|
Re: ذباب سوق صابرين علاجه فى الصين (Re: بلدى يا حبوب)
|
نجيء لذباب الخرطوم والطاغي عليه اللون الأخضر وأنا ما عارف الحكاية جات كده والله علشان بجي يوم والشجرة تمسك ذمام الأمور و نسبة لكثرة انفجارات المجارى وسقوط عمارات البراري ولا ننسى فضلات مكاتب الحكومة للناس المعلومة افتكر عشان كده الذباب بقى متوحش احمر العينين طويل الجناحين اقرع الرأس ذو حنك لولبي متنوع الإشكال . أول الحديث فى الخرطوم ذباب حدائق 6 ابريل ده من النوع الرومانسي يتغذى على بقايا الايسكريم ومناديل الورق المشبعة بأحمر شفايف وحتى لا يزعج جالسيه يلبد لاصطياد العربات الواقفة جوار الحدائق حيث أكياس شارع أفريقيا المحتشمة بعناوين كافترياتها ,ثاني الحديث ذباب كبرى توتى وقاعة الصداقة ده من النوع ألاسع لكثرة ستات الشاى وبقايا مطعم قاعة الصداقة الحكومي ومتى تحكرت ومديت كرعيك تجده يلسع فيها واحد من الجماعة قال (ما تنسوا الذباب ده حضاري جابوه الجماعة علشان عدم انبساط الكوعين ولصاق الاثنين . وصلنا لسوق الخرطوم والذباب بالكوم المحيرنى ما شغال بالعباد تشوفه طاير بس وعند أول منعطف مجارى مطرشقك عينيك ما تشوف الا النور ذباب من النوع الدبابى كثير الطيران والزوغان وحين افتراسه لاول حفرة تتبع لمصلحة مجارى الخرطوم يمص فيها مص لا بهمه ارتفاع الدولار ولا انبطاح الجنيه واكثر حاجة بتخوفه محطات الوقود وكراهية كده طالب بتحرير المحروقات. ذباب السوق العربى من النوع أبو لستك كثير ألصيق ما سال فى زول طول النهار والليل لافى وعند الجوع يجد ضالته فى فشفاش وكمونية ميدان جاكسون ودرداقات الفواكه يعنى ممشى أموره . نواصل
|
|
|
|
|
|