نم هانئاً يا حميد

Quote: كما للفرح روعة فللحزن لوعة وتأجيل الحزن يذهب بلوعته كما يذهب تأجيل الفرح بروعته دعونى ابكى هذا الدرويش الزاهد العابد دعونى ابكى هذا المتصوف السايح الدايح ايها الشعراء المطاليق ابكوا معى من سماكم هكذا يا ازهرى ، يا نخلى ، ياغفارى ، يا عاطف ، يا الدوش محجوب شريف هووووووووى القدال ، محمد محى الدين، محمد مدنى يا ود باااااااادى ...يافاضلاااااااااابى عووووووووووووووك يا رعاوزة العرب الرحل ما لاقاكم فى المطرانى؟؟ يا رطانت الليل مالاقاكم جنب كاويق الجرف الامحل؟؟ يا نضافت ، البودة الدهسير، اللعوت‘ الضريسة، شوك الجمال، المعيوقة ، الحلفا ، العشر زولكم الكان بجيب خباراتكم لى ناس الرادى ويييييييييييييييييينو؟؟ ماشفتوهو زولاً لى..؟. يا فاطنى السمحى...يا القصب الاحمر يا شليل وين رحتا؟ منو اليغوص يكوس صمغ اضنيكم بعد ده يا ترابلة الزمن الممحق الجهجاه عشان يلقى مراق لى الشوك المكسر فى القلوب..؟. يا المزارعية الشقايا منو اليخوض برجوب العشم عشان يسد لبقا؟ يا شفع العرب الفتارى منو بعد ده اليشيل لكم نفسكم عشان ترتاحو ومنو البلم الفاناهو ايديكم وانتو ساكين القطاره؟ منو البحفر من حرفو الجوانى عشان تتوسع دروب الدنيا زين ؟ يا الرضية ماشفتى حميد ود زينب؟ منجلو مكسور عود ومجدوع على التحتانية بس مانى لاقيه يا نورى يا المقرونة يا الدواسيق يا الخيراب يا الكوارير يا الحواجنير؟ يا ناس فوق يا ناس تحت الجاى من الجريف اتلجاى من الجبل ما صادفكم الاخدر القصير الاغبش؟ يا الفى اطن الفرن يا الفى كيم البيت يا القاعدى فى الدونكا حميد قالو جاء شالو حريف من عندك ماك خابراهو شقيش قبل...؟ ياناس البركل الزول ابكرعين مشققات ماجاكم جاى؟ يانسرين النمر يانسرين سوركتى الزول ده قبل شوية كان بقرأ بيناتكن ماجاكن صاد؟ يا عمال السكة رماد خبر الزويل ده مادقش اضانكم؟ اولاد الجامعات يا خرطوم يا تقانة يا اهلية يا بنات الاحفاد الزول ده ما معاكم؟ بعد ده الدايرلو دلو بير، فرش جير ، جنزير، خيط وابير، زولا خير ، لبن طير يقبل وين؟ كراب عنقريب، محويب، صفقة ودليب يكوسن وين؟ عن رفعة مرق ، ، ، شافع غرق، صريف حرق ،نقع وين؟ امونة حردت، بنبونة وقعت، ساقية هكعت ، نطير وين؟ جراب فقش ، تراب رقش، مرقة فرش، تكية عرش نقول يا منو؟ كان هدم وطرقه انهرن، دماع جرن، حمار حرن، بنيات خافن جرن، جسوماً عرن، حكومات ازدرن، قوانين جائرات سرن، حلالنا وين؟ فى نفير، دايرين غفير، زولاً حكمة وخبير، حالاً عسير، انسان ذو ضمير، شاعراً قدير ، مجير، بى منو نستجير؟ درنا نواتى ملاح، زول صلاح، غطاس،عوام سباح، شاى صباح، كسرة وملاح نتبن قدح منو؟ كان زماناتنا قسن، ظروفنا عصن، حكوماتنا نسن، مراكبنا تائهات مارسن ، ليالينا مسن، حفائرنا حسن نسوى شنو؟