|
لعناية ود شيقوق : دوقة مليانة كاش تتزوج في عمر 85
|
الدوقة كاتيانا فيز جيمس دوقة البا في اسبانيا وعمرها 85 سنة ويسبق اسمها 51 من القاب النبلاء وتملك مساحات واسعة من الاراضي والقصو تزوجت من رجل يصغرها ب 26 سنة (يعني قدرك تقريباً يا شيخ الطيب) ولا انت اصغر من كده شوية؟) حليلك يا الطيب يابتاع الشدر الكبار فرصة وجلت منك كان اغنتك عن مساككة التعويضات واحلام البترول.
|
|
|
|
|
|
|
|
Re: لعناية ود شيقوق : دوقة مليانة كاش تتزوج في عمر 85 (Re: محمد عمر الفكي)
|
ود الفكي
ياخ والله ما شفت البوست دا الا هسه وآسف للتأخير
Quote: الدوقة كاتيانا فيز جيمس دوقة البا في اسبانيا وعمرها 85 سنة ويسبق اسمها 51 من القاب النبلاء وتملك مساحات واسعة من الاراضي والقصو تزوجت من رجل يصغرها ب 26 سنة (يعني قدرك تقريباً يا شيخ الطيب) ولا انت اصغر من كده شوية؟) حليلك يا الطيب يابتاع الشدر الكبار فرصة وجلت منك كان اغنتك عن مساككة التعويضات واحلام البترول. |
ههه لا آآآآآآآآآ أمحمد اخوى ما تنزعج الجايات اكتر من الرايحات
| |
|
|
|
|
|
|
Re: لعناية ود شيقوق : دوقة مليانة كاش تتزوج في عمر 85 (Re: الطيب شيقوق)
|
. .
لا حولاااااااااا شناة السواد
يامحمد عمر ياخي دي قالت (للنيتو) قومي وقعدت مكانها .
قصة النيتو (مضرب المثل في الشناة) للحناكيش الما سمعوا بيها:
القصة واردة في كتاب الاحاجي السودانية للراحل المقيم عبد الله الطيب أعلى الله في الجنان مقامه، و فيهاوصف عجيب للشناة والسماحة :
ومختصر القصة أن محمد الشاطر أراد ان يتزوج بفتاة جميلة ووصفت له فتاة تدعى اللعيب وأظن أهل البت كانو دايرين يدبسوه في الشينة (النيتو) فاراد أن يعرف الوصف بنفسه فارسل خادمه بشارة عشان يجيب ليه الخبر اليقين وقال ليه:
ـ اتحيّل و شوف لي اللعيب:
و ذهب بشارة الى أهل العروس ، و طلب منهم ماء، و نظر الى العروس ، و رجع بعد ذلك الى سيده.فقال له محمد الشاطر:ـ كيف وش اللعيب يا بشارة؟ ـ قمر سبعتين الليها دارة.وكيف نخرة اللعيب يا بشارة؟ ـ قمقم الدهب عند النصارى. ـ كيف رقبة اللعيب يا بشارة؟ ـ كوز الدهب وسط الجرارة. و كيف ضهر اللعيب يا بشارة؟ ـ فتر و شبر ليه انفزارة. ـ كيف ايد اللعيب يا بشارة؟ ـ كرباج العنج عند البطارة. ـ كيف بطن اللعيب يا بشارة؟ ـ طاقة الهنود عند التجارة. ـ كيف كفل اللعيب يا بشارة؟ ـ ود الجدي الراقد حدارة. ـ كيف شعر اللعيب يا بشارة؟ ـ هضليم نعام خاتي انقصارة. ـ كيف قدم اللعيب يا بشارة؟ ـ قدم الحمام فوق الحجارة".
وعشان يعرف شكل النيتو نادى بشارة تاني و قال ليه يا بشارة . أمش بيت العروس و اتحيّل، و شوف لي النيتو دي، شكلها كيف انه".
و مشى بشارة لأهل العروس و ادّعى أنه عطشان جدا. و طلب منهم كوز ماء. و كانت النيتو قاعدة قدام المشـّاطة. و نظر إليها بشارة بتدقيق، و عرف شكلها و رجع لمحمد الشاطر. فقال له محمد الشاطر:
ـ كيف وش النيتو؟ بشارة: كدوسك المصّيته. محمد الشاطر : كيف عيون النيتو؟ بشارة :كديسك الزازيتو. محمد الشاطر:كيف خشم النيتو؟ بشارة :كنتوش ملاحك التكيتـُه. محمد الشاطر : كيف شعر النيتو؟ بشارة: صوف كديسك البلّيته. محمد الشاطر : كيف ايد النيتو؟ بشارة : مغيزلك الترّيته. محمد الشاطر :كيف نهد النيتو؟ بشارة : قرقادك الشويته. محمد الشاطر : كيف بطن النيتو؟ بشارة : كرتوبك الوسط الديار رميته. محمد الشاطر:كيف ضهر النيتو؟ بشارة : قوسك الحنيته. محمد الشاطر:كيف كفل النيتو؟ بشارة : طارك الدقيته. محمد الشاطر: كيف كرعين النيتو؟ بشارة:ود السقد السكيته و اتمطرق طالب بيته. محمد الشاطر:شن يحلني من النيتو؟ بشارة:جملك ان شديته و مالك ان خليته.
و شد محمد الشاطر جمله،و خلّى ماله، و سافر هو و بشارة بليل.و أصبحا من الصباح في بلد طيره عجمي."
:) بشارة الثقيل إتلوم مع النيتو وجعلها مضرب الامثال في الشناة لكن مابنلومه لأن المستشار مؤتمن كما قالت العرب
دحين إنت هسع إتلومت لوم السواد مع ود شيقوق دير تدبسه في الشكلوتة دي .
. .
| |
|
|
|
|
|
|
|