|
Re: تداعيات الحرب في جبال النوبة/جنوب كردفان (Re: أبو ساندرا)
|
صديقي ابوساندرا..حبابك
ياخي لقيت اللقطة المادي فيها صباعك دي..و كنت ناوي انزلها في خيط منفصل ..المهم..
كتر خيرك على الوقوف مع جنوب كردفان و اهاليها..و نقل هذه المعلومات,... يا ابا ساندرا .. دي ليك انت شخصيا (متأكد ح تفهمها صاح)..يا اخي انا لظروف انسانية (ابوي سوا ليهو عملية..و ما داير تضامن من شعوب سودانيز اونلاين) ما قادر اتصل على اخواني و اسرتي في الدلنج..و لمن اتصل بكون عامل حساب ما ادخلهم في حرج مع الحيكومة..و حتى الإتصال انقطع قبل اسبوع عدييل ( لأنو حكومة دولة عمر البشير قطعت الإتصالات في كل مدن جنوب كردفان).. يبقى منو البيقدر يمرق في مظاهرة ولا تجييش راي عام..!
في يوليو 2010 ناس حاولت تمرق في الخرطوم ..و نالت ما نالت..و ما يسمى بمنافقي و منافقات النخبة السودانية.. دي بي طينة و دي بي عجينة (كتر خير الشابة نجلاء سيد احمد جابت ليها اشرطة عن بعض من نساء المنطقة..و بعد شوية قامت الإنقاذ حاربتنا بنفس النهج و جابت اولاد المنطقة و قعدوا يصرحوا بانو هناك عودة طوعية و بطيخ..و النخبة السودانية في اجازة...!)..
المظاهرات خرجت يا ابو ساندرا في كل مدن العالم الصاحية و الليها ضمير.. اوربا.. نورث امريكا.. استراليا..ياخي الشعب السوداني الفضل قولة كتر خيركم مرقتوا ما قالها لينا..!!!..و دي الجابت تقرير بيلاي المجوبك..و قعدنا تاني سبعة شهور عشان نجيب فكرة السماح لمنظمات الإغاثة لدخول جنوب كردفان..!!!!!!
رفعنا البندقية في ستة شهري ستة (النجهتنا بيها نور تاور)..و رغم اختلافنا مع البندقية.. قلنا خير..و اتحدينا الشعب السوداني..و قلنا ليهم اهو داك عبد العزيز الحلو ولعها..و قال انو قضيتو قضية ازالة حكم الجبهة الإسلامية في السودان..و مافي زول قال لينا عينكم في راسكم؟!!.. ياخي لمن احترنا في دينا ده.. الشعب السوداني ده صحي داير تغيير ولا نحنا برانا ناس الخلا شايلين وش القباحة ساكت؟؟؟...!!! اليوم يا ابا ساندرا.. الحرب وصلناها العباسية..و العباسية للناس الساقطة جغرافية و ماها عارفة التكتح في الجغرافيا.. العباسية دي وسط السودان..و فركة كعب من الخرطوم..و برضك النخبة السودانية دي بطينة و دي بي عجينة..!!!
نعم جنوب كردفان و اهلها في محنة عظيمة....\ نعم النخبة السودانية مارست جبن و تواطؤ غير مبرر تجاه انسان جنوب كردفان..!!!
و على قول غنية الدرملي المشهورة (الجنزير التقيل).. نحن ناس جنوب كردفان ..ولعنا نارنا و ح نتدفاها برانا..,,! كتر خيرك على التضامن يا صديقي..
كبر
|
|
|
|
|
|
|
العنوان |
الكاتب |
Date |
تداعيات الحرب في جبال النوبة/جنوب كردفان | أبو ساندرا | 02-01-12, 08:51 AM |
Re: تداعيات الحرب في جبال النوبة/جنوب كردفان | أبو ساندرا | 02-01-12, 09:04 AM |
Re: تداعيات الحرب في جبال النوبة/جنوب كردفان | أبو ساندرا | 02-01-12, 09:19 AM |
Re: تداعيات الحرب في جبال النوبة/جنوب كردفان | محمد كابيلا | 02-01-12, 09:40 AM |
Re: تداعيات الحرب في جبال النوبة/جنوب كردفان | أبو ساندرا | 02-01-12, 09:51 AM |
Re: تداعيات الحرب في جبال النوبة/جنوب كردفان | أبو ساندرا | 02-01-12, 09:57 AM |
Re: تداعيات الحرب في جبال النوبة/جنوب كردفان | Kabar | 02-01-12, 11:51 AM |
Re: تداعيات الحرب في جبال النوبة/جنوب كردفان | أبو ساندرا | 02-01-12, 12:24 PM |
Re: تداعيات الحرب في جبال النوبة/جنوب كردفان | اسماعيل كردولي | 02-02-12, 10:47 AM |
Re: تداعيات الحرب في جبال النوبة/جنوب كردفان | أبو ساندرا | 02-02-12, 12:03 PM |
Re: تداعيات الحرب في جبال النوبة/جنوب كردفان | أبو ساندرا | 02-15-12, 09:36 AM |
Re: تداعيات الحرب في جبال النوبة/جنوب كردفان | أبو ساندرا | 02-29-12, 08:12 AM |
|
|
|