الشعـب يمـر بمرحلـة القنـع

Quote: شعب ناكر للجميـل بصورة ما إعتيادية..حكومة بتفعل مافي مصلحتو ووقايتو من الامراض وهو ماراضي أولاً اكل اللحم بيجيب القاوت.. وربنا اكرمنا بحكومة صدرتها للخارج واهدتها للشعوب الفقيرة من باب الجار اولى من الدار وبارك الله فيمن آثر غيره على نفسه ولو به خصاصة وهنا الحكم الرشيد اهدي للشعب حسنة الدنيا والآخرة .. فكسب وقاية من الامراض ونال حسنة واجر تدخله الجنة.. ثانياً كترت الأكل بتعمل بدانة ودي بيجي من وراها امراض كتيرة منها السكري والضغط والهارت غير انها بتعمل بلادة وخمول في الذهن .. والحمد لله وبنعمة منه وبحمد وبشهادة صاحب البوست الجاحد اصبح الشعب هزيل وضعيف ( بقراية محايدة يعني رشيق وستايل على الآخر ) ودا بكون انه الحكومة بسياساتها الرشيدة عملت على كف يد الشعب عن اللقف واللهف في اي ملف وبدل الفطور المدنكل وصينية الغداء وبعدها صحانة التحلية وطبق الفواكه ثم العشاء الما مخمج وبعده كورية اللبن وفرت ليهو بائل اخري بكباية شاي مسيخة من الصباح وفطور موية فول ثم خلتو يدمج الغداء والعشاء في وجبة واحدة ممثلة في صحن بتاع فتة فول او شوربة عدس وبكدة يضرب عصفورين بصحن واحد .. يوفر الوقت للعمل والشلهتة والجري في الاسواق وفي نفس اللحظة يتخلص من من اي كتلة للدهن في جسمو ويبقي عبارة عن عضم مكسو بجلده ودي قمة القدرة الرياضية وطاقة تساعده في المكابسة والمدافرة في المواصلات ولو كمان قال يوفر حق المواصلات عشان حق حقنة البنسلين والا فتيل درب لاخوهو والا بته الصغيرة تكون لياقة كاااربة يدق بيها كداري من امبدة ام درمان لغاية المحطة الوسطى.. عشان كدة نحن شعب جاحد .. قدر ما تعمل الحكومة لمصلحة الشعب الشعب يفسر تصرفها خطأ ويقول ظالمننا.. لو قلت ليهو منطقك شنو .. يقول ليك شوف الكيزان ديل مترعين وسمان وليهم كروش وجعاب وياكلو في اليوم خمسة وجبات مع ملاحقاتها والواحد معرس اربعة.. ياله من منطق اعوج يا شعبنا الجاحد .. الكيزان بطريقتهم دي عاوزين يكفو عنكم البلاء ويرفعو عنكم الحسد والحقد من الشعوب التانية الممكن ينظروا ليكم كشعب منعم مرفه لذا هم تحملوا عنكم البلايا والخطايا و###### الدنيا وامراضها فضحو من اجلكم بتحمل كل الرزايا .. أفلا تكونو شعبا شكورا؟؟!