|
نقد فاضح لذواتنا فيما يخص الالفاظ البذئيه في المنبر الاخر
|
سأحاول انا اتحلي بشئين قليل شجاعه وبعض لنقد الذات استنكر كثيرون الكم الهائل من الالفاظ البذئيه والخادشه في المنبر الاخر والتي وجهت لكثير من اعضاء سودانيز اونلاين مدخلي لهذا الشئ اسئله واستفسارات للاعضاء رغم ادانتي لهذا الفعل مبدئيا يحاول الكثيرين الظهور بثوب ملائكي او نبوي في محاوله لسمو اخلاقي مطلق,وهذا منافي للواقع فمعلوم بالضروره ان معظم السودانين في جلساتهم الخاصه والمغلقه كاصدقاء مقربين او شلليات يطلقون فيما بينهم الفاظ خادشه ويتنابزون فيما بينهم ببذاءه باينه ويتداولون نكات تتناول المسكوت عنه بكل اريحيه فهم في حالة خاصتهم هذه تحررو من الرقيب المجتمعي وتحررو من خوفهم فاطلقو لارواحهم ماهو غير متاح,واكاد اجزم ان الكثير من الاعضاء هنا استعملو هذه الالفاظ بشكل متفاوت في حياتهم الخاصه ذات مره او مرات,هذا بالضبط ما حصل لاعضاء المنبر الاخر فقد تحررو من الخوف والرقيب المجتمعي باستعمال اسماء مستعاره فنفسو عن غبنهم تجاه الاعضاء هنا كونهم حرمو من الكتابه والتعبير في الحاله الطبيعيه وترسبت تلك الاشياء وتراكمت فكان هذا البركان المنفجر,واجزم ان معظمهم لو كتبو هنا باسمائهم الحقيقه لمارس عليهم الخوف والرقيب المجتمعي ان تكون لغتهم كمعظم لغة الاعضاء هنا من حيث انضباطها اللفظي. الشئ الاخر معظم الاعضاء هناك يكتبون وهم في حاله من الحنق والغضب تجاه بكري الذي يرونه لم يمنحهم العضويه وتجاه الاعضاء الذين لم يتمكنو من الرد عليهم فتراكمت هذه العوامل داخلهم لتنفجر بصورتها تلك ولنا هنا ان نتسأل فكم مره ومره وهنا في ذات المنبر عندما يسيطر الغضب علي بعض الاعضاء وهذا عامل واحد كما اسلفنا لتلك اللغه,الم نسمع ونقرا ذات العبارات هنا من قبل بعض الاعضاء الغاضبين من بعضهم وادخال ذات الالفاظ من سب وشتم ولعن بكل ماهو قبيح قبل ان يتدخل بكري بحذف تلك البوستات .اتسال كم بوست هنا محزوف يحتوي علي تلك الالفاظ مجرد تساؤل.......................؟ اري ان نتناول الظاهره في سياقها العام والشامل ولا نفصل اولئك الناس عن انفسنا فهم جزء من تكويننا الاجتماعي شئنا ام ابينا............................ اخر الكي اجزم ولا يراودني شك ان كثير من الاعضاء هنا يتلصصون هناك ويضكون ملء الاشداق بشئ من السرور حين يرو ان بعضهم قد حقق لهم ما كانو يودونه هنا تجاه بعض خصومهم للاسف انها بعض من الحقيقه
|
|
|
|
|
|
|
|
Re: نقد فاضح لذواتنا فيما يخص الالفاظ البذئيه في المنبر الاخر (Re: محمد علي شقدي)
|
شقدي يا صديق تعرف انا بتكلم عن انو الشباب الكتبو هناك ديل بكتبو وهم في حالة تحرر من اي شئ وساخطين علي كل شئ,وزي ما قال ود المشرف في بوست مجاور انو سودانيز زاتها بقت سلطه اها اقرب ليك يعني يا شقدي لو سالتك عليك الله سمعت كم نكته بذئيه في الحكومه دي,اكيد بتسمعها وتتكيف وتضحك لكن ما بتقدر تجي تكتبها هنا ولا انا ولا ناس كتيرين,لانو في محازير ذاتيه وموضوعيه,اها لو المحازير دي سقطت بتشوف جنس الكلام البي غادي ده,وده بالضبط الحاصل للناس ديلك.
| |
|
|
|
|
|
|
Re: نقد فاضح لذواتنا فيما يخص الالفاظ البذئيه في المنبر الاخر (Re: Abdlaziz Eisa)
|
عبد العزيز سلامات في بدايتي حديثي اشرت الي رفضي من حيث المبدأ لهذه اللغه اذا كانت هنا او هناك او في اي مكان يقرأه او يرتاده اخرون ولكن تناولتها من منظور اخر ولماذا تقال وهل الاعضاء هنا مبرؤن منها,أو لم تكتب هنا من قبل؟ بالاضافه لشئ اخر لم اذكره سابقا,وهو الانحطاط اللفظي والاخلاقي في الشارع السودان خصوصا في اوساط الشباب نتيجه لتراكم الاحباط والعطاله والضغط الاقتصادي وعوامل اخري. اخر زياره لي للسودان وجدت بعض ابناء حيي وهم في بداية الشباب يتداولون مثل هذه الالفاظ وكأن شئ لم يكن.
| |
|
|
|
|
|
|
Re: نقد فاضح لذواتنا فيما يخص الالفاظ البذئيه في المنبر الاخر (Re: فاروق عثمان)
|
Quote: اخر زياره لي للسودان وجدت بعض ابناء حيي وهم في بداية الشباب يتداولون مثل هذه الالفاظ وكأن شئ لم يكن. |
دي يا دكتور شكلها متطورة مع التكنولوجيا ...
بالنسبة للجنس الخشن ممّا قُمنا دي الحالة ولكن كانت أخفّ شوية ... أمّا الجنس الناعم أسأل الله السترة ...
واحد صاحبي قال لي الواحدة تعاين ليك لمّن تكسر عينك إنت وتدنقر في الواطة وتقرّب تقول ليها يا بت إنتي ما عندك أخوان
دمت بود ،،،
| |
|
|
|
|
|
|
Re: نقد فاضح لذواتنا فيما يخص الالفاظ البذئيه في المنبر الاخر (Re: صبري طه)
|
صبري يا صديق كدي داير ارجعك بالذاكره لي وراء شويه تذكر لما الفيلم يكون هندي يوم الخميس وبطلتو سيرديفي والبطل اميتاب ابطويله اها لما شعيبو يقوم اجيب الاستراحه في لحظة ابطويله جاري علي سرديفي دايرك تذكر الكان بي تقال لي شعيبو في اللحظه ديك كان شنو شعيبو هو مشغل السينما في تمانينات وبداية تسعينات القرن الماضي ولا اديك مشهد تاني الكوره شعله علم والشعله غالبه واحد جابو فتح الرحمن سانتو اها احمد الامام التبيشه الله يرحمو اتفرد والجار يعمل معاه ضربة جزاء ما يحسبها الحكم متذكر النبذ الكان بقولو للحكم ديل يا صديق مشهدين مرن بي ومرن بيك مئات المرات والجماهير الكان بتنبذ دي كانت في حالتين مختلفتين واحده اندماج وخدر لذيذ في انتظار لحظه ما قطعها ليها شعيبو,اتحررت من اي شئ واننتابها غضب عارم ترجمتو بي كم لا يخطر علي بالك من النبذ لشعيبو المسكين والتاني ترقب وانشداد وتمني لي هدف لم يتحقق,اتحررت الجماهير من اي ضابط الا غضبها وكالت للحكم من السباب ما يكفي لتكون امه او اخته علي وشك الوضوع لوكان النبذ يفعل فعله الحسي الشباب ديل عندهم نفس الغضب والحنق ده علي اي شئ ومن اي شئ,لقو نفسهم يكتبو ويقولو ما يشاءو دون ان يعرف حقيقتهم احد,اها متوقع يقولو شنو يعني؟؟؟؟؟؟؟؟؟
| |
|
|
|
|
|
|
Re: نقد فاضح لذواتنا فيما يخص الالفاظ البذئيه في المنبر الاخر (Re: فاروق عثمان)
|
اخ فاروق تحية طيبة فرق كبير بين استخدام اللغة الخاصة في مجالسنا القاصرة علينا و اصدقائنا وخاصتنا وبين عرضها على المنابر العامة اسف للمثال لكن الوضع اشبه بقضاء الحاجة , لا يوجد احد يشعر بالقرف من نفسه وهو يفعلها لكن اكيد ستفرغ مافي جوفك لو فعلها احدهم امامك ثم المقارنة بين ما يحدث هنا من تهاتر وما يدور هناك ايضا فيها اجحاف على الاقل من يشتم هنا يشتم باسمه سواء الحقيقي او النيك نيم المعروف على الاقل لصاحب الموقع بالتالي يتحمل ولو ادبيا مسؤولية كتابته لكن التخفي و التحلل من المسؤولية و الشتيمة دا جبن ليس إلّا فحتى الشتيمة و الاساءة - او ردها - لخصمك لا قيمة لها كان ما اديتها ليه في يدو وعينك في عينو عديل كدا حتى في المجتمع السوداني تلقى من يشتم شخص وراء ظهره او يطاعنه و يتجنب المواجهة دايما ما يكون تصرفه موضع نقد اكثر من الشتيمة نفسها باعتباره جبن عن المواجهة
وان كنت اتفق معك في جزئية ان البعض هنا يحاول ان يبدو في ثوب ملائكي بنقده للشتائم و الافاظ في المنبر الآخر واقرب مثال عب عزيز الجاي يعمل فيهااسي نبي وهو نفسه قبل فترة دخل في بوست كان فيه خلاف مع كاتبه او كاتبته ما متذكر وصف جميع المخالفين لكاتب البوست بالأقزام وسالناه قصدك شنو او منو عمل رايح لي يوم الليلة اقزام دي اشادة يا خوي ولاّ شكر ما ياها لغة العاجز النضح بيها اناءك فرقت شنو من الالفاظ الجاي تعمل فيها ملاك وتنتقدها
| |
|
|
|
|
|
|
Re: نقد فاضح لذواتنا فيما يخص الالفاظ البذئيه في المنبر الاخر (Re: محمد البشرى الخضر)
|
محمد البشري ازيك ياخ انا متفق معاك في كلامك ده تماما بس النقطه الانا بناقش فيها هو نقد بي طريقه مختلفه للظاهره في عمومها انا ما ببرر ليهم اللغه دي ومستنكره تماما لكن في نفس الوكت بحاول اصل لي تحليل يكون موضوعي لي معرفة ليه هم قالوها وما بفصلهم من المجتمع السوداني بي ظواهرو السلبيه والايجابيه لانو القالو اللغه دي سودانيين وما اتراك ولا مغاربه ولا مصريين. بعدين حكاية الانا المتضخمه فينا دي ونحنا احسن ناس واعرف ناس واكتر ناس مهذبين وارجل ناس,يبدو لي الناس احسن تعيد فيها النظر. شكرا تاني يا ود البشري
| |
|
|
|
|
|
|
Re: نقد فاضح لذواتنا فيما يخص الالفاظ البذئيه في المنبر الاخر (Re: فاروق عثمان)
|
Quote: % من الناس البتكتب في موقع الهكر هم اعضاء المنبر انفسـهم .. هناك تفاصيل لبوستات من 2005 .. حتي المتابع الدقيق للمنبر كمتصفح لا يمكنه تذكرها .. مثل هذه الأمر تكرر في المنبر عدة مرات .. |
يا حميدة خليني اختلف معاك لحد كبير ولا أنكر وجود عدد مقدر من الأعضاء. هؤلاء قد يكونون متتبعين دقيقين للمنبر وكل كتاباتهم وهجماتهم تدل انهم كانوا في انتظار الدخول ولم يحظوا بالعضوية لذا فقد حفظوا هذا الكم الهائل من البيانات داخل عقولهم الظاهرة والباطنة ومن ثم وجدوا الفرصة لبثها. أو ان تكون الجهة المهكرة جهة رسمية ولديها داتا بيز وسيستم ولو تلاحظ أن الأسلوب الموجود بي هناك متطابق بين مجموعة من الأعضاء مما يدلل انهم زول واحد. هذا والله ألم
| |
|
|
|
|
|
|
|