العلاقة بين السخف وsocial intelligence والشخصية الاسفيرية والكتابة ..!

Quote: الكلمة البين 3 و4 هي شخصية الانسان في حياته "الواقعية" بعيدا عن شاشة الكمبيوتر

كويس سؤالك يا رمانة بديني مساحة اشرح قصدي من باقي العنوان !
في كلام كتير حول الشخصية الاسفيرية و الشخصية الواقعية و تطابقهم - و مرات بنسمع انو والله لاقيت
الزول داك في الواقع و بختلف تماما عن الاسفير
للخروج من مازق التطابق ممكن اقول ان الاسفيرية امتداد او تجلي للشخصية الحقيقية - طيب ليه الاختلاف !؟
ببساطة لانو الاسفير كفضاء بيختلف عن فضاء الواقع - ولامن جابو زول و ختوهو في سياق محدد بيتصرف بسلوك محدد -
و ممكن يكوّن بالوجود و الممارسة نوع من التلاؤم مع الواقع الجديد -
مثلا الواقع الاسفيري -مثال المنبر- اكثر عنفا من واقعنا العنيف زاتو ! وفي الواقع الجديد دا ح يكوّن صفات او سلوك للتواجد والبقاء
(زي تخانة الجلد - العدوان ورد العدوان وغيرها ) و ممكن الشخصية او النسخة الاسفيرية تتغير و تكتسب ادبيات الواقع الجديد -
والعنف اسبابو كتيرة منها الحرية الجديدة و عدم وجود قانون او سلطة شبية بالواقع -الاحساس بالامان من المعتدي عليه !
يعني ممكن انبذ و اسئ براحتي زول قاعد في امريكا و انا قاعد في السودان - لكن لو هو كان قاعد في حلتنا ممكن الاوز شوية
لانو ممكن يجي ياخد حقو باليد او يقاطعني اجتماعيا ! عموما اسباب العنف كتيرة ومعقدة و منها الواقع السياسي والاقتصادي -
و مشكلة الشخصية الاسفيرية المتخيلة و الـ(imagined) حقت الزول الواحد تتعدد بالنسبة للاخرين -! و بعتمد علي
مقدرات الزول التاني في الـ (judgement) ! و شخصيتك الاسفيرية-الحقيقية المتخيلة عندي ممكن
تختلف عن شخصيتك عند زول تاني ؟
و من الطبيعي تخيلاتنا عن الشخصية الحقيقية تكون مختلفة عن الشخصية الاسفيرية -لانو ثقافتنا
قائمة علي الـ(judgement) السريع -ولانو في الواقع الحقيقي زاتو نحن غالبا شخصيات ما حقيقية ! لانو محكومين بثقافة (مُثُل) و بنحاول نتصرف علي اساس (ما يجب ان يكون) وليس (علي ما هو عليه حقيقة -خوفا من حكم المجتمع ) و ممكن واحد يعاشر التاني 10 سنين و يجي يكتشف انو ما كان بعرفو ! و نتساءل ببراءة (والله ما كنت متخيلو ح يتصرف كدة ) لامن الواحد يتصرف بالطريقة النحن ما متخيلينها !

و ختاما لتعقيد الشخصية الحقيقية من الطبيعي تتعقد تجليلتها في النسخة الاسفيرية البتمارس الحضور الاجتماعي عن طريق الكتابة فقط
ولهشاشة الشخصية الواقعية في طبيعة تكوينها لامن جات في واقع اكثر حرية و غير محكوم باخلاقيات الواقع (الزائف!)كان من الطبيعي تتفضح و تبقي اكثر (حقيقية!!) و تمارس السخف كيفما اتفق !
و بمعني آخر :برغم سطحية الكتابة لتوصبل الفكرة الاساسية للزول في التواصل ورغم محدودية المشاركين في الاسفير لكن بعتبر انو الاسفير فضح (الشخصية السودانية )!
و دي مناسبة سعيدة انو الناس بمجهود بسيط ممكن يعرفوا -بس من المنبر دا !- ليه السودان عامل كدة خمسين سنة !
ومش خلال ال10 سنين من عمر المنبر من بوست واحد بس !ان شاء الله بوست الفنانة القالوا البتبحث عن حاجة كدة !





قربنا نخلص من العنوان !
حقو نبدأ الكلام عن العلاقة بيناتهم

(عدل بواسطة هيثم طه on 05-04-2012, 04:25 AM)
(عدل بواسطة هيثم طه on 05-04-2012, 04:35 AM)