|
|
 سيول و امطار...كارثة اخرى في الطريق؟
|
لم تتوقف الامطار الغزيرة عن الهطول منذ ماقبل التاسعة مساء و حتى الان 4.47 ولا يبدو انها ستتقف قريبا
لذا فالكارثة قادمة قادمة في الخرطوم ومعظم اواسط السودان
ولا يوجداي نوع من التحذير رقم ان صور الاقمار الصناعية قد اظهرت الوضع قبل زمن كافي (الجماعة شغالين في التلفزيون غنى و رقيص وفي نيالا رصاص)
ربنا يكضب الشينة
المتأثرين هم فقراء بلادي الذين هم معظم سكان العاصمة
سارفع صورة الاقمار الصناعية
|
|
 
|
|
|
|
|
|
|
|
Re: سيول و امطار...كارثة اخرى في الطريق؟ (Re: Nazik Eltayeb)
|
سلامات دكتور قرشي و رمضان كريم
كنت عايزة اقول انو مفروض يكون في تحذير للناس و ارواح الناس ما لعبة بعدين اتذكرت قتل الاطفال في نيالا بما يعني ان ارواح السودانيين هي اخر اهتمامات هذ الحكومة بل هي تعتبرها رخيصة.
نمشي نقرا في الدار بعد دا اخبار من شاكلة (موت طفلة عندما انهار المنزل في مدينة الفتح و سقوط رجل مسن في بئر ولا مجرى مائي وهو قادم من صلاة التراويح بسبب الامطار في الحاج يوسف و موت اسرة لانهيار المنزل في الكلاكلة).
| |
|
|
|
|
|
|
|
|
|
Re: سيول و امطار...كارثة اخرى في الطريق؟ (Re: Nazik Eltayeb)
|
سلام نازك
يبدو ان فصل الخريف داهم المحليات فجأة كالعادة. وأقل شئ يمكن فعله من جانب المحليات هو حفر مجارى لتصريف مياه الامطار ولو فى الشوارع الرئيسية.
ولا يحتاج هذا الامر لميزانية ضخمة أو مجهود كبير، لكنها اللامبالاة والاستهتار.
| |
|
|
|
|
|
|
|
|
|
Re: سيول و امطار...كارثة اخرى في الطريق؟ (Re: عبدالكريم الامين احمد)
|
شكرا نازك الطيب
وربنا يفرج الكروب على شعبنا.....
ويا اخي د.ام بده صحيح ما اوردته...ولكن
Quote:
سلام نازك
يبدو ان فصل الخريف داهم المحليات فجأة كالعادة.
وأقل شئ يمكن فعله من جانب المحليات هو حفر مجارى لتصريف مياه
الامطار ولو فى الشوارع الرئيسية.
ولا يحتاج هذا الامر لميزانية ضخمة أو مجهود كبير، لكنها اللامبالاة
والاستهتار. |
ليس فقط اللامبالاة و الاستهتار بقدر الانشغال بقمع شعبهم و البطش بهم.
| |
|
|
|
|
|
|
|
|
Re: سيول و امطار...كارثة اخرى في الطريق؟ (Re: Tragie Mustafa)
|
كنا (في كوستي) ننظم الحملات لإعادة حفر الخيران قبيل بدء موسم الخريف
جزء من العمل بالتعاون مع المجلس البلدي والآخر بإرشاد من كبار السن من سكان الأحياء
ولذلك كان نزول المطر نعمة ومتعة
عشان كدا حقو الناس تعتمد على نفسها وما تنتظر الحكومة
عادي ممكن يوزعوا خطبة على أئمة المساجد تقول ليك: لا يعلم نزول المطر إلا الله
مش هي حكومة رسالية إسلامية وما عايزة جغمسة في الدين بعد الانفصال ؟
رمضان كريم يا نازك
| |
|
|
|
|
|
|
|
|
|
Re: سيول و امطار...كارثة اخرى في الطريق؟ (Re: معاوية الزبير)
|
سلام أخت نازك ورمضان كريم
شكرا على التنوير بي أحوالنا البائسة ...وعجزنا الكبير عن فعل أي شئ ..رغم
أن إرادة الشعوب لو صحت ما في شيتا صعب بإذن الواحد الأحد ..
Quote: نشر بتاريخ الثلاثاء, 31 تموز/يوليو 2012 13:00
غرفة عمليات للتدخل العاجل لمعالجة تصريف الأمطار بالخرطوم
الخرطوم: البصير - هبة - هادية
تعرضت أرجاء واسعة من ولاية الخرطوم لأمطار غزيرة مساء أمس الأول وفجر أمس، تسببت في إنهيار (27) منزلاً شمال
أم درمان إنهياراً كاملاً، وإنهيار (26) منزلاً إنهياراً جزئياً. وقال اللواء عبد الله عمر مدير شرطة الدفاع المدني بولاية الخرطوم
إن منطقتي الجرافة والنوفلاب شمال أم درمان تأثرتا بسيول قادمة من غرب أم درمان لوقوعهما في مجاري الخيران ،
مشيراً لوقوف غرفة طوارئ الخريف على حجم الأضرار الناجمة من تلك الأمطار والسيول، وأكد مدير الدفاع المدني
بولاية الخرطوم على عدم وجود إصابات أو وفيات وسط المواطنين. وناشد أولياء الأمور ومديري المدارس بالحرص على
مراجعة توصيلات الكهرباء، وتنبيه التلاميذ من الإبتعاد عن الجدران المبللة حتى لا يتعرضون لإصابات الكهرباء.
وفي ذات السياق كونت ولاية الخرطوم غرفة عمليات مركزية تحت إشراف وزير التخطيط العمراني والبنى التحتية،
وغرف على مستوى كل محلية من محليات الولاية السبع، لمعالجة الصعوبات التى تواجه الولاية فى تصريف مياه أي
أمطار تهطل في الولاية، وتزيد كميتها عن (15) ملم عبر شبكة المصارف الحالية، وأكد والي الخرطوم عبد الرحمن الخضر
أن مهمة هذه الغرف هي التدخل بالآليات التي وفرت لها في تصريف المياه التي تتراكم في الشوارع والمنخفضات.
وأشار إلى أنه لا يمكن تغطية كل الشوارع لذلك يجب إعطاء هذه الغرف مهملة (24) ساعة حتى تتمكن من تصريف المياه.
وقال الخضر في سياق تعليقه على الأمطار التي هطلت فجر أمس وتأثرت بها أجزاء واسعة من الولاية خاصة شمال بحري،
قال إن هذا يعدّ عملاً إسعافياً وإن العمل الإستراتيجي هو إنشاء مصارف خرصانية ثابتة بدأت فيها الولاية،
لكنها تحتاج من (6) إلى (7) سنوات حتى تكتمل.
|
الله يطمنك يا الخضر ...يعني تاني ناوين تقعدوا ستة ولا سبعة سنوات ؟؟؟ طيب التلاتة وعشرين الفاتو ديل
ليه ما عملتو فيها مجاريكم دي ؟؟ حبكت هسة بعد ما ضربكم الفلس ...من وين بالله عليك ؟؟
| |
|
|
|
|
|
|
|
|
|
Re: سيول و امطار...كارثة اخرى في الطريق؟ (Re: على ميرغني)
|
يا دكتور امبدة رمضان كريم
المحليات دي قصتها قصة مع الخريف قصة رمانسية ياخ دا حب اذلي و جفوة و صدود نظام (جيتك وفي انتظار عينيك كملت الصبر كلو) مع الاعتذار للاغنية
خلينها االاحياء الطرفية اهي منسية وناسا منسيين
شفت نص الخرطوم والسوق العربي؟ الصورة التحت دي لشارع علي عبداللطيف امام الخطوط السعودية صباح اليوم
يعني محل الطيارة بتقوم و الهناي بنوم
| |
|
|
|
|
|
|
|
|
|
Re: سيول و امطار...كارثة اخرى في الطريق؟ (Re: Nazik Eltayeb)
|
ودا النيل في امدرمان صباح اليوم يعني لحدي 15 اغسطس قمة الفيضان يا غرقنا يا مرقنا- في زول عارف منسوب النيل الزرق محطة الديم سجل كم؟
غايتو بحيرة تانا كلها مطر.
عايزين مطرة واحدة تاني تزيد عن المائة مليمتر عشان نخش على كارثة خريف 1988 تانية
| |
|
|
|
|
|
|
|
|
|
Re: سيول و امطار...كارثة اخرى في الطريق؟ (Re: Nazik Eltayeb)
|
Quote: واصلي في الفوركاست و دق نواقيس الخطر
في بلادا صار التخبط والعشوائية هي سيدة الموقف علي مستوي التجهيزات للخريف والامطار وعلي مستوي كل شي اخر
|
يا كيكي يا هندسة رمضان كريم
نفركس شنو و نخلي شنو....الله في
عارف مش الخواجات قالوا when you are in hole, stop digging او كما قال
لكن جماعتنا عندهم نظرية ( اذا كنت في حفرة فواصل الحفر فقد تخرج من كالفورنيا بالناحية التانية من الكرة الارضية)
| |
|
|
|
|
|
|
|
|
|
Re: سيول و امطار...كارثة اخرى في الطريق؟ (Re: Nazik Eltayeb)
|
Quote: وربنا يفرج الكروب على شعبنا.....
|
العزيزة تراجي دعوة زي دي في رمضان من ام مكلومة في نيالا ولا طفل صغير في جبال النوبة ولا معدم في ضواحي العاصمة تصادف لحظة اجابة ينزع الله الحكم من الفاشلين ديل نزع في رمشة عين.
الله في و شعبنا باذن الله في وحنغير
| |
|
|
|
|
|
|
|
|
|
Re: سيول و امطار...كارثة اخرى في الطريق؟ (Re: Nazik Eltayeb)
|
اخي معاوية المدير
عارف العمل الطوعي و منظمات المجتمع المدني مفروض تكون ادوات حقيقية في تغيير الواقع لو ناس شارع اتعاونوا مع بعض صرفوا موية شارعهم لو ناس حلة صرفوا موية الخور لو و لو
لكن كيف؟
الناس مشغولة في المعايش مافي زمن تقعد مع بعض ذاتو و منظمات المجتمع المدني الخرطومية كمثال مقيدة باجراءات حكومية واشراف لصيق من مفوضية شنو كدا الانساني و نفس شلة الجماعة تجي كل سنة تصبح هي المسئولة عن الجمعية الفلانية وهم اما اصحاب غرض خاص او جماعة ذوي نية حسنة لكن كباااار في السن خالص وعايزين اتسلوا ويقضوا وقت او يفتقروا للغة البتقربهم للشباب وهم عماد منظمات المجتمع المدني الحقيقة
ما تنسا حالة الاحباط العام وسط الشباب و كسير المقاديف بالعطالة وغياب الرؤية .
غايتو انا ناوية افتح يوم بوست عن منظمات المجتمع المدني الديكورية دي
| Quote: عادي ممكن يوزعوا خطبة على أئمة المساجد تقول ليك: لا يعلم نزول المطر إلا الله |
هههههههههه اصوا ما بعيدة عليهم ما بعد ماضيعوا 26 مليار حقت البترول جاء على عثمان في افتتاح مسجد كادقلي و قال ليهم الغنى و الفقر من الله
| |
|
|
|
|
|
|
|
|
|
Re: سيول و امطار...كارثة اخرى في الطريق؟ (Re: Nazik Eltayeb)
|
اخي ابراهيم فضل الله رمضان كريم
وشكرا على الاقتباس المهم
عارف الجريدة جابت مشاكل مطرة يوم 30 مطرة يوم 1 اكيد عملت عمايل بس المعلومات لسه ما اتوفرت
Quote: لله يطمنك يا الخضر ...يعني تاني ناوين تقعدوا ستة ولا سبعة سنوات ؟؟؟ طيب التلاتة وعشرين الفاتو ديل
ليه ما عملتو فيها مجاريكم دي ؟؟ حبكت هسة بعد ما ضربكم الفلس ...من وين بالله عليك ؟؟ |
كان عليهم ناويين يقعدوا ستة ولا سبعة قرون (يود أحدهم لو يعمر ألف سنة وما هو بمزحزحه من العذاب أن يعمر)
لكن شعبنا دا نحن بنراهن عليه وشعبنا تمام وواثقين منو.....شفت صور الشباب و الشابات صغار السن و خطواتهم الواثقة في مظاهرات نيالا السلمية
اها الصور دي انا من شفتها عرفت انو الشعب دا حينتصر
| |
|
|
|
|
|
|
|
|
|
Re: سيول و امطار...كارثة اخرى في الطريق؟ (Re: Nazik Eltayeb)
|
اخي على ميرغني
Quote: (لذلك يجب إعطاء هذه الغرف مهملة (24) ساعة حتى تتمكن من تصريف المياه. )
الخضر طالب المهلة دي من الشعب ولا من المطرة
يا اخي الناس دي صراحة شعورها اتبلد عديل كدا
هو الزول دكتور في شنو |
من المطرة ياخ من المطرة الما عندها احساس وولا ذوق ولا اتيكيت دي وما بتسأذن جاية خاشة توووش ولاية الخضر بلا احم ولا دستور
غايتو قصة الشعور اتبلد دي ينظر فيها لانو عندي انا هو اصلا مافي
اها جينا لدكتور في شنو و مهندس في شنو دا سال دا يا على ياخوي؟
ممكن تقرا سنتين هندسة وما تكمل وتبقا باش مهندس فلان وممكن تعمل دكتوراة في النحو وتبقى وزير صحة ودكتوراة في الطب وتبقا وزير اتصالات .مين دا القال ليكم انو الوزير لازم يكون عفي مجالو. الوزير دا وظيفة سياسية قصد منها الترضية او كما قال معجم الفاظ المشروع الحضاري
| |
|
|
|
|
|
|
|
|
|
Re: سيول و امطار...كارثة اخرى في الطريق؟ (Re: Nazik Eltayeb)
|
وامغستى رحل تلوت الليل
ودى وزارة الاشغال
عليها كل الرحمة
فى زمن جميل كنا بنشوف عمال الاشغال بنضفوا فى المجارى من شهر اربعة مرات
ياحليل زمان يا نازك لمن البلد كانت مملوكة للناس مش للافراد
الماضى جميل عشان كدا الواحد ماعاوز يطلع منه
وحات الله يا نازك عشنا زمن كانت الشوارع يتم غسلها يوميا
عمال الكهرباء يبدلون الانوار ال"حرقانة " كل ما شاهد احدهم واحدة مطفية
الشوارع لمن تنزل المطرة ما كنا بنحس بيها
البيوت نفس الشى
المدارس ما بتتاخر لحظة الا ايام نميرى الاخيرة
الشؤون الهندسية فى كل محلية من محليات البلد من نمولى لغاية حلفا
ومن الجنينة لغاية بورتسودان
كلها بتكون موجهة لمصلحة المواطن الكان ما بدفع ضرايب قدر الان
يعنى اتضاعفت عليهو المهام ضرايب ومافى خدمات
مغسة تشق وبلد عدمانة اسم الوجيع
| |
|
|
|
|
|
|
|
|
|
Re: سيول و امطار...كارثة اخرى في الطريق؟ (Re: محمد ميرغني شاطر)
|
الاستاذة الرائعة سلمى الشيخ سلامة
كل الشعوب بتحلم بالمستقبل الا نحن بنحلم بالماضي
اعتقد نحن اكثر ناس بنقول كنا و كنا
لمن كنا صغار في الروضة زمان كان في نشيد كنت حافظاه شديد بقول (للمستقبل نحن بنعمل للايام الحلوة الجاية ) وظللت اتسال عن المستقبل مذاك الحين ومضت السنون ولا جا مستقبل زي الناس لا جات ايام حلوة الا بقدر انتقاص الحزن فيها بمقدار فاطلقنا عليها مجازاً ايام حلوة
مش تحسي ان حظ الشعب السوداني دون شعوب الارض هو الاقل ؟ حتى تلك الشعوب التي تعاني من كوارث حروب و ازمات لهم ايام جميلة قادمة الانحن(دا حظ شنو النحس دا البلد بالجد منحوسة) الحكاية طولت شديد
مثلك سابكي وزارة الاشغال و المخازن والمهمات و النقل الميكانيكي و النقل النهري و سودانير و السكة حديد ومشروع الجزيرة و الموانئ و الخدمة المدنية الزي الساعة.
الناس الدايرة ترجع للخلف لانو الامام مسدود
خلونا نكسر الحيطة يمكن الدرب يبين و الشمس تطلع و نشم الهواء
| |
|
|
|
|
|
|
|
|
|
Re: سيول و امطار...كارثة اخرى في الطريق؟ (Re: Nazik Eltayeb)
|
Quote: لا لعبة ولعبة كبيرة ومسلية يانازك ..
هم بكتلو في الشعب كل يوم بسلاحهم فا بالك لم كمان تساعدهم الكوارس الطبيعية ..
اتحاد الحكومة مع القدر ..
وزي ما قالو في الفيس بوك .. اكيد المعارضة والمتمردين صلو صلاة الإستزغى عشان يخربو .. |
اخي محمد ميرغني شاطر
نعم اوافقك تماما ان ارواح الناس في البلد دي لعبة (رغم انها يجب ان لا تكون) ودا امر ثبت بادلة لا تحصى ولا تعد و القائمة تطول
ادوية فاسدة- مواد بناء فاسدة -طرق غير مطابقة للمواصفات- رشاوي في الهينة و القاسية- مقاولات وهمية لاشخاص وشركات خاصة غير مؤهلة.
نرجع لمثال المجاري التي تحفر كل سنة للامطار في اخر لحظة بدون مواصفات بدون اشراف بدون ما يزال التراب عن جانبها لتشكل هي نفسها خطرا على السكان ثم يعاد حفرها الخريف المقبل بقروشنا (ساقية جحا بس).
الحكومة دي عندها عدة طرق للقتل: جوعا وهي الطريقة المفضلة - حربا ودي طريقة الحكومة البتحبها شديد لانو فيها حفلة بتاعة رقيص وساوند سيستم قبل المعركة- وبعدين القتل البطئ وممكن نسميه القتل فساداً وهي الاكثر استخداماً لانها طريقة لامن شاف ولامن دري
الله في
يطول روحنا وروحكم
| |
|
|
|
|
|
|
|
|
|
Re: سيول و امطار...كارثة اخرى في الطريق؟ (Re: Nazik Eltayeb)
|
صحيفة الانتباهة
وفاة امرأة وانهيار أكثر من «100» منزل جراء الأمطار بالخرطوم
التفاصيل
نشر بتاريخ الجمعة, 03 آب/أغسطس 2012 13:23
الخرطوم: هبة عبيد
انهار أكثر من «100» منزل بمحلية أمبدة متأثرة بالأمطار التي هطلت أمس الأول واستمرت حتى صباح أمس. وأكد محمد علي قناوي النائب بالمجلس التشريعي أن هطول الأمطار بغزارة أدى إلى انهيار عدد من المربعات بمحلية أمبدة، منها دار السلام والحلة الجديدة وأمبدة مربع «10» والبقعة «38» وحمد النيل، ووفاة امرأة وإصابة أخرى إصابة بالغة نقلت على إثرها للمستشفى، وقال إن مياه الأمطار ظلت باقية في الشوارع بسبب عدم التصريف، الأمر الذي جعل العديد من المنازل بالمحلية مهددة بالسقوط.
| |
|
|
|
|
|
|
|
|
|
Re: سيول و امطار...كارثة اخرى في الطريق؟ (Re: Nazik Eltayeb)
|
دمرت عشرات البيوت أمطار الخرطوم.. السقوط فى امتحان الجاهزية
08-04-2012 08:22 AM
تقرير: محمد حمدان
تعرضت أرجاء واسعة من ولاية الخرطوم لأمطار غزيرة بدأت في الهطول منذ ول واستمرت حتى الساعات الأولى من فجر أمس الاول وتسببت الأمطار المتفرقة في تعطل حركة السير بعدد من شوارع محليات الخرطوم، بجانب تسببها في انهيار (27) منزلاً شمال أم درمان انهياراً كاملاً، وانهيار (26) منزلاً انهياراً جزئياً، فيما تمكنت الأمطار التي بدأت في الهطول منذ مطلع الأسبوع الجاري من فضح شوارع الخرطوم التي (غرقت في الموية) وأكدت ضعف استعدادات حكومة الولاية لمجابهة فصل الخريف على الرغم من تصريحاتها المتكررة باستعدادها المبكر للخريف وتشكيل لجنة طوارئ لها، وفي صبيحة أمس، رصدت (السوداني) عدداً من عربات الشطف تجوب عدداً من شوارع العاصمة بغية شطف المياه من الشوارع والميادين.
انهيار كامل
ودمرت الأمطار التي هطلت أمس الأول أكثر من 300 منزل بالريف الجنوبي ، فيما جرفت السيول أكثر من (100) منزل بأمبدة. وقال رئيس لجنة قرية التكامل بالريف الجنوبي أم درمان رجب محمد بشير لــــــ(السوداني) إن الأمطار الأخيرة بالخرطوم دمرت الكثير من المنازل في قرى كرور والعامرية والصالحة جادين وأكد انهيار أكثر من 300 منزل انهياراً كاملاً بقرية التكامل مشيراً إلى أن إغراق المنازل نتج عن عدم وجود فواصل بين المشاريع الزراعية وعشوائيتها والمجاري ما أدى إلى إغراق المنازل" وكشف رجب عن دفعهم بمذكرة إلى معتمد أم درمان تطالب بتكوين غرفة طوارئ لدعم وإغاثة متأثري المنطقة مناشداً السلطات بتوفير خيم لإيواء المتأثرين وعمل مجارٍ لتصريف المياه.
الوقوف على الخسائر
وفي السياق وقف والي الخرطوم د. عبدالرحمن الخضر على عمليات تصريف مياه الأمطار منذ مساء الأمس الأول وحتى الأمس بمتابعة العمل الذي تقوم به غرفة العمليات المركزية بوزارة التخطيط والبنى التحتية والعمل الذي قادته المحليات خاصة تلك التي تأثرت بالسيول القادمة من مناطق بعيدة.
وقال نائب المدير العام لهيئة الطرق ومصارف الأمطار المهندس عبدالقادر همد إن كمية الأمطار تراوحت ما بين (27 ـ 53) ملم وأكد أن المعالجات توجهت بصفة أساسية للمناطق الأكثر تأثراً مع إعطاء أولوية لمداخل الجسور النيلية والأنفاق وتصريف المياه من الشوارع الرئيسة التي تسلكها وسائل المواصلات وهي شارع الجامعة والجمهورية والطابية والسيد عبدالرحمن والنجومي وشارع النيل وحدائق السلام وشارع الكومنولث بالإضافة إلى شطف المياه من مواقف المواصلات.
أمبدة تغرق
أما في أم درمان التي تضررت أجزاء كبيرة منها بالأمطار كشف معتمد أمبدة عبداللطيف فضيلي تأثر مائة منزل بأمبدة جراء السيول مشيراً إلى أن محليته بذلت جهداً مقدراً في فتح المصارف وشطف المياه من مواقف المواصلات والمرافق التعليمية والصحية ودور العبادة .
من جهته أوضح معتمد كرري د. ناجي محمد علي أن المحلية وجهت كل جهودها لتصريف المياه من الشوارع الرئيسية والمناطق الصناعية والأسواق وأقرّ المعتمد أن الميادين داخل الأحياء التي لا توجد لها مداخل للمصارف بدأ التعامل معها بنظام آبار التصريف وسيتواصل حفرها باعتبارها الوسيلة الوحيدة لمعالجة مثل هذه المواضيع مشيراً إلى أن فرق التدخل المكونة من 50 فرداً ساهمت في فتح المصارف والتأكد من سريانها نحو مصباتها.
مناشدة للأهالي
وفي بحري ناشد المعتمد المهندس طارق حبيب الله مواطني أحياء الدروشاب والسامراب وأم القرى بإزالة الحواجز والمخالفات والاعتداءات التي تمت على مصارف المياه وعرقلت الانسياب الطبيعي للمياه. وقال المعتمد إن المصرف الرئيسي الذي تمت تكسيته بالحجر مؤخراً يصب عند النيل بمنطقة الكدرو ساهم في تجنيب منطقة بحري شمال كميات المياه القادمة من منابع السيول في أقصى الشرق.
وفي السياق توقعت هيئة الإرصاد الجوي أن يظل الجو خريفي طوال يوم الإثنين بالخرطوم وأن تكون درجات الحرارة منخفضة أيضاً. وأوضحت الإرصاد في تقرير أن كميات الأمطار التي هطلت تعتبر كبيرة وأن توزيعها كان جيداً.وقال التقرير إن الكميات في شندي بولاية نهر النيل وصلت إلى 25 ملم، وفي الخرطوم إلى 12.3 ملم وكسلا 3 ملم، وحلفا الجديدة 36 ملم، والدويم 22.4 ملم، والقضارف 6.8 ملم.وتتوقع الإرصاد أن تهطل أمطار الإثنين بكميات كبيرة بمدني والقضارف وسنار وكردفان هذا بجانب هطول أمطار أقل في مناطق أخرى متفرقة من البلاد.
عطلة إجبارية
وتسببت الأمطار التي هطلت بغزارة يوم أمس، في عدم تمكن الموظفين والعمال من الوصول لأعمالهم في مواعيدهم المحددة، نسبة لرداءة الطرق الرئيسية وانعدام المواصلات، فيما منحت عدة مدارس بشقيها (الأساس والثانوي) طلابها عطلة أمس، وفضلت بعض الأسر عدم إرسال أبنائها للمدارس خوفاً عليهم من رداءة الطرق واحتمال تهدم الجدران عليهم أوتعرضهم لضربات الكهرباء، لكن تلاميذ المدارس الذين دخلوا في عطلة إجبارية عن الدراسة فضلوا (العوم) في الميادين التي امتلأت بكاملها بالمياه.
السوداني
| |
|
|
|
|
|
|
| |
Nazik Eltayeb
محمد قرشي عباس
ombadda
عبدالكريم الامين احمد
Tragie Mustafa
معاوية الزبير
ibrahim fadlalla
سلمى الشيخ سلامة
محمد ميرغني شاطر
فيس بوك
تويتر
انستقرام
يوتيوب
بنتيريست