قراء وقارئات المنبر العام ... عبروا عن رايكم حول الاحداث الأخيرة ..

Quote: شئ المؤلم في الحصل انه أثبت انو أهلنا في السودان في الشرق وفي الغرب وفي كل مكان اصبحوا ضحايا للاولاد الجابوهم من بطونهم وربوهم عشان يريحوهم ويعيشوهم زي الناس العايشة في العالم كله في سلام . لكن نقول شنو والله انا مالي في السياسة ومابعرف كلامها ومابحبها بس عايزة اكتب عن الشافتو عيني في الاحداث الفاتت يا ناس ياهوي ياشباب دارفور ورجالها امهاتنا وشيوخنا جياعنين ومشردين والاطفال في المعسكرات راجين الرحمة من الله ما حنقول من زول . انتو لمن عندكم مال قدر دا ماكنتو تعشو الجيعان وتدواوا المرضان وما كنتو تلبسو الصغار وتعلموهم وتريحوا اهلنا بى العندكم ما قلنا الماعندكم لانهم فعلا محرومين ماتقولو شردوهم نا س الانقاذ ولا غيرهم انتو ليه ما بتدوهم من قدر العندكم ليه تجوا عليهم انتو والزمن ليه زول مابيفكر فيهم وتستغلوهم أسوأ استغلال.حسع كمية العربات دي وكمية السلاح الراح ده والعيال التعبانين المحتاجين لسة لاحضان امهاتهم ديل ليه يحصل ده كلو ليه ما واحد يجي يتفلسف ويقول القضية اكبر ولا اصغر القضية بالنسبة لاهلنا الغبش هي لقمة عيش كريمة ووضل بيت وختت رأس بأمان . لكن وين مع طموحات الطامحين في الشهرة والمال والقصوركل واحد عامل ليه قضية والناس تستنى لما يلقى ليه كرسى ويأخد نصيبه البحلم بيهو من الجاه بعد داك اهلنا بيرتاحو وبينوموا من غير ما يلقو اي تغيير غير انو بس يخلصوا من الناس الكانت عاملة غاغا .بس في كتيرين بروحوا في الرجول بس نقول شنو الله كريم علينا وربنا يفرج حترتاحوا يأهلنا في دارفور كان الله اداكم العمر بس اصبروا لحدي مايشبعوا الجيعانين للمال والجاه وبتاجروا بشعبوهم وهم في امان وبعيدين من الالم والوجع الحاصل .والكلام ده بقولوا ليكم عن تجربة نحن في الشرق وبالتحديد في كسلاكنا زيكم لانو اولادنا مرقوا لقضية الشرق كان سمعتو بيها وكل شهر شهرين يضربوا كسلا بالدانات ونخش تحت السراير لانو كسلا صغيرة ودانة واحدة شرارها بيصل لكل راكوبة وكل اوضة وكل قطية وياما ناس جوة قطاطيها تحلم تفطر شنو ولا تتغدى شنو تجي دانة تغديها وتريحا لانو فعلا ربنا ارحم بيعبادوو وياما صحينا على صوت الضرب والحرب ورجف شيوخنا وصغارنا وطار النوم من عيونا وياما وياما لكن الحمد لله حسع ارتحنا مش لانو قضية الشرق اتحلت لا ارتحنا لانو اولادنا الكانو حاميننا النوم كل واحد لقى الديروا البقى مساعد ولا والبقى شنو ما بعرف مبروك عليهم ما بنأبى ليهم الخير ونحن جا ئزتنا اكبر لانو بقينا ننوم مرتاحين وما في دانة وهموم الضرب وكدا يعني انا عارفة كلامي مابعجبلكن دي الحقيقة والحقيقة مرة دايما وربنا يحفظ اهلنا في السودان وربنا يكفينا شر الدايرين لينا الفرقة والشتات ودايرين لينا الموت لانو نحن شعب واحد واخوان والله يعلم نحن في كسلا ولا في نيالا ولا الخرطومنحن جسم واحد ووجعتنا واحدة والداير الفتن ان شاء الله ربنا يكفينا شره بما يشاء بنية التاكاام احمد