|
البارساوعيال مدريد كلاسيكو أسباني في شوارع جبرة 2012
|
الساده المشاهدين تنبيه هام: الموضوع منقول من الربع الفات ولانو ما حصلت الارشفة نقلتوهنا تاني فلكم العتبي (السادة اصحاب المداخلات بتاعت السنة الفاتت) مواصفات الاستمتاع ب (الكلاسيكو)
النموذج( أ ) سبت (اخدر) علي حد الوصف ثم تلفون محشو بالرصيد مع مبلغ محترم من المال (حق الشاي والسجاير ودخول نادي المشاهدة) وحفظ جيد لنجوم البارشا عشان تغالط الجماعة وتلوم المدرب لاقدر الله في حالة التعادل او الهزيمة (والعجب لو لابس فنيلة برشلونة) طوالي تحتل الكرسي القدام ، والشاشة علي شرط تكون 40 بوصة والتعليق بصوت عصام الشوالي ..... النموذج (ب) خاص بالاسرة ..... كرت الجزيرة (أول شي) التأكد من عداد الكهربا الشفع (ينومو بدري) مايعرف إصطلاحا بربط الاحزمة توفير (مصاريف اليوم التاني ) تفاديا لنقة متوقعة قبل وبعد المبارة.. لو ساكن مع نسابتك (ينًصح) بنادي مشاهدة خارجي .. ولا موبايل وسماعة وتتابع المبارة عن طريق (أف أم) بعد ان تتغطي جيدا لو جارك نقاق ومزعج (يستحسن) قفل نور الحوش الخارجي وسحب سلكة الباب والامتناع عن التدخين لحدي (الربع الساعة الاولي). احد المهتمين (بالفارغة والمقدودة) من اولاد حلتنا وهو علي (فكرة مكشوش من السعودية) في ازمنة ما قبل توسعة الحرم وذهاب بن لادن الي افغنستان، ولكنه عايش الوهمة بي انو مهما حصل فهو (ود السعودية) وده (لقبو) في الحلة ... فصطادني قرب دكان يوسف اها الكورة كيف الليلة ثم استرسال قائلا عندك كرت الجزيرة جيب سفة ولو في سجارة ما بطال الليلة الفطور فول ولاشنو الجديد شنو .. وينك ماظاهر شايفكم قطعتو الشجرة بتاعكم انت بتشجع منو اخوك عثمان قاعد حاولت التملص من إستمارة الاسئلة تلك فأجتبه لالالالا والله ح شوف اي نادي مشاهدة فأجابني (ماهو عادي) ليييييييييييييييييييي ياخ الكروت رخيصة وراقدة في السوق ولو عندك زول في السعوية الكرت والرسيفر والتلفزيون كلهم بي 00ا ريال والسلك هدية بنشتريهم من واحد هندي والله نحن لمن كنا هناك الكروت زي اكياس الدكوة مشتتة في الشقة ..... ثم إجترار لذكريات (صادقة ونبيلة)
نواصل
|
|
|
|
|
|
|
|
Re: البارساوعيال مدريد كلاسيكو أسباني في شوارع جبرة 2012 (Re: omar alhag)
|
وانا قلبي معلق باول الشارع امشطه بنظرات ممعنة في الاشتياق لعلها ( سلمي) وكم تمنيت بان تخرج بدون وجه حق ومبرر منطقي ليافعة معدودة الخطوات واطوال امتار القماش اومسسترة (بضلفة الباب) .. وكل هذا لم يحدث
وود السعودية (يغرف) من معين لا ينضب من الذكريات وانا مقياس رسم وقاسم مشترك ل (تلك) و (هذه)
بصرت وبصرت كثيرا وانا اقف علي ارض زلقة من كثرة (الطلبات المنزلية) متكئ علي ورقة من فئة (عشرين جنيه) مثيرة للجدل اتحسسها بين الفنية والاخري مغبة ان تفر هاربة كغزال بري نافر وجافل حتي من انعكاس ظله علي الارض. بعد مناورات مضنية تخلصت من ود(السعودية) واسئلته الشرهة. وعند اول ملف بجور الفرن فاجاني (النهار ونجم الدين ترطيبة) . سادي الدرب مُحمر العيون شافطا من تبقي من اوكسجين شارع الفرن ومتحسيا لون المخدات (يعني يادوب قايم من النوم)
دبياجة
لمن لا يعرف نجم الدين ترطبية التعليم . مدرسة صناعية (لحدي سنة كم الله اعلم) الغلاط : لحدي ما تجيك امراض الطفولة الستة وانت في عز الشباب او يصبيك شباب مبكر وانت ترفل في شيخوخة سعيدة اللون السياسي : بالنهار كورنجي وبالليل (ببقي خاتف لونيين) ومرات لون واحد. ويمتلك عدة مواهب ممكن يعطلك من مشوار مهم ما بتفق معاك في اي شئ قدرة فائقة علي (الونسة ) مع كافة الفئات العمرية (الشيوخ والشباب والاطفال) لو شفتو في الشارع (احسن تبرم منو ) او تقضي سحابة النهار (وباقي علبة سجايرك وتمباكك) متجرر معه من ضل لي ضل.ومن فارغة لي مقدودة .
| |
|
|
|
|
|
|
Re: البارساوعيال مدريد كلاسيكو أسباني في شوارع جبرة 2012 (Re: omar alhag)
|
توكلت علي الحي الدايم متجها صوب ترطيبة واثق الخطي امشي ، متسلح بشخصية ادهم صبري (رجل المستحيل) في توجيه الضربات الساحقة وتفادي (طلقة المسدس) ومصارعة التمسايح المفترسة ..... وإستفزاز العدو بي إبتسامات ساخرة وضحكات مرتجلة...... كيف ياشاب (باغته سريعا) فإستدار بزواية (45 درجة) اهلا قالها متشاغلا بجريدة يوحي بعدم اكتراث بإئن همست في سري (ده تكتيك جديد لحرب الشوارع) اسمع (هكذا فأجاني) ... في خبر عجيب في الجرايد فأجبته دقيقة امشي الفرن واجيك راجع ياخ فرن شنو انت ما تمشي الفرن التاني ده ماسورة ساي وعيشو كعب فأخذ الرجل يشتم ويسب في الفرن واصحابه وقطعة الارض المشيد عليه (طلعت ورثة) وعليها مشاكل ..... وانا اقطب حواجبي دهشة ثم ارخي عضلات وجهي تجهما والرجل لاينفك في سب الفرن .. وفكرت بان اقود حملة شعبية ضد اصحاب الفرن وحملة اخري (تصحيحية لمسار الفرن) او اقوم بعمل إستخبارتي محكم واعمل (انشقاق) بين العمال ثم مؤتمر صحفي وتعين قيادة جديدة .. وهاك يا بيانات في اعمدة النور و(ضلف) ابواب الدكاين للقيادة الشرعية الجديدة وبعدها نجتمع بالورثة (شغل مفاوضات عديل كده) ثم نتنقل بين السوق العربي والسوق المركزي وإحتمال نمشي شعبي ام درمان (ده كلها اماكن مقترحة للتفاوض) ومصاريف ونثريات وكل مشوار بي امجاد واحتمال نمشي (اديس ابابا) نسبة لوجود عمال (حبش) او اقلها ننتقل الي سوق الديم في خطوة تمهدية كل ذلك و(العبد لله) مفاوض صعب المراس منتفخ الاوداج والجيوب متنقلا بطاولة المفوضات من سوق الي سوق وخاصة (بتاع الديم) اجالس جميلات (الامهره) مستمتعا بوجبات (الزغني) ومذاق (الدليخ الحار) ومُحبسا بشاي كارب ... وتلك نقلة نوعية في مسار (قضية الفرن) وعرفت (تحت تحت ) بان بعض الورثة يسكنون جبل اولياء .. ففكرت في الخزان والسمك ونقل طاولة التفاوض الي (منتجعات) بحريه وانا في حلمي ذلك اذا ببص سياحي يتهادي بنا بشارع (الكلالة الجبل) تتقدمه عربات مظللة و نجدة مرور و (موتر) تفسح لنا في السير وتزيح عنا هايسات وركشات تزاحمنا, وعلي جانبي الشارع لوحات كبيرة (خصوصا ) عند نهاية سوق اللفة واخري عند مدخل الجبل ترحب بوفد التفاوض واللذين (معه) وصورة العبد لله (زي إعلانات سوداني) اخر شياكة وإبتسامات تصحبنا الفرقة الاثيوبية في مهرجان باذخ قبل دخول التفاوض ... نواصل
| |
|
|
|
|
|
|
|