|
فارس جديد لمجــد دار جعل التليد
|
نابى احمد على عصب من منطقة الغبش غرب كبوشيه لم يتجاوز 21 عاماً حاول نابى انقاذ ثلاثة اطفال اثناء انقلاب الرفاس الذي كان يقلهم من قوز بُرة الى كبوشيه انكفا اب رفاس وتحته اطفال حاول نابي انتشالهم في أثناء المحاولة قطع ابورفاس يده اليسرى من مفصل الكتف.. و لكن هذا البطل رغم فقدان يده ظل الى آخر لحظه ينتشل الاطفال حتى أنقذهم واحداً واحدا بشهامة وصبر قل ان تجده في زماننا هذا +++++++++++++++++++++++
والله ولد و حرررم دود و أمانة الليله ما برز راجل يا ناس الشي دا مو ساهــل بي المره الفارس الحــر .. الآن طريح الفراش في مستشفى شندي أنا أقترح ترتيب زيارة عاجلة له من القريبين والقيام بالواجــب يا أهل الواجب
|
|
|
|
|
|
|
|
Re: فارس جديد لمجــد دار جعل التليد (Re: علم الدين الخواض)
|
يستحق تمثالا بالحجم الطبيعي ، اصعب شيء هو ان تنقذ غريقا في النيل وبالذات في هذه الشهور من العام يصبح الامر شبه مستحيل ، كان مرقت رقبتك ما خليت حاجة ...
زمان اهلنا كانو بقولوا البحر بقوم بي زول وينوم بي زول " ويقصدون ان اول الفيضان لابد ان تحدث فيه حوادث غرق ونفس الشيء عندما ينتهي موسم الفيضان " الله يقطع الرفاصات والمراكب ، غايتو ناس شندي والمتمة ارتاحو منها .. الله يريح البقية ..
تحياتي علم الدين .....
| |
|
|
|
|
|
|
Re: فارس جديد لمجــد دار جعل التليد (Re: ahmed haneen)
|
لكم التحية اخوتي جميعا .. اتصلت بنابي مساء اليوم وتحدثت معه طويلا .. ولاول مرة حكي لي ماحدث ... كانت بطولة حقيقية ... مروة .. شجاعة ... يقين وايمان تام بقضاء الله وقدره .... نعم.. الموضوع يحتاج لرد الجميل لهذا الفارس .. وخلال الايام المقبلة نرفع لكم التقرير الطبي وصور الشاب ( نابي ) ونرجو من المختصين في المجال الطبي وغيرهم المشاركة في علاجه دمتم جميعا تحملون هموم وقضايا الاهل والبسطاء في كل ارجاء البلاد... وهذه صور تبين الرصيف الترابي ( القيف ) الذي تهدم علي اب رفاس وتسبب في الحادث :
http://www.youtube.com/watch?v=6dQUPn_sK3k&sns=fb
| |
|
|
|
|
|
|
Re: فارس جديد لمجــد دار جعل التليد (Re: علم الدين الخواض)
|
علم الدين
التحايا النواضر
مكرر للفارس الهمام ابرسوة
الذي انقذ ارواح اليافعين
وضحي من اجلهم بضراعو اليمين
المهم بلغوا سلامنا ونحنا جاهزين
بس استقروا علي نوع الدعم وكيفية توصيله نحن بره البلد
وارجو التنسيق مع ابن اخي تاتاي سرور كمال الدين امين عام مستشفي شندي وادونا خبر.
وفقكم الله
| |
|
|
|
|
|
|
Re: فارس جديد لمجــد دار جعل التليد (Re: عبد اللطيف السيدح)
|
اتصلت باسرته اليوم وغدا باذن الله سترسل الصور والتقرير الطبي من المستشفي هناك وفد من بعض الاخوة المتطوعين سيقف علي حالته وغالبا ما يزوره يوم السبت حسب الترتيبات التي اتفقنا عليها حتي نتمكن من دراسة حالته وامكانية العلاج داخل او خارج السودان مع العلم بانه اصيب ببعض الحروح الطفيفة في انحاء متفرقة من جسمه
| |
|
|
|
|
|
|
Re: فارس جديد لمجــد دار جعل التليد (Re: علم الدين الخواض)
|
بقلم د. سعد عبد القادر
كأن التاريخ يعيد نفسه في قصص الشجاعة والبطولة النادرة هذا هو الفارس المسلم عبدالله بن سَبْرَةَ يرثي يده حين قطعت وهو يحارب الروم ويصر على حربهم بما بقي له من ساعدٍ فيقول فإِن يكن أَطربُونُ الرُّومِ قَطَّعَها * فإِنَّ فيها بحمدِ الله مُنْتَفَعَا بَنَانَتانِ وجُذْمُورٌ أُقِيمُ بها *صَدْرَ القَناةِ إِذا ما صارِخٌ فَزِعا ولنا أن نفخر اليوم بالفارس الجعلي (نابي أحمد) الذي يذكرنا بهذا الفارس المسلم، على الرغم من تباعد القرون بينهما، وظللت منذ ساعة واكثر أبحث عن قصة مشابهة لقصة بطلنا نابي حى وجدت قصة عبد الله بن سبرة هذه، وقد جاشت قريحتي بهذا المسدار المتواضع آملا من الإخوة الكرام إكمال النقص فيه : نابي الفي المحاص منو الاسود جات فارّة سالم فعلو من لوم ام حمد والسارّة مابرمش يمين كان الجبال جات تارّة أنقذ أبرياء رضيان قنوع بالحارّة **** نظم اشعاري مهما قلت فيك قليله انت تساوي في الحوبات جيوش وقبيله فارس دار جعل رفعت راسنا الليله وعدونا الفصيح خليتو عدمان حيلة ** إياك نابي ود عصب المأصل حُر ما بكازيك ود امُّو الطرور العُر تنقذ في الغراقى ودم وريدك يشُر لا بِتْوِحْ ولا بتفز ولا بِتْتُرْ ** بي توب الفخر يا نابي إت غتيتنا لميت شملنا في الدار بعد شِتِّيتْنا في كل الأرض أسياد بلد بقيتنا وبي إيدك يمين فوق للنجوم ختيتنا ** يا اللدر البحوم في النيل خريفو وصيفو موجك هاج وعكرت البحر لا قيفو قومتك هيجة الريح مستحيل كِتِّيفو ومتلك حمزة يوم لاقى الكفر بي سيفو
| |
|
|
|
|
|
|
Re: فارس جديد لمجــد دار جعل التليد (Re: علم الدين الخواض)
|
وهذه ابيات كتبت بقلم بعض الشباب تصور الدور البطولي الذي قام به نابي:
شال فوق الدّبَر بي دَمُّو واحدة ضراعو
في شان روح جُهال انتبّ قام فِسراعو
خاد في بحور ألم بي واحدة فَرَد أشراعو
شاف الموت ضِحَي وسعالو تب بي كْراعُو ---------------------------------- راجل ود رجال وفوق عزّو يوت يتضرّع وياو أسد الدواس اِنتم فراسة وكرّع
تفداك دار جعل لاك خُفتَ لاب تتورّع فداك صُرر القبايل ياك ود أصول ومفرّع
-----------------------------------
ياك جبل الضرا المليان فراسة وهيبة
حَجيت الجُهال من موتة قاسية قِرَيبة ما بنكفيك شُكر وان زخّ مطراً صيبة والمتلك مو قليل يا ود الاصول الطيبة
----------------------------------
نابى ياك ناب النتر البى زئيرو ملوع ما هماك ألم ايدك وعارفو كم متنوع كملت الرجالة لا جبنت لاك متلوع منقذ للبراءة وللكريم بالبتر متطوع
---------------------------------
نابى ياهوعشا البايتات فى السنين الستة رجالتو من جلباب وطاقية وكبران جِتة بى متلو أمان جعل ولى كل البيزور الحتة دا طامح خيرو عااامى حاشا مو أِب ستة
------------------------------------
| |
|
|
|
|
|
|
Re: فارس جديد لمجــد دار جعل التليد (Re: علم الدين الخواض)
|
توجه نفر كريم تنادوا عبر الفيس بوك الي الغبش واستقبلتهم الغبش بترحابهم المعهود شيخ طارق اللبيب وياسر محمد الحسن والمحجوب عبد الوهاب ود.انس الصافي وعلاء الدين حسن ومحمد الختم وخضر الخواض وعامر محمد كرار وعصام الحاج كلنا نابي ... كلنا نابي ... كلنا نابي ... وصل وفد كلنا نابي قرية الغبش عشرة أشخاص يمثلون ألاف يحملون قضية الفتي نابي ود عصب فارس المنطقة الذي أنقذ أطفال من الغرق بيد مقطوعة تنزف دما وأستقبلهم أهل المنطقة بالنحاس والحفاوة التلاحم .. الأحتفال ببطولة نابي .. مفخرة المتمة .. عبد الله ود سعد 2011 تلاحم .. فخر .. عزة ... ثبات ... لا أدري ماذا فعلت بنا نابي .. هكذا أجتمعوا جميعا ودقوا النحاس ونصبوك بطلا .. ندعو كل اهل السودان قبيله قبيلة ونعلم ان لكل منطقة وقبيلة فارسها ... فنابي لا يعبر الا عن اخلاق السوداني الاصيل ومروته فلنقف معه بمختلف الواننا واعراقنا في محنته
| |
|
|
|
|
|
|
Re: فارس جديد لمجــد دار جعل التليد (Re: علم الدين الخواض)
|
كلمات شرف الدين عقيد
يوم شكرك مايجي وان شاء الله مانضوق نارك ...... ماك الفي الزنقة بتلعثم ويبلع ريقو ومابتخفس علي الفات العقاب وتعيقه وماقيلت في الشجر الكتير رقريقه كوراك ابو مروة بتلفاهو وتفرج ضيقه دخري الحوبة لي القاصدنه فاتح دارك يوم شكرك مايجي وان شاء الله مانضوق نارك ....... من زمن التلعب شليل شاديت ماباريت الخمالة وبي توب امك اتلفيت سارح بي المراح ولي ضهر الخيول شديت من يوم قمت من تبيت زولاُ رزيييييييييييين ومبارك يوم شكرك مايجي وان شاء الله مانضوق نارك ........ مابتضضاري بي الدانقات تخون الجارة وما بتدخل علي السمحات لمن اصغرن تضاري من الشافعة حتي الماشة بي الدفارة بحترمن شهامتك ... وبوقرنو وقارك يوم شكرك مايجي وان شاء الله مانضوق نارك ..... وياناس اللجنة يوم شكركم مايجي الغازي اللدود لي يوم دواسو مجرق عينيك يا التلب زي جمر الكمينة محرق ساوي ضراعك وداك سيفك سنين ومطرق ضربك صاقعة لي الجيش الكتير ومفرق وبتجيبو التكوسو ان طار غرب وان شرق سيد الفوارس ومابتاباه انت الدارك يوم شكرك مايجي وان شاء الله مانضوق نارك ----------------- الصنديد وقور مابتبري البلف الراس عاقل ديمة مابتشرب مرير الكاس رويان عفة .... ماببتع عيوب الناس ومابتشبع بلي بتدي وتمد لي جارك يوم شكرك مايجي وان شاء الله مانضوق نارك ----------- القاسي الصعيب عندك بسييييييييييط ومسهل يا اب راياً عدل عند الكبار والجهل نضمك عوس رجال مو شيتاً كعيب ومبهل الحاكم البلد لي شورتك دوام بتمهل وبطروك يوم تغيب مابدوروه انت ودارك ويوم شكرك مايجي
| |
|
|
|
|
|
|
Re: فارس جديد لمجــد دار جعل التليد (Re: علم الدين الخواض)
|
كلمات ميادة خضر
الليلة المتمة اتباشرت بي نابي اب نورا شلع ماهو المضلم وخابي كوّر في الدميرة وخادا متل الدابي نجدة شهامة انفذ لي ام وضيبا كابي -------------------- اب رسوة المربعن خلس المدروكة لبع اللجة لامجداف ولافلوكة شان امات ضماير ماتصيبهن شوكة سخى بي روحو قال اصلو الايام دلوكة
-------------------- الدخر ي البجيب حق الوليه ضراعو الشلبي البقسم للعدامة متاعو الوابل الهطل مذنو وهرج كركاعو اسخى عليهو ودالبي البيوت ماصاعو
---------------------
اللدّر البشيل حمل الوليات ضهرو الفارس البهابوهو الرجال القهرو كريما ماصنفلي شكرة والمد ظهرو حرّن ماقدل فوق نسوا كتر ظهرو
----------------------
اتناسى العمر مدا الايدين بسراع نابي الطيب الزول الخلوق وشراع ومن دار الجعل ارض الزراعه قراع ضاق آلام وماهماو اي صراع
---------------------
ونابي الزينة من دون الولاد عاجبني ارجوك ياملك اختك عديل احسبني كفايا اليتامي وحرفي ليك عاتبني كت دايراك اخوي علا القدر حاجبني
--------------------
| |
|
|
|
|
|
|
|