|
|
 Re: من هي هذه المحامية التي أعتدت عليها قوات الشرطة؟ (Re: عبدالحافظ سعد الطيب)
|
المهندس الشفيع كتب يقول:
(طالما التهمة هي اعمال فاضحة فيستحسن ان لا يعرف من هي ، بغض النظر عن براءتها و ادانتها)..
صديقي المهندس الشفيع وراق عبد الرحمن..حبابك
ياخي داير انصحك لوجه الله و رسولو..لو بتقبل النصيحة الحقة..و نختلف أو نتفق في السياسة.. لكن يا اخو اخلاقنا السودانية العادية تب ما ظني تكون محل خلاف..و الدخلني هنا يا الشفيع..حسرة على ضياعنا و تشتتنا..غيبوبتنا السرمدية المفروضة علينا ( و انت تجسد الحال بصورة لاتحسد عليها)..و اسألك بكل وضوح: انت جنيت يا الشفيع ولا صابتك غيبوبة حتى بت لا تدري ماهية افعالك و اقوالك؟..و نفسي افهم (لأنو امرك بيهمني كتير).. شنو الوجعة الماسكاها عليك الجبهة الإسلامية و نظام حكمها حتى تغدو في حكم الزول الغايب العقل و حسن التصرف ؟(باقيهم ما عندي بيهم شغلة فهم يا اما جهلاء مدجنين و يا اما مهوسين لحد الغيب..و طالما هو خيارهم فهم احرار..و ما بننصحهم لأنو المهوس ما بتنفع فيهو نصيحة)..!!
غض النظر عن اختلافك مع اخونا دينق أو اتفاقك معاهو..لكن يا الشفيع كلمتك القلتها في حق المحامية دي عيب عدييل يا اخوي ..لو بتعرف العيب و بتحراهو..فالمحامية دي سودانية متلك..ممكن تكون اختك.. أو بت عمتك.. او زميلتك.. الخ.. نختلف في السياسة يا قريبي..لكن ما بنغيـّب و ننتهك عروض الغير مهما كان الأمر..
انت يا الشفيع قلت (طالما التهمة هي اعمال فاضحة)..و ده قذف (بمفهومه الشرعي) في حق ناس لا تعرفهم ولا تعرف طريقة تربيتهم لأبنائهم و بناتهم..و هذا عيب اربأ بك ان تلغ فيه بمثل هذه الكيفية و السهولة..
و لو راجعت نفسك و قريت الكلام كويس ما كان يمكن أن تجزم بمثل هذا الجزم (طالما يا الشفيع تفيد الجزم..و الجزم يفيد القطعية..و القطعية ترجيح حكم شرعي)..اول بالتبادي يا الشفيع كان تسأل نفسك منو القام بالتحقيق؟..التحقيق في الخبر قامت بيهو نقابة المحاميين..و دي ماسكنها ناس الجبهة الإسلامية..و طالما النقابة هي القامت بالتحقيق فهذا يعني وقوفها الى جانب المحامية..و دفاعها عنها و ايقانها التام بظلم هذه المحامية من قبل السلطات المعنية..!
تاني التبادي.. الخبر قال ناس الشرطة اتهموا المحامية بالقوة الجنائية..و لو كنت مكانك اول حاجة كان اتوقفت في حكاية القوة الجنائية دي.. أو على الأقل كان سالت ناس القانون عن معناها؟!!!..
و عارفك ح تسمع كلامي و تصدقني..مافي حاجة في القانون الجنائي السوداني اسمها قوة جنائية ممكن تنطبق على حالة المحامية..و عشان اكون معاك اكتر وضوحا.. المقاومة الجنائية المذكورة في القانون الجنائي السوداني ممكن تنطبق على عقار و الحلو و مني اركو مناي..و عشان الصورة تتضح ليك..مفهوم القوة الجنائية ذكر مرة واحدة في القانون الجنائي و في المادة (63) و اسمها الفتنة..و بتذهب لفكرة انو من يدعو أو ينشر دعوة لمقاومة السلطة عن طريق القوة الجنائية..و دي ياهو مفهوم المعارضة المسلحة ضد السلطة.. فهل محامية مشت عشان تمضى ليها عقد بيع أو معاملة قانونية مع موكلها.. باقي ليك ممكن تستخدم قوة جنائية و تعمل على تقويض السلطة عن طريق استخدام القوة الجنائية؟..مافي حاجة اسمها استخدام قوة جنائية في هذه الحالة..حتى لو ثبت انو المحامية كان عندها صاروخ توما هوك او كروز..او كلاشنكوف.. لأن القوة الجنائية المقصودة في القانون محددة و مفهومة و تنطبق على المعارضة المسلحة للسلطة القائمة (يعني جريمة سياسية)..و دي ما حصلت في قصة المحامية دي..و هذا خطأ من الشرطة التي وجهت التهمة (لأنها شرطة ما عندها ادني معرفة بالقانون الذي تطبق و تحتج به على الناس..و دايرة تعمل ليها عواء فارغ..!!)..
ثالت التبادي..حكاية الأفعال الفاضحة..و التي جزمت على حدوثها بحكاية (طالما التهمة هي الأفعال الفاضحة)..هل سألت نفسك ماهي الأفعال الفاضحة التي يحاكم عليها القانون الجنائي السوداني؟..
اها يا الشفيع القانون الجنائي السوداني بيقول في المادة 152 (دي الحاكموا بيها لبنى حسين)..من يأتي في مكان عام فعلا أو سلوكا فاضحا أو مخلا بالآداب العامة...اها القانون اشترط المكان العام؟..باقي ليك محامية مشت مع موكلها عشان تمضى عقد و في مكان الموكل..هل ده مكان عام؟..ثم ما هو الفعل أو السلوك الفاضح و المخل بالآداب العامة؟..القانون السوداني مقصر في الحتة دي..و ما عندو قائمة بنماذج مثل هذه الأفعال..عشان كده المادة دي بقت سيف مسلط على رقاب العامة ..يعني انا و انت ممكن تكون عندنا مصافحة المرأة للرجل حاجة عادية و غير مخلة بالآداب العامة.. لكن في واحد تاني مهوس و معقد ممكن يعتبرها اخلال بالآداب العامة (ياخي افترض انصار سنة مشوكش في دينـو و عندو عقدة تجاه اي حاجة تسويها المرأة)..و عشان نوضح ليك اكتر يا الشفيع.. القبلة (البوسة) في موقف البصات أو نص السوق (كليهما مكان عام).. ممكن تشكل فعل مخل بالآداب العامة..اها في ذمتك يا الشفيع في سودانية في الكلاكلة ممكن تبوس ليها راجل في مكان عام حتى نقدر نقول عليها ارتكبت فعل فاضح و مخل بالآداب العامة؟..ناهيك عن كونها محامية و العلاقة بينها و بين موكلها وفق النظم و الذوق و الأتيكيت و القانون؟..
اها الجانب التاني من الأفعال الفاضحة هو الزي الفاضح..و دي مدخلة السودان كلو في حيص بيص..و عشان اوضح ليك اكتر المحامية السودانية عشان تمارس عملها اليومي و الرسمي بتكون لابسة توب أو لابسة بلوزة باكمام طويلة و اسكيرت لغاية الرسغ..هل ده زي فاضح؟..هل ده ممكن يشكل فعل مخل بالآداب العامة؟ ( لاحظ الخبر اصلا ما ذكر انو المحامية دي تم القبض عليها في وقتها الخاص و خارج اطار العمل الرسمي..يعني حتى جريدة الراي العام قالت انو البوليس اتربص بيها..و التربص يعادل المابيك في الضلام يحدر ليك..)..
ياخي انا ما كوز يا الشفيع..و عمري لن اكون..و ما متفق مع الحكومة الحالية دي..و لو وضعت القمر عن يميني و الشمس عن شمالي ما بتفق معاها تب..لكن انت وكت الحكاية شايفها موضوع اجانب و غيرو..مش كان ممكن تقول لدينق..كتر خيرك.. لكن افهم انو عندنا مؤسسات..و البوليس الغلطان ..ممكن نقابة المحاميين تتدخل و تقول ليهو عيينك في راسك؟..غالبك تقول لدينق الأجنبي (كما تتعامل معه)..المحامية مظلومة لكن في مؤسسات ممكن ترد ليها حقها و تحميها؟..ولا ناس الشرطة قاسمين معاك عشان كده بتصدقهم و تتحامل على الأبرياء المغلوبين؟..
هذه المحامية لا اعرفها..وا حلف ليك على المصحف انو لا فعلت قوة جنائية ولا فعل فاضح..و انما قضيتها تشكل الخزي الأخلاقي ووحل السقوط الذي ادمنا الغوص فيها ..سواءا كنا ندري أولا ندري..و لو مكضبني هسع ده راجع انو ليه اي مشكلة طرفها البوليس لازم يكون فيها عرقي و شرمــــطة و افعال فاضحة؟.. لأنو بؤس البوليس يسول له استجداء التعاطف عبر قيم يعرف جيدا أن الشعب السوداني ممكن يتعاطف معاها.. و هذا هو العــهر الحقيقي..!
مافي محامية سودانية بترتكب فعل فاضح كما حدده القانون الجنائي السوداني..لكن الشرطة هي التى فقدت الأخلاق و القيم و التربية..و اصبحت تتربص بالبسطاء و الضعفاء..!
اتمنى ان تكون صادقا و شجاعا و تعتذر لهذه المحامية و اسرتها الكريمة..!
و دمت..
كبر
|
|
  
|
|
|
|
|
| العنوان |
الكاتب |
Date |
| من هي هذه المحامية التي أعتدت عليها قوات الشرطة؟ | Deng | 03-23-12, 03:39 PM |
| Re: من هي هذه المحامية التي أعتدت عليها قوات الشرطة؟ | الشفيع وراق عبد الرحمن | 03-23-12, 05:26 PM |
| Re: من هي هذه المحامية التي أعتدت عليها قوات الشرطة؟ | Deng | 03-23-12, 11:46 PM |
| Re: من هي هذه المحامية التي أعتدت عليها قوات الشرطة؟ | Tragie Mustafa | 03-23-12, 11:51 PM |
| Re: من هي هذه المحامية التي أعتدت عليها قوات الشرطة؟ | محمد المسلمي | 03-23-12, 11:57 PM |
| Re: من هي هذه المحامية التي أعتدت عليها قوات الشرطة؟ | عبدالحافظ سعد الطيب | 03-24-12, 05:38 AM |
| Re: من هي هذه المحامية التي أعتدت عليها قوات الشرطة؟ | Alshafea Ibrahim | 03-24-12, 09:25 AM |
| Re: من هي هذه المحامية التي أعتدت عليها قوات الشرطة؟ | Kabar | 03-24-12, 09:29 AM |
| Re: من هي هذه المحامية التي أعتدت عليها قوات الشرطة؟ | عماد موسى محمد | 03-24-12, 09:47 AM |
| Re: من هي هذه المحامية التي أعتدت عليها قوات الشرطة؟ | الشفيع وراق عبد الرحمن | 03-24-12, 04:14 PM |
 Re: من هي هذه المحامية التي أعتدت عليها قوات الشرطة؟ | Rawia | 03-24-12, 05:21 PM |
| Re: من هي هذه المحامية التي أعتدت عليها قوات الشرطة؟ | Hassan Makkawi | 03-24-12, 07:13 PM |
| Re: من هي هذه المحامية التي أعتدت عليها قوات الشرطة؟ | mayada kamal | 03-24-12, 05:43 PM |
| Re: من هي هذه المحامية التي أعتدت عليها قوات الشرطة؟ | ABDALLAH ABDALLAH | 03-24-12, 07:04 PM |
| Re: من هي هذه المحامية التي أعتدت عليها قوات الشرطة؟ | Deng | 03-25-12, 06:53 AM |
| Re: من هي هذه المحامية التي أعتدت عليها قوات الشرطة؟ | الفاضل يسن عثمان | 03-25-12, 02:58 PM |
| Re: من هي هذه المحامية التي أعتدت عليها قوات الشرطة؟ | الشفيع وراق عبد الرحمن | 03-25-12, 03:40 PM |
| Re: من هي هذه المحامية التي أعتدت عليها قوات الشرطة؟ | الشفيع وراق عبد الرحمن | 03-25-12, 03:44 PM |
| Re: من هي هذه المحامية التي أعتدت عليها قوات الشرطة؟ | الشفيع وراق عبد الرحمن | 03-25-12, 03:37 PM |
| Re: من هي هذه المحامية التي أعتدت عليها قوات الشرطة؟ | النذير حجازي | 03-25-12, 03:42 PM |
| Re: من هي هذه المحامية التي أعتدت عليها قوات الشرطة؟ | الشفيع وراق عبد الرحمن | 03-25-12, 09:02 PM |
|
| |
Kabar
فيس بوك
تويتر
انستقرام
يوتيوب
بنتيريست