|
Re: هنا نتحاور ونتعرف على ابراهيم محمد الحسن ... مرحبا بالجميع (Re: Hisham Magzoub)
|
Quote: غايتو جنس حسادة عليك ،،
هسع أنا إشتكيت ليك ؟؟
يعني حاسدني على خلطة الثلاثة؟،،
ياخي أعتبرني عاوز أعوض ما ضاع علي من خلط زمان ...
|
يا بير و الله دي حسادة اسفيرية فعلا
يعني يقرأ و يتابع من الصباح ما يدخل إلا في لحظة الاستفراد الثلاثي
و يجي و معاه الطوبة
يا هشام ما تنقص طوب البيت البتبني فيه
دي أمانة ناس و علشان البيت ما يقع
خليها طوبتك في حالها
| |
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
هشام، حاسد و لا بغران،،
خلى إبراهيم دة فى حالو و سعدو و هناه....
تهانى، شنو ياخى بتظهرى و أنا مافى، ولا اقول ليكى، يكون دة التنسيق النسقناهو مع بعض يومتها،،،
صاحبتك بقت نساية ....
بمناسبة البروجكت، سارة، إنتى المعلومة ديك ترستيها من منو؟؟ سريع، و إلا انا ما متابعة كويس؟؟؟؟
و بعدين تهانى و إبراهيم،
مشكورين شديد على الإطراء، لكن دة ذاااتو ما فى زول قالوا لى، سايبنى لافة مروحة ساكت،،،
الجروب الخامس: طارق و رائد؟؟؟؟
| |
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
هالــــــــــــــــــــه
Quote: فى كلمات بسيطة جدا، الحاصل دة ما عاجب زول،،
و كونه بعضهم قادر على إشاعة روح الفرقة و الشتات، دة ما معناهو إنو البقية تمتثل ليهم، و تديهم الدايرنو بارد كدة،
المنبر دة زى الوطن ما حق زول، و ما من حق أى إنسان يقرر ليه مصير حسب هواه،،
إحنا من واجبنا إننا نقيف و نحارب، البشاعة بالجمال، و الفرقة بالحب و الوصال، و دة واحد من البنود المحاولين نحققها فى اليوم الحار (بوست و لا منبر)،، |
ينصر دينك
| |
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: Hala Hassan)
|
Quote: ما تنسى نحن عايشين ذكريات كافتريا هندسة .. وجارين عجلة الزمن (4) سنين للوراء ... |
ابراهومة سلام متقمص الدور
تحياتي لبنت كهرباء 84 عفاف ( تظهر في الصورة العليا )
وللدكتورة تهاني التي دعمتك كثيرا بتسلسل الذكريات المشتركة ولسارة الصامدة والاضافة الحقيقية ولهالة ولكلامها المركز للبرلوم ود سميرة ونحن كلنا كده نخش طوالي اليوم الحار ونتجاهل المنبر العام لما فيه من مهاترات علاء الدين ( الحاج ) هو الوحيد الذي يجبر الشخص للدخول للمنبر العام لجدية موضوعه وجدية طرحه مع الامتاع في السرد نحتاج لدعم كل حادب لا تياس يا ود سميرة فالياس ليس من شيم هندسة ولا من ينتمي اليها
يكفي انك تخرجت من ذلك الصرح العظيم لولا اصرارك وثقتك بنفسك لما فعلت ذلك
يا ابرهيم متابعين
وبناتنا ما محتاجات طوب
الواحدة بي مية
هشام مجذوب لك التحية ( زنقة الشغل شديدة )
| |
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
معسكر الخدمة الإلزامية (1):
أذكر إنه وبعد التخرج مباشرةً ، عدد كبير من أولاد الدفعة اتحمسوا وشجعوا بعض لأداء الخدمة الإلزامية ..
وطبعا موضوع الخدمة ده كان هاجس كبير وقتها لإرتباطه بالتوظيف،، والسفر،، والكشات الكانت مدورة ألف ...
المهم ،،
أنا برضو كنت بأحاول أقنع نفسي .. باتخاذ القرار بدخول المعسكر .. للتخلص من الهاجس ده ...
وأهو الواحد مع أولاد دفعته .. تهون المصيبة شوية ....
بس ،،
ما عارف الحصل شنو ..
يمكن عدم تحمس بعض الزملاء ال close للموضوع .. وترددهم وقتها ،،،
خلاني أنا برضو أتردد وأؤجل الفكرة .. وما مشينا مع الدفعة دي ...
ويمكن ده لخير قادم ..
نواصل ،،
| |
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
معسكر الخدمة الإلزامية (2):
ومرَ المعسكر إياه ..
وعلى ما أذكر كان في ضواحي الكلية الحربية،،
وكان من أصعب المعسكرات ،، لدرجة سموه (قبر الكلب)...
وطبعا سمعنا من الشباب كمية المعاناة الواجهتهم فيه .. والكثير من الذكريات والمواقف ،، المضحكة ،، والمؤلمة ،،
وقتها ،، أنا كنت نزلت شغل .. (الحمد لله لسة ما كانوا طبقوا قرار شرط الإلزامية لإستخراج الشهادات والتوظيف في القطاع الخاص ....)
و مرت سنة ..
وعدت سنة ...
وتم الإعلان عن فتح معسكر خدمة إلزامية لخريجي الجامعات للعمل في مجال التدريس ...
وكانت فرصة لا تفوت ...
| |
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
معسكر الخدمة الإلزامية (3):
طبعا الهاجس الأكبر في موضوع الإلزامية ،، هو التوزيع ما بعد التدريب العسكري ..
ووقتها الناس كانت بتلاوز من موضوع (الجنوب) وكانت المعمعة في أوجها ...
وجدنا في موضوع التدريس ده مخرج مناسب ..
حيث كان التجنيد يبدأ بالعمل في البداية (9 أشهر) ،،
ثم بعد كده التدريب العسكري (شهرين) ..
وبس ،،
وبكده الواحد يكون ضمن حكاية التوزيع والجنوب ،،
| |
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
طيب ،، نواصل موضوع الخدمة الإلزامية ،،
وصلنا وين ..
أيوة ...
معسكر الخدمة الإلزامية (5):
سجلنا مع الدفعة دي ..
وعملوا لينا تدريب لمدة أسبوع على ما أذكر . على أساسيات التدريس وفنياته ...
ثم تم توزيع الناس على المدارس الثانوية ..
التوزيع في المرحلة الأولى كان جغرافيا .. يعني بيوزعوك في أقرب مدرسة لمكان سكنك ..
والناس الإلتحقوا متأخرين وزعوهم في الأقاليم ...
حسب جغرافية السكن ،، أقرب مدرسة لي كانت مدرسة محمد حسين الثانوية (بنين) .. ودي واحدة من أكبر مدارس أمدرمان .. كماً .. (وش مطير عيونو!!!) ..
يعني التدريس فيها .. لو مسكوك رياضيات سنة أولى بس ،، بتلقى نفسك الأسبوع كله جدولك full
والواحد طبعا عاوز يضرب عصفورين بحجر .. يقضي الخدمة الإلزامية،، ويواصل عملو...
طيب والعمل؟؟!!
| |
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
معسكر الخدمة الإلزامية (6):
المهم ،،
طبعا أخوكم ود شيوخ .. ما تشوفوني كده ... الحظ إبتسم لي تاني مرة ..
وتم توزيعي في مدرسة علي السيد (بنات)
ولحظي السعيد،،
المدرسة كانت جديدة في أمدرمان ،، وفيها 3 أنهر بس ... وقريبة من بيتنا ... وإدارة المدرسة طلعوا متفهمين جدا ..
أخوكم مسكوه رياضيات أولية سنة أولى .. يعني 3 فصول بس ،،
والحصص كلها كانت صباحية .. يعني بالكتير الساعة 10 / 11 بأكون خلصت حصصي ..
وبأمشي ألحق شغلي ..
ناس الشغل برضو كانو متعاونين ..
نواصل،،
| |
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
معسكر الخدمة الإلزامية (7):
خلصنا العام الدراسي ..
وبالجد كانت فترة ممتعة جدا ... والواحد حقيقة إشتغل فيها بإخلاص ...
وبعد شهر أو أكتر تم الإعلان عن التدريب العسكري لإكمال فترة التجنيد ....
طبعا شلنا هم ،،،
لما يحكيه المجندون بصورة عامة عن المعسكرات والتدريب ..
ومن ما سمعناه من معاناة أولاد دفعتنا (ناس قبر الكلب) ،،،
لكن،،، مافي مفر .. ولابد من الخطوة دي لإكمال الفترة ،،
و ...
إذا بالحظ يبسم لي من جديد ..
| |
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
معسكر الخدمة الإلزامية (9):
ويستمر الحظ الحلو،،
لما عملنا الكشف الطبي ،،
الدكتور كان فاهم .. وطلعني (لجنة)
يعني عندي شوية مشاكل صحية ،،
يعني تدريب بدون بيادة ... (دي بيفهموها المجندين) ...
يعني الجكات الطوييييلة بتاعت الصباح .. اللي بيلفوا فيها العاصمة المثلثة ..
كنت معفي منها ،،
طبعا في موضوع الإلزامية ده ،،
لو طلعوك خردة .. وغير لائق .. وما منك فائدة .. بتكون مبسوط ،، ومكسب ،، و عز الطلب ،،،،،
| |
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
معسكر الخدمة الإلزامية (11):
واحد من المواقف اللذيذة جدا ،،
طبعا الناس المعفيين من جكة الصباح (الناس العندهم أزمة ومشاكل صحية ،،) بيكونوا قاعدين في المعسكر .. لغاية ما الجماعة يرجعوا من البيادة ..
وطبعا دي التعلمجية ما بيفوتوها من غير يعكروا مزاجنا ..
ولو جاء ماري ضابط ساكت وشافنا .. ممكن مزاجو يخليه يطبق فينا واحدة من الجزاءات .. وليه ؟ عشان مرتاحين ومرطبين ..
مرة جاء واحد من الضباط المسئولين ماري .. وبتفقد الخرد القاعدين ديل بيعملو في شنو ..
لمة في مجموعة كبيرة ،، وللأسف أنا منهم ..
ولسان حالو يقول : ( أرى رؤسا قد أينعت ،، وحان قطافها ،،)
شاف الشعر قام شوية .. وقال أحسن عقاب ليهم ،،، هو تجديد الصلعة ....
قال لينا كل واحد يحلق للتاني صلعة ...
(وشوش مغيوووووووظة ،،)
| |
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
معسكر الخدمة الإلزامية (12):
المهم ،،
لمونا في غرفة كبييرة كده ،، ووزعوا لينا الأمواس .. عشان كل واحد يحلق للتاني ،،
وطبعا مراقبنا الضابط وعدد من العساكر ...
أنا كان فردتي منوووو ؟؟ خالد حبة .. (برضو كان خردة) ..
قمت بديت بيه هو في الأول ،، وجريت ليه الصلعة بمزااااج ....
والشباب مدورين في بعض ،،
بعد شوية كده ،، نتلفت ،، نلقاهم مشوا وخلونا برانا ،، بعد ما إطمئنوا إنه مشروع الصلع بدأ ...
يقوموا الشباب ... يتصرفوا بسرعة ،، وكل واحد رمى الموس الشايلها .. .. وفك البيرق .. وأندس وسط مجموعات تانية ...
طبعا المتضررين كانوا الحلقوا في الأول .. ناس خالد حبة ...
طبعا تصرف ذي ده في العسكرية ممكن يكافؤك عليه .. وفي مقولة شهيرة جدا بتقول : (العسكرية تصرف ...)
| |
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
بخصوص ذكريات معسكر الخدمة الإلزامية ،، ده أيميل من الباشمهندس اليسع عبد المنعم ...
Quote: تتذكر يا إبراهيم ،، مرة ونحن واقفين في الطابور، جاء ضابط .. وكان زميل سابق لي .. جاء يسأل مني .. يا ساتر ،،، أكيد ده بيكون هواء كبير .. طبعا اي ضابط بيعرف ليه زول ،، ممكن يجي يبرمج بيه قدام الناس ..
قمت أنا عملت رايح .. ولما شفتو لافي في الطوابير يسأل عني .. قلت أحسن أتخارج ... وأزوغ ...
لمة فيني التعلمجي (النحيلة) ... تتذكرو ؟ ولقاها فرصة .. قال لي اتحركت .. واتكلمت .. وووووو ولازم أحلق ليك صلعة ...
أنا طبعا فكرت سريع ... وقارنت .. بين الصلعة .. وبين البرمجة الممكن يدورها فيني الضابط زميلنا ....
ففضلت الصلعة .... |
| |
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
اليسع تحياتي ،، والله كانت أيام ....
Quote: لمة فيني التعلمجي (النحيلة) ... تتذكرو ؟ |
التعلمجي .. النحيلة .. كيف ما بأتذكرو ،،،
ياخي ده كان منجض الناس نجاض شديد ،، وهو شافع يا دوب ... فعلا نحيلة ،،
طبعا الموضوع ده كان مستفز الشباب شديد ،، الأولاد جامعيين وخريجين ،، مهندسين ، ومحامين ،، وأساتذة ،، وووو كل ديل ،، يتحكم فيهم واحد ذي النحيلة ده ...
مرة في واحد من المجندين وصل منو الحد ... وعذبو عذاب شديد .. فمرة كده .. اتلفت يمين ،، وشمال ...
وما كدب ،،
لصق ليه كف ،،،،
لمن آمن ....
| |
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
معسكر الخدمة الإلزامية (14):
طبعا كان من المفترض انه المعسكر يكون شهرين ...
لكن ،،، يستمر الحظ الباسم ...
وقبل إكمال الشهرين ونحن في إستعدادات التدريب للتخريج ..
مرة جاء مدير عام الخدمة الإلزامية ماري بعربيته .. وشاف واحد من المجندين تتم معاقبته ..
كانوا بيدحروجه في موية مطرة !!! ...
المشهد إستفزاه جدا ،، وزعل زعل شديد ،،، (ونحن كنا فاكرين دي من المقررات الثابتة في التدريب العسكري ...)
ونتيجة زعلته دي .. قام ليك على إدارة المعسكر .. وهاج فيهم ..
وقرر ،،،
| |
|
|
|
|
|
|
Re: هنا نتحاور ونتعرف على ابراهيم محمد الحسن ... مرحبا بالجميع (Re: ابراهيم محمد الحسن)
|
معسكر الخدمة الإلزامية (16):
في موضوع التخريج .. وضرب النار ،،،
برضو كنت من المحظوظين ،،
قسمونا لمجموعتين ،، وأنا كنت ضمن المجموعة الأولى ،،
ضرب النار كان في معسكر (السليت) .. وكان حاضر مدير عام الخدمة الوطنية ،،
وده كان سبب خلى الموضوع يعدي على خير ،، وما واجهنا أي تحرشات من قبل تعلمجية معسكر السليت ..
وطبعا ديل موضوع معسكر العمارات ده كان مزعلهم ،، و عندهم فيه رأي كبير ..
بالنسبة للمجموعة التانية ،، يومهم كان بعدنا ،،،
بس ،،
حظهم كان تعيس ،، لقوا فيهم الفرصة ،، و برمجوا بيهم ألف ،،،
وكان من ضمنهم خالد حبة ،،، ياخي خالد حبة ده حظه ما كويس خالص ،، (وش حظو كويس ،،،)
| |
|
|
|
|
|
|
|