السلام عليكم ورحمة الله وبركاته وكل عام وأنتم بخير
الناظر لحال عاصمتنا المثلثة لا يظن أنها عاصمة بلد استقل منذ 55 عاما!! العمارة الحديثة في البلد قليلة والبيوت معظمها أرضية وثقافة الحيشان طاغية عند السكان أظن أن العقلية البدوية لدى سكان الخرطوم ( شعبا وحكومة ) لها دور كبير العقلية الريفية التي ترى أهمية وجود الحوش عشان الواحد في الصيف يرقد برة وعشان الهمبريب بتاع الصباح يضرب والهم يروح ويجينا طيب!!
أظن كذلك أن هنالك تقصيرا من الحكومات المتعاقبة في عدة مسائل: 1- المعمار: فيجب على الحكومات أن تسعى لتعمير العاصمة وخاصة وسط البلد وواجهتها ونرى أن الحكومات لم تهم بهذا الشأن إلا قليلا.
2- النظافة: نجد أن عاصمتنا من أوسـخ العواصم في الدنيا ونجد عواصم بلاد إفريقية نسخر منها ونرى أننا أفضل منها، نجد أن عواصمها أجمل وأنظف بمراحل من خرطومنا مثل أسمرا عاصمة أريتريا والتي هي من أنظف العواصم الإفريقية بل ويقال أن غرامة مالية كبيرة تفرض على من يلقي قطعة ورق في الطريق العام!!
3- البنية التحتية والخدمات الأساسية: نجد أن الخرطوم صفرا في هذا المجال!! فعاصمة بلد عمرها منذ استقلت أكثر من 55 عاما وإلى اليوم لا يوجد فيها شبكة صرف صحي إلا في بعض الأحياء ومن عصر المستعمر!!! وما زال كل سنة مدورة قصة الخريف والمجاري .. الجماعة يجي الخريف يحفروا المجاري وتتملي وتفيض والسنة الجاية نفس الشي تتحفر نفس المجاري وتتدفن مرة تانية .. وعاد لا وين!!
الطرق والتي لم نرها تشق الأحياء إلا في عهد هذه الحكومة بعد استخراج البترول، ولكنها لا زالت بعيدة عن المواصفات والجودة، وإن كانت محمدة تحسب لها.
والجسور والتي كذلك لم تنشأ بكثرة إلى في عهد النظام الحالي وهذا من الحق الذي يجب أن يقال، ولكنها وللأسف أيضا بعيدة عن المواصفات والجودة فيها غير منضبطة وبعضها يظهر فيها الخلل بعد شهور من افتتاحها.
4- التشجير والمناظر العامة: والخرطوم وللأسف صفر كبير في هذا الجانب فبلد يشقها أطول نهر في العالم وتحيط بها ثلاثة أنهار والماء منها على مرمى حجر ولكن مع ذلك لا يوجد فيها تشجير ،، وللأسف أن معظم التشجير منذ عهد الانجليز!!!
سأحاول رفد البوست ببعض الصور لعواصم دول إفريقية ليس لديها مثل إمكانيات السودان ولكن عواصمها تستغرب من شكلها ونظافتها حتى تحسب أنك في عاصمة أوروبية.
11-09-2011, 04:06 PM
محمد جلال عبدالله محمد جلال عبدالله
تاريخ التسجيل: 06-24-2011
مجموع المشاركات: 4552
الاخ محمد جلال .. عيدك مبارك رغم اتفاقى معك فى ( جوطة ) الخرطوم .. الا ان الاستدلال بالصور لا يعكس الواقع تماما .. الصور المنتقاة تخفى وراءها الكثير من المناظر السالبة ، و بذلك المقياس ما رأيك فى صورتين من الخرطوم .. الاولى من فندق السلام روتانا و الاخرى لكوبرى الفتيحاب :
11-09-2011, 07:32 PM
راشد يحى مدلل راشد يحى مدلل
تاريخ التسجيل: 08-22-2004
مجموع المشاركات: 338
مساء الخير هو القال ليك انو الخرطوم مدينة منو .؟ الخرطوم لتتحمل من المدينة اسمها .....اذا حاولت ان تقيس الخرطوم بمقايس المدن وشروطها فان الخرطوم عبارة عن قرية كبيرة دعنا اولا نتكلم عن بعض صفات المدن نظام الصرف الصحى التخطيط الخدمات ( مياة ' كهرباء 'منظومة مواصلات متنوعة ) ياخ عليك الله لقيت ليك مدينة المطار فى نصها وتحتل المنشأ ت العسكرية قلب البلد
11-09-2011, 08:11 PM
عبدالعزيز الفاضلابى عبدالعزيز الفاضلابى
تاريخ التسجيل: 07-02-2008
مجموع المشاركات: 8199
لأن نظام الادارة والتخطيط في الدولة زي نظام الكتابة في البورد ده. في البورد ده اي زول عجبتو مداخلة في بوست يلفحها ويجري يفتح بيها بوست منفصل. عشان كده تري البورد مترهِّل بمواضيع مكررة ومواضيع لاتصلح اساسا ان يفتح لها بوست منفصل يعني الواحد علي الاقل مابيعاين للصفحة الاولي عشان يتفادي التكرار .. نفس الشئ بالنسبة للخرطوم اي مهندس او مسئول لاحت ليهو فكرة مشروع في راسو تاني يوم بب يقوم ينفذها ,,عشان كده اصبحت مترهِّلة زي البورد ده.. لاتنسيق مع ادارات اخري لاقراية لاوالويات لادراسة تقاطع مصالح .. وهكذا. هي الخرتوم براها ,, امش شوف حي السودنة عطبرة وخلي الناس تحكي ليك الانجليز سلموه كيف وفي عهد الانقاذ بقي شنو .. ملاعب القولف عملوها ... خليها في سرِّك ,,
11-09-2011, 09:11 PM
Munir Munir
تاريخ التسجيل: 02-11-2002
مجموع المشاركات: 10496
الأخ محمدجلال كل سنة وأنت والمتداخلين طيبين .. تعرف الخرطوم دي زي الطاحونة .. كلما تقرِّب تتطور تقوم تتمدد وتتمدد وأي مجهود للتطوير يروح شمار في ملحاً حار .. في الطاحونة كلما العيش ينطحن يكبوا فوقه شوال عيش جديد يحتاج طحن من جديد .. فموارد العاصمة مشتتة في محاولة لتوفير خدمات لمدينة تتمدد بإستمرار .. وما يكاد يتمدن سكان قادمون إليها حتي يأتي إليها قادمون جدد يريدون قدراَ أدني من الخدمات - موية ونور وتعليم وصحة ومواصلات وتموين .. إلخ..إلخ .. هذا من الناحية البشرية .. تجي للثقافة تلقي الناس ماعندها إهتمام بالمحافظة علي النظافة لأن الجو زاتو لا يشجع .. شمش حارة وأتربة وغبار زايد الفلس تجعل أي زول شايل أخلاقه في طرف نخرته .. وذلك الجو الصحراوي لا يساعد علي التنظيف .. ولربما تذكر حينما كان يوسف عبدالفتاح والياً علي الخرطوم بذل مجهود خارق لنظافة العاصمة وجنن المساجين جن .. الجماعة يكنسوا الزلط بي جاي تجي التراب ترجع تغطي الشارع بي جاي .. وحاول يعمل تشجير وشتل صف طويل من شتول النخيل علي طول خط السكة حديد من كبري بحري في إتجاه القيادة العامة وإنت طالع .. لكين المجهود ده كله ذهب أدراج الرياح والشتول ماتت - حسب آخر عهدي بها - .. فالشغلانة دايرة صبر ومثابرة وميزانية وإهتمام من الحكومة والمواطن .. ولربما تتذكر العدد المهول من صناديق القمامة الصغير علي طول شوارع الزلط الكبيرة حتي يرمي فيها الناس الأوساخ كالورق وخلافه كما الأمم المتحضرة .. ولكن تلقي الزول يفرتق ورقة الساندوتش ويرميها ليك في نص الشارع ولا يكلف نفسه أن يرميها في الصندوق علي بعد خطوتين منه .. وهكذا .. فالقصة جايطة .. وبعدين ياأخوي لا يمكننا أن نقارن الخرطوم الصحراوية مع عواصم أفريقيا جنوب الصحراء حيث المناخ الاستوائي الممطر والأرض المخضرة المعشبة طول السنة .. حيث أن الغبار معدوم وموية المطرة شغالة غسيل طبيعي للأرض والمباني .. أما عندنا فتقوم تضرب البيت بوماستيك تجيك كتاحة من مافي تعقبها ليك مطرة تضيع ليك جهدك وقروشك ..
فأسوأ شئ هو مناخنا الصحراوي عدو التشجير والنظافة ..
11-09-2011, 09:27 PM
محمد المسلمي محمد المسلمي
تاريخ التسجيل: 08-08-2009
مجموع المشاركات: 11831
في فترةمن ايام بدرالدين طه ايام كان والي الخرطوم شكل لجنة لتطوير ولاية الخرطوم وكانت اللجنة معظم اضائها من الادارة الاهلية من نظار وعمد ورجال دين اسلامي ومسيحي واغلبهم من ضواحي الخرطوم وفتحدث احد العمد في الجلسة الافتتاحية وقال له سيدي الرئيس الشاعر قال في الضواحي وطرف المدائن الخرطوم خلوها طور الضواحي والريف بعد ذلك الخرطوم ستتطور براها
11-10-2011, 11:41 AM
محمد جلال عبدالله محمد جلال عبدالله
تاريخ التسجيل: 06-24-2011
مجموع المشاركات: 4552
Quote: رغم اتفاقى معك فى ( جوطة ) الخرطوم .. الا ان الاستدلال بالصور لا يعكس الواقع تماما .. الصور المنتقاة تخفى وراءها الكثير من المناظر السالبة ، و بذلك المقياس ما رأيك فى صورتين من الخرطوم .. الاولى من فندق السلام روتانا و الاخرى لكوبرى الفتيحاب :
صدقت في ذلك فالصور لا تعكس دائما إلا أجمل المواقع ولكن الفيصل هو التجربة الشخصية لمن زار تلك البلاد وهذا هو عين ما قلته أنا أعلاه:
Quote: طبعا هذه الصور قد لا تعطي الصورة الحقيقية لأنها مقوقلة ولكن الناس الذين يسافرون لتلك البلاد يقولون أنها نظيفة ومنظمة
11-10-2011, 11:45 AM
محمد جلال عبدالله محمد جلال عبدالله
تاريخ التسجيل: 06-24-2011
مجموع المشاركات: 4552
Quote: مساء الخير هو القال ليك انو الخرطوم مدينة منو .؟ الخرطوم لتتحمل من المدينة اسمها .....اذا حاولت ان تقيس الخرطوم بمقايس المدن وشروطها فان الخرطوم عبارة عن قرية كبيرة دعنا اولا نتكلم عن بعض صفات المدن نظام الصرف الصحى التخطيط الخدمات ( مياة ' كهرباء 'منظومة مواصلات متنوعة )
والقال ليك أنا قلت الخرطوم مدينة منو ^_^ الخرطوم فعلا بمقياس المدن الحديثة ليست سوى قرية كبيرة ولكن بمقياس القديم فهي مدينة كانت من أجمل العواصم الافريفية والعربية ولذلك كان تساؤلي:لماذا لم تتطور كعاصمة.؟
Quote: ياخ عليك الله لقيت ليك مدينة المطار فى نصها وتحتل المنشأ ت العسكرية قلب البلد
طبعا هذا الكلام كان زمان لمن كانت دي نهاية البلد ياخ أنا لي هسي بتذكر في التمانينات شارع مدني ده كلو كان عبارة عن خلا!!! والقيادة العامة دي يخيل لي ورثوا موقعها ده من التركية السابقة وطبعا كعقلية السودانيين في غير القابلة للتطور وفي المحافظة على الموروث القديم وإن وإن
11-10-2011, 11:47 AM
محمد جلال عبدالله محمد جلال عبدالله
تاريخ التسجيل: 06-24-2011
مجموع المشاركات: 4552
Quote: تعرف الخرطوم دي زي الطاحونة .. كلما تقرِّب تتطور تقوم تتمدد وتتمدد وأي مجهود للتطوير يروح شمار في ملحاً حار .. في الطاحونة كلما العيش ينطحن يكبوا فوقه شوال عيش جديد يحتاج طحن من جديد .. فموارد العاصمة مشتتة في محاولة لتوفير خدمات لمدينة تتمدد بإستمرار .. وما يكاد يتمدن سكان قادمون إليها حتي يأتي إليها قادمون جدد يريدون قدراَ أدني من الخدمات .
إذن فهي مشكلة الحكومات التي لم تطور الريف ولم توفر له الخدمات وبالتالي انسحب ذلك على العاصمة
Quote: تجي للثقافة تلقي الناس ماعندها إهتمام بالمحافظة علي النظافة لأن الجو زاتو لا يشجع .. شمش حارة وأتربة وغبار زايد الفلس تجعل أي زول شايل أخلاقه في طرف نخرته .. وذلك الجو الصحراوي لا يساعد علي التنظيف .. ولربما تذكر حينما كان يوسف عبدالفتاح والياً علي الخرطوم بذل مجهود خارق لنظافة العاصمة وجنن المساجين جن .. الجماعة يكنسوا الزلط بي جاي تجي التراب ترجع تغطي الشارع بي جاي .. وحاول يعمل تشجير وشتل صف طويل من شتول النخيل علي طول خط السكة حديد من كبري بحري في إتجاه القيادة العامة وإنت طالع .. لكين المجهود ده كله ذهب أدراج الرياح والشتول ماتت - حسب آخر عهدي بها - .. فالشغلانة دايرة صبر ومثابرة وميزانية وإهتمام من الحكومة والمواطن .. ولربما تتذكر العدد المهول من صناديق القمامة الصغير علي طول شوارع الزلط الكبيرة حتي يرمي فيها الناس الأوساخ كالورق وخلافه كما الأمم المتحضرة .. ولكن تلقي الزول يفرتق ورقة الساندوتش ويرميها ليك في نص الشارع ولا يكلف نفسه أن يرميها في الصندوق علي بعد خطوتين منه .. وهكذا .. فالقصة جايطة .. .
إذن فهي مشكلة ثقافة أيضا وعدم وعي من المواطن ويخيل لي المواطن السوداني المسيس دائما بدخل التسييس في أي حاجة يعني لو كرهان حكومته ما حيهتم بنضافة البلد لو روحو محرقاهو من الاسعار برضو ما حيهتم
Quote: وبعدين ياأخوي لا يمكننا أن نقارن الخرطوم الصحراوية مع عواصم أفريقيا جنوب الصحراء حيث المناخ الاستوائي الممطر والأرض المخضرة المعشبة طول السنة .. حيث أن الغبار معدوم وموية المطرة شغالة غسيل طبيعي للأرض والمباني .. أما عندنا فتقوم تضرب البيت بوماستيك تجيك كتاحة من مافي تعقبها ليك مطرة تضيع ليك جهدك وقروشك ..
فأسوأ شئ هو مناخنا الصحراوي عدو التشجير والنظافة
فعلا المناخ ليهو دور كبير وأنا والله أستغرب في مناخ بلادنا الفيها كمية أنهار وأشجار ومناخ الخليج اللي هو صحراوي بحت!! بالمناسبة عندنا كمية غبار لا توجد في أي مكان في العالم حتى الخليج منبع الصحراء!!
11-10-2011, 11:55 AM
محمد جلال عبدالله محمد جلال عبدالله
تاريخ التسجيل: 06-24-2011
مجموع المشاركات: 4552
Quote: وفتحدث احد العمد في الجلسة الافتتاحية وقال له سيدي الرئيس الشاعر قال في الضواحي وطرف المدائن الخرطوم خلوها طور الضواحي والريف بعد ذلك الخرطوم ستتطور براها
ما هو دي العقلية السودانية التقليدية مفروض ما يجيبوا زي ديل!! مفروض يجيبوا شباب بين 25 إلى 45 سنة وناس يكون لفوا العالم وشافوا بلاد برة وعندهم خبرة ودراية
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
محمد جلال عبدالله
انور التكينة
راشد يحى مدلل
عبدالعزيز الفاضلابى
Munir
محمد المسلمي
فيس بوك
تويتر
انستقرام
يوتيوب
بنتيريست