تحياتي الطيبة لجميع الأخوات و الأخوة هنا و المتابعين من برا المنبر .
يوم الزفه طبعاً هو اليوم التاريخي بالنسبة للعروس و العريس و تقريباً دا يوم فيهو قصص وحكايات و حوادث و كبكبه و رجفيبه عجيبة بتحصل و عادةً بتحصل فيها حكايات بتكون عالقة بالاذهان لأبد الحياة فيها المضحك و فيها المخجل . لكن طبعاً في حاجة مهمة في يوم الزفه دا (طبعاً دا بالنسبة لينا نحنا الاتزوجنا في ال15 سنة الاخيرة دي) طبعاً العروس و العريس دائماً بيكون عندهم اغنية محددة للزفه عادةً بيجوا داخلين بيها لمكان الاحتفال حين مقدمهم من الكوافير و بعديها طوالي في اغنية متفق عليها بينهم و بيرقصوا فيها سلو دانس و كل الجمهور حولهم بيتفرج .
فكرة البوست ببساطة أننا نتذكر ال Slow dance الرقصنا عليها في ليلة الزفة، يعني إي و احد فينا يجي يكتب اغنيته و يحكي لينا عن الاتفاق حولها و ياريت لو لقى لينا منها مقطع يوتيوب.
بصراحة ابدأ بنفسي كنت بالجد متكبكب كبكبة شديده جداً (اول مرة ياخ الزول يجرب موضوع زي دا) و كان التنسيق بيني وحبيبتي فقط علي أغنية سلو دانس و نسينا اغنية الدخول لصالة الحفل اها انا كان رآي اننا نرقص علي اغنية محددة لري شارلز و هي بتترقص فنك دانس اغنية جميلة خلاص و انا معجب بيها Hit the road jack و حبيبتي كان عندها اغنية عربية جميلة جداً في لفضل شاكر بس بيني وبينكم رغم جمال الأغنية و كلماته انا غناء الخلايجة و العرب ما بياكل فينيّ جوه ، طبعا بدينا اي واحد عايز يستقطب لاختياره و إي واحد متخندق لاختياره بدون تنازل و استمرينا كدا لحدي ما جاء يوم الزفة فقمنا اتفاجأنا باختيار ناس التصوير لاغنية لا في السماء لا في الارض و فوق دا ودا انحنا الاتنين متكبكبين و نرجف و ما اظن فينا واحد ذاتو متذكر انو رقص كيف و لا هو كان و اقف ذاتو، باختصار ما اظن فينا زول متذكر الجاء منو و الما جاء منو لوووووول .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
سفيان بشير نابرى
فيس بوك
تويتر
انستقرام
يوتيوب
بنتيريست