|
لقينا الباسوورد ..... ضيعت الباسبورت ..شكيتك علي الله
|
بعد مافتحت البوست بيومين ( اخليكي المغصة تكتلني .... ارد عليكي بكري يسحب الباسوورد...) ضيعت الباسبورت..... شكيتك علي الله انا ناقص بلاوي ...؟
شبكتني ليك ... عاوزين ملايات ولازم تغير الفرش والبوهية دي بقت قديمة ... وفي حاجة تانية مابوريكم ليها. المهم التقول بيت ابونا اسبوع كامل وانا يدي قصاد جيبي عديييييل لغايت ماجففت مواردي . المهم..... الولية المطوفشة عاملة فيها نظام نضافة وعيد وكده .... الساعة واحدة ونص صباحا وانا في امان ربي حاكي لي في فيلم علي السوبر موفيز .....! اسمع انا الظاهر قبيل رميت الجواز في الزبالة .....! ياولية قولي بسم الله زبالة شنو .... انتي لسة صائمة ...؟ صائمة شنو يازول بقول ليك الجواز في الزبالة .... انت طرشت ولاشنو ...؟ ياولية انتي شاربة حلو مر ولا شاربة ......!؟ المهم بي ليلي داك قمت جري علي الزبالة الا القي ليك الحاوية ملانة للاخر وكل مااحاول اطلع لي كيس لي بره يدي تغرق في باقي دمعة او ملاح روب وماعارف مكبوس بي جداد ...وده كله هين المصيبة في ريحة الكركم بتاع الهنود..ياخي ده كيماوي عديل كده .. يعني العملية جايطة جوطة شديدة واذا حاولت افضي الحاوية كلها وحاتك عاوز لي اسبوع ....! المهم رجعت السرير وقلت الصباح يحلها الف حلال ....اتاري بعد داك بنص ساعة جات عربية الزبالة وفرغت الحاوية ومعاها الجواز الاخضر الجميل وجواه الماتتسماش وامنية وعبودي وجدو واسيل وتوقيعات بكري حسن صالح وعبد الرحيم محمد حسين وحاجات تانية حامياني ....! وطبعا راجيني التقييييييييييييل مع بدل الفاقد .
عليكم الله دي اعمل ليها شنو........؟ حلوها انتو . هارون دياب
|
|
|
|
|
|