سلامات ناظم و شيخي محجوب والشكر استاذنا الجليل دكتور حيدر تعرف يا محجوب قريت المقال علي السريع و احبطني جدا لكن ما دام انت موجود وفي حضرة عزيزنا ناظم سيد الاسم زاتو موجود ممكن نتسامر معاكم ! تعرف بالرغم من انو الدكتور من الناس المجتهدين والملتزمين والمهمومين جدا -لكن اسلوب معالجاتو للقضايا مرات بحس بيها وصفي تعميمي ما داير اتطاول علي قامتو المحترمة لكن المقال دا في تقديري فيهو كتير من التعميمات و المحاولة للوصول للاستناجات او اثبات الفرضيات بسرعة --
المقال عموما شايفو بيساعد علي التنميط وليس اثارة التفكير
اولا لاحظت انو المقال ما عامل تحديد واضح بين عقل "المثقف" و "عقل النخبة السياسية "- ولامن يكون داير يثبت فكرتو عن الخفاض كتير بحاول يستدل بالسياسين والامثلة الساهلة ! وبالرغم من انو النقد هو العملية الاولي في مشروع البناء لكن ما عارف غرام بعض المثقفين بالمصطلحات او المفردات زي "الخفاض الفرعوني" - "النخبة وادمان الفشل" - ما عندي اعتراض علي الوصف و ممكن حسع مفهوم (الخفاض الفرعوني ) تسير بها الركبان و يبقي تنميط لكن تساؤلي : شنو البضيفو المفهوم دا في اثارة التفكير غير الناس تنبذ بيهو بعض ! وبعدين -في تقديري -مرات المقال فيهو كلام عام زي (ومن الواضح أن الإنسان السوداني لم يترك الكثير المكتوب، ولم يظهر ميلا للتفلسف والتنظير) - قصدي هل دي خصوصية الانسان السودان ولة المنطقة كلها
اضافة ماذا يعني (إذ لا يوجد في هذا العصر نخبة فعلت بوطنها مثلما فعلت النخبة السودانية) - في تقديري دا كلام اقرب الي الونسة! علي غرار الشعب السوداني مثلا اطيب شعب او اكعب شعب الكلام الزي دا ممكن نقولوا في الونسات للتضخيم و إعطاء حججنا قوة إقناعية وهمية بدون أي دراسة قصدي هل في دراسة مقارنة لنخب الدول عشان نحدد ؟؟ هو كمفكر شايف التركيز حقو يكون التدقيق وليس الـ( appeal to audience l )
وبعدين ما عرفت العجلة في المقال (اتوقع ان يتصدي بعض المتقعرين لهذا النقد الذاتي ويسمونه:"جلد الذات" . فليكن، هل اوقفتم جلد الفتيات في محاكم النظام) وهل في مشكلة لو واحد صنف مقالو علي انه جلد الذات ! وليه الخوف للتسمية المستعجلة للنقاد بالمقعرين و المساءلة بايقاف جلد البنات ! يعني نقد المقال او الفكرة بيوازي الصمت علي جلد البنات ! والعلاقة شنو اصلا بين النقد والجلد !؟ و شنو الارهاب والترهيب دا ! حسع الكلام دا -في نظري -محاولة لختان العقل وتكميمو !
الباقي كلام كتير ! والله صحي !
تحياتي لك ولناظم تقديرنا و تحايانا الخاصة بالله يا ناظم لاستاذنا حيدر
(عدل بواسطة هيثم طه on 06-21-2012, 05:13 AM) (عدل بواسطة هيثم طه on 06-21-2012, 05:14 AM)
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة