|
نعيب حكومتنا وأيضا العيب فينا (يوجد حزن يا جوازات بحرى)
|
هل تستطيعوا ان تتخيلوا الزحمة التى سببها موضوع الرقم الوطنى؟؟ الرقم الوطنى اول ما طلع ما كان فى زول شغال بيه ولما بدأ يرتبط بكثير من التعاملات بدأ يتحرك كل الناس من جميع الاعمار وهناك شريحة اجبرت للخروج كانت متكأة تحت ظلال عجزها لكبر سنها ليس عامل العمر فحسب بل هناك من جمع بين العمر وبين ان يكون معوقا ... زحمة زحمة إنعدمت فيها الرحمة المحزن فى الامر ان الصالة مزدحمة يجلس الشباب الصغار فى الكراسى و الاقوياء والاعمى والشايل المكسر من كبار السن واقفين على حيلهم فيهم من يمشى على ثلاث وعكاكيز وعصى لا يستطيع الوقوف مرة يجلس ومرة ينحنح وهناك الاعمى تخيلوا العميان يتشبثون باكتاف وايادى زويهم والشباب كأن الامر لا يعنيهم مناظر تحنن وتثير الحزن اين عاداتنا اين تقديرنا لكبار السن اين مشروع التأصيل الحضارى؟؟ أين حديث الرسول ص ليس منا من لم يرحم صغيرنا ، ويعرف حق كبيرنا " ؟؟؟؟ كنت اتوقع فى برنامج المشروع الحضارى ان تكون هناك قوانين مستوحاة من ديننا او حتى من قوانين العرف الدولى مراعاة حق المعوقين والعجزة اصبح امرا مسلما دوليا ياخى كبار السن ديل فى اى مكان عندهم حق هذه الظاهرة الجميلة توجد اكثرها فى بلاد غير المسلمين هذه الاشياء اصبحت من ابجديات الحضارة والمدنية ناهيك ان ديننا امرنا بها قبل 1400 سنة
... يا هو دا السودان ؟؟؟؟ لماذا اجبر العجزة وكبار السن للخروج من قواعدهم ؟؟ لانو اى حاجة قعد تبقى بالرقم الوطنى بعد شويتين القحة ذاتها ح لازم يكون عندك رقم الجن دا
....
ليه ننتظر الحكومة تعالج لينا الحتة دى ؟؟ قبلما نعيبها يجب ان نلوم نفسنا فى حاجات كتيييييييييييييييييييييييرة لانو كدا ح ينطبق علينا برضو حديث : كما تكونوا يولى عليكم يجب ان نكون كويسين عشان ربنا يولى علينا الكويسين ليه نحنا ما نعمل الحاجات الكويسة برانا قبلما تفرض علينا بالقانون ؟؟ ويا حكومة عليكى الله ياخى امشى للناس الكبار ديل فى بيوتهم وإنتى زاتك مصرة على الرقم الوطنى دا زاتو ليه ؟؟
وإنتوا يا شباب الزمن دا إنتوا والله غريبين عليكم الله حبة رحمة!
|
|
|
|
|
|
|
|
|