العنصريه موجوده في الملاعب السعوديه منذ امد طويل لكن الجديد طريقه التعاطي معها. بالامس اصدرت لجنه الانضباط بالاتحاد السعودي قرارا قضي بتغريم نادي الهلال مبلغ ستون الف ريال مع تهديد بمزيد من العقوبات قد تصل للعب بدون جمهور في حاله تكرار المخالفه وذلك على خلفيه هتافات رددتها جماهير الهلال في مباراه الفريق امام الاتحاد القادم من مدينه جده وقد وصلت تلك الهتافات الى المنازل بواسطه النقل التلفزيوني نادي الهلال رد باصدار بيان يتقبل فيه العقوبه لكنه طالب بتطبيق القوانيين على الجميع مذكرا بحادثه هتاف جماهير بعض الانديه ضد مهاجمه السابق والمعار للعين الاماراتي ياسر القحطاني وهي اساءت شخصيه خادشه للحياء العام ولجنه الانضباط وقتها لم تحرك ساكنا معظم برامج القنوات التلفزيونيه السعوديه اهتمت بالحادثه وافردت لها مساحات واسعه وهو امر لم يكن يحدث سابقا لا بد من الاشاره الى حاله العداء بين فريقي الهلال والاتحاد الذين يتقاسمان بطولات الدوري في الاعوام حيث يعتبر مشجعي الهلال فريق الاتحاد ليس بكامل الاهليه السعوديه نسبه لنظرتهم لعموم سكان جده من الوافدين الذين حصلوا على الجنسيه السعوديه بينما مشجعي الهلال او اغلبهم من بدو الحجاز سكان البلاد الاصليين
01-09-2012, 10:13 AM
فدياس نجم الدين
فدياس نجم الدين
تاريخ التسجيل: 05-19-2008
مجموع المشاركات: 2401
يبدو القرار السعودي متسقا مع الحمله العالميه لمكافحه العنصريه في الملاعب والجميع شاهد العقوبه المغلظه التي اوقعها الاتحاد الانجليزي على لاعب ليفربول لويس سواريز الذي تفوه بعبارات عنصريه تجاه لاعب المان يوناتيد باتريك ايفرا العقوبه كانت الايقاف ثمانيه مباريات وعقوبه ماليه كبيره كما يوجه حون تيري قائد تشيلسي والمنتخب الانجليزي اتهامات مماثله الا ان قضيته مع فيرديناد الصغير لاعب نيوكاسل شقيق ريو فيريدنياد لاعب المان يوناتيد امام الشرطه البريطانيه
01-09-2012, 10:26 AM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
Quote: رفعت إدارة نادي الهلال خطاباً إلى الاتحاد العربي السعودي لكرة القدم، تضمن التعليق على قرار لجنة الانضباط بشأن فرض غرامة مالية قدرها 60 ألف ريال على نادي الهلال بشأن ما صدر من جماهيره في مباراة الهلال والاتحاد في دوري زين للموسم الرياضي الجاري، أبدت من خلاله احترامها وتقديرها لكافة القرارات الصادرة من كافة اللجان التابعة للاتحاد السعودي لكرة القدم، مبينة أنها لمست تكرار نفس الأخطاء في اتخاذ القرارات تجاه نادي الهلال، وغياب العقوبات تجاه الأندية الأخرى.
وذكرت الإدارة ضمن خطابها: "سبق لنا مخاطبة الاتحاد السعودي لكرة القدم عدة مرات في جانب الهتافات التي تصدر تجاه لاعبي الهلال وخاصة ً اللاعب ياسر القحطاني، وإساءات متكررة للنادي وجماهيره في أغلب ملاعب المملكة دون أن تتخذ اللجنة أية قرارات، مشيرة خلال خطابها إلى أن العبارات التي تم معاقبة جماهير الهلال من خلالها، سبق وأن رُددت في أكثر من مباراة لم يكن الهلال طرفاً فيها ومع ذلك لم تصدر لجنة الانضباط في أي عقوبات.
وبيّنت إدارة النادي خلال خطابها أن ما يؤكد عدم اتخاذ اللجنة أي موقف، تجاه ما صدر من جمهور نادي الاتحاد في نفس المباراة التي عُوقب بعدها الهلال تجاه حكم المباراة وتحديداً بعد نهاية المباراة، حين هتف عدد من جمهور الاتحاد بكلمات بذئية بـ"اللغة الانجليزية"، وأرفقت إدارة الهلال مع الخطاب (CD) يتضمن ما يثبت ذلك.
يشار إلى إدارة النادي شددت على أنها تستنكر أي عبارات مسيئة وعنصرية، من كافة الجماهير بمختلف ميولها، مضيفةً إلى أنها تحث جماهيرها دوماً على أن تكون مثالاً يحتذى في هتافاتها الإيجابية، مبدية تيقنها أن تلك الهتافات التي صدرت من أي من جماهير الناديين لا تعد إلاّ سوى نماذج قليلة لا تمثل الجماهير الرياضية الواعية، مشيدة بحكمة رئيس نادي الاتحاد اللواء محمد بن داخل على تعامله مع الموضوع بحكمة وروية كانت محل إشادة الجميع.
وأكدت إدارة النادي على أن لجنة الانضباط بالاتحاد العربي السعودي لكرة القدم قد عاقبت نادي الهلال عقب الأحداث التي صاحبت لقاء الهلال والشعلة في دور الـ16 من كأس ولي العهد، والتي كانت نتاجاً طبيعياً كون الملعب لم يكن مهيئاً لاستقبال مباراة تشهد حضوراً جماهيرياً، ومع أن الهلال لم يكن له شأناً في تنظيم المباراة على ذلك الملعب غير المهيأ لاحتضان مثل هذه المباريات الجماهيرية، إلاّ أن لجنة الانضباط فرضت العقوبة على نادي الهلال، رغم أن بيان شرطة الرياض حمّل مكتب رعاية الشباب بمحافظة الخرج كامل المسئولية، ونوهت إدارة نادي الهلال بجهود شرطة منطقة الرياض في إنقاذ الموقف حينها.
وأوضحت إدارة نادي الهلال أنها لم تريد أن تتطرق لتلك الجوانب إعلامياً، إيماناً منها أن لكل جهة صلاحياتها التي تخولها العمل بموجب ما تقتضيه الأنظمة واللوائح، إلاّ أنه بعد أن صدرت العقوبة بحق نادي الهلال فقط، ودون النظر إلى المخالفات التي قامت بها جماهير الأندية الأخرى، ولم تعاقب، رفعت خطابها التوضيحي إلى الاتحاد السعودي لكرة القدم لينضم إلى الخطابات التي سبق أن رفعتها إلى الاتحاد السعودي بشأن الهتافات المسيئة
01-09-2012, 11:34 AM
فدياس نجم الدين
فدياس نجم الدين
تاريخ التسجيل: 05-19-2008
مجموع المشاركات: 2401
ودالصائم انت ناسي اخوك متخصص كوره وكده محل ما تدق الكوره بتلقانا مصنقرين نرجع لموضوعنا المتابع يلاحظ ان قائد الاتحاد محمد نور لم يلقي ما يوازي موهبته من اهتمام ونجوميه اعلاميه بل ولم يكن عنصرا فاعلا في انجازات المنتخب السعودي الذي يمر حاليا باسواء فتراته نور لم يصل لنجوميه ماجد عبدالله ولا الثنيان ولا الجابر ولا القحطاني بل ان نجوم ظهروا خلفه وجدوا نصيب من حملات الشركات الاعلانيه ربما كان للعدائيه التي يتعامل بها نور مع الهلال وجمهوره علاقه بمحاولات تحجيم ظهور نور وتالقه اعلاميا كما هو متالق داخل المستطيل موضوع نور يقفز بي لحاله مشابهه في مصر وهي لشيكابالا لاعب الزمالك والذي يتعرض دوما للسباب العنصري لبشرته السمراء من جماهير الاهلي وهو كذلك لم يصل لمستوى جماهيريه نجوم الاهلي اعلاميا بل وبعض نجوم الزمالك البيض البشره يتفوقون عليه اعلاميا ولو انه خلال الموسم الماضي وهذا الموسم اثبت شيكا انه هو الزمالك ولو غاب لغاب الزمالك لن تجد شيكا ولا محمد نور وجوه في حملات اعلانيه لشركات كما لن تجدهم ضيوف على اغلب المحطات والقنوات الفضائيه المهتمه بالشان الرياضي في مصر والمملكه هل للامر علاقه بلون بشرتهما اما ماذا هناك؟
01-09-2012, 11:44 AM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
بالنسبة لنور .. ما أظن والدليل محمد الدعيع وصل إلى قمة النجومية بل أصبح عميد لاعبي العالم منذ عام 2000 وحتى الآن! ومن الاتحاد عندكـ أحمد جميل ومحمد الخليوي .. أشهر ثنائي دفاع مرّ على تاريخ الاتحاد حتى وقت قريب!!
مهرجان اعتزال الدعيع كان الأسبوع الفات وكان فعلا مهرجان!!
بالنسبة لمحمد نور مشكلتو الأساسية هي العصبية والمزاجية وعدم الانضباطية كمان! ودي أضرّت بلاعبين كتار في السعودية زي خالد عزيز وفهد الغشيان
أضف إلى ذلكـ (الدلع) اللاقيهو محمد نور في الاتحاد!
01-09-2012, 12:04 PM
فدياس نجم الدين
فدياس نجم الدين
تاريخ التسجيل: 05-19-2008
مجموع المشاركات: 2401
ودالصايم الدعيع يستحق التكريم لكن السبعه كانت كتيره وذكرتنا ثمانيه المانيا اما مساله نجوميته فده جاء بالاضافه لتالقه لوجوده في الهلال ولك ان تعود للوراء لترى ما جري لخميس العويران واحمد الدوخي عقب انتقالهما من الهلال للاتحاد العصبيه والمزاجيه كانت لدي كثير من اللاعبين السعوديين لعل ابرزهم عندي هو يوسف الثنيان اللاعب الذي لا يمكن ان يتكرر في الملاعب مر بكثير من المشاكل التي اثرت في مسيرته رغم تميزه احمد جميل ومحمد الخليوي اين هما الان من نجوميه صالح الداوود مدافع الشباب والهلال السابق والذي اصبح محللا في قناه تلدوري والكاس وتجده في اغلب القنوات بل اين هما من الهريفي والكلثم والشنيف والتمياط لا تكاد تجدهما في اي موقع في الاتحاد السعودي ولجانه المساعده الكثيره ولا تجدهما في اي قناه ولا في مجال التدريب فاين اختفيا
01-09-2012, 12:23 PM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
يا فدياس .. أعتقد القصة راجعة للاعب نفسه!! ما ياهو عندكـ ماجد عبد الله كان محلل زي الترتيب!! برضو دخل في متاهات الأجهزة الإدارية وبعدها قرر يشتت من المجال نهائي!!
بالمناسبة أحمد الدوخي لحدي الموسم الفات كان أساسي في النصر أما خميس فبرضو انتهى بتصرفاته الشخصية .. ومن قبله مرزوق العتيبي هدّاف المنتخب السعودي في فترة من الفترات وكان أغلى لاعب في السعودية!!
نواف التمياط اعتزل الكرة وهو في أوجّ المجد بعد الإصابات الكتيرة وفشل البرامج التأهيلية ليهو! وقناة الجزيرة الرياضية كان ليها دور كبير في تحويله إلى محلل فني!
وبحسب مقارناتكـ دي يوسف الثنيان مفروض يكون نجم نجوم التحليل وينو؟ ومن قبلها سامي الجابر اتفرغ فترة للتحليل وهسي دخل عالم الإدارة برضو!
وحاليا من أهم المحللين الرياضيين في السعودية مدني رحيمي، عبد العزيز الدغيثر، عيسى الجوكم وما محتاج أوريكـ تصنيفهم شنو عند السعوديين!!
01-09-2012, 12:24 PM
محمد البشرى الخضر
محمد البشرى الخضر
تاريخ التسجيل: 11-14-2006
مجموع المشاركات: 28869
Quote: مشجعي الهلال او اغلبهم من بدو الحجاز سكان البلاد الاصليين
كدي في الأول أكد لينا معلومتك دي !!
Quote: لن تجد شيكا ولا محمد نور وجوه في حملات اعلانيه لشركات كما لن تجدهم ضيوف على اغلب المحطات والقنوات الفضائيه المهتمه بالشان الرياضي في مصر والمملكه
هل للامر علاقه بلون بشرتهما اما ماذا هناك؟
ومال صاحبنا الهنا من الشركس ولا من الأرمن
01-09-2012, 12:50 PM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
طبعا يا فدياس انا وصحبي العارض حميدة من متابعي الدوري السعودي من داخل الإستاد..والكورة دي نحن قاعديين جوووة..قلت ليهو يا عمك خلينا نقعد في سايد الإتحاد ..أهلنا ومننا وفينا وما ف زول بيفرزنا..:-) الغريبة جوة الإستاد أصلو ما سمعنا هتافات الهلاليين لكن كنا بنسمع هتاف الإتحادية لمن ما حشببو البلينت لي محمد نور وكانت بي صوت واااحد وحسب ترجمة إم بي سي تو اللعنة اللعنة اللعنة لك..نظام الحكم إنجليزي وكده..:-) العنصرية منتشرة في مكايدات الخليجيين ودونك ما حصل من تراشق بين السعودية وقطر.. محمد نور عن نفسي لا أجده موهبة سعودية لكن الإتحاديين عاملين ليهو توم وشمار....السعودية دي ما جابت ولا ح تجيب زي الثنيان والغشيان ..
01-09-2012, 01:06 PM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
محمد علي معلومه غالبيه مشجعي الزعيم من سكان البلدان الاصليين بتلقاها مدفقه في معظم المنتديات السعوديه بتاعت الكوره بعدين انت قايل هم بيعايروا الاتحاديين بيقولوا ليهم شنو طراش بحر بفتح الطاء وليس بضمها او حدف بحر ومرات بيقولوا ليهم بقايا حجيج بالنسبه لدعايه الدعيع اظني بتكلم عن محمد نور وشيكابالا وديل برضو تلقى ليهم دعايه لكن كلامي ان وجودهم الاعلامي ما قوي ومكثف مقارنه بموهبتهما تصدق ماجد عبدالله بعد اعتزاله بسنين وبعد عمل كرش عنده دعايه بتاعت لبن ولا مويه ما متذكر
المهم سعدنا بمرورك من هنا
01-09-2012, 05:40 PM
Deng
Deng
تاريخ التسجيل: 11-28-2002
مجموع المشاركات: 52577
اوووو حبيبنا دينق لقيتك خطير لكن قلت لي بتال القوس ولد ده تصدق اخوك من معجبي وليد الفراج اها بالمناسبه قناه لاين سبورت بعد شالوا منها الدوري وسابها الفراج وجاء ام بي سي بقت زي قناه زول مافي زول بيشهادها عموما حبابك في هذا البوست الجلابي معليش يا عمر الفاروق وودالبشري فطينكم لنرد على زياره اخونا دينق
01-09-2012, 06:18 PM
فدياس نجم الدين
فدياس نجم الدين
تاريخ التسجيل: 05-19-2008
مجموع المشاركات: 2401
عمر الفاروق ياخي انت زول فنان الثنيان فعلا احرف من انجبت الملاعب السعوديه وتجدني اشطح واقول ربما يكون واحد من احرف اللاعبين العرب ولو اني شاهدته في خواتيم ايامه وبالمناسبه دي خليني اقول ان فائز نصر الدين الذي شاهدته بعد اعتزاله ربما يكون احرف لاعب سوداني اشوفه واستغرب كيف ضاعت الموهبه دي ودالبشري وود الصائم تشكرات لاثراء البوست
01-09-2012, 07:00 PM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
بالمناسبة يا فدياس لو كان دينق رد قبالنا وجينا انا وود البشرى بعدو ةقمت رديت علينا قبل دينق كان عادي ممكن زول يجي يقول ليك دي عنصرية ..شوفت كيف مرات في حاجات عادية ممكن تتشقلب فقط لأنو نفوس الناس براإا الجايطة؟ بالمناسبة ابو يعقوب هو فعلا ألعب لاعب عربي في وجهة نظري..حرفنة فايز نصر الدين حرفنة محدودة في مساحات ضيقة تصلح في دوريات الصالات.. بأل القوس أنجح مقدم برامج رياضية وعنل مدرسة كللل الناس بقت بتقلد فيهو.. الولد يبدو إنو مدعوم وإن كان أيام القناة السعودية أحد الأمراء ثبتة ةقال ليهو فينا معناه ترى إتجاوزت حدودك
01-09-2012, 07:47 PM
احمد التجانى احمد
احمد التجانى احمد
تاريخ التسجيل: 11-11-2006
مجموع المشاركات: 3155
تحياتى فدياس والضيوف عمر الفاروق , تصدق برغم ال 17 سنة فى السعودية علا كورتهم اطلاقا ما جذبتنى شايفها مليس وسحسحة اكثر من اللازم
Quote: ومن الاتحاد عندكـ أحمد جميل ومحمد الخليوي .. أشهر ثنائي دفاع مرّ على تاريخ الاتحاد حتى وقت قريب!!
ود الصايم انت صاحى !!! الخليوى هسة شغال سكيورتى فى البنك الاهلى واحمد جميل اسوى حالا وحتى ماجد عبد الله , اين هو الان , البشوف محبة الجماهير له فى عصره الذهبى يقول بالميت كدة يطلقوا اسمه على احد الشوارع او الاستادات اخبرنى جاره فى الرياض انه اختفى عنه الاصحاب والمريدين الذين كانوا فى ايام مجده لايبارحون بيته بما فيهم الامراء والشيوخ ووجهاء القوم وكانوا بينفوا سودانيته ولكن اذا سالت منه الان يقولوا ليك الزول ماجد
Quote: مهرجان اعتزال الدعيع كان الأسبوع الفات وكان فعلا مهرجان!!
كان اسوا مهرجان اعتزال برغم وجود يوفنتوس , الملعب فقط كان به 30 الف مقارنة ب 70 الف فى مباريات عادية تجمع الهلال مع الرائد او الانصار عدد من زملاؤه اللاعبين لم يحضروا
01-09-2012, 08:04 PM
فدياس نجم الدين
فدياس نجم الدين
تاريخ التسجيل: 05-19-2008
مجموع المشاركات: 2401
عمر اتفقت معاك تماما في احقيه الثنيان بلقب الافضل عربيا ولو اني لم اشاهد معظم اللاعبين العرب خصوصا من اعتزل منهم بتال القوس مذيع ومقدم برامج ممتاز جدا وفعلا خلق اسلوب يحاول الكثيرون الان التشبه به بالمناسبه في مذيع في الرياضيه السعوديه عمك عجوز كده وبيلبس نظاره ياخي ده بيض لمن بهناك تركي العوجه برضو مذيع ومحاور كويس بالنسبه لدينق فنحن هنا نحاول ان نؤسس لفهم جديد اختلف مع دينق لكنه يزورني هنا في بوست لا مجال فيه للاختلاف فادانه العنصريه من الطبيعه البشريه السويه
01-10-2012, 09:23 AM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
تعرف يا عمر الفاروق في فيديو تاني بفتشو ليكـ هسي! يمين تقع عديل من الضحكـ .. المذيع ما قادر يسأل طويل العمر! جاط ليكـ السؤال وجاط معاهو الأمير زاتو! دقيقة بفتشو ليكـ!
01-10-2012, 09:28 AM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
أحمد التجاني يا عمكـ إنت من زمن الجمهور بصل 30 ألف؟ ياخ ناس هيئة الدوري عاملين مؤتمر عديل عشان يشوفوا الناس دي بقت ما بتخش الكور مالا!! لجنة المسابقات السنة دي عملت المباريات كلها الأربع والخميس عشان ترجّع الناس تاني للاستادات!! مباراة الاتحاد والرائد الأخيرة حضورها لم يتجاوز 400 مشجع!!
أما الخليوي وجميل .. فبرضو أنا متمسكـ برأيي الخلل منهم ما من المجتمع .. حتى ماجد عبد الله! في يوم من الأيام اتفكر نفسو من أصحاب السمو عديل كـدا!
ما ياهو كل اللاعبين القدام بقو محللين ونقاقين في القنوات الفضائية! بعدين إنت عارف المحلل بياخد في الاستوديو الواحد كم؟
01-10-2012, 10:09 AM
فدياس نجم الدين
فدياس نجم الدين
تاريخ التسجيل: 05-19-2008
مجموع المشاركات: 2401
احمد التجاني زي ماقال ود الصايم العزوف الجماهيري عن متابعه المباريات بقي مشكله في السعوديه كلفها نص مقعد في دوري ابطال اسيا السنه دي وفق معايير الاتحادي الاسيوي لانو متوسط الحضور كان ضعيف جدا فبدلا من اربعه مقاعد للفرق السعوديه بقوا تلاته ونص والغريب في الموضوع ده انو قطر الملاعب قاعدين يضربوا الكراسي بوهيه عشان يظهروا زي فيهم مشجعيين حصلت على اربع مقاعد بالرجوع لموضوعنا الاساسي نجد ان اعتراف معظم مقدمي البرامج بوجود مشكله العنصريه هو اول طرق الوصول للحل
كسره ود الصايم انت دينق خلعك زي بمعرفته لبتال وانا كنت قايلو متخصص في ناس لاري كينج وديفيد ليبرمان ولينو ومن لف لفهم لكن حفاظا على تقاليد الاونلاين نقول ( من يكتب بباسوريد دينق) كسره الكسره اجدع لي تلفون بتال القوس في الماسنجر
01-10-2012, 10:47 AM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
ودالصايم المذيع خائف ومرتبك لمن نسي هو عايز يسال من شنو بداء بالهلال نادي القرن وانتهي بـ هل لسموكم قصيده واظنه كان عايز يسال بمناسبه نيل الهلال لقب نادي القرن في اسيا هل جادت قريحتكم بقصيده تخلد هذا الانجاز لكن من الربكه والكبكه الدرب راح ليهو
تعرف خفت يقول ليهو يا سموك انشاء الله اتغديت كويس
01-10-2012, 05:36 PM
Deng
Deng
تاريخ التسجيل: 11-28-2002
مجموع المشاركات: 52577
Quote: كسره ود الصايم انت دينق خلعك زي بمعرفته لبتال وانا كنت قايلو متخصص في ناس لاري كينج وديفيد ليبرمان ولينو ومن لف لفهم لكن حفاظا على تقاليد الاونلاين نقول ( من يكتب بباسوريد دينق)
بيكتب بيهو ناصر الجوهر.
يا ولدي نحنا لمن عرفنا الكرة السعودية كان بلعبوا فيها ناس ود النقر وود خوجلي.
بعدين لو ما السود السعودين لما كانت الكرة السعودية العالمية أصلا.
وكأس العالم 1994 بأمريكا أكبر دليل على ذلك.
01-10-2012, 05:56 PM
فدياس نجم الدين
فدياس نجم الدين
تاريخ التسجيل: 05-19-2008
مجموع المشاركات: 2401
Quote: وكأس العالم 1994 بأمريكا أكبر دليل على ذلك.
تعرف يا دينق .. في نكتة مشهورة في المنتخب دا قالوا واحد من (بدو نجد) ـ مش الحجاز يا فدياس قاعد يتفرج في المباراة .. بعد شوية سأل الجماعة: وين المواطنين؟
01-10-2012, 08:11 PM
سيف النصر محي الدين
سيف النصر محي الدين
تاريخ التسجيل: 04-12-2011
مجموع المشاركات: 8995
يا فدياس في درجات العنصرية السعودية محمد الدعيع يأتي في درجة اعلى من محمد نور، فكونه اسود تجعله ادنى من السعوديين البيض و يمكن لاي واحد منهم أن يقول له او عنه "عبد" بدون أن يطرف له جفن, أما محمد نور هوساوي فهو مكاوي متجنس و عند السعوديين دي درجة واحدة بس زيادة من المقيم غير السعودي زائد أنو اسود ، الدعيع مثلا يمكنه أن يعمل بالجيش السعودي و الشرطة، أما محمد نور فهو لا يستطيع و لا يحق له التقديم اساسا لمثل هذه الوظائف لأنه و بحسب التعبير الرسمي ليس "سعودي الأصل و المنشأ"..
01-10-2012, 09:02 PM
mohmed khalail
mohmed khalail
تاريخ التسجيل: 06-14-2007
مجموع المشاركات: 4509
لا ونعم حسب تفاوت الفهم بين المشجعين فماجد عبد الله السوداني كان فتى الرياضة السعودي الاول لفترة طويلة من الزمان فناً وخلقاً وغرّض على التانية ديبالله وزي ما ذكر الاخوة عن الدعيع احمد جميل فهد خميس العويران وغيرهم من نجوم السعودية سمر وفي مصر كمان كان الاخوة يوسف (إبراهيم وإسماعيل) في الزمالك وقبلهما فاروق جعفر ومن ثم شيكاوتجد ربيع يس في الاهلي كان من النجوم والاعمدة الاساسية أحمد الكأس الاتحاد السكندري او المصري لا اذكر ففي اعتقادي النجم ان دعم موهبته بالاخلاق الحميده داخل وخارج الملعب سيكسب احترام الجمهورالمنافس قبل المؤيد.
01-10-2012, 08:47 PM
عمران حسن صالح
عمران حسن صالح
تاريخ التسجيل: 11-26-2004
مجموع المشاركات: 10159
البوست بقى ممتع يا فدياس استغربت الراي بتاع الكورة السعودية مملسة ، من أخونا احمد التجاني وبالمناسبة انا اقتنعت انو السعودين كمشجعين بيعرفوا كورة فعلاً لأنهم قاطعوا مشاهدة المباريات بعد المستوى الإتغير حسي لامن جيت قبل كام تاشر سنة هنا ، مبارايات الدوري عبر التلفاز كانت زجمة خليكـ من تدخل تشوفه في الاستاد الأمير الشاعر بن مساعد ده جمع بين نقيضين ! توتر الكورة ومشاكله ومشاعر الشاعر تغنى الفنان القدير محمد عبده بأجمل كلماته الغريب يا ود الصايم في ردودو على المذيع كان يتحدث بمنطق " الناس مقامات " والزول فردة إبن الملكـ الراحل والمذيع طبزه بكلمة انو تاخروا بسبب رئيس الاهلي ! هكذا فهمت
01-11-2012, 07:15 AM
فدياس نجم الدين
فدياس نجم الدين
تاريخ التسجيل: 05-19-2008
مجموع المشاركات: 2401
صلاح اخوك معجب كبير بكبرياء الامير الشاعر عبدالرحمن بن مساعد ياخي ده يشهيك الاماره والطنقعها خالد العطا سمعت الكثير عن الساحر الطاهر حسيب لكن بكل اسف ظهوره كان قبل التوثيق بالتصوير التلفزيوني زيو وزي الامير صديق منزول وكثير من موهبيين السودان الما شفناهم. شكرا لمرورك دينق يا مستعرب وكمان عندك استلاب في الغدد اللمفاويه لدرجه خلتك تتابع الدوريات العربيه واخبارها ههههههههه ( فدياس مركب مكنه بشاشا) على قول عادل امام لعمر الحريري يا دينق ما تجي توزع الناس دي ونقلب الموقع ده لمنتدي خليجي هههههههه وجودك في بوست اضاف له وجعله ممتع بحسب تعبير عمران سيف حيرتني قصه شهاده المنشا دي الشئ بضاعه وارد تايوان لكن تعرف ملاحظتك دي الكنت بفتش عليها الجماعه النهايه اسمائهم فيها البيشي ولا الدوسري بتلقاهم في وضع افضل من الجماعه الاسمائهم بتنتهي بهوساوي او فلاته او المولد واظن ديل من الحجاز واغلب الاخرين من جيزان ونجران وبيشه عمران اخوانا احمد التجاني احسبه من محبي الكره الافريقيه العنيفه لكني شايف الدوري السعودي قوي وانا متابعه مع الدوري المصري يمكن المستوي انخفض شويه لكنه برضو احسن مننا بمراحل عمران خليك قريب ليزداد البوست روعه بوجودكم جميعا
01-11-2012, 11:51 AM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
يا ود الصايم حرااام عليك.. والله موووووت بي الضحك... ياخ الزول ده مالو؟؟؟ قول والله الفيديو ده ما مفبرك.. بالمناسبة وزي ما بيقول لي حميدة الأمير عبدالرحمن صاحب سموو ملكي يعني صاحب مقام وممكن بكرة يبقى ملك عشان كده لازم يحافظ على برستيجو.. عن نفسي أعتقد في حاجات مرجعيتها ذكاء اللاعب..فسامي الجابر الذي هو ليس من أصول سعودية إستفاد من الكورة كما لم يستفيد بني ادم من قبل..وأسة الزول ده عمل لي روحو شخصية ح تخليهو اللاعب رقم واحد في تاريخ السعودية..علم وطووور روحو..
01-12-2012, 08:16 AM
فدياس نجم الدين
فدياس نجم الدين
تاريخ التسجيل: 05-19-2008
مجموع المشاركات: 2401
عمر الفاروق كما قلت الذكاء الاجتماعي والاعلامي هو الذي يصنع الفرق احيانا فسامي ليس بافصل موهبه من خالد مسعد ولا حتى زميله خالد التيماوي لكنه طور نفسه بالدراسه والاجتهاد واذكر في هذا الموسم والدوري شغال سامي سافر لكورس تدريبي في انجلترا عشان كده ما بعيد تسمع بيهو مساعد مدرب للمنتخب الاول وبعدها مدرب عديل للمنتخب
01-12-2012, 08:51 AM
عبد الدائم سيد أحمد
عبد الدائم سيد أحمد
تاريخ التسجيل: 10-28-2006
مجموع المشاركات: 4220
يا فدياس وود الصايم فى مقولة هنا فى السعودية بتقول ( آآقولك خالد التيماوى تقولي عبدو برناوى )
حسب متابعتى للدورى السعودى بدون تعصب رؤساء الهلال مرور بكل الاجيال هم اكثرهم حنكة ودراية علم وفهم وتعامل راقى ..
زمان قبل ظهور القنوات الفضائية فى البطولات العربية كنا بنعرف لاعبين الهلال و النصر فقط وقليل من الاندية الاخرى
استطاع الهلال فى السنين الاخيرة ازاحة النصر كفريق منافس له وظهر الاتحاد كــند خطير للهلال ...
البون الشاسع ما بين بطولات الهلال و الاتحاد سواء الداخلية او الخارجية ، تجعل دائما" مشجعى الاتحاد فى حالة تعصب وانفلات حتى داخل النقاشات العادية هنا فى جده لو قلت الهلال تلقى ميه اتحادى نط ليك فى حلقك ...
منكنة الاتحاديين فى السنين الاخيرة انو الهلال ما احرز بطولة اسيا بمسماها الجديد .... ناسين بطولتين للاندية ابطال الدورى فى اسيا وبطولتين للاندية ابطال الكؤوس فى اسيا وبطولتين للسوبر الاسيوى
وفى سبيل نفـــى تلك البطولات يحاول الاتحاديين نسيان بطولتهم للاندية ابطال الكؤوس اليتيمة .
وانا اقولكم شجع الهلال ( الزعيم ) وريح راسك ...
نحن اصحاب سمؤ يا ود الصايم ترى دير بالك ....
01-12-2012, 09:39 AM
فدياس نجم الدين
فدياس نجم الدين
تاريخ التسجيل: 05-19-2008
مجموع المشاركات: 2401
عبدالدائم لطالما شكك الاتحاديون والنصرويون في بطولات الهلال ونسبتها للتحكيم لكن اكثر ما يغيظهم الان هو لقب فريق القرن في اسيا واظنك كمتابع للدوري السعودي تعلم ان الفرق التي تقاسم الهلال النديه تتغير ويفضل هو الرقم الثابت فمن منافسه النصر لمنافسه الشباب ثم منافسه الاتحاد والان ظهر الاهلي كمنافس
لكن يا عبدالدائم الاهله حقارين وجمهور الهلال او قل فئه ليست قليله منه العنصريه تجري منها مجرى الدم ودي مشكله كبيره
01-12-2012, 09:59 AM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
بافتراض إني طارح روحي بفهم كورة فمنذ قدومي للسعودية وانا أشجع فريق الشباب اللي بعتقد إنو جمهورو عشرة وبي انا بقينا حداشر.. الهلال فعلا فريق منظم إداريا..بس يا فدياس نادي القرن كان واضح جدا فيها شغل الفبركة وواللعب تحت الطاولات.. مع إني ما بحب الهلال السعودي بس الحقيقة تقال وزي ما في السودان الهلال وفي مصر الأهلي ففي السعودية لو الهلال تمام فالمنتخب السعودي تملم..ولو الهلال كعب فالمنتخب السعوحي بيكون معب..
01-12-2012, 10:11 AM
طلحة عبدالله
طلحة عبدالله
تاريخ التسجيل: 09-14-2007
مجموع المشاركات: 18104
يا أبو عمير دي كدا ما بتجىء ياخ يا إما إتا طارح نفسك فعلا يا إما كمان ما طارحا الإفتراض الجابو شنو هنا .. وبعدين ياخ ما تاخد على كلام كابتن وليد عبد اللطيف كتير الزول دا بهظر ساي وإتا فعلا بتفهم كورة .. صدقني.
01-12-2012, 11:06 AM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
والله يا طلحة بعد ما عايز اتفاصح واقةل ليك ما إنت ختيت إستفهام قبل كده فزول قال ليك ما باجي؟ إتذمرت إني قولت ليك..فخجلت وتواريت :-( خلاص يا زول نشيل الإفتراض وأقولها بملء فمي انا بفففهم كورة:-)
01-12-2012, 10:32 AM
فدياس نجم الدين
فدياس نجم الدين
تاريخ التسجيل: 05-19-2008
مجموع المشاركات: 2401
عمر الفاروق ياخي انت ابو المفهوميه سيب التواضع وركب مكنه محلل طوالي الشباب فريق له طريقه لعب معروفه على مر الاجيال مثله مثل الراقي الاهلي وله اداره ذكيه تعرف كيف تتعامل مع الاعلام الهلالي القوي ومراكز النفوذ في الكره السعوديه كسره كان تكمل جملتك دي المنتخب المصري بخير طالما الاهلي بخير المنتخب السعودي بخير طالما الهلال بخير المنتخب السوداني بخير طالما سيد البلد بخير لعنايه طلحه للنظر والافاده
01-12-2012, 11:23 AM
طلحة عبدالله
طلحة عبدالله
تاريخ التسجيل: 09-14-2007
مجموع المشاركات: 18104
Quote: والله يا طلحة بعد ما عايز اتفاصح واقةل ليك ما إنت ختيت إستفهام قبل كده فزول قال ليك ما باجي؟ إتذمرت إني قولت ليك..فخجلت وتواريت :-( خلاص يا زول نشيل الإفتراض وأقولها بملء فمي انا بفففهم كورة:-)
والله يا أبوعمير وبغض النظر عما تحته خط أعلاه لكن أنا واثق منك إنك واثق في نفسك وكلك زهو وفخر واعزاز ...
يا فدياس
Quote: المنتخب السوداني بخير طالما سيد البلد بخير لعنايه طلحه للنظر والافاده
وهو يعني إفادتي ح تكون أحسن من إفادة أنصار سيد اللبن أو أيا كان إسمه؟ أكيد لا . بس السؤال: متي يكون سيد اللبن أو أيا كان إسمه بخير ؟؟؟؟ أظن ح ننتظر لما أبو الهول يتحرك من مكانو .
01-12-2012, 12:53 PM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
طلحه كده بدون عصبيه هلال مريخ مش ده ملاحظه جديره بالبحث والتحليل طبعا ممكن اضرب ليك مثل بعافيه الهلال في الفين وسبعه والانعكست ايجابي بتاهل المنتخب لامم افريقيا في الفين وتمانيه بتصدر مجموعه فيها تونس زاتها
بالرجوع لعمر الفاروق تعرف اخوك بيكتب كل بوستاته ومشاركته بالموبايل عشان كده مرات بتلقي حروف ملصقها مع بعض ومرات بتلقي حرف الفاء بدل القاف وحرف الخاء بدل الحاء وهكذا واخوك ما شغال بالموضوع ده الشغله ومعتمد على فطنه القارئ المسكين المرات فطنته بتتعب لمن يصل للمعني المراد من المشاركه
01-12-2012, 03:20 PM
Deng
Deng
تاريخ التسجيل: 11-28-2002
مجموع المشاركات: 52577
Quote: تعرف يا دينق .. في نكتة مشهورة في المنتخب دا قالوا واحد من (بدو نجد) ـ مش الحجاز يا فدياس قاعد يتفرج في المباراة .. بعد شوية سأل الجماعة: وين المواطنين؟
ود الصايم.
في عام 1994 وبعد مباريات كأس العالم الذي شارك فيه المنتخب الوطني السعودي وكان قد ظهر بمستوى جيد جدا. ولقد كان معظم أفراد المنتخب السعودي أنذاك هم من السعودين السود. ذهبت لمكتب البريد لكي أرسل بعض الأغراض للسعودية لأحد أصدقائي، كانت موظفة البريد فتاة من المكسيك وكان يبدوا عليها من المتابعين لكرة القدم. تجاذبت معي طرف الحديث وقالت لي" أنتو عندكم فريق كرة قدم ممتاز جدا، ولقد ظهرتم بمستو رائع". رديت عليها بضحكة وقلت لها أنا من السودان وليس من السعودية. وفي مساء نفس اليوم ألتقيت بعض أصدقائي من السعودية وحكيت لهم القصة، وقلت لهم فريقكم ده من غير أولادنا ديل مافيهو أي فايدة.
01-12-2012, 05:51 PM
عمر الفاروق
عمر الفاروق
تاريخ التسجيل: 10-10-2005
مجموع المشاركات: 9669
بالمناسبة يا فدياس العنصرية تضرب بجرورها في كرة القدم الأوروبية أكتر من العربية والدليل الواضح منتخب فرنسا..ويا دينق بتاعت البريد دي ما كان تقول ليك فرنسا 98 بتاعتكم لعبت تمام..:-) كدي أرجع ليها.. منتخبات إيطاليا وألمانيا وإسبانيا لم تعرف البشرة السمراء إلا في السنوات الأخيرة وده ح يغطس حجرهم فالصورة مقلوبة في اوروبا..:-)
01-12-2012, 07:14 PM
فدياس نجم الدين
فدياس نجم الدين
تاريخ التسجيل: 05-19-2008
مجموع المشاركات: 2401
دينق وعمر الفاروق لعل جمهور الكره العالميه لا يزال يذكر مشهد ايتو الكاميروني لاعب برشلونه السابق وهو يحاول مغادره الملعب بعد هتافات عنصريه ضده في احدى مباريات الدوري الاسباني وهو مشهد يصور العنصريه في اوضح صورها وفي الموسم السابق اتهم مارسيلو لاعب الريال بوسكس لاعب البارسا بسبه عنصريا لكن الاتحاد الاسباني لم يحرك ساكنا على العكس من الاتحاد الانجليزي الحاسم جدا في هكذا امور
01-14-2012, 09:52 AM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
Quote: استطاع الهلال فى السنين الاخيرة ازاحة النصر كفريق منافس له وظهر الاتحاد كــند خطير للهلال ...
عبد الدايم .. الكلام دا زمان ياخ! هسي المنافس الوحيد للهلال هو الأهلي!! الاتحاد بقى عبارة عن رواكيب .. النوع الما بتشكّر داكـ!!
عمر الفاروق .. سمعت تصريح رئيس الهلال بعد مباراة التعاون؟ يمين بالله لو ما سمعتوا نص عمركـ الرياضي راح!!
دينق
Quote: وقلت لهم فريقكم ده من غير أولادنا ديل مافيهو أي فايدة
تعرف أديكـ نوع تاني من العنصرية .. بين أولاد الشيوخ وما تحتهم من البشرية!! قبل تلاتة أو أربعة مواسم الهلال قرّر يتعاقد مع الحسن كيتا طبعا كيتا كان محترف في الاتحاد واضطرت تنهي عقدو لأنو (جبّص) للجمهور السعودي وأصحاب السمو القاعدين في المنصة كلهم! المهم لما الهلال قرّر يتعاقد مع كيتا قام منصور البلوي رئيس الاتحاد في الوكت داكـ جا الرياض بطيارتو الخاصة وانتظر كيتا في المطار أول ما نزل ساقوا بالطيارة ووداهو جدة عشان يوقع مع الاتحاد تاني وأصحاب السمو بتاعين الهلال قاعدين في المطار منتظرين!!
أنقر بعد داكـ منصور بقى رئيس .. ولّ اترشح تاني لرئاسة نادي!!
01-14-2012, 11:05 AM
عبد اللطيف السيدح
عبد اللطيف السيدح
تاريخ التسجيل: 03-11-2008
مجموع المشاركات: 5454
ودالصايم والشباب يبدو ان الكوره السعوديه في طريقها للدخول لنفق مظلم من التعصب ففي مباراه الهلال والتعاون والانتهت بالتعادل الايجابي هدف لهدف وبالتالي ذهبت الصداره للاهلي بعد المباراه هاجمت مجموعه من جماهير منزل الحكم عبدالرحمن القحطاني وقذفته بالحجاره وكتبت عليه عبارات مسيئه بالبوهيه هذا بخلاف الجماهير التي كانت في الاستاد وسبت الحكم ورمته بكل ما هو ممكن ومتوفر في يدها ملاحظتي من خلال متابعتي للكوره السعوديه لم ارصد حكم اسمر البشره منذ عهد عمر المهنا وعبدالرحمن الزيد وصولا لخليل جلال وفهد المرداسي هل هذه الملاحظه صحيحه ام فاتني شئ هنا
نرحب بالسيدح في البوست وكلامك فايت قعر اضاني بما فيه كلام ود الصايم عن الاستراحه
01-14-2012, 01:14 PM
فدياس نجم الدين
فدياس نجم الدين
تاريخ التسجيل: 05-19-2008
مجموع المشاركات: 2401
حبيبنا محمد اظن اختلطت عليك الاسماء في موضوع الحسن كيتا الذي طرد من الملاعب السعوديه بعد الحركه الاشرت اليها لكنه عاد بعد عفو ملكي ليلعب للشباب لكنه ما قدم ليهو حاجه لاصابته اللاعب الخطفه البلوي من الهلال وبطيارته الخاصه كان السيراليوني محمد كالون والجاء ليوقع للهلال قام البلوي دفع ليهو اتنين مليون يورو زياده فمشي معاهو وكانت النتيجه حرمانه من اللعب لاي نادي سعودي مدى الحياه وطرد البلوي من رئاسه الاتحاد الحاول يعود ليها في الانتخابات الفاتت الجابت اللواء محمد داخل الجهني رئيس وفي اخر لحظه منع البلوي من الترشح او حتى الادلاء باي تصريحات صحفيه كده بس حكم قرقوش
01-15-2012, 07:46 AM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
محمد بس عشان دينق يآاااااامن زاتو هههههههههه اسمع انت صحي حكام سمر البشره في الدوري السعودي مافي؟؟ الموضوع ده زاني لي في راسي ليهو يومين كده اعمل ابحاثك وافيدني
01-15-2012, 08:19 AM
محمد عبد الماجد الصايم
محمد عبد الماجد الصايم
تاريخ التسجيل: 10-16-2005
مجموع المشاركات: 35312
عليكـ الله متّع نفسكـ بالتصريح دا!! بعد مباراة الهلال والتعاون وانتهت 1/1 الحكم طبّق فيها أي نظرية ممكنة .. وطبعا لجنة الانضباط شايلة عقوباتها وواقفة .. وأي تصريح ضد الحكم بتدفع فيهو 75 ألف ريال للمرة الأولى وبتضاعف في كل مرة!! شوف عمكـ رئيس الهلال زاغ من الموضوع كيف:
01-15-2012, 09:12 AM
فدياس نجم الدين
فدياس نجم الدين
تاريخ التسجيل: 05-19-2008
مجموع المشاركات: 2401
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة