|
Re: قيراط كوزنة ولا قنطار شطاره (الجزء الثانى) (Re: talha alsayed)
|
استفراغ عاطفي وطني
الاستاذ / طلحة تحية ود واحترام
لا اعرف من اين ابدا فالزاكرة منهكة ومثقوبة .. انا من الجيل الذي نشاء في ظل الانقاذ قمنا وربينا علي نغمة في ساحات الفداء والشعارات الهلامية بتاعتم .. تخرجت من جامعة جوبا في العام 2008 مدرسة العلوم الادارية تخصص ادارة عامة .. استلمت شهادتي والحمد لله ونسبة للاوضاع المادية قررت ان استخرج التفاصيل في وقت لاحق المهم خشيت في المعمعة والمكابسة بتاعة الشغل .. عملت لفترة طويلة بمقهي انترنت بدوام كامل من الصباح لحدي 11 مساءاً .. اتيحت لي فرصة العمل بشركة زين كمتدرب في قسم خدمات المشتركين لمدة عام واحد وبعداك يفكوك عكس الهواء وينزلو دفعة تانية (مشروع استحلاب لطاقات الخريجين وكده) وده موضوع عايز ليهو بوست براهو ساكتب لك في وقت لاحق بالتفصيل انشاءالله المهم مع الشغل ماقدرت ارجع اطلع التفاصيل وحاليا انا ماحقدر اطلع التفاصيل لانو علي حسب علمي ادارة الجامعة شالت كل الملفات القديمة بتاعت الطلبة وماخلت منها اي نسخة .. يعني يا امشي جوبا اطلعا ولا انتظر لحدي مايتم معالجة المشكلة في اللقريب العاجل علي حد قولهم يعني خمسة ستة عشرة سنة كدة .. انا حاليا عايز التفاصيل عشان اقدم لي منحة ماجستير في المملكة العربية السعودية القريبة دي بامتيازات فوق الممتاذة قراية وعائد مادي كويس وخبرة تكفي لرتق وترميم مادرسنا من مناهج اكل عليها الدهر وشرب .. ياخي الواحد ماقادر يقول ليهو جملة واحدة مفيده بالانجليزي لانو قريناهو من سنه خامسة اساس والمنهج زاتو عبارة عن شمومه ساي كان اخير عدمو .. والظروف ماكانت بتسمح انو الواحد يدخل معهد بتاع لغة علي حسابو الخاص .. انا عايز اقرا واشتغل واتميز وانفع البلد دي لكن ويييييييين كييييييييييييييف ؟ بس الامل في ربنا مابنقطع نعم المولي ونعم النصير
بكره احلي انشاءالله
وقول لي كيزانكم الفي المنبر الحرب دي الا يمشوها براهم هم وسادتهم الي الجحيم ومزبلة التاريخ كتيرة عليهم خلاص الشعارات دي بقت ماجايبه حقها وكما قال الرائع القدال
الفاضلة لمليم البشاتن والمعاطن والخبوب الباقي مايخموكا تاني على الدفافير والكناتر والحروب
الباقي تعظيم التماسك في الخطوب لا نافع الشَّدة العلوق ولا نافع المبقوص يحوق لا بنفعك عَرَق الزنوج ولابرقعك لبن العروب إلا الوقوف ألفاً ضكر واحد براك في الشيمة تلفحك الهبوب الغيمة تديك للسفاسف والعواصف والمطر برطع مع الأفعال وادخل على التاريخ يغلب أجاويدك من قرقريب عوسك اخرِج من التاريخ شيخك وعربيدك لا نافعك التكفير ولانافعك التوبيخ فامشيه وحيدك وامرق على التاريخ تلقاه في السهلات مستني كمسيدك لا بيظلم التاريخ ولا يرحم التاريخ إياه عوس ايدك
ختاماً
أجل إنني أنحني تحت سيف العناء ولكن صمتي هو الجلجلة وذل انحنائي هو الكبرياء لأني أبالغ في الإنحناء لكي أزرع القنـبـلة فتخفي برحم الثرى ثورة مقبلة احمد مطر- انحناء السنبله تنحني السنبله فتقطف ثمرتها لكن نحن ننحني حتي تزبل ثمرتنا لتخبي تحت الثري موت جيل لكن وين ليكم ياكيزان من تحت الثري سنبعث من جديد
(عزرا فما اكتب لا يرقي لمستوي كتاباتكم بس زي ما شايف عنوان الرساله استفراغ عاطفي وطني) يعني فجاة كده لقيت نفسي بطرش في الكلام ده بدون ترتيب للافكار والاحداث والجمل وقول لي ناس المنبر يبطلو المهاترات مع بعض في الفارغة والمليانه نفسي في يوم نتفق علي مبدا وفكرة واحده سليمة في البلد دي ياخ بالصورة دي نحن حنكون دايما في الدرك الاسفل
خالص الود والتقدير
نعود للتعليق لاحقآ
| |
|
|
|
|
|
|
|