|
|
 Re: ٣٠ يونيو امام البيت الابيض......التحالف الديمقراطي! (Re: ناجي ميرغني)
|
الصحفي القامة سعد الدين إبراهيم يطلب الشعب السوداني يالتقشف
يجب أن نتقشف كمواطنين زي ما الحكومة اتقشفت.. يعني نعمل شنو ؟ يعني بدل نأكل بيتزا وكافيار.. ونحلي بالفاكهة والبسبوسة.. نكتفي بأكل ـ شنو ياربي؟ داير لي حاجة رخيصة ناكلها..؟ نأكل كسرة بي موية مثلاً .. نلقى الكسرة الموية تكون قاطعة.. نلقى الموية الكسره تكون زادت.. طيب نشوف حاجة رخيصة تانية.. ناكل طماطم بالدكوهة.. لكين الطماطم غالي.. ماغالي اشتري نص كيلو.. والدكوة قالوا بتجيب سرطان.. طيب ننساها ناكل شنو؟.. ناكل ويكة؟ ويكة بالرغيف.. عشان الكسرة أغلى من الرغيف؟ وده صاح ياربي.. طيب لفة الكسرة بجنيه.. بتطلع- لو كنت رجل «تُلقامه أي كبير اللقم- خمس لقمات.. ولو كنت لقمتك متوسطة بتعمل سبع لقمات.. يعني اللقمة بدون تمليح تطلع بي عشرين قرش، يعني خُمس جنيه اللقمة مملحه المِلِيح بي تلتين قرش.. تطلع اللقمة بي نص جنيه.. وعشان نتقشف صاح يبقى ناكل باللقمة.. يعني البالغ ياكل في حدود خمس ست لقمات.. الطفل والمسن كفاهم لقمتين تلاتة..
لكن لازم نتقشف أكتر مثلاً لو مرضت- لا قدر الله- ما تتفشخر وتمشي لي اختصاصي يشيل منك ميه وميتين الف.. أمشي لي جاركم الممرض وقول ليهو يادكتور.. انت مابتكلفك حاجة وهو بتريحو.. اتكلم معاهو في حاجات تانية غير مرضك.. الكورة.. الأغاني الهابطة.. وزي إنك اتذكرته فجأه تقول ليهو بالمناسبة يادكتور عندي حموضة وقبضة كدة.. ولواية في بطني.. يقوم يقول ليك عندك نزلة معوية أو أي حاجه.. تقول ليهو مابلقى لي عندك دواء عينات ولا كدة.. إذا اداك خلاص .. إذا ما أداك قول ليهو ماممكن استعمل دوا بلدي.. يقوم يقول ليك المورينجا.. تمشي لي زول زارعا تشيل شوية صفق وتستعملو .. قالوا بتعالج أي حاجة.. كده تكون اتقشفت تقشفاً طبياً تمام التمام.. بعدين لما تدي ولدك الصغير الفي الروضة السندوتش قول ليهو لو صاحبك شحدك قرمه ماتديهو، لأنو القرمة بي خمسين قرش.. لأنو لو ضربته السندوتش بمحتوياتو وضربتها في «القرمه» تطلع بالشي الفلاني.. أما إذا كنت تعبان ماقادر على السندوتش ذاتو.. ممكن تقول للشافع معليش الليله سندوتش مافي لكِن انت عندك كم صاحب.. خمسة ستة.. شيل من كل واحد قرمة.. قرمة ماتزيدا ماتبقى أناني.. وعشان المرة الجاية يديك، وبالطريق دي خمس ست قرمات ياها لو ضميتا مع بعض بتبقى سندوتش.
أما السكر الفقري فدكتور ياسر ميرغني حل لينا المشكلة وقال قاطعوه تعالوا نقاطع السكر وماف مشكلة.. أشربو الشاي مسيخ، فيها شنو يعني كان مافيهو سكر، لو ماقدرت تبلعو شوف واحده تكون عسل عاين ليها وأشرب تلقى السكر المعنوي، وهو أخير من السكر المادي.. أما إذا كنت ماراجل.. فاتفرجي في« مهند» واشربي الشاي المسيخ ببقى حلو جداً.. إذا ماتيسر مهند، فاشربي الشاي وانتي بتعايني لي« راجل المرا » .. مُش قالو حلو حلا ..
المهم هناك ألف طريقه للتقشف، وكده نكون اتقشفنا حكومة وشعب.. وده ح يشجع الحكومة عشان تزيد تقشفا.. لغاية ماتتلاشى.. يعني الوزراء ينقصو.. لغاية مايبقو وزير واحد.. بعدين الوزير ذاتو يستقيل إمعاناً في التقشف، تبقى مافي حكومه خالص والشعب يرتاح.. ده لو فضل شعب..
http://www.akhirlahza.sd/akhir/index.php?opti...-09-40-58&Itemid=136
|
|
 
|
|
|
|
|
| العنوان |
الكاتب |
Date |
| ٣٠ يونيو امام البيت الابيض......التحالف الديمقراطي! | بدر الدين احمد موسى | 06-28-12, 07:53 AM |
| Re: ٣٠ يونيو امام البيت الابيض......التحالف الديمقراطي! | بدر الدين احمد موسى | 06-28-12, 08:03 AM |
| Re: ٣٠ يونيو امام البيت الابيض......التحالف الديمقراطي! | بدر الدين احمد موسى | 06-28-12, 08:44 AM |
| Re: ٣٠ يونيو امام البيت الابيض......التحالف الديمقراطي! | بدر الدين احمد موسى | 06-28-12, 08:58 AM |
| Re: ٣٠ يونيو امام البيت الابيض......التحالف الديمقراطي! | بدر الدين احمد موسى | 06-28-12, 09:41 AM |
| Re: ٣٠ يونيو امام البيت الابيض......التحالف الديمقراطي! | بدر الدين احمد موسى | 06-28-12, 06:50 PM |
| Re: ٣٠ يونيو امام البيت الابيض......التحالف الديمقراطي! | بدر الدين احمد موسى | 06-28-12, 08:58 PM |
| Re: ٣٠ يونيو امام البيت الابيض......التحالف الديمقراطي! | ناجي ميرغني | 06-29-12, 00:34 AM |
| Re: ٣٠ يونيو امام البيت الابيض......التحالف الديمقراطي! | ناجي ميرغني | 06-29-12, 01:00 AM |
| Re: ٣٠ يونيو امام البيت الابيض......التحالف الديمقراطي! | عبدالعزيز حسن على | 06-29-12, 03:38 AM |
| Re: ٣٠ يونيو امام البيت الابيض......التحالف الديمقراطي! | أحمد طراوه | 06-29-12, 04:19 AM |
|
| |
فيس بوك
تويتر
انستقرام
يوتيوب
بنتيريست