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: مريم بنت الحسين)
|
سلام يا حمد
تحياتي
قلت لي القراصة مالها؟؟؟
القراصة دي انا غيرت ليها الطاحونة عديل من الخبر مشيت لواحدة في الدمام
وعلمت ليها تست بالطوة وما نفعت، مشيت جبت لي صاج بتاع كهرباء مخصوص، والله مخصوص
ما بسوي فيهو حاجة الا القراصة لقيتو الوحيد البجيب ليك السماكة مع المساحة المطلوبة
وما خلينا دقيق ما جربناهو عشان يجيب الاتنين سنتي وفي نفس الوقت نجيضة من جوه
وانا اساسا شايقي من جهة الاب وحلفاوي من جهة الام، والاتنين ناس قراريص سااااكت
بس في touch كده ما بعرفها الا خبير عشان يعرف الفرق بين قراصة الشوايقة وقراصة النوبيين، انا لسه ما وصلت المرحلة دي
لكن ماشي في السكة لحد ما نعمل ماستر وبعدها الدكتوارة وحفل التخرج اكيد بعزمك على واحدة شان تآمن زاتو
يا سلام ياخي
وبتبالغو كمان
تشكر يا حمد على البوست والمزاح اللطيف
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: حمد عبد الغفار عمر)
|
حمد رمضانك كريم واهلك
بوست موفق خاستن في هذا الوكت بالذات
حسين نوباتيا مسكاقمي ابوننقانتو
رمضان كريم يا بلدياتي ونحن من اشكان
ليس منا من لم يأكل القراصة بالويكة الناشفة في الافطار بالذات
مريم بت الحسين والله اكلك اكل حناكيش عندنا الزيك بنقول عليهم ديل ناس الخرتوم الارابري
Quote: إحنا ناس قوميين
بناكل القراصة والعصيدة والكسرة
والكول والكيموت
ومع المصريين بناكل المحشي في رمضان
والطبيخ والرز
ومن سنتين صمت جزء من رمضان في بيت صاحبتي قطرية
ودي لازم أحكي عن الفطور في بيتهم بالتفصيل
ثابت وكل يوم بتتعمل شوربة بالصلصة فيها كمية من الخضروات
كوسة وبامية وفاصوليها وباذنجان وتتخدم خدمة تمام
وبعدين تتسقى في رقاق ودي الوجبة اليومية
تاني اللحمة والرز
تتسلق اللحمة وتتحمر ويتعمل رز بشوربتها ويتزين بالمكسرات والبيض المسلوق
السلطات كم نوع من السلطات
وبلح وعصاير كدا انتهى الفطور
في ميني ساندوتشات وفطاير ومملحات بتتختى في غرفة المعيشة مع التحلية (لقمة القاضي وبسبوسة وكنافة وقطايف) والشاي والقهوة
والفواكه دي قصة براها
وبالمناسبة هناك تبادل أطباق بينهم وبين الجيران وبينهم وبين الاهل
ولاتخلو سفرتهم من تلاتة اطباق من الحلة على الاقل
جا وقت العشاء يقولو للبت الشغالة سخني باقي الفطور جيبيهو
جا وكت السحور
يقولو جيبو التلفون نطلب
يطلبو اكل لما تتحير
واخوهوم يجي من برة شايل ومحمل
زوجة اخوهم تطلب براها
وإتخيل منظري وأنا ضيفة وهم كرما جدا
آها أنا بعد يومين وهم بيحلفوا فيني كدا
بكيت
والله بكيت من كتر الاكل
__________
رمضانكم كريم كلكم وربنا يعيدو عليكم بالخير |
بالله شوفو جنس المحن دي
انتي عارفة انو الاعراب ديل كانو بياكلو الجراد (ماتنسي حرف الراء) المشوي
حتى ان السلطان علي دينار كان يرسل الذرة الفيتريتة على اهل الجزيرة العربية
هؤلاء القوم لولا ورود الاجانب لكانوا من اكلة الجراد (ماتنسي حرف الراء) الرسميين
عندنا في السعودية عادي جدا تلقى ناس في المطاعم يتسحروا بالبطاطس التبيخ (ياععععععععععع) والتبيخ المشكل (يااااااع)
واخيرا بعدما اصبحت عزابيا فقد درجت ام العيال بارسال مسحوق ويكة قوشابي
ووصتني باستعمال دقيق سيقا زادتنا لتنسينا حياتنا
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: بدر الدين احمد موسى)
|
بدر التمام رمضان كريم
Quote: انا زول كسرة!
و مرات مرات باكل الرغيف!
للتوقعني يا حمد, زوجتي جنها قراصة- ما عندها اي علاقة بالشمالية- و لما أكلها بحس بحجار في بطني ههههههههه
ياخ القمح ذاتو طعمه كيف كيف!
المايو و الفتريتة وييييييييييي زي ما قال قريبي كيكي التفكيكي! |
ياخ الكسرة دي متعة بتقبل أي حاجة
زوجتك دي ما دام ما من الشمالية بالغت في القراصة دي ما تديها فرصة، كدي تأكد من جيرانكم بكونوا من الجماعة أياهم
ثم المايو والفتريتة باشكالها قدم الحمام الخ ويييين
وطبعا كيكي كرجل مهام صعبة في مناطق الشدة بكون مجضم شغلانية البني كربو والكجيك دي للآخر
ياخ الكجيك دا متعة
مرة جيت إجازة من الدمازين جبت معاي كيس كجيك لحدي الوالدة ما فهمت حاجة
يومي بقوم بظبط ليك الشغلانية براي يمين بعد يومين بيتنا بقى مالوفة
البايتة ليهو سكرة خشمو أصبح مسيخ عندنا
العجايز العندها باقي ملاريا تجي تتمطق تقول لأمي يا بت حمد اللية حمد ولدك ما عمل كجيك ؟
عذاب
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: حمد عبد الغفار عمر)
|
حمد يا عمك
تصوم وتفطر على خير
اعز اخواني وجيراني في الدنيا دي دنقلاوي .. عنده حكمة بتقول انه القراصة دي الزول ما بشبع منها إلا حنكه يوجعه ساي حتى يوقف اكل .. يلا لما يعملوها طوالي بعزمونا ليها كلنا وما في طريقة تقول ما جاي لأنو لو قلت كدة بجيبا ويجيني في البيت .. (والأعجب من كدة لمن تاكلا بالتركين) يعني تخيل (عرب جزيرة وتركين تجي كيف)
أها في الفترة الاولى كنت بمر بالمأساة المريت بيها انت لكن تاني اتعودنا والمدام كمان اخدت المقادير على الطريقة الدنقلاوية
Quote: ياخي دي زي الواحد يكون شغال في سفارة قطر في السعودية وينقلوه سفارة تشاد في السودان
|
وديني دي مش أوسكار وبس 
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: نادر النور آدم)
|
صلاح العبد الله
رمضان كريم طال عمرك
Quote: ياخي زمني ده كلو قايلك زول بتعرف الأكل النضيف ، أحبطتني لكن..
وبعدين وسط شنو البتتكلم عنو ده ،، نحن أهل الوسط طال عمرك( الخرطوم ) ..
رغم أن الجذور وارد ( دنقلا ) لكن ناس الوسط الحقيقي بياكلو
القراصة والعصيدة والكسرة ، على قدم المساواة وكده..
ثم أنك بتبالغ ، تقارن الذرة بالقمح ؟؟؟؟ معقولة بس!!
قول لي منو الفي الدنيا بياكل ذرة غير السودانيين والحبش والارتريين..
وبعض مخلوقات الله غير الناطقة ( لا مؤاخذة )..
ورغم ذلك بنحب (الذرة) الكسرة والعصيدة ، وقبلهم القراصة..
في رمضان ده تفطر بقراصة يمين ( تمسكك ) أسبوع ، لا جوع لا عطش..
ويا حبذا لو كانت بـ(جكود ديسي) واللا (أوي) .. إنا لله.. |
ياخي أنا كما بعرف الأكل النضيف بطني أبت القراصة؟
وبعدين خليك مع الزمن الخرطوم دي هسة بعد ما جيناها نحن ناس الوسط سميناها المركز عشان الكرور بتاع الهامش دا كلوا اتلم فيها سواء من الشمال والغرب والشرق والجنوب
وفي نفس الوقت نحافظ على الوسط بتاعنا ونفصلوا كمنطقة خالية من اللغاويس بتاعتكم دي على سبيل المثال لا الحصر، قراصة ، دامرقا، بفرة الخ
جكود ديسي وأوي ديل شنو كمان ؟ محن
بعد دا يجي محمد المشرف وتمبس يقولوا نحن أهل العاصمة وأولاد قلبا وما أدراك
والله الخرطوم دي بعد دا تنقلبو فيها وتمشوا بيديكم بدل كرعيكم
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: حمد عبد الغفار عمر)
|
Quote: | Quote: تديها حبببببببة باكينج بودر بي طرف الملعقة.. وخميرة فورية تقريبا ملعقة ونص صغار (حسب كمية الدقيق، يعني مثلاً الكلام ده لي كبايتين دقيق).. |
مريم
روشتتك دى روشتة قراصة مخمرة !
بس ما تنسى انو القراصة المخمرة فقط مع ملاح الخدرة المفروكة والويكة بشيقها (المفروكة والحمراء الناشفة او السادة ) , اما ملاح ( التركين) و ( الدمعة واهلنا الكبار يسموه ( اليحنى ) ) لا ينفع معهما الا القراصة الفطيرة!
| |
|
|
|
|
|
|
|
|
 Re: يا ناس الشمالية بتبالغو (توجد قراصة) (Re: خالد حاكم)
|
مريوم القراصة وهي في النار (مابتغتيها)؟
غايتو أمي الله يديها الصحة وطولة العمر قالت لي (غتي) القراصة وهي في النار وغطيها لما تطلعيها في ماعونها
عمايلي في القراصة ممكن أدي روحي سبعة من خمستاشر مع أني طباخة ماهرة وذويقة درجة أولى لكن مابعرف لي القراصة ولا الرز المفلفل (عقدتي) ولا بعرف أعمل شاي سادة
أمي غايتو بتاكل قراصتي اليومين ديل وكأنها بتاكل سد حنك (لاتعليق) براي بعرف إني هببت فقررت أبعد منها ولو لحين
بعمل عصيدة تمام إتعلمتها من جارتي جنوبية وكسرة مابعوس ولا أظني بقدر أتعلم بعد دا
+++++
نجي للجكود الذكروا صلاح في مداخلته..الجكود هو الملاح الاخدر جيرانا في القاهرة نوبيين بيعملوهو وعرفت الاسم منهم
الكيموت ياحمد هو الفول السوداني المسحون والجنوبيات بيعملوا بيه ملاحات في منتهى الروعة والجمال
الاكلة بتاعة رمضان الرئيسية الذكرتها من القطريين (الفتة) بيسموها الثريد وطبعا دا الاسم العربي للفتة
بعض من أعمالي
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: Rawia)
|
سلام بت الحسين
رمضان كريم
| Quote: قراصتك، قبل ساعة ونص او ساعتين من الاكل تعجنها.. لو الواطة حاره، ممكن ساعه بس تكون معاك تمام... تديها حبببببببة باكينج بودر بي طرف الملعقة.. وخميرة فورية تقريبا ملعقة ونص صغار |
بالمناسبه احسن دقيق انا جربتو للقراصه ومامحتاج لتخمير .. يعنى خميرتو جواهو هو النوع التحت دا self raising
دا اسمو نجدة غريق ومنار يرجع التايهين
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: أحمد ابن عوف)
|
كدي دقيقة... الناس القاعده تنبّذ لينا في الكسره ... يا قول النصري، القراصة مافيها أي ذكاء... زول ساط ليهو مويه في دقيق وعملها... اي عزابي حايم بعرف يعمل قراصة... الكسره دي فيها حركة cool كده، الزول لو ما عنده مهارات خاصة ما ممكن يعملها... بعدين البرنامج بتاع انه الذره ما بياكلوه الناس وبدوه للحصين، فده عدم ذوق من الناس والله... بعدين البهايم من متين بتتخير، كان ادوتها قمح بتاكله... والجداد ده بياكل KFC مثلا!...
اخونا خالد حاكم... كدي تعال اشرح لي قصة القراصة الما مخمّره دي كيف، لانه نادر عذبني عذاب بي الموّال ده... رغم انه طريقة القراصة دي جبتها من اخته عن والدته... ! هي انا لما اعملها ما بتكون خميرة... يعني ما بخليها تطول كتير... ولو الجو حار اول ما احس بيها فارت بسيط كده برميها.... اها الما مخمره كيف؟ جربتها من غير خميرة، والله لستك عربية بس!
راوية العباسي، مشتاقون والله... القراصة ما بغطيها... الغريبة زمان كنت بغطيها قبل ما اتزوج... بعد ما نسابنا ناس القراصة، بقيت ما بغطيها.. اعتقد الهدف من الغطا تسريع النجاض، لكن لما تكون شغاله في بتوجاز او بتاع كهرباء ما بتحتاج لانه بكون سريع... الطوة الشغاله بيها دي خفيفه شديد بتسخن سريع وبتبرد سريع...
صورتك الجبتيها دي موش كريب ولا انا غلطانه... سريع شليلها، الرطانة ديل بشيلوا حالنا حسي...
خضر ازيك... جربته الself rising... بس لاحظ اني (بعوس) لي ناس جاييبن من الشمالية، يعني ده ماااا بخارج معاهم... طبعا للناس الما عندهم الدقيق الزي ده، ممكن يستخدموا دقيق الفينو معاه لكل كباية، تلت ملعقة بتاعت باكينج بودر... بس الفينو زاتو انواع، مثلا ناس السعودية عندهم الدقيق الكويتي والدقيق الفوم، الكويتي ابيض زيادة عن اللزوم ما حلو في القراصة، فوم احسن منّه لانه فيه نسبة بتاعت نخالة... ممكن برضه تلخبطوه مع دقيق اسمر لمزيد من القشرة..
حمد، معليش البوست اتقلب بوست تبشيري... وانا استلمته الردود.....
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: مريم بنت الحسين)
|
| Quote: القراصة مافيها أي ذكاء... زول ساط ليهو مويه في دقيق وعملها... اي عزابي حايم بعرف يعمل قراصة... الكسره دي فيها حركة cool كده، الزول لو ما عنده مهارات خاصة ما ممكن يعملها |
بس دي النجيضة يا بنت الحسين
والموضوع دا جاينو بالتفصيل انت قايلاني بخليهم يورموا لي بطني ساي كدا
البوستك ليك يا بنت الحسين وللجميع اخدي راحتك بالكامل
بعدين رمضان دا زاتو بدا يدخل في العضم البوست بكون عايز ليهو نفرين ثلاثة
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: حمد عبد الغفار عمر)
|
خالد حاكم رمضان كريم
Quote: للاسف الشديد الفول ذاتو شمالية الجنسية !
فى خلاوينا فى الشمالية التلاميذ بياكلوا الفول بالقراصة! |
ياخي ما دام الأسف نشيل منو الجنسية طوالي
الفول بالقراصة دا انا مرة جربتو ما بطال بمشي
بالمناسبة ليك علاقة بناس حاكم حلفا القديمة؟ تحديدا / عبد الرحمن محمد حاكم المحاسب
لو حاصل اديني خبر مغروض في عبد الرحمن دا
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: حمد عبد الغفار عمر)
|
حمد وضيوفو الكرام
رمضان كريم و وتصومو تفطرو على خير
قراصتكم والله خلتنى اجرى واتجارى عشان اغير برنامج الصحن الرئيس بتاع اليوم
من شفت صورة خضر الطيب وتوووشك على المطبخ وعملت الدمعه
خصوصا امس فاطره معانا قريبتنا من البلد ومازن ولدى حنكوش زيك ياحمد
شرب شوربه وشال ليه قطعة من الفطائر المره قالت ليه يا ولد ما تاكل اسى ده اكل رجال ده
هناك الرجوله معناهالازم تضرب القراصه
ضحكتنى شديد مريم بت الحسين فى وصف القراصه وعحنها بالمقاسات وكبايتين دقيق
ومضرب البيض والباكنج باودر
ياخى دى قراصة حناكيش
القراصه هناك بس تشنقى كمك وتكبى الدقيق من المجوز لمن تفترى
وبالخرتوش
تعرفى المجوز يا مريم
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: فتحية شامي)
|
مراحب نادر النور رمضان كريم
Quote: (عرب جزيرة وتركين تجي كيف)
أها في الفترة الاولى كنت بمر بالمأساة المريت بيها انت لكن تاني اتعودنا والمدام كمان اخدت المقادير على الطريقة الدنقلاوية |
ما بتجي، أنتو خلاص فات فيكم فوات وطلعتوا من المعنى
ومبروكة عليكم سفارة تشاد دي
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: حمد عبد الغفار عمر)
|
أهلا يا أحمد بن عوف
رمضان كريم
Quote: القراصة دي انا غيرت ليها الطاحونة عديل من الخبر مشيت لواحدة في الدمام
وعلمت ليها تست بالطوة وما نفعت، مشيت جبت لي صاج بتاع كهرباء مخصوص، والله مخصوص
ما بسوي فيهو حاجة الا القراصة لقيتو الوحيد البجيب ليك السماكة مع المساحة المطلوبة
وما خلينا دقيق ما جربناهو عشان يجيب الاتنين سنتي وفي نفس الوقت نجيضة من جوه
وانا اساسا شايقي من جهة الاب وحلفاوي من جهة الام، والاتنين ناس قراريص سااااكت
|
والله انت مورط ورطة كبيرة مع القراصة دي ولا بتتحاول إنك تتطلع منها
وأقول ليك حاجة لو عملت السبعة وذمتها ما بتصل للمستوى الأصلي
لأنو الـ Texture المحبب والبنطوي على التماسك والمرونة والطعم مع بعضهم دا، الناس اتوصلوا ليهو بعد تجارب مريرة
تحديدا شكل الصاج نفسه وباقي العدة ومستوى النار وفترة الإنتظار وطعم الدقيق نفسه بتاع السودان دا ما بتلقا هنا . ودا بظهر ليك في أول محاولة قطع ليها بتحس بالفرق في يدك
انا ما بقدر أفتي في القراصة لكن أنا للآن ما لقيت كسرة في السعودية كيفتني من حيث الشكل والطعم مجرد تأدية واجب وإني أكلت كسرة بس
ياخي صاج الكسرة في بيتنا ياهو هو من ولدونا لحدي ما طلعنا من البيت دا من شدة الأستعمال وكمية الطايوق الاتمسح بيها بقى ما بستقبل أي شيء غير كسرة
خلاص
لكن نقدر مثابرتك ومحاولاتك الدؤوبة
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: حمد عبد الغفار عمر)
|
Quote: اخونا خالد حاكم... كدي تعال اشرح لي قصة القراصة الما مخمّره دي كيف، لانه نادر عذبني عذاب بي الموّال ده... رغم انه طريقة القراصة دي جبتها من اخته عن والدته... ! هي انا لما اعملها ما بتكون خميرة... يعني ما بخليها تطول كتير... ولو الجو حار اول ما احس بيها فارت بسيط كده برميها.... اها الما مخمره كيف؟ جربتها من غير خميرة، والله لستك عربية بس!
|
مريم
سلامات
التخمير بحرارة الجو هو التخمير الطبيعى .. وفى وجهة نظرى اجود انواع التخمير !
بالنسبة للقراصة المامخمرة ( الفطيرة ) اجود انواعها بتعتمد على دقيق القمح البلدى الغير مغربل و المطحون فى طواحينا البلدية وهذا النوع من الدقيق غير متوفر فى بلدان المهجر , وفعلا زى ما قلتى القراصة ( الفطيرة ) المعمولة بنوع دقيقكم لستك عربية !
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: خالد حاكم)
|
فى نوع بتاع قراصة معروفة عند الدناقلة والمحس فى زول اكلها او سمع بيها ؟
تسمى ( GROUP KABID ) وهى قراصة لدقيق القمح مع البسلة 0 ( تخلط القمح مع البسلة وتطحن )
هى قراصة غير موجودة بصورة يومية مثل القراصة العادية !
تصنع فقط عند الطلب وتتاكل فقط مع الخدرة المفروكة والويكة المفروكة والناشفة بانواعها!
قراصة كانت مرغوبة ومطلوبة عند الاجيال السابقة ولا وجود يذكر لها عند الجيل الحالى !
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: خالد حاكم)
|
مرحبتين فتحية شامي ورمضان كريم
Quote: القراصه هناك بس تشنقى كمك وتكبى الدقيق من المجوز لمن تفترى
وبالخرتوش
تعرفى المجوز يا مريم |
دا الكلام
بس زي قراصتك دي لو وقعت في نوعنا دا ياها المضيعاه
ومن هسة لو الظروف جابتني الأمارات تسمحي لي من زيارتكم
ما بقدر والله
شكرا لزيارتك واصلي الشرح
| |
|
|
|
|
|
|
|
|
|
Re: يا ناس الشمالية بتبالغو (توجد قراصة) (Re: كمال عكود)
|
أهلا كمال عكود رمضان كريم
| Quote: يا حمد ياخي القراصة دي نحن وكت ما نفطر بها نوتب ، بتعرف الوتيب؟؟ كل التفاتيف الباقية دي ما تدخل الراس |
بعرفو الوتيب ، مش ياهو كتلان الحيل والذهللة ؟
لكن يا كمال الحصرية والاتجاه الواحد دا مشكلة خصوصا لما تتطلع من المنطقة
تسلم ياخ
| |
|
|
|
|
|
|
|
| |
حمد عبد الغفار عمر
فايزودالقاضي
Zomrawi Alweli
محمد عبد الماجد الصايم
بكري الخير
الشاذلى خيرى عبد الله
omer osman
معاوية الأرباب
MOHAMED EL-BEELI
خضر الطيب
Rawia
Al-Shaygi
الشفيع وراق عبد الرحمن
حسين نوباتيا
مريم بنت الحسين
بدر الدين احمد موسى
Ashraf el-Halabi
أحمد ابن عوف
نادر النور آدم
كمال عكود
فيس بوك
تويتر
انستقرام
يوتيوب
بنتيريست