|
|
 Re: إلى مغتربـــه ....... (Re: إدريس محمد إبراهيم)
|
ولا تزعل يا قريبي ....
يا بلد ...
إدريس محمد إبراهيم
راجع ليك ...
راجع ليك يا بلداً أصيل بالحيل ... جميل بالحيل ..
أبّل اشواقي منّ النيل ...
بعد ركض السنين الطال..
ترتاح مره تهدا الخيل ...
بعد بعداًً يهدّ الحيل ...
وكل ما يوم بشوفه جراحي تتجدد ...
تذوب فيني المداخل الحلوه تتبدد ...
واحس بالعبره تخنق فيني واتنهد ..
واحبس في المحاجر الصابره دمعات هم بتتجلد ...
شنو الفيك با بلاد الغربه يفرح زول عشان يسعد ..
شنو الما بيستفز يقتل أحاسيسك وتتبلد ...
***
راجع ليك يا بلدي ..
صرخة شوق تهز اركاني من جواي ...
بدور اقلد حضن أمي وأتوه ابكي ...
دموع زولاً حنين بكاي ...
أضم أخواني في صدري ...
ينز دمع الفراق حكاي...
اشيلك يا وطن غنوه
بترسم في مراسي خطاي ...
واجوب اركانك الكانت منارات ذكرى متكيه ...
بزور شندي وكبوشـيه ...
بلاد المك ... اريت كل الولاد متلو ...
بيقلع حقو ايديه ...
أزور كنداكه ملكة مروي سلطانة المجاهديه ..
اشم عبق الزمان سطّر ...
حروف لابطالنا مرويه ...
واطير واحضن ديار كرمه وربوع دلقو ...
واشوف ترهاقا يقدل في ربى التاريخ ...
واعيش عزة بعانخي الشامخه وامجادو البطوليه ...
تجيني بنيّه محسيه ...
شايله الشوق مع دعوة فطور مفتوحه في أجمل صباحيه ...
نجيهم نلقى حسناوات تليس في بويت الطين ..
والوحل الجميل زي حنه في سيقان خلاسيه ...
وتمسح واحده في طرف القميص ايديها عفويه ..
ما بتفارقو لين نغسل ملابسكم ونكويها ..
كلام يغسل مشاعر حيه يكويها ..
قبيل قالوا الكرم بستان ...
جذورو الراسخه محسيه ...
دار العوضه يا مرتع صباي البدري ...
يا مترة جدودي الطاله صبحيه ...
يا عمي الجمع نفس العزاز في حسو ...
أنفاس غيمه فجريه ...
ويا خالي الوقف على ارض الجدود مختال ...
أنغام فاس وطوريه ...
ويا سمحة حسان الحيّ يوم ضميتي زولاً تاه ...
لهيب نفسك مع الدمعه السقت ...
سهاد ايامو مرثيه ...
سته سنين .. تلاته شهور .. وكم من يوم ...
تشيل الغيبه من بلدك ...
حرام ما نحنا أهليه ...
أمشي كريمه ارض البركل المعطاء ...
وديمه العزه شايجيه ...
أقيف في نوري واتأمل بلاد حمّيد ...
جلاس الواثق المليان معاني بتشدو حنيه ...
لبب يا مهدي يا روعة شموخ الثوره مهديه ...
ويا غرباً ملاني غنا ..
يا أرض التعايشه الغر ..
كون من روح بطوليه ...
وترفل ياي هناك مزدانه زي أجمل جنوبيه ...
بلاد الخير يظلل كل ربوعها اليانعه ...
غاص في تربه طينيه ...
واشّم ريحة البحر يا ناس...
تزغرد فيني حنيّه ...
سواكن يا ارض دقنه البطل مغوار ...
حضاره جذورها في أعماقنا مبنيه ...
حرارة ثغرنا المنداحه غابة شوق مداريه ...
زي أجمل بجاويه ...
تحمل سيفها تختال هايمه تتراقص ...
زي قارب تغازل أمواجو حوريه ...
***
عشرين وخمسه من السنين ...
ما خلاص يا زول كفايه ...
سويت شنو .. ولميت شنو ..
غير الجراح تزداد نكايه ...
لازم تضع للغربه حد ...
وتعود وترجع للبلد ...
نحرق سفن أوبتنا شان ...
نحضن ظلالك للأبد ...
سودانا يا أجمل بلد ...
سودانا يا أجمل بلد ...
|
|
 
|
|
|
|
|
| العنوان |
الكاتب |
Date |
 إلى مغتربـــه ....... | إدريس محمد إبراهيم | 03-06-12, 07:28 AM |
| Re: إلى مغتربـــه ....... | ابو جهينة | 03-06-12, 12:17 PM |
| Re: إلى مغتربـــه ....... | حبيب نورة | 03-06-12, 01:12 PM |
| Re: إلى مغتربـــه ....... | صالح عبده | 03-06-12, 01:32 PM |
| Re: إلى مغتربـــه ....... | إدريس محمد إبراهيم | 03-07-12, 07:55 AM |
| Re: إلى مغتربـــه ....... | إدريس محمد إبراهيم | 03-07-12, 08:15 AM |
| Re: إلى مغتربـــه ....... | إدريس محمد إبراهيم | 03-07-12, 08:32 AM |
| Re: إلى مغتربـــه ....... | mohmed khalail | 03-07-12, 11:49 PM |
| Re: إلى مغتربـــه ....... | إدريس محمد إبراهيم | 03-10-12, 06:39 AM |
| Re: إلى مغتربـــه ....... | إدريس محمد إبراهيم | 03-11-12, 09:15 AM |
|
| |
إدريس محمد إبراهيم
فيس بوك
تويتر
انستقرام
يوتيوب
بنتيريست