طلب مساعدة عاجلة .. صديق سوداني يطلب رقم حسابي لايداع مبلغ مالي كبير

Quote: انت صاحبك دا داير يجرب الحركة دي في حسابك؟ ما يفتح حساب ويدي ليهم اذا متاكد من مصدر القروش؟

Quote: صديقي فايز ياخي انت دائما زول فزعة بصراحة في البداية الزول اقنعني ووراني طريقة عمل الموقع وهو موقع دعائي وكلما كترت الكلكات تاخد قروش ائ كلكاية بخمسة دولارات وطبعا زولنا ما صدق واشتغل كلكلة ومرتو تكلكل واولادو يكلكلون والضيف البجي اكلكل وامس مشيت ليهو زيارة طوالي لهمني اللاتوب قبل الشاهي وقال ليك كلكل هنا لحدي ما اجيب ليك الشاهي وبجي بوريك الحاصل شنو اها لقيتو مجمع ليهو زي 25 ألف دولار قال لي وقعت لي في جرح انا مشكلتي ما عندي رقم حساب ولو لقيت رقم حساب خلال 60 يوم القروش بتجيني وطبعا زولك حمش وزول فزعات زيك كدي طوالي اتصلت على هاتف الراجحي وناس الراجحي جزاهن الله خير خاتن رسالة صوتية مما سمعتها طوالي فكرت في جماعتي ناس سودانيز المفتحين قلت انا زول عميكة ساهي اخير ارجع للمفتحين والان اظن ان الامر واضح .

Quote: اجابتي على صديقي كانت بارسال رابط هذا البوست على اميله ليعرف اجابتي و ترتاح اسرته من الكلكة في الفاضي

(عدل بواسطة محمد عبدالرحمن on 12-17-2011, 07:45 PM)

Quote: اقول راي عشان في الحر امشي كوبر وانت تاكل البتيخ الساقط

يا ود البوش طلعت احرف من شيخ الهدية ذاتو وما رديت على صحبك وخليتنا نرد عليهو نحن:)


في واحد تاني فاتح بوست زي حقك دا حاولت انصحو ... تصدق انفصم فيني... شكلو الموضوع دا ما عاوز فيهو نقاش


يا ود البوش راجع البوست دا عسى تجد فيه ما يفيدك انت وصحبك الباحث عن الثراء السريع :)

Types of Fraud and How to Protect Yourself إعداد:حسين نوباتيا

Quote: دخلت لاحتفى بوجود اثنين من كتابى المفضلين فى هذا البوست . واحس ان اسلوب الكتابة عندهما متشابه ..وفيه كثير من ريحة اهلى فى الجزيرة ..الاول اتابع كتاباته منذ سنوات قصص اهلى ناس ودربيعة والحصاحيصا وبنطون رفاعة واركويت وست النفر والحتانة ..وهو ابوحراز ..والثانى حكاوى اهلى ناس سرحان والهدى والعقدة والحصاحيصا ...وشخوص حية تسعى بيننا بحكمتها ######ريتها وطرافتها ..طبعا التانى هو ودالبوش .. اسلوب الكتابة متشابه الطرفة والحكمة ...بيئة الكتابة الجزيرة الخضراء ..وهم بكتبوا بدوك احساس انهم قاعدين بتونسوا فى طرف اب عشرين او الترعة ...ياسلام على روعة الكتابة ..وياريت دخول ابوحراز للبوست دا تكون بداية لفكرة بوست فى سهول وقرى وحلال الجزيرة لنستمتع بالحكاوى ..لذلك اقترح بوست مشترك بعنوان (حكاوى الحلال فى الجزيرة ) ..وتكون المشاركات فيه مجادعة بين ودالبوش وابوحراز ...وشخصيا متيقن انه سيكون من اجمل البوستات التى كتبت .. رايكم شنو دام فضلكم ..

Quote: الأخ محمد عبدالرحمن سلام ... أثني ....... . . . للأشخاص الذين لايعرفون ( الحلال ) بتشديد الحاء هي جمع حلة يعني أصغر من القرية ..... تحياتي لكم ولصاحب البوست والمتداخلين .

Quote: اها جيت لقيت الناس مرعوبين من ابو العريف وزميلو الختري حمالتك علي اول توزيعة لكن القبول حقهم كوووووووف سنفكونا وخلوا خشمنا ملح ملح

Quote: انت صاحبك دا داير يجرب الحركة دي في حسابك؟ ما يفتح حساب ويدي ليهم اذا متاكد من مصدر القروش؟ اللكنك المرفق مبهم ومصابق لواحدة من طرق الاحتيال المعروفة بايهام الضحية ان مبالغ كبيرة ستودع في حسابه بعد القيام بعملية بسيطة وهو يعتمد على تحريك غريزة الطمع التى تعمى العقل .. فمن غير المنطقي اعطاءك 5 دولار في كل مرة تعمل فيها كلك لرابط لمدة 30 ثانية.. لو كانت المسالة بهذه البساطة مكانش حد غلب... الطريقة بسيطة تديهم IBAN NO الذي يحوي كل تفاصيل الحساب واسمك وبقية التفاصيل المتعلقة بالحساب ويقوم يعملوا Auto debit من حسابك بعد ان يوهموك انها لتجربة الحساب الا ان ياتوك بالقاضية ويخلو حسابك بالماينض يعني مكشوف بلغة البنوك ... بعدين تمشي تشتكي للبنك بانو حسابك تم السطو عليه ...فيقوم المحتالين باثبات انك من اعطيتهم رقم الحساب وتفاصيله فلا تشملك حماية العميل العادية التى يستمتع بها العملاء.. يعني زي الشلت قروشك ختيتا في جيب المحتالين ديل وبعدين تجي للبنك تقول ليهم رجعوها لي.. باختصار ما تديهو رقم حسباك:)

Quote: البوست دة ناقصو واحد خاض التجربة يجي يحكي للناس ... حقو تختو بريد إلكتروني عشان العايز ممكن يحكي من وراء حجاب وما يدخل في كشف حال ... بعدين في ناس لخبتو بين حاجتين: الرسائل البتجي من غرب أفريقيا وبريطانيا وتقول ليك أنا عندي قروش ما عارف أطلعا وكدة وبين الحاجة دي. الأخيرة دي إنت بتشتغل عشان تكسب القروش ... لكن بعد داك ......؟

Quote: علما باني اثق تماما في صديقي وانا متأكد ما عندو رقم حساب ولكني لا اثق في الموقع هلا تفيدونا يا اهل الذكر ان كنتم تعلمون

Quote: يعني شنو غسيل اموال يا حسين نوباتنا

لكن باختصار غسيل الاموال هو an introduction of money driven from illegal sources such as drug trafficking into the financial system

يعني ادخال اموال من مصادر غير قانونية كتجارة وتهريب المخدرات في النظام المصرفي...

ويتكون من ثلاث خطوات وهي:-

Placement وهي الخطوة الاولى والاهم والاخطر وتكون بايداع المبالغ "الوســخة المحتاجة غسيل" في النظام المصرفي
ثم

الــ Layering وهي علمية محاولة اخفاء الاموال بتوزيعها في حسابات مختلفة او تحويلها لحسابات في بلدان اخرى الخ..
ثم

الــIntegration وهي علمية ايجاد تبريرات مقنعة لمصادر الاموال كالقروض او فواتير مزورة الخ

تحياتي..