وصلتنى هذه القصيدة من شاعر حلمنتيشى يعتذر لكم بشدة عن ركاكتها وخروج بعض الكلمات عن النص وأنشرها "بضبانتها" إيمانا منى بحرية الكلمة فى زمن"لحس الكوع" ووفاءا لكنداكات السودان الماجدات وأولى ملكات النيل والتاريخ، واحتراما لأجيال قرفنا والشرارة وأطفال القمامة وأطفال المايقوما واحتقارا لظلال عمارات لص كافورى واحتراما للاعبى الدافورى وستات الشاى والكسرة وبنات "قدر ظروفك" فى هذا الظرف العصيب والصعيب... اليهم جميعا كلفنى الحلمنتيشى أن أهدى اليهم قصيدة "لحس الكوع فى زمن الجوع".....
يا رب محمد ورب يَسوع فى أى كتاب "لحسُ الكوع"؟ فى أى حديث لحس الكوع؟؟ من أى أديم جاء "أبو العفين"؟ وكيف خلقتم شذاذ الآفاق؟؟ وابن الجاز وإبن عصاة؟؟ وراقص كافورى المشهور ونذير الشؤمِ بشير اللؤم وتابعه الأول طه وابن العتبانى واسامة سدود وأخيه قوش وكل عتلٍّ فى الكيزان .......... لك يوم يا نافع يا جربوع ما دام علمتنا لحس الكوع وخاف من شكلنا شبح الجوع يا ربى يا رافع للمرفوع ارحم شعبى من لحس الكوع لا تجعل شعبى ذليل مفجوع الصبر على راسك مطبوع جائع وحسابك ما مدفوع مجرور مكسور بالجوع مرفوع مفعول فى سوق صرف الممنوع يا صوت البحة وغير مسموع يا نَفَسَا أخير منو المقطوع يا دمعتو ليست أى دموع ويفوق فى بكاهو بكا الموجوع أحمد ربك من لحس الكوع يا الخيرو مبعزق شكل ونوع والناس سواسية عند الجوع والجائع يعرف لحس الكوع والحاكم صاحب الكوع والبوع يرقص فى قصرو وانت تجوع والظلم يعم فى نجوع ونجوع وبيوت أشباح فى كل ربوع يا ليل الشعب عرق ودموع يا حظ الشعب العانى الجوع الجائع أخير منو الملسوع حلم الجوعان كسرة ومنقوع كافورى الخير دفق كام نوع كافورى نيون.. كافورى شموع كافورى.. لصوص.. كافورى ضبوع كافورى كلاب ... كافورى سبوع كافورى بنوك.. كافورى فروع كافورى النهب الغير مشروع كافورى بيان عسكر مسموع جاييك طوفان شعبى الموجوع حيجيك الشعب جموع وجموع ويوريك كيفن لحس الكوع يا رئيس الكوع يا صاحب البوع لو تسمح حُوش نافع الجربوع فالشعب كفر من جوعو الجوع ********* كتاحة يا نافع كتاحة يا بقرة طه الضباحة وريالة النعجة النطاحة وإذاعة حاحا النحناحة وصحيفة الخال الوحواحة وفحيح البمبان فى الساحة وكيزان كافورى المرتاحة قفلونا بضبة ومفتاحه فى بيوت مسكونة بأشباحا وكلاب الأمن النباحة والثورة الجاية وكسّاحة كتاحة هامش وسلاحه حتشيل الإنقاذ بالراحة وابو العفين آخرو مناحة كتاحة يا نافع كتاحة يا بقرة حاحة النطاحة ******** ارقص يا بشير شان يومك جايى ونهايتك رحلة الى لاهاى لا تسأل أين؟ متى او why فالمسألة فيها الف هناى والمجرم ليس له هداي ******** برطع مثنى وثلاث ورباع خربانة الدنيا قدودا وساع يا سارق لا يعرف إشباع انهب واهرب لمليزيا كراع او تركيا ذات الصيت والباع لو حوض الرملة بتروى سراع لشبعت شبع كرعت البااااع يا نافع ضار محروم ابداع احفورى وديناصور جعجاع علم شعبك لحس الأكواع حتى تلحس كوعك ملتاع يا نافع ضار يا زول بلباع يا ناهب خيرنا ويا لباع يا اب قنفد وسط اللمة ضاع يا كوع ناشف وسط الأكواع يا بوم يا شوم يا خروف قال باع يا كُلُعْلُعْ كُعْ يا كُعْ يا كاع يا شُرُمْ يا بُرُمْ يا بتاع وبتاع ********** يا الإسمك ناافع لكن ضار دكتور لكن فى الحكم حمار إرهابى خطير وكمان سمسار وجبـــ ان لكن باطش جبار دكتور فى لحس الكوع الحار فكرك أصغر من فكر الفار كان افضل تزرع دوم وشمار من ترمى بلادك جوا النار يا نافع فيك الشعب احتار ********** بلد المليون بقى كم حِتّة زى شدرة وصفقا خلاص حَتّة ورئيسك بقى شيخ الحِتّة يا أعفن فِتْفِت يا فَتّة يا الفقت ابو العفين جِتّة يوم الكنداكة تكون زُغت عفنت وراك مليون حتة ما لايقة عليك الكرفتة يا مُعَفّص يا شبه البطة ودى آخر وقفة ومحطة وآخر فسوة وآخر ظرطة!!! يا *زَلَبَطّة.. يا زلبطة!!!
* زلبطة كلمة مصرية لا معنى لها!!!! حلمنتيشى زعلان من ابوالعفين
*الإعادة لتنوين بعض الكلمات حسب توجيهات الشاعر الحلمنتيشى.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة