عامودي مزمل ابوالقاسم و سلك 20 11 و 2011 مباراة الثار

Quote: بسم الله الرحمن الرحيم في السلك وصية ابو السباع * الليله ليلة التتويج بالكأس * ولا يأتي التتويج الا بالتجويد * كلنا نجود * الجهاز الفني يجود عملو * اللاعبون كل يجود عملو * نحن الشفوت نجود الشفتنه * استاذنا اسماعيل حسن له وصيه * قال السن بالسن والعين بالعين والبادئ اظلم * وكلنا لا ينسي مباراة اهلي الخرطوم في الدوره الاولي * والاهلي كان البادئ * واليله الثأر * قون سولي في الدوره الاولي بسته اقوان الليله * كلو شئ زاد * ويوصينا استاذنا اسماعيل حسن بان نفتح عينا كبييييييييييره * نراقب التحكيم ونردعه ونرده اذا اراد ظلمنا * ايها الناس * ناس الاذاعه الداخليه * قرآن من الصباح * الدنيا دي مامعروفه * لانو السبح السمعنا بيها يوم كورة النسور تكتف البلد دي كلها * والنفاثات في العقد * ولكن لا اله الا الله منصورين باذن الله * التي صدرت من الاولتراس هي التي هزمت التنجيم * الليله لا اله الا الله شديييييييييييييد * ايها الناس * كلنا من عصرا بدري * بشعارالمريخ * باعلامنا * وصفافيرنا * والعابنا الناريه * وحناجرنا القويه * نهتف ونغني ونزغرد ونرقص ونحتفل بالكأس * الخرطوم يجب ان لا تنوم اليوم * والولايات لها حق الفرح وتسيير المسيرات في كل المحافظات * سوداني لا يحتفل بانجاز المريخ لا اعتقد انه موجود * في الامارات يمكنكم الاحتفال في الميادين العامه * اما مريخاب نيويورك ففي بروك لين فسحه كبيره بتشيلكم * مريخاب السعوديه الاحتفال في جده * علي البحر * اما مريخاب الداخل * من اسي ادوا اولادكم حق العشا من بدري * الرجعه البيوت الصباح * احتفال في الاستاد * ومنه للنادي * مسيرات في شارع العرضه * من النادي للمحافظه وللنادي * للصباح * انه الفرح المباح * ايها الشفوت * لا تستعجلوا هدف التتويج * القون بجي بجي * الوالي قال بجي * ولما الوالي يقول بجي يبقي بجي * اسي قودوين جا ؟؟؟؟؟ * بعد نحتفل بالكأس حقو الاتحاد يقفل الموسم * مباريات شنو الفضلت وبتعمل شنو * نسرح اللاعبين * يمشوا يرتاحوا * ساكواها قالوا ختان اولاد اختو بعد بكره * يمشي يلحق * ايدكو عقد اخوهو يوم الاربعاء * يمشي يحصل * ساكواها يمشي يجيب لينا اوراق اللاعب الجديد * واذا الاتحاد اصر ان نلعب الكوره الوديه ضد الهلال * نلعبها * لكن نخت المنتخب المناسب * لكل مقام مقال * الاشبال * ناس وليد * واهو برضو احتكاك كويس لناس مساوي واتير * الكوره الفاتت جابت ميه وتسعه مليون * دي لازم تجيب تسعمائه وواحد مليون * لما نقول مريخ * بصوت واحد * زغبير يقع ويقوم ويقع تاني * ايها الناس * اليوم يومكم ولا عذر لاي انسان * يوم الحصاد * الرماد كال حماد * المافرحان بالحصاد يفرح لرماد حماد * حماد قالوا مشي مدني * ياربي فيل صغير يجري بحماد مافي !!!!! * المهم * انشاء الله * ميرغني كرار وحامد بدوي ومعاويه الجاك واحمد محمد احمد وجعفر سليمان وشخصي الضعيف الرهيف بقيادة اسماعيل حسن * كلنا في الشعبيه * من عصرا بدري * حيث المريخاب الحمر * حيث شعب المريخ العظيم * لن نقبل زول في الجانبيات والمقصوره الا المرضي وكبار السن * حفله زي الحفله * معزومين ياخالد عزالدين والرشيد ويس بتاع زفة الالوان وابو منذر * تعالوا ولو متنكرين * ولما تبكوا قولوا دي دموع الفرح * اتفرحي * ايها الناس * التهنئه لعريس المريخ الاخ بري محمد بري بالاسلاميه للتأمين بمناسبة زواجه * وبري حايخلي العروسه في الفندق ويجي الكوره * العروسه ملحوقه * ايها الناس * اليوم يوم الفرح انشاء الله * كل مظاهر الفرح يجب احضارها للاستاد * علم كاب فنيله صفاره دلوكه طبله نحاس بنقز العاب ناريه آيس كريم داندرمه صفقه سااااااي * المهم اي حاجه تعينك علي الاحتفال احضرها اخي المريخي * المهم * نتشفتن قبل واثناء الكوره * وبعد ذلك نتبشتن في الرقيص * بي حقنا * نحتو * باحترام * ونهتف * ايييييييييييييي مريخ اييييييييييييييييييييي * بله اليوناميد الليله لو شات من بعيد بقعوا قبل زغبير ناس الرشيد * اتوقعي * المهم * قتل الحسد في قلب الحاسد هو المبتغي * رشاد نجم الدين * اخو رفعت نجم الدين الكان حارس المريخ * ساكن العرضه , فرحان بالتعادل مع النسور * لما فضل ليها حداشر دقيقه اعصابو باظت * طلع الشارع قال يقضي الحداشر دقيقه دي مشي ساااااي * اول من وصل بيت جيرانهم سمع دوي صوت المريخاب * لي اسي ماسك راسو ومدنقر * موش قلت ليكم المريخ ده بخلي العاقل يطقع والمجنون يهبش !!!!!! * اتجنني * ايها الناس * اليوم اي مريخي يجب ان ينافس نفسه في التشجيع والمسانده والاحتفال بعد ذلك * رابطه كرري تنافس رابطه الصحافات * ناس بتري ينافسوا ناس سوبا * رابطة الكلاكلات تنافس رابطة جبل اولياء * ناس الحلفايا جايين يثبتوا وجودهم * ناس القضارف الكوره الفاتت حضروا بالحافلات * ياناس القضارف * الكوره دي بالبصات * ناس المنتديات وناس الفيس بوك * مادايرن زول خلف الكي بورد اثناء الكوره * مادايرين مكان فاضي في الاستاد * مادايرين مكان صامت في الاستاد * مادايرين علم في الجيب * كل الاعلام فوق تلوح * ترفرف في سارية هامات شعب المريخ العظيم * شخصيا متبرع اودي الكاس العفريته يغسلوهوا ويشحموهوا * كأس حايقعد جمب مانديلا * يقعد بالغبار ده ككيف !!!!!! * غايتو الكاس ده لو ضاق الكندشه عندنا * تاني الفيفا ما بتمرقو من استادنا * اتفيفي سلك كهربا ننساك كيف والليله الربه وقونين بالجمبه والي لقاء سلك