|
Re: خضر حسين .. يبكي حميد .. بدمع القلب .. (Re: معتصم ود الجمام)
|
فلنبكي مع خضر يا معتصم ..... إعتقدنا أن البكاء يقل مع الكبر لكنو ذاد
إتصل علي قبل قليل أبوعبيدة الماحي فلم يستطع إكمال جملة .... وجهش بالبكاء سأنتظر يوم يومين .. لأعاود الإتصال عليه عل دموعه تمسح بعضاً من الحزن الكبييييييير
فقد جلل يا معتصم ! لماذا نحن بالذات مكتوب علينا أن نُفجع بالجملة؟ ... إستغفر الله.
| |
|
|
|
|
|
|
Re: خضر حسين .. يبكي حميد .. بدمع القلب .. (Re: مريم عزالدين صديق)
|
يا راحلين عِنْ دُغُش الليل .. ما لاقيتو جناياً زي تكية نخل الفجر الجاسر .. في المترة عراجين ضي يا رعّاوة العرب الرُّحّل .. ما لاقاكم في المطراني في كاويق الجرف الأمحل بين أسراب الرهو الراحل .. ساند أكتاف الليل الميّلْ عِنْ ساساق الغيمة عليكم بين رقراق الخيمة معاكم .. ما أديتوهو شوي بي حرجل حميد
منو البسند كتف ليلنا؟ العزاء للوطن
| |
|
|
|
|
|
|
Re: خضر حسين .. يبكي حميد .. بدمع القلب .. (Re: nadus2000)
|
(!)
الحزن رايح مودر
والوطن باقي وصريح
أيوة يا ( أطهر عريس)
مينا مينا
وغابة غابة
ربابة
مسرح
إسبتالية
الوطن باقي ومهيب
ده (الوطن فوق الجميع)
يا نخل
أبنوس
تبلدي
ياجرح ناتح في صفي
يا غنانا ومشتهانا
(!!)
المياتم
حارة حارة
الزغاريد
الأناشيد
المراسم
والطبول
الحزن في كل مسري
والوطن حق الجميع
الوطن نبداه هسي
وبي (سراااع)
الوطن باقيلنا غصة
أم هي قصة ؟
لست أدري
وماني عارف
والـ
نقول هي قصة
ياتو كوكب
ياتو نجماً كنت إنت ؟
ياتو منفي ؟
ياتو أرض الله نحنا ؟
ياتوا رسلاً هبطوا أرضك
ياتوا ملجأ
فيهو نحنا
نحنا محنة
محنة نحنا
(!!!)
نحنا يا الله
قمنا
من بلد ساقيهوا نيلك
من دغيش الفجر
نصحي
وتندهيلنا
شوقك العمر الغلبنا
حضنك القصر خطانا
وما إنهزمنا
لا شكينا
لا إنكسر جوانا خاطرك
وياكا إنت
ويانا
نحنا
نحنا
(!!!!)
(دينك) العندك خطانا
وما تعبنا
ولا شكينا
وعمرنا العاجبك خطاه
هاك أمسكـ
إلا كوني
كوني زي أحلامنا وأجمل
كوني أكبر من خطاهم
ياخ هاكـ
هاك عقاب عمراً مشيتوا
هاك بصارة رأي سديد
هاكـ أشواقي وفعايلوا
هاكـ أحزان عمري ضمة
وما فترنا
نحنا فجرك
من بلد تيرابوا شمسك
من وطن ساقيهو نيلك
(!!!!!)
نحنا إحنا
نحنا
خازوق شعبي راكب
نحنا
(ماسورة) وسقالة
نحنا شفع
نحو روضة
نحنا مصحف
نحنا عيسي
يا محمد
نحنا موسي
نحنا توارةً مقدس
نحنا قرآن جوة خلوة
نحنا مريم والمسيح
نحنا عيسي
أيوة
عيسي
الديمة مشنوق في صليبك
متين هو ينزل ؟
(!!!!!!)
نحنا يا الله
هاشم
(طيب العشرة الشفيع)
نحنا
محجوب
يا جوزيف
نحنا نخلة
نحنا باباي الجنوب
يا تبلدي في كردفان
نحنا توتيل يا بلادي
وفينا من نخلات شمالك
نحنا (حميد)
نحنا (محجوب)
وفينا كم (قدال)
بيقدل
نحنا
(وردي)
البي حضوروا
علم القلب التمني
(!!!!!)
نحنا أسري
نحنا مسري
نحنا مرسي الشوق حقيقة
بقينا للأشواق نهاتي
بقينا للأحزان شواهد
نحنا
إحنا
محنة
نحنا
نحنا صعلوقين في شارع ؟
أم
أنحنا
ركعة مصلايتين في مسجد ؟
ولا نحنا
شعب دافر نحو حتفوا
ولا نحنا ؟
مين أنحنا ؟
نحنا مين ؟
(!!!!!)
نحنا أولاد الطريق
ديل أنحنا
القالهم المحجوب في غنوة
(ديل أنحنا
القالو متنا
وقالوا فتنا
وقالوا للناس
إنتهينا)
ديل أنحنا
إنتو مين ؟
(!!!!!!)
ما تقولي
نحنا في الأسفار وردنا
ماتقولي (أترنا) في العشرة الكرام
وما تقول لي
وما تقولي
وما تقول
أيتها شئ
إنتو ياكم إنتو إنتوا
(!!!!!!)
نحنا ما بكتلنا غاشم
نحنا ما بهزمنا ظالم
نحنا
شعبك
نحنا بنوتك
ولادك
ديل قصادك
ديل بيمشوا
وتاني نحبا
تاني
بنتاتي ونقوم
الا
نركع
لالا حاشا
ضمة يمة
الا نسرق
ما بيحصل يابا (أبداُ)
بس بنشرق
همنا المرقة الأكيدة
نحو فجرك يا بلادي
(!!!!!!)
فجرك النور طريقك
إنطفئ
شعبك الغنيتلو دايما
إنـ ..........
صبحك الطول غيابوا
إنـ .............
وحلمك الغنيتو غنوة
إنـ.....
وهاشم الحسن العطا
فات و روح
مصطفي الولد السمح
ها قد (مشي)
سودانك الحالمبوا ضمة
آآآخ
تفرزع
كل كلاشنكوف معبئ
قد رطن
والمكن
واقف معطل
المزارعية التحت
(الجنود الوين تخش)
في سبيلك
(عمُروا )
إستبلدوا الأحلام رصاص
كل البنادق (عمرت)
صفا إنتباه
صفا إسترح
والوطن عسكر
هنالك
(!!!!!!)
في مريدي
الحالة أسكت
وفي الجبال
الحالة حالة
أمري والخزان
قصادك
شفع العرب الهنالك
ماتوا ضمة
ماتوا بي رصاص غيباك
ماتوا والكل في إنتظارك
ماتوا محروقين هنالك
وطال غيابك يا وجيع
يا غضب كل الشوارع
يا شغيلة
يا مزارعية وعديلة
يا درق كل القبائل
يا درب كل الحياري
والتعابي
يا (كوان)
أهلي الفقاري
(!!!!!)
الآن فقط
الآن تبكيك
المداين
بكت العيون
بكت الشوارع من طرف
بكت البكيات الحريق
وبكي البكي
بكن
البنيات الطريق
الوليدات القصيد
وبكوا الشيوخ
الشفح الحروم
وجنيات الفريق
بكي أي زول
بكت المصارين
العرق
بكت الخطي
بكت العيون
بكت
*(الأيادي الترصف
الشارع زلط
بكت الأيادي
التبني مستشفي
وتموت بالسل فقط )
(!!!!!!)
حميد هو مات ؟
كان السؤال علي الشفاه
كنت السؤال ؟
يا للقدر
كنت الإجابة
علي السؤال ؟
حميد
بموت ؟
حميد يظل
لحن الشفاه
حميد يظل
عرق الحياة
حميد بفوت ؟
حميد منارة علي الطريق
حميد بصارة
حميد
جرحنا وكل شئ
حميد وطنا النشتهي
حميد غنانا الما كمل
حميد معينا الما (نضب)
حميد وجعينا وكل شئ
وكان كل شئ
(!!!)
حميد ده
كان مشفي
ودواء
كان الطريق
كان الجرح
كان الوريد
لي دمنا
كان المغيث
كان الدعاء المستجاب
كان الوطن
كان الضهر
أدينا أحلامنا وسكتنا
كان سهرنا
وكان وجعنا
كان أي شئ
كان الولد
كان البلاد
كانوا البنات المشتهي
كان الحبيبة
والصديقة
والزميلة
كان الرفيقة والأمل
كان البصارة
والدبارة
ما العمل ؟
(!!)
كان السؤال
لألف إجابةٍ
نحو إحتفائنا بالطريق
كان الدليل
كان الجسارة
والدبارة
فما (العمل) ؟
حميد هو مات ؟
(!)
خطنا الثوري يا حميد كنت
حزبنا الثوري أنت
وجهنا الأممي كنت
يا غنانا ومشتهانا
يا مناديلنا وعرقنا
جيتنا من جيهة المطور
دفقت فينا الأمنيات
فردهت أحلام البلد
وراقصت نخلات الوطن
يا وطنا
يا أمل كل الغلابة
يا شغيلة
يا مزارعية وبسيطة
يا نخل
أبنوس تبلدي
يا وطنا
ويا وطنا
ويا طنا
حميدنا
قد سلك الدرب
حميدنا فات
لكنو
في
حميدنا
مات
لكنو
حي
حميدنا
راكز ما بفوت
حميدنا
حي
حميد
أحـــي
حميد
أحـــي
حميدنا
فيي
حميدنا
راكز وما بفوت
ـــــــ
الخرطوم 20/3/2012م
| |
|
|
|
|
|
|
|