|
*** والله عيب كبير يا جماعة !!!***
|
وعيب كبير ما يحدث في المنتدي من مناورات لفظية بشعة وغيرها بسبب الحرب اللعينة وبين منو ؟ بين سودانيين في بعضهم إن رضينا أم ابينا ياها الفتنة بي عينها , والفتنة اكعب من القتل , بصراحة شديدة النصيحة حاااااااارة , لكن ده الواقع الحاصل بينا اليوم سواء معارضة او جنوبيين واقفين صف , والشماليين أو مؤتمر وطني واقفين صف تاني ,, بالجد شيء مؤسف للغاية , ما تجوا تسمعوا موال الوطنية والوطن ، ولا يجي التاني يسمع موال الإنفصال ودولة قائمة بي زاتها وتعدي وما شابه ذلك المشكلة ليه ما تحل من الجذور؟؟ وليه طوالي نشمر سواعدنا للشينة ؟؟؟ الوضع الراهن ده للجنوب والشمال حتى بعد الإنفصال برضو اشقاء واخوان والإتنين سودانيين ( فلستوب ) وضعهم بالضبط زي الأخوان في البيت الواحد ووصل بيهم الإختلاف للإنفصال وفرز العيشة من الحوش الكبير , والسبب كلو رب البيت الما عرف يدير بيته بدبلوماسية وحنكة وبقى في خيار وفقوس في الأخوان ، واحد حرد العيشة القرف دي والتفرقة الخلتو يكره يعيش في بيت ابوه الإتولد واتربي فيه لامن بقى راجل, غصبا عنه شال عفشه وفرز عيشته بدت المناقرة، حقي وحقك, برضو رب البيت ما تاب ولا إتعظ ، بل زاد الطين بلة , وولع النيران بالفتنة ، رغم إنهم في حوشين منفصلين لكن سالين سكاكينهم لي الفرقة الفي النص وكلو بسبب كبير القوم الما قادر ولا داير يحل المشكلة بي أخوي وأخوك. ممكن جدا الناس تلقى حل وسط بدل الحرابة وسط الخرابة وبعدما كل الأخوان تموت نحن ممطوطين صفين , جزء يحمش النيران بي هنا وجزء بي هنا!!! بالجد إتصدمت في ناس كتار, البقول ليك الضبح من الأضان لي الأضان ! والبقول ليك دولة دخيلة لازم دحرها ونصلهم في بيوتهم ونقتلهم !! يعني الجانبين مؤيدين الحرب, وفي النهاية الساسة هم في قصورهم مرتاحين ، لا خيره في البشير ولا خيره في سيلفاكير منو الفيهم هسه شايل سلاحه وداخل المعركة ؟ ولا رسل اولاده ؟ما كلهم محشرين في جحورهم زي الفئران ، والشعب الغلبان هو الخسران فعلا نجحوا فتنوكم في بعضكم، حتى هنا في حوش بكري ده قدروا قسموكم كيمان !! لو بدت الحرب دي والله المواطنين من الناحيتين يموتوا بالآلاف وبرضو ما يصلوا لي حل , والإنقاذ لقت ليها شماعة كبيرة تنتكل عليها بي مزاااج وتعلق فيها عيوب ال 23 سنة الفاتت وسيلفاكير هو الدق مسامير الشماعة دي في الأرض بدون ما يعي،و فتح ليه ابواب مع ناس هو عارفهم وقارش ملحتهم رغم إنه انفصل منهم لكنو دقس ودقس معاه كل الغلابة الطول عمرهم مهمشين ، بدل ما يفرحوا بي إنفصالهم وعيشتهم الوعدهم بيها , طالت غربتهم وكتر تشريدهم وده كلووو بسبب السلطة والجاه ,, يا جماعة لازم نوحد كلمتنا إنه ما دايرين حرب ، الحرب دمار لكل الشعوب ’ وخراب بيوت ، وخراب إقتصاد البلد الأصلو داقي الدلجة من زمااان، وجوع وفقر ومرض الله يهدي الجميع ويصلح الحال ويبعد مننا الفتنة والحروب
|
|
|
|
|
|