|
|
 Re: عربي جوبا ... هل من موثق لها ؟؟؟ (Re: عماد الشبلي)
|
***
**
*
يا عماد يا شبلى
اليك ملمح لربما ينير لنا مسارات التوثيق.
انا قريت كل الكلام السابق وما دخل لى فى مخى
العربى بصيغته التى تعرف بعربى جوبا
يكون صوت مخارج لاحرف اللغة العربية لاى سودانى
يتكلم العربية كلغة ثانية مالم يتلق تعليم ممنهج للغة العربية
واليك حكاية ابناء السودانيين فى لوس انجلوس
وهم يتكلمون مع بعضهم البعض او فى حضرتنا لاننا
نصر عليهم ان يتكلموا بالعربى ونبدأ معهم نجرجرهم لذلك
وجوبا هناك فى عمق الخاطر
واظنك قد التقيت بابنى حسام ولربما يمكن ان توضح الامر أكثر
من وجهة نظرك وان تحكى انطباعك عن لغته العربية بعد عوده من السودان
ملحوظه: حسام ابنى يزور السودان لاول مرة فى حياته
ويرجع من الاجازه وهو يتكلم عربى جوبا
حسام لم يزور جوبا فى حياتة..
بهذه المعطيات تكون جوبا هى السودان
ويمكن ان نقول هو يتكلم عربى الوطن الوحد
عربى جوبا الخرطوم
وكنت بقول وبيه طول حسى وبرقع بالصوت الحيانى
..
..
منو البفصلنا وكيف يفصلنا..
ونحن متواصلين ومتصلين ..
وكيفن تفارق العازه ام نفلين ..
وكيف ياخوانا بس ورونى
كيفن بس..
نكون وطنيين ...
وعندما الفاس وقع فى الراس
مافى غير نقول
وملعون الكان السبب فى الدارين..
اليك يا صديقى مكدى قراشى
عندما اسمعها
من صغيرك وضاح
وانا اسالة ما اسمك ياولد
ما اسمك
ويجيبنى وبراة الاطفال فى عينيه
وداه قراشى
تضيق الدنيا بما رحبت
وادخل فى كستبانه
اتحسر على السنة اطفالنا
المعوجة..
و على هذا الزمان المعوج
والذى طوحنا على هذه الذرارى..
لانعلم ما هو مصير هؤلاء الزغب الصغار
بكى حسام ذياك اليوم
واليوم اكان عطلة
بعد ان دار على كل منازل اقرانة
ولكن لايوجد احد..
فقد فر الخواجات
للقاء الاسرى الاسبوعى..
جلس امامى ..
والدمع قد رسم قصة على الخدود..
داد..
ديد اى هاف اينى قران مام اور داد
نطقها بانجليزية طلقة
لالبس فيه.. ولا غموض ..
كل اولاد الحلة مشوا لحبوباتهم
الا انا..
ورماح الحارسيك قيام..
..
قلت لة حاشى وكلا
فالقراند داد تبعك
هناك فى البعيد..
ودلفنا الى صفحات القوقل ايرث
بارك الله لنا فيك ياعم قوقل
فقد ساعدت كثيرا فى عملية الشرح اللئيمة
وها قد عبر كل البحار وسكون بالقرب منها حبوبتك يابنى
والتى بقربها يكون الف عيد
وبسرعة ادرت قرص التلفون
لاحل المعضلة النحن فيها..
و يحادث الجنا حبوبتة
وما هى الا لحظات وسرا صوتها العذب
عبر الاثير معطرا
وتركتها بعد السلام
يمة حسام الليلة قال الا يكلمك
وجاء صوتها الى اذنة
الو حسومى
حبيى
ياحليلك ياود امى
الليلة طريتنى..
وقلت عايز تكلم حبوبتك
ارتسمت دهشة السنين
فى عيون البراءة..
وسالت دمعة اخرى وهو يعيدنى سماعة التلفون
داد اى كانط اسبيك اسبانيش..
وانحدرت دمعة اخرى من قلبى
المودر لقد فقدنا اللنك
وضاع منا تلاحق الاجيال..
اقراء لهم مانكتب هنا
يا مجدى
من معانى ومفردات
واحكى لهم ما سوف نحكى من ذكريات
ولا تقل لهم ما انا بقارىء
عسى ولعل ..
...
..
.
..
وكل الابناء والبنات هناك يتكلمون عربى جوبا بلا منازع.
فهل هى جوبا اخرى
ويقول المغنى
يامسافر جوبا
ودع قوم سيب الخرطوم
قوم
قوم
قوم بارحها
وها نحن نؤكد أن ليس لنا تانى مقام فى الخرطوم
ونلم وليداتنا بعربى جوبا ده ونتوكل عليك يا جوبا
ونحن نترنم جوبا مالك عليا
جوبا شلتى عينيا
وبعد ده تانى فى كلام ما فى اهم من النظر
وخلى عندك بعد نظر يا صاحبى ..
*صديقى الودود مجدى قرشى – هوعمدة لوس انجلوس غير المتوج.
*
**
***
|
|
 
|
|
|
|
|
| العنوان |
الكاتب |
Date |
 عربي جوبا ... هل من موثق لها ؟؟؟ | عماد الشبلي | 07-08-11, 11:09 AM |
| Re: عربي جوبا ... هل من موثق لها ؟؟؟ | عماد الشبلي | 07-08-11, 11:14 AM |
| Re: عربي جوبا ... هل من موثق لها ؟؟؟ | ذواليد سليمان مصطفى | 07-08-11, 11:18 AM |
| Re: عربي جوبا ... هل من موثق لها ؟؟؟ | عماد الشبلي | 07-08-11, 11:28 AM |
 Re: عربي جوبا ... هل من موثق لها ؟؟؟ | عبدالله الشقليني | 07-08-11, 02:22 PM |
| Re: عربي جوبا ... هل من موثق لها ؟؟؟ | احمد الامين احمد | 07-08-11, 02:48 PM |
| Re: عربي جوبا ... هل من موثق لها ؟؟؟ | عماد الشبلي | 07-08-11, 04:44 PM |
| Re: عربي جوبا ... هل من موثق لها ؟؟؟ | عماد الشبلي | 07-08-11, 03:24 PM |
| Re: عربي جوبا ... هل من موثق لها ؟؟؟ | عماد الشبلي | 07-09-11, 12:43 PM |
| Re: عربي جوبا ... هل من موثق لها ؟؟؟ | عماد الشبلي | 07-09-11, 06:36 PM |
| Re: عربي جوبا ... هل من موثق لها ؟؟؟ | عماد الشبلي | 07-09-11, 07:09 PM |
| Re: عربي جوبا ... هل من موثق لها ؟؟؟ | عماد الشبلي | 07-09-11, 07:28 PM |
| Re: عربي جوبا ... هل من موثق لها ؟؟؟ | sumah | 07-16-11, 07:15 PM |
| Re: عربي جوبا ... هل من موثق لها ؟؟؟ | عماد الشبلي | 07-16-11, 08:28 PM |
| Re: عربي جوبا ... هل من موثق لها ؟؟؟ | حاتم يوسف العبيد | 07-17-11, 05:47 AM |
| Re: عربي جوبا ... هل من موثق لها ؟؟؟ | عماد الشبلي | 07-17-11, 03:17 PM |
|
| |
sumah
فيس بوك
تويتر
انستقرام
يوتيوب
بنتيريست