محطات النجوم ..الكابتن ( ياسر عمراب )

Quote: كانت البداية في حلتنا بحري المزاد شمال مرتع صبانا وطفولتنا كنا بنلعب في السهلة الورا بيوتنا وفجاة السهلة تم تسويرها ما كنا عارفين السور ده حق منو المهم اننا عملناه استاد وكتبنا عليه استاد الزمالك وعملنا فريق سميناه بالزمالك تيمنا بالزمالك الكان بتعجبنا فنايله البيضاء المخططه بالاحمر وصوره البشوفها في مجلات اكتوبر واخر ساعة وفجأه الاستاد جوه اسياده وكملوا بنيانه وكانت روضة دار الام الحنون ..غيرنا ملعبنا وغيرنا فريقنا وسميناه بالاهلي ماعارف ليه لكن بكون في عشاق للاهلي.. والاهلي ده جمع كل الاولاد من كل المزاد اولاد حلتنا واولاد المزاد جنوب وكان فريق عظيم وكانت فترة عظيمة مليئة بالنشاط واللعب واللهو .. اشياء في ذاكرتي ابدا ما بنساها ..حصة الرياضة في الصباح من كل اسبوع دراسي, ونحن في ميادين رابطة المزاد شمال ونحن مقسمين علي الثلاثة ميادين واخي ابن المارشال يحي الطاهر (ايمن) بجيب الكور من بيتهم .. كنا بنجهل ليه كل كمية الكور دي عند ناس ايمن لكن فهمنا بعد ما امتد بنا العمر شوية,,, انجبت دفعتنا في المدرسة المزاد الابتدائية فيما بعد حارس مرمي عظيم لعب في نادي الهلال العظيم ..العجيب في الامر انه ما كان بشارك في اللعب وحتي لو شارك ما بشارك كحارس وده هو حارس مرمي الهلال ومن بعد الهلال لاعب نادي التحرير هشام الطيب. كانت بتعجبنا فكرة هلال مريخ فكنا بنتنافس علي ذلك ..ما كانت الميادين خالية كما الان لا لعيبة ولا جمهور .. كل شئ كان بامتاع وبي ايقاع وبحب وهذا ما حببنا في عشق هذه المجنونة