إلي رضوان داؤود! شِعْر.. مصطفي مدثر

Quote: رضوان ======= رضوانا دا زولاً صبوحْ. الطيبة لونه. وفيو صدُوح طيراً ببشرنا بجديدْ يا الله غيثك حان هتونُه؟ رضوانا دا زولاً صبوح وكمان شَمُوخ ما طاطا إلاّ عشان يشوف ايدينو فيها القيد حديد ويا حسرة القيد الحديد في زول شَهَر كلمات نُصاح! يا قائل الحق الشريف بلسان صِدِق صوتك بقيف صوت المرابين البِقَع عضمة لسانك أمضى من أخطر سلاح. هل يكسروك حاشاهو مرقك أن يطُق مهما تشتت من رصاصْ هم، لا مناص، الخاسرين. اليوم وباكر وفي الاساس. هل علقوك عشان تقول غير الكلام ولقوك حروفك واقفة في كلمة سلام لقوك مذاكر كيف يكون معنى العدالة وكيف عشان يبقى المواطن فردِ حرْ يتختى ساس. رضوانا قول رضوانا قول هل عذبوك من يا تو دين جابو الكلام من ياتو فتوى وأي راسْ كلْ فتوى ضد إنو المواطن يبقى آمن ويبقى حر هي في الصميم أصلاً حرام. وما أتعسُم هم لا مناص الخاسرين ح يخيبوا هم ح يدوبوا في آفاق شعار يتشالبُم عمق الهتاف وتتبرا إنت من العذاب نتبرا كلنا من جُذام