خريجوا طنطا اجمعوا هنا

Quote: السلام عليكم جميعاً يا عاطف إن شاء الله تكون إتصلت على فايز حسن وبليت شوقو وشوقك ليهو بعد الـ 27 سنة دي ؟ طنطا وما أدراك ما طنطا .. حكاويها كتيرة ومغامراتنا فيها وفي مصر أكتر .. طبعاً أنا كنت أول مرة أسافر بالطيارة .. ومن كسلا .. للقاهرة .. تصوروا ! أتذكر أني سافرت في شهر نوفمبر .. وطبعاً ما عندي فكرة إنه الطقس شتاء في مصر .. كنت لابس قميص نص كُم ومصيف تماماً .. ولمن وصلت الطيارة لمطار القاهرة حوالي الساعة 3 صباحاً ومديت راسي من باب الطيارة .. قربت أرجع لجوة تاني .. جاتني ليك لفحة هوا باااارد.. إضطريت أجري جري على البص .. وجري من البص لجوة الصالة .. إنتهت الإجراءات بسرعة وطلعنا الشارع .. والبرد شديد جداً كنَّا مجموعة من الطلبة إتقابلنا في مطار الخرطوم.. ووحدنا الجهود مع بعض .. لمن طلعنا من المطار كانت الساعة 4 صباحاً تقريباً .. نمشي وين يا جماعة ؟ .. كلنا دايشين .. وأول مرة نسافر برة السودان .. أخدنا تاكسي وقررنا نمشي السفارة السودانية .. قلنا لبتاع التاكسي ودينا السفارة .. طبعاً هو عرف إننا دايشين .. فأخد بينا كم لفة كده والعداد شغال قبل ما يوصلنا جمب السفارة .. نزلنا من التكسي .. اتلفتنا حولينا .. نفتش في حتة تلمنا من البرد لحدي الشمس ما تطلع .. لقينا جراج في بيت بابو فاتح شوية كدة .. دخلنا شنطنا ودخلنا جواهو .. اتجدعنا في الأرض ورقدنا .. لمن الشمس طلعت شوية كده .. طلعنا لقينا طبلية لبيع الفول جمب الجراج .. ضربنا الفول والطعمية .. ومع البرد داك أكلنا بمزاج .. وشربنا الشاي .. والسفارة طبعاً بتفتح الساعة 9 .. خلصنا إجراءات التسجيل والتبليغ في السفارة حتى بعد داك مشينا على فندق في العتبة .. وطبعاً بمجرد ما ختينا شنطنا في الغرفة .. نزلنا نتمشى في القاهرة .. ومن ديك وأنا كسرت ركبة في قاهرة المعز .. وما شفت طنطا إلاَّ بعد 3 شهور .. تصدقوا ؟ بالصدفة قابلني ضابط جيش قريبنا كان في دورة في مصر .. وأصر إني أطلع من الفندق وأمشي أسكن معاهو ومجموعة من الضباط في شقة مؤجرة ليهم .. وطبعاً راحات شديدة .. وكل شئ متوفر في الشقة لواحد برلوم جاي من كسلا .. للقاهرة .. وما ادراك ما القاهرة في الأيام ديك .. وللحكي بقية إن مدْ الله في العُمر ..