|
Re: حلااااتو... ( سخرية الفاتح جبرا بتخلى الموضوع مهضوم كتير.. (Re: Nagat Sid Ahmed Elshiekh)
|
|حلااااتو
الفاتح جـــبرا | ساخر سبيل ـــــــــــــــــــــــــــــــــــــ طقس من الطقوس اليومية التى إعتدت عليها منذ سنوات لا أعرف كم عددها .. أن أقوم بعد توصيل الأولاد للمدارس أن أغشى (كشك الجرائد) أشتري صحيفتين سياسيتين .. ما أن أدخل إلي المنزل حتى أتوجه (للراكوبة) التى تفتح علي المطبخ حيث أضع الصحيفتين على أحد الأسرة وأدلف إلى المطبخ لأصنع كوب قهوتى الصباحية !
أثناء وجودى بالمطبخ كانت جارتنا الحاجة (صفية) التى درجت علي شرب القهوة الصباحية أحيناً معي تتصفح الصحيفتين .. تنظر إلى (الصور) إذ أنها أمية (جيل ما قبل المدارس) ، ما أن حملت فنجانى القهوة ووضعته بيننا على التربيزة الحديدية وجلست علي السرير حتى خاطبتنى (الحاجة صفية) قائلة وهى تشير إلي صورة بالصفحة الأولى :
- حلااااااتو يا ولدي .. ده منو ؟ أمسكت منها الصحيفة ونظرت إلى الصورة - ده يا حاجة مساعد رئيس الجمهورية الجديد !
- لكن ما حلااااتو .. لكن يا ولدي ما سغيروني بقى للمساعدة متين ؟ - يا حاجه ما تحكيها شديد ما أى زول يساعد وخلاص - أها ووليدى ده بيساعد الرئيس في شنو؟ هنا (بينى وبينكم) ما عرفتا أقول ليها شنو فقلت لها عشان أمشى الموضوع :
- ما ا أصلو يا حاجه الرئيس بيكون عاوز ليهو مساعد يساعدو وكده !
يبدو أن الحاجه (مصحصحة) بعد أن (ظبطت راسا) برشفة من فنجان القهوة إذ ردت عليا (على طول) :
أنا عارفه الزول مهما كانت وظيفتو بيحتاج للمساعدة .. لكن سؤالى ليك بيساعد الرئيس في شنو ؟ يلز ليهو العربية أكان وقفت ؟ - يا حاجه بتبالغي في عربية رئيس بتقيف كمان لمن يلزوها ؟ - (تنظر إلى الصورة) : حلاااااتو .. لكن طيب بيساعدو في شنو ؟ - والله يا حاجه أنا لو أعرف أقول ع طول زى ما قال عادل إمام .. لكن والله ما عارف !
- حلاااتو .. والله من وشو الناير ده .. وش صلاح ده ح يساعد الرئيس والبلد دى ح تمشى لى قدام !
- (فى حزن ضاحك) : تمشى وين ! ؟ - والله يا ولدى باين عليهو وش خير .. شوف براااك كان البلد دى ما إتصلحت !
- تتصلح ؟ والله بالطريقه دى ياها الماشة الخور عدييييييل !
- قول بسم الله يا ولدي ... خور شنو؟ حلااااتو .. شوف الدم في عروقو باين !
- ما لازم الدم في عروقوا يكون باين .. هو قاعد معانا في الشمش السخنة دى ؟ - أجى يا ود أمى هو ما سوداني .. هو ما مننا ؟ - من ناحية سودانى يا حاجة فهو سوداني ومننا لكن من (الروضة) وتانى ما رجع البلد دى ، كدى خليهو يودهو الثورة الحارة 79 ويقولو ليهو أرجع براك .. كان جا راجع بيتهم تاني يلومونى !
- يعني شنو ما بعرف (الثورات)؟ - لا يا حاجة بيعرفا كويس .. وكمان كل (ثورة) لمن يطلع مظاهرة بيدوهو كم سوط في ضهرو .. والبنبان بيدخل في عيونو !
- حلااااتو .. هسه وش الصلاح ده وش سيطان وحراسات وبنبان !
- (مسترسلة) أوعا بيكون بيوزع منشورات ؟ - لا بيوزع (الراتب) !
- شغال صراف يعنى ؟ - صراف شنو يا حاجه ! الجنا ده مما الله خلقو ما إتوظف ! ودى أول وظيفة ليهو !
- حلاااتو يا ولدي هو ذاااتو بقى للتوظيف بتين ؟ - والله يا حاجه كلامك صاح .. دفعتوا لسه طايرين !
- حلاااتو .. والله أنا قلبي رادو مما شفتو .. إن شاء الله يترقي ويوصل أعلي المرتب !
- يترقي وين يا حاجة .. القدامو هي بس ترقية وااااحده .. من مساعد يبقى (ياى) !!
كسرة :
سأل أحدهم (مازن) : يا مازن إنتا بتعمل شنو ؟ فأجابه مازن : قاعد أنوم بالنهار وإشتغل بالليل ! ثم سال أخوه (حمادة) : وإنتا يا حمادة قاعد تعمل شنو ؟ فأجابه أنا بنوم بالليل وبالصباح بشتغل مع مازن !!
مبروك للشعب الفضل بتعيين (حمادة) مساعداً للرئيس !
| |
![Edit](https://sudaneseonline.com/db/icon_edit.gif)
|
|
|
|
|
|
Re: حلااااتو... ( سخرية الفاتح جبرا بتخلى الموضوع مهضوم كتير.. (Re: saber alhawatti)
|
** بت سيد أحمد . ** ابو ناجى "البروف جبرا" ** سلام وصباحكما خير..
## مع إنو اليوم احد وأول الأسبوع والواحد بيكون مدبرس عادةً من بدايات أيام العمل حالياً وسابقاً المدرسه ,, لكن ابو ناجى بحلاتوو وحلات كتاباتو خلو الواحد يحس بإنو معاهو فى الراكوبه وفنجان القهوه فى اليد وبيتفرج فى صورة حلاتووو وتعليق الحاجه .. ** شكراً بت سيد أحمد على نقل هذا الإبداع فى زمن الإحباط وتلاشى الفرح. (ودام الود بين الجميع) (ابو محمد فؤاد)
| |
![ICQ](https://sudaneseonline.com/db/blank.gif) ![AIM](https://sudaneseonline.com/db/blank.gif) ![URL](https://sudaneseonline.com/db/blank.gif) ![Edit](https://sudaneseonline.com/db/icon_edit.gif)
|
|
|
|
|
|
Re: حلااااتو... ( سخرية الفاتح جبرا بتخلى الموضوع مهضوم كتير.. (Re: محمد الطيب يوسف)
|
من كتب تلك السيرة الذاتية ورماها لكــلاب الانترنت الضالة !!!؟؟..
هذا ان كنت تعتقد ان الاستاذ الفاتح احد الموصوفين ببوستك اعلاه
Quote: رد هنا المانعك شنو؟؟ رد هنا ده .. وجهز لينا مدحة الجمعة الجاية لو حيين .. |
لا باس ان ارد هنا فيما يتعلق بامر الاستاذ الفاتح
اراك هنا تثبت موضوع السرقة وتدندن بالقوقل وتهددني بسجيمان !
فارفق بنفسك
فيا عزيزي الفاضل
اسألك سؤال واحد فقط ان استطعت ان تجاوب عليه او يجاوب عليه من تتهدني به
من هو مؤلف النكتة مثار الجدل؟
اما مسألة تناول الكاتبين - عفوا استاذ الفاتح - فهذا ثابت وان استطاع سجيمان ان يثبت انه كتبها اولا
لا تنفي كونها نكتة مسموعه واعيد انتاجها في شكل مقال صحفي ينسب لهما
فهل من كتبها اولا استحق ملكيتها؟
وان ثبت على الفاتح جبرا سرقتها كت اند بسيت فلك مني ولسجيمان الاعتذار
ولي رأي قد كتبته في بوست سابق حول هذه المسالة
Quote: عزيزي البروف امين
السلام عليكم ورحمة الله وبركاته
لا اريد ان انكا جرحا فطويل الجرح يغري بالتناسي
كنت من المتابعين لهذا الموضوع ولي راي قد لا يعجب الاستاذ الفاتح
وهو ان تناول النكات والطرائف المسموعه وتحويلها لمنتج اخر في شكل مقال او اسكتش او منلوج مثل الهيلاهوب وامثالها هو دليل على ضعف الخيال
ولا اعتقد ان الاستاذ الفاتح ينقصه الخيال ولكن الكتابه اليوميه مرهقه خصوصا في مجال كمجاله
اما الكتابة السياسيه فما اسهلها فيوميا امامك سيل من الاخبار والمعلومات تنتقي منها كما تنتقي جيد التمر
و الكتابه الساخره لا تصنع صناعة كما في صياغة المقال السياسي وانما تحتاج لدربه وخيال وحس نقدي عالي
وكما ذكرت فان الكتابة اليومية مرهقه فما بالك بنوعية كتابة الاستاذ الفاتح
والحسد بين اهل الصنعة الواحدة قديم
|
Quote: وجهز لينا مدحة الجمعة الجاية لو حيين .. |
الحمد لله انك لم تجد في ارشيفي سوى مديح الرسول ص ان كان في ذلك ذم
| |
![Yahoo](https://sudaneseonline.com/db/blank.gif) ![Edit](https://sudaneseonline.com/db/icon_edit.gif)
|
|
|
|
|
|
|