|
الأيام دي جنازة المنبر: السلفية والسلفيون والوهابية والرابطة الشرعية
|
السلام عليكم ورحمة الله وبركاته
عودنا المناضلون في كل فترة زمانية على الإتيان (بجنازة) ما ونصب الصيوانات ودق الدلالليك والردحي حولها حي ووب ... حي ووب غاغ غيغ .. غاغ غيغ ماع ميع .. ماع ميع
الفعلو والتركو .. أحي أحي العملوا والسووا .. أحي أحي
ده شنو ده ياخواننا ده!!! السلفية والسلفيين والحركات الإسلامية بمختلف مسمياتها والرابطة الشرعية ليهم خرتمية سنة شغالين بما يعتقدونه حقا بس فجعة كدي اكتشف الحلمانيون أن هؤلاء هم الشيطان الأكبر والعفريت الأحمر الذي يجب اجتثاثه من الدنيا!!
الحاجة الغريبة المحيراني في ناس ما عندهم علاقة بالدين أصلا .. وبعضهم غير مسلمين وبعضهم لا يصلون وبعد ده يجوا يفتوا في الدين الإسلامي وفي أحكام فقهية تحتاج ناس متخصصين في علم الفقه!! سبحان الله أصبح الدين كلأ مباحا يخضع لقواعد الفكر الحر والمنطق البشري دون قواعد ولا ضوابط!!
الغريبة إنو هؤلاء الحلمانيون ومدعي الليبرالية ومن لف لفهم وهم يدعون إلى تقديس (العقل) و ( الفكر) أنهم يحاولون نقل المعركة من كونها فكرية قانونية إلى معركة ميدانية جسدية وينفخون وينفثون النيران من أجل مزيد من الاشتعال كدأبهم دائما وأبدا في كل مشاكل السودان لمصلحة من يعمل هؤلاء؟؟؟ ولماذا ينهجون هذا النهج؟؟؟
الخلاف الذي دار أخيرا بين الرابطة الشرعية وبين الصادق المهدي هو خلاف فكري قانوني!! لم يدع أحد إلى ضرب/قتل/سحل الصادق المهدي بل ردوا عليه فكريا ودعوا إلى مقاضاته قانونيا .. حسب القوانين التي تتيحها جمهورية السودان منذ حوالي ثلاثين عاما كاملة!! طيب الجد شنو؟؟؟ ده ما ياهو التعامل الحضاري ذاتو البتقولوهو إنتو دعوا الصادق لمناظرة في أفكاره وعشان عارف نفسه مفلس وما عنده حاجة رفض يقعد معاهم ودعوا لمحاكمته بالقانون المتوفر في البلد يعني ما مدوا إيدهم ولا كراعهم طيب الناس دي بتورجغ وتحمش في النيران لي شنو؟؟
وللا إيه يقول ليك كيان الأنصار كان داير يقتحم دار الرابطة الشرعية والصادق منعهم ومطلعين ليك بيان طويل عريض يصف علماء الرابطة الشرعية بعلماء السلطان طيب كيان اللنصار ده عميان من عبد الرحمن الصادق اللي هو مستشار للرئيس عنده مكتب في القصر وامتيازات منصب وراتب وجزء من النظام الحاكم يا كيان اللنصار أفتونا مأجورين: لو الرابطة الشرعية وهي منظمة (غير حكومية) علماء سلطان عبد الرحمن ود سيدكم الصادق يكون شنو؟ عملاء سلطان تنابلة سلطان (م.ن) للسلطان؟؟ أفتونا بالله عليكم!!
الغريبة يقول ليك دي حكومة مجرمة وبنت ستين كـلـــب وإنـعـل أبوها كمان ولمن يتزنقوا يجروا للحكومة زي ما عمل الحزب الشيوحي لمن كفره محمد عبد الكريم!! جروا طوالي مش فتحوا فيهو بلاغ ولا تحاكموا للقضاء .. كلا بل مشوا اشتكوا محمد عبد الكريم لجهاز الأمن .. والله صحي ^____^
طيب جحاز الأمن ده مش هو برضو الابن ستين كـلـب وهو صاحب بيوت الأشباح؟ مش ياهو الجحاز العذب فلان وعلان وكتل فلان وعلان؟؟؟ طيب لمن تحصل الزنقة تجروا ليهو لييييييه؟؟؟؟
نرجع تاني لموضوع تحميش النيران الذي يقوم به البعض هاهنا أنصار السنة والسلفيون والرابطة الشرعية عموما كل كلامهم ونقاشهم فكري بكسروا الأفكار ويحطموا المعتقدات الباطلة وما مدوا يدهم يوم على الصوفية هذا على حد علمي
طيب ما تواجهوا الفكر بالفكر كما تدعون وما تقضوا على الرأي بالرأي ليه تاليب الصوفية والعامة على السلفيين لا وللا إيه في ناس تحف في المنبر ده اشتكوا لطوب الأرض من الكيزان وعنف الكيزان وسيخ الكيزان وتعذيب الكيزان هسي يقول ليك: يجب مواجهة هذه الفئات بالطريقة التي يعرفونها والتي تلجمهم!! دعوة صريحة للعنف!!
طيب أنت يا من يدعو لمواجهة النقاش الفكري بالعنف إنت قايل القصة بتقيف لي هنا؟؟ أنصار السنة والسلفيين ديل ما عندهم يدين؟؟؟ يعني قايلهم حيقيفوا كده مكتوفين لو تواصل مسلسل الاعتداء عليهم؟ المنطق بقول لكل فعل رد فعل مضاد له في الاتجاه ومساو له في المقدار يعني بنفس القدر حيكون في استهداف للصوفية ولكل من يعتدي عليهم ونبقى بعدين في أحي أحي والتوبة لي حبوبة ويا حكومة ألحقينا!! أنا لا أدعو إلى ذلك بالتأكيد لكن اتكلم عن منطق الأشياء
لا والأتحف من الناس ديل في تحف تانية والله أنتيكات عديل وارد خان الخليلي يقول ليك شنو في حرق خيمة أنصار السنة: نحمل أنصار السنة المسؤولية الكاملة عن هذا الاعتداء ياخواننا أنصار السنة معتدى عليهم معتدى عليهم معتدى عليهم كيف تحملونهم المسؤولية يعني؟؟ يعني هم مشوا أجروا ناس عشان يدقوهم؟؟؟ غايتو دي بس زي: في الحالتين أنا الضايع والمابدورك في الضملة يحدر ليك
أها نرجع تاني لموضوع التكفير الكفر حكم شرعي والتكفير باب من أبواب الفقه الإسلامي موجود في كل مذهب من المذاهب لكن التكفير له شروط وله ضوابط وهنالك عوارض للتكفير وانتفاء موانع وكلام كتير وفي حاجة مهمة: ليس كل من نطق بالكفر هو كافر!! ولا من فعل الكفر هو كافر يعني قد يقول الشخص كلاما ويكون كلامه كفرا ولكن لا يكفر حتى يبين له وتقام عليه الحجة طبعا دي أحكام فقهية والكلام فيها يطول .. لكن في النهاية التكفير حكم شرعي وليس كل من هب ودب يكفر الناس بل العلماء والقضاء الشرعي ودي الحاجات المفروض الناس تتناقش فيها فكريا بالعلم والفقه والشرع أما الجوطة الحاصلة دي فعبارة عن ابتزاز سياسي وفكري وحرب نفسية لا غير
يقيني الشخصي: أن من أحرق القباب ليسوا هم السلفيون وأن من أحرق خيمة أنصار السنة واعتدى عليهم ليسوا هم الصوفية بل هنالك طرف ثالث يسعى إلى إشغال الناس وإلهائهم عن قضايا أخرى وأعني بذلك الحكومة أو جهاز الأمن مثلا
أو يكون هنالك أطراف داخلية أو خارجية تسعى لفتنة طائفية دينية في السودان ودي برضو ممكن تكون الحكومة أو دولة الجنوب مثلا ,, المانع شنو ما دام فتى المنبر المدلل (دينق) بسعى لنشر الفتن بين المسلمين هنا في المنبر وهو نصراني أو كجوري لا يدين بالإسلام؟؟!! حقو نفكر شوية في الحتة دي برضو
أخيرا: الحاجة العجيبة إنو الموضوع ده اتلما فيهو سمك لبن تمر هندي فسيخ ^_____^ حلمانيين على صوفية على نصارى على روافض كلهم متلمين في الحتة دي أنا متكيف شديد من الحتة دي لأنها بتوري حقائق الناس مدعي الحرية والليبرالية وجزى الله الشدائد كل خير *** عرفت بها عدوي من صديقي
أها الجنازة جاهزة .. قوموا إلى نياحكم يهديكم الله .. ^____^
|
|
|
|
|
|
|
|
|