شقة مصر

Quote: حافظ الإمام محي الدين · Calgary, Alberta سؤال لأخونا ملهم، إنت ليه ما كلمت الناس إنه الشقة دي حتكون هي سكنك الخاص وح تستقبل فيها المرضي أحيانا؟ وليه ما قلت للناس صلحوا لي عربيتي الخاصه دي وأنا وقت ألقي زمن ممكن أوصل الناس بتاعين فايزين. أنا شايف إنه الزول طالما ناقش تفاصيل صغيره نوع بوماستك ومخدة ومرتبة وملاية عند بداية المشروع ما ممكن يجلي أهم حاجتين (الشقة، والعربية) وما يتكلم عنهم بإسهاب لأنه ديل عضم المشروع. +++ ملهم ، موضوعك بتاع خدمة الناس يستاهل يدوك فيه عربية آخر موديل ومعاه شقة ديلوكس ومرتب محترم، لكن إخفاءك للجانب بتاع منفعتك الخاصه من الموضوع ده خلي شكلك ما حلو قدام الناس. نصيحتي ليك إنك تحكم ضميرك ودي حاجة بسألك منها الله سبحانه وتعالي فلو أخطأت إستغفر ربك وشوف طريقة تصلح بيها الخطأ ده، وأطلب العفو من الناس ، حق الناس يا ملهم مسئولية عظيمة فلا تستهون به و ح يغطس حجرك فلا تستمع لصوت الناس الذين يحاولون أن يزينوا لك الباطل. أما إذا كنت علي حق فدافع عن نفسك بقوة لأنه دفاعك هنا ضعيف لايرقي لفداحة وبشاعة التهمة. +++ أعتقد معظم الناس الإتبرعت وإنتقدوك هنا لم يكن هدفها إغتيال شخصيتك ولكن حارقاها مسألة إنك أكلت بعقلها حلاوة وبيني وبينك المسألة بتحرق وإنت زاتك لو كنت مكانهم بتزعل، هسي إنت من ضمن أهداف مشروعك ده مش عشان تحمي أهلنا من شغل النصب والإحتيال؟ وكمان برضو دايرين يلفتوا إنتباه الناس عشان ما يتاكل بعقلهم حلاوة، الناس دي ما وقفت علي تبرعهم وبس ،بل أخبروا أهلهم ومعارفهم عشان يساهموا في المشروع ده، ألا تعتقد إنه واجبهم يحتم عليهم إبراء ذمتهم من المسئولية دي، معقول يساعدوك عشان تنصب عليهم؟ (تنصب عليهم) دي طبعا حسب قناعاتهم مش قناعاتي أنا. ما تعتمد علي قصة شيخ المكاشفي والراجل بتاع مطامير العيش عشان تلقي بيه مخرج، أبونا الشيخ وبتاع العيش ديل مشوا الموضوع لأنهم كانوا هم المتضررين الوحيدين وعفوا ولكن الموضوع هنا مختلف ، الناس هنا بتحاول تحذر الآخرين من الوقوع في نفس خطأهم وده من صلب الدين، وشيخ المكاشفي لو كان حي وعنده باسويرد كان عفا ليك حقه وسلخك عشان ما يجي زول تاني يتغشى وده تقريبا القاعده تعمل فيه الناس هنا.