تعقيبا علي ما اوردته بعض الصحف المحلية السعودية نقلا عن وزارة العمل السعودية ،اكد سفير السودان لدي المملكة العربية السعودية ان القوانين السودانية تمنع تصدير عمالة نسائية منزلية الي الخارج ،مشيرا الي ان السودان لم يسبق له ان قام بتصدير عمالة نسائية منزلية الي اي دولة في العالم ،وان ذلك امر سيادي ولا يقبل اي تفسيرات اخري . ونفي سعادة السفير تلقي السودان اي طلب رسمي من قبل المسؤولين بالسعودية بهذا الشان،موضحا ان السودان ذاته بحاجة الي مثل هذه الشرائح العمالية ، الامر الذي دفع مسؤولين من السودان للعمل علي استقدام عمالة من الخارج لسد النقص .ونوه السفير الي ان المجتمع السوداني لا يقبل اي فكرة من هذا القبيل ،منطلقا من عاداته وتقاليده المحافظة ،ومذكرا بان بلاده ظلت ولعقود طويلة تسهم في تنمية وبناء واستقرار الدول العربية الشقيقة ،من خلال رفدها بكفاءات عالية في كافة الميادين ، الامر الذي ظل محل تقدير واشادة من قبل المسؤولين بتلك الدول في اعلي مستوياتها. وقال عبد الحافظ ان وزارة العمل في السودان تقف ضد هذا التوجه،بيد انها تؤيد منح تاشيرات وفتح فرص عمل للسودانيات في المصانع والمؤسسات والمنشات بشرط وجود عقود واضحة . واعرب سفير السودان لدي المملكة عن شكره وتقديره لحكومة خادم الحرمين الشريفين لرعايتها للعمالة السودانية في السعودية،وما تجده من عناية واهتمام من قبل القيادة الرشيدة ومن الشعب السعودي الأبي
09-20-2011, 09:32 AM
الصادق صديق سلمان الصادق صديق سلمان
تاريخ التسجيل: 07-11-2006
مجموع المشاركات: 4010
Quote: بالأمر ... بل القنصلية هي المعنية بذلك ... وهي تتعامل مباشرة
مع جهات الإختصاص في السودان ...
وجدت هذا الخبر ربما يمكن ان يفيد
Quote: رفض السودان التفاوض مع شركات عمالية سعودية لإيجاد عاملات منازل للعمل في السعودية، واعتبر المصدر أن الرفض نابع من العادات والتقاليد. وقال متوكل شروني نائب القنصل العام السوداني في جدة لـ «الشرق الأوسط» «ناقشنا فعلياً هذا الأمر لدى السفارة، وهو أمر لا يمكن تنفيذه بالنسبة للنساء بالعمل عاملات منازل»، وأضاف: «السودانيات لا يعملن في السودان خادمات، فكيف يعملن خارج الدولة»، لافتاً إلى أن العادات ترفض هذا المبدأ.
09-20-2011, 10:07 AM
علي الكرار هاشم علي الكرار هاشم
تاريخ التسجيل: 02-10-2007
مجموع المشاركات: 3710
الاخ الكريم عبد الباقي الجيلي حياك الله وحيا الله هذا الاسم ذو الإيحاء الصوفي البديع
طبعا أنا لست معنيا بالرد باسم السفارة السودانية ولكن الثقافة العامة تستدعي القول بأن السفير ممثل دولة بكامل تفاصيلها وهو يتحدث باسم الرئيس بداهة ومن ثم الوزراء حتي وزير العمل وحديث السفير تدخل في شأن أعلي من القنصل ( يعني قطعت جهيرة قول كل خطيب) أما القول بان هناك خادمات فهذا قول صواب اتفق معك مثلما هناك أسر ترتضي المهنة ذاتها داخل السودان وهذا ليس معيبا فالعمل شرف لكن اذا تسربت بعض السودانيات عن رضا وقناعة فهذا ليس بيت القصيد فالحديث عن المهنة بصورة سافرة شديدة الوضوح وعن استقدام بديل لشعوب معروفة مثل تفردنا في رعي الابل والذي قطعا لا تعرفه شعوب أخري ومثل تميز الفلبينيات بالتمريض
لك تحياتي وعبرك لحواء السودان
09-20-2011, 10:08 AM
ibrahim alnimma ibrahim alnimma
تاريخ التسجيل: 03-28-2008
مجموع المشاركات: 5197
Quote: ونفى السفير، في البيان تلقي السودان أي طلب رسمي من قبل المسؤولين في المملكة بهذا الشأن، موضحاً أن بلاده بحاجة إلى مثل هذه الشرائح العمالية الأمر الذي دفع مسؤولين في السودان للعمل على استقدام عمالة من الخارج لسد النقص.
الذي دفع مسؤولين في السودان للعمل على استقدام عمالة من الخارج لسد النقص تعجبت من هذه الدقة ،فعلاً المسؤلين السودانين (وليس الشعب السوداني ) هو من يقوم باستيراد عمالة من الخارج !شوف الخمج دة كيف؟ من جهة اخري رأيك ياعلي الكرار لو في الموضوع ده ارباح ، كان حيكون ده موقفهم؟ ياعمي لو الحكومة ضد ان تعمل السودانيات كعمالة منزلية ، لحاربت الفقر ، وانا اعرف ان هناك من المتضررين من إلغاء مجانية العلاج والتعليم ، مادفع بفلذات اكبادهم من الطالبات الجامعات للعمل كمربيات وكعاملات منازل ليقابلن نفقات الدراسة والاعاشة ..............الحكومة ياعلي تبحث عن مصالحها ولا علاقة لها بالمواطن والمواطنة والعادات السودانية ........... وسلامي
09-20-2011, 10:14 AM
معاذ حسن معاذ حسن
تاريخ التسجيل: 11-14-2006
مجموع المشاركات: 3353
Quote: ،اكد سفير السودان لدي المملكة العربية السعودية ان القوانين السودانية تمنع تصدير عمالة نسائية منزلية الي الخارج ،مشيرا الي ان السودان لم يسبق له ان قام بتصدير عمالة نسائية منزلية الي اي دولة في العالم ،وان ذلك امر سيادي ولا يقبل اي تفسيرات اخري
شكرا علي ريحتنا
09-20-2011, 10:21 AM
فتحي الصديق فتحي الصديق
تاريخ التسجيل: 06-17-2003
مجموع المشاركات: 6072
Quote: بعيدا عن موضوع البوست يا مدثر .. السودانيات يعملن في السودان كخادمات ..... بل وبعضهن جامعيات كمان ...
صاح ...اوافقك ...لكن الشغالات زي ديل انا معجب جدا بطمحوهم فمثلا انا اعرف واحدة خريجة جامعية عملت بمنزل لمدة 3 سنوات ...الان استطاعت عمل شغل خاص بيها ناجح جدا و علاقتها بي ناس البيت الكانت تعمل معهم علاقة اخوية جدا
09-20-2011, 10:50 AM
علي الكرار هاشم علي الكرار هاشم
تاريخ التسجيل: 02-10-2007
مجموع المشاركات: 3710
Quote: الحقباني: مصطلح العمالة المنزلية يقصد به كافة المهن التي تصدر بها تأشيرات للأفراد ولا يقتصر على الخادمات الرياض - نايف آل زاحم
أعرب نائب وزير العمل الدكتور مفرج بن سعد الحقباني عن حرصه على تصحيح سوء الفهم الذي حدث حول ما نشر بشأن فتح باب الاستقدام للعمالة المنزلية من عدد من البلدان منها دولتا السودان واليمن الشقيقتان، مؤكداً أن المقصود بذلك استقدام عدد من المهن التي يعمل بها الرجال والتي تنطوي تحت مصطلح العمالة المنزلية مثل الممرض المنزلي والحارس المنزلي والسائق الخاص والطاهي والمضيف والبستاني ولا يعني بأي حال من الأحول الخادمات من النساء كما فهم البعض حيث أن الأنظمة والقوانين في كل من السودان وكذلك اليمن لا تسمح باستقدام العمالة المنزلية النسائية منها.
وبين معالي الدكتور الحقباني ل «الرياض» أن المصطلح المتداول والشائع للعمالة المنزلية والذي أسيء فهمه يقصد بها كافة المهن التي تصدر بها تأشيرات داخل المنزل أو خارجة لصالح الأفراد أو المنشآت الخاصة بموجب تصريح عمل، مؤكداً أن المقصود بفتح باب الاستقدام للعمالة المنزلية من السودان هو العمالة من الرجال فقط وفي المهن السابق ذكرها والتي يعمل بها عدد من أبناء السودان الشقيق في المملكة منذ سنوات طويلة لما تتطلبه من أمانة وحسن الخلق وتوفر الثقة بهم.
وأشار الدكتور الحقباني أن الوزارة عندما خصت السودان ضمن الدول التي يتم استقدام العمالة المنزلية الرجالية منها فإن ذلك ينبع من المكانة المتميزة لهذه الدولة العربية الشقيقة وتقديراً لما يتمتع به أبناؤها من الأمانة والكفاءة وحسن الخلق والخصال الحميدة والتي يفسر هذا الحرص على استقدامهم للعمل من قبل أشقائهم وإخوانهم في المملكة.
Quote: ولا يعني بأي حال من الأحول الخادمات من النساء كما فهم البعض حيث أن الأنظمة والقوانين في كل من السودان وكذلك اليمن لا تسمح باستقدام العمالة المنزلية النسائية منها.
الاخ البشير يبشروك بكل خير ان شاء الله يبدو أن الموضوع انداحت دائرته وهي تظهر معدن الشعب السوداني
09-20-2011, 11:57 AM
علي الكرار هاشم علي الكرار هاشم
تاريخ التسجيل: 02-10-2007
مجموع المشاركات: 3710
Quote: ونفي سعادة السفير تلقي السودان اي طلب رسمي من قبل المسؤولين بالسعودية بهذا الشان،موضحا ان السودان ذاته بحاجة الي مثل هذه الشرائح العمالية ، الامر الذي دفع مسؤولين من السودان للعمل علي استقدام عمالة من الخارج لسد النقص
بالله, يعني خلاص ما عندنا شباب عاطل و بيبيع نعناع و نبق و قنقليس ده لو لقي ليه فرصه؟ ولا عندنا زول قاعد قدام المصطبه في البيت من غير شغل؟ كدي يا يمه, خلاص بقينا دوله نفطيه و شبعنا الشعب و عندنا نقص عماله لمن بنجيب من بره, يا ناس ارحمونا, انتوا قايلننا هبل ولا مجانين ولا انتوا المجانين؟ يا سعادة السفير ده كلام زول جاهل و جاهل جدا كمان. امشي اخد جوله في الشوارع و شوف العطاله و الشباب العاوز يشتغل و ما لاقي.
شكرا صاحب البوست انك نقلت لينا كلام السفير و كشفت ليناجهله و عنجهيته بدون قصد. قرب يقول والله بياكلوا كيك بدل العيش.
09-20-2011, 12:23 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
Quote: «السودانيات لا يعملن في السودان خادمات، فكيف يعملن خارج الدولة»
بل تعمل السودانيات داخل السودان كخادمات وخارجه أيضاً "وإن كان بصورة غير مقننة" وفي كلٍ شر!
نعم الخدمة في البيوت عمل شريف ولكني أرى فيه إمتهان لكرامة المرأة السودانية أكثر من أي عمل آخر خصوصاً لو كان في الخارج وأعني (السعودية تحديداً) ما يحدث للخادمات في بلدان الخليج اسوأ من أن يتصوره عقل، عنف لفظي ومعنوي وبدني (ضرب وإغتصاب) مما يدفع بالكثيرات للإنتحار هرباً من ذلك الجحيم .. أفظع ما في الدنيا أن أرى وأعرف أن بنت بلدي تعمل في الدعارة سداً للرمق، ولكن الأفظع أن تعمل كخادمة في بيوت الخليجيين، ألم يسأل أحدكم نفسه لم أوقفت أندونيسيا والفلبين إرسال نساؤهم للمملكة العربية السعودية؟؟
لا توجد حوجة في الدنيا تدفع بالسودانيات للعمل تحت ظروف كهذه فالمخدمين الخليجيين (السعوديين تحديداً) من أردأ أنواع البشر (شوف وسمع)
09-20-2011, 01:00 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
Quote: لا توجد حوجة في الدنيا تدفع بالسودانيات للعمل تحت ظروف كهذه
مين اللقال ؟!
ما تخلينا نكتب ساي يا تيسير ... ونفرش متاع وخصوصيات بشر
ده قرار من تريد العمل كخادمة وحدها هل التي تعرف ظرفها ومسبباتها ... نفس الكلام البتقولي فيه ده اتقال على العمل بمجمله بالنسبة للسودانيات في الخليج في وقت ما ....
09-20-2011, 01:22 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
ده كلام يقولوا سفير لي حكومة قايمة بدورها وموفرة اي شي لمواطنيها بتدفع للزول الما لقى شغل عشان يعيش عيشة كريمة
لكن حكومة وصلت سعر كيلو الطماطم لي 18 جنيه وكيلو اللحمة لي العجالي لي 24 جنيه
وما بتدي الفراء والمساكين تعريفة
لا يحق لها ان تمنع اي شخص ان يعمل اي مهنة طالما انها مهنة قانونية وشريفة
لمن لا يعلم يسال عن الفتوحات الفتح 1 ، 2، 3، 4 او القرية سابقا
هناك في دنيا تانية مدينة كاملة مرادفة للخرطوم الحياة فيها مختلفة .. والعيشة ضنك ... واهل تلك المنطقة ... لو كانت لديهم فرصة ان يعملوا
انتو ما عارفين في كم سنقل مزر في البلد دي تربي في اكتر من ولدين ومعاها امها وابوها الكبار وشايلة الشيلة براها لمن اتفنس عودها من الحمل انتو ما عارفين وكت يمرض طفل الحوجة بتصل بيهن وين
الما عارف يقيف في اقرب استوب .. وشوف في كم انثى شايلا ليها شافع مدروخ من السخانة وبتشحد بيه الساعة 2 ظهر اغلب تقاطعات الخرطوم وامدرمان لا تخلو من هولاء النساء
يعي دي بشحدن مزاج منهن ؟!!!!!!!!!!!!! اخير يشحدن ولا يشتغلن في خدمة المنازل ....
الاخ وليد شكرا لمرورك الفعال وغيرتك العالية ووطنيتك التي لا تحتاج ( رفع ضو) افتكر لا أحد يختلف معك في أن المرأة السودانية تعمل وقد خرجت باكرا وهي ( ماسكه) البيت لكن الموضوع حول نقطة معينة لها تبعات ووراءها ما وراءها من تحسبات جعلت الناس تستنكر القرار هذا لب الموضوع
ولك التحية
09-20-2011, 01:40 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
مرحب الكرار انا زاتي عارف انو سبب كلامك ده الغيرة على السودانيات لكن حق الحياة اعلى قيمة من حق الحياة الكريمة
ده امر بفتن في النسوان الما لاقيات شغل وبصرفن على اسر ما انتو
Quote: لكن الموضوع حول نقطة معينة لها تبعات ووراءها ما وراءها من تحسبات جعلت الناس تستنكر القرار هذا لب الموضوع
وانا بتكلم في لب الموضوع مين الادي السفير ومن قبله الحكومة ومن بعده انتم حق ان يحجر على فرصة عمل احد لايساعد لا هو ولا الحكومة ولا انتم في محنته
هسع انا برفع ليك كيس حصل امبارح القريبة دي
سودانية من جبال النوبة مواليد امدرمان وتربيتها ... ام لطفلين الاكبر في الصف الثامن والصغير 3 سنوات .. راجلها ما معروف مكانو ( طفش ) ... حاصلة على الشهادة السودانية بنجاح عيانة ولم تستطيع العلاج .. لدرجة انو زوجتي عملت خطا وتجاوزت القانون .. واستخدمت بطاقة تامينها الاجتماعي زورا عشان تدخل بيها ديك للدكتور .. عملت جميع الوظائف .. اخر شي اشتغلت حنانة .. وبرضو غلبها ولدها الكبير على صغر سنة جاتو قرحة تنقر السبب شنو ؟؟ الدكتور قال الجوع بتديه خمسمة جنية للمدرسة الصباح وبترجع المغرب والولد الوكت ده كله مستنيها عشان تجيب عيش نسيت اقول ليك انو امها العمرها فوق الثمانين عايشة معاها تسكن القرية وبالمناسبة عشان تمرق من القرية تصل اطراف امدرمان محطة صابرين عاوزه ليها الف جنيه وعشان تمرق من صابرين لوسط امدرمان عاوزه ليها 500 جنيه يعني ماشي جاي 3 الف جنيه مواصلات بس
وزي ديل كتار
حلو مشاكلهن اولا وشوف ليهن مصادر رزق حسب ما يعجبكم بعد داك امنهو منهن شغل البيوت بتبعاتو
لكن تمنعوه ساااااااااااكت عشان الصورة الاجتماعية للسودان بدون ما تحلو مشكتهن
ما عندكم حق
09-20-2011, 01:28 PM
maman maman
تاريخ التسجيل: 11-21-2002
مجموع المشاركات: 1041
هذا الموضوع نقلته من كتاب ( في الوطن العربي.. رحلات حمد الجاسر) للمرحوم العلامة الشيخ حمد الجاسر الذي زار السودان عام 1978م ، وقابل عمنا المرحوم يونس الدسوقي صاحب مكتبة أفريقيا بأم درمان .. أنظر كيف رد الدسوقي على الجاسر عندما طلب منه (خادمة) لتعمل لديه!
يقول الكاتب :
أجهدني المشي فخرجت من المتحف (يقصد متحف الخليفة بأم درمان)، ورجعت إلى السوق، ومررت بمكتبة دخلتها فإذا ما فيها من الكتب قليل، و لا أحد حولها ، فأظهرت لرجل كان واقفا ببابها استغرابي من خلو كثير من رفوفها من الكتب، مع ضخامة الاسم المكتوب فوق بابها (مكتبة أفريقيا) فقال: وهل تركت بيروت لنا شيئا من الكتب؟! فاستزدته إيضاحا فقال: نحن نطبع كتبنا في بيروت، ونحضر ما نحتاج إليه من المطبوعات الأخرى من تلك البلاد، فأصابنا من نكبة بيروت نصيبنا!. ثم رأيت من بين الكتب المعروضة كتاب (دوحة الوزراء) في تاريخ بغداد، فأردت أن أفهم شيئا عن ثقافة الرجل فقلت: وما للسودان ولبغداد؟ فقال بسرعة وانفعال : كيف؟! بغداد عاصمة الإسلام مال السودان ومالها؟! نحن عرب مسلمون، ثم استرسل في حديثه، غير أنني قطعته عليه بقولي: اسمح لي أنا لم أقرأ شيئا عن تاريخ السودان، فهل لديك ما يفيدني في هذا الموضوع؟! فقال : اخبرني باسمك وأين تنزل.أبعث لك كتابا يفيدك هدية مني، فطلبت منه أن يكتب لي اسم الكتاب الذي ينصحني بقراءاته فكتب: (السودان عبر القرون) للدكتور مكي شبيكة ، وكتاب (مشيخة العبدلاب) فطلبت أن يضيف إلى هذا اسمه فكتب: يونس محمد الحسن- مكتبة أفريقيا العالمية- أم درمان ، ولما عرف أنني من مدينة الرياض قال: أختي تقيم الآن هناك مع زوجها. ثم أدركه تجهم وغضب شديد ، لما قلت: ليتني أجد سيدة سودانية تذهب إلى الرياض للإشراف على تربية حفيدتي من ابنتي الموظفة في جامعة الرياض.
فقال بصرامة وشدة: نحن عرب لا نجيز لنسائنا العمل عند غير محارمهن، كالحال في .... والحبشة، وأنصحك بعدم إظهار هذا في هذه البلاد، فانسللت خارجا من عنده بغاية الخجل.
09-20-2011, 03:05 PM
تيسير عووضة تيسير عووضة
تاريخ التسجيل: 12-20-2005
مجموع المشاركات: 7136
Quote: سلامة وصحة السودانيات النفسية والجسدية فوق كل إعتبار ولا يجب أن نعرضهن للمخاطر تحت مسوغ الجوع أوالحوجة ..
يا تيسير قولي الكلام ده للستة نسوان القاعدات قدام تقاطع الشنقيطي مع الصناعات وشايلات اربعة شفع عمر عام واحد من الساعة 11 صباحا وحتى المغرب
قولي ليهن باعتبار قد يتعرضن جوعي واستحملوا الجوع وشافعكم ده لفو بيه في الهجير مستنيات الاستوب عشان احتمال بعدين يغتصبوكن
قولي الكلام ده للبت الرفعت ليك قصتها فوق دي ... وهي عندها نفسيات تماما وبقت مقتنعا انو الله خلقها عشان يعزبها وقالت بعضمت لسانها لو ما شافعها الصغير كان انتحرت وشربت صبغة
مع الملاحظة من ناحية جسدية منهية تماما
قولي ليها تحملي اذاك النفس الاني والجسدي الاني
لاعتبار ما سيكون بعدين و قد يتعرضن
يعني ناس معرضين للمخاطر انيا وبصورة مهددة للحياة يمنعوهم من فرصة تجاوز المخاطر الانية بحجة مخاطر بعدين
يكفي المرأة السودانية ما عانته بسبب الحروب والنزوح كمان نجي نفتح لينا باب ما حا يتقفل إلا على جثث المزيد من بنات السودان وفوق كم؟ فوق 400 ولا 500 ريال في الشهر يمكن يدوها ليها والأرجح يحرموها ليها بالشهور؟
الما عارف أوضاع الخادمات في الخليج وشاف بي عينو وسمع عن قرب ما يتكلم ساكت
09-20-2011, 03:21 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
Quote: الما عارف أوضاع الخادمات في الخليج وشاف بي عينو وسمع عن قرب ما يتكلم ساكت
بل الما عارف اوضاع شريحة كبيرة من النساء السودانيات الانية وما عندو حل لي مشكلتن ما ينضم ساكت
لو ما كريمة وفيها انتهاك للخصوصية كان لفيت ليك تقاطعات امدرمان الفيها استوبات تقاطع تقاطع وصورت ليك المتسولات فيها ومعاهن اطفالهم كان مشيت ليك الفتح واحد واتنين وتلاته واربعة ووريتك الناس عايشة كيفن
09-20-2011, 03:25 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
بأمانة كدا يا وليد أحسن الزول يموت من الجوع ولا يموت من التعذيب أو يموت منتحر من هول البيحصل ليهو؟
وبعدين إنت قايل نسوان الأستوبات ديلاك لمن تجيهم فرصة عمل كخادمات في السعودية ياهن خلاص الشبعوا هن وعيالهم؟ والله دا إمعان في المثالية وحسن الظن ما أكتر ..
هل تصدق إنو غالبية الخادمات بيمشوا هناك بيتموا سنة وسنتين وما بيدوهم قرش أحمر طيلة فترة الشغل يعني شغالات بي بطونهن وزي نظام السخرة وبي وجبة واااحدة بس في اليوم ولمن الواحدة يفيض بيها بتهرب وتلجأ لسفارة بلدها حق التذكرة ما بيكون عندها وبترجع بلدها بي الفستان اللابساهو دا كان رجعت حية طبعاً
بحاول أتخيل الحيحصل لنساء الأستوبات وعيالهن أحسن الواحدة تموت من الجوع هي وولدها بدل تجدعو للشارع بالسنين دونما مقابل وبعديها تجي تلقاهو مات مسمم بالسبيرتو دا طبعاً في حال إنها ما إنتحرت وجات السودان في صندوق ..
09-20-2011, 03:44 PM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
Quote: بأمانة كدا يا وليد أحسن الزول يموت من الجوع ولا يموت من التعذيب أو يموت منتحر من هول البيحصل ليهو؟ وبعدين إنت قايل الستة نسوان ديلاك لمن تجيهم فرصة عمل كخادمات في السودية ياهن خلا الشبعوا هن وعيالهم؟
ده رائيك الشخصي ي تيسير خصوصا لو كان الكلام عن التعذيب مقدم بـ قد يعني قد يحدث وقد لا
بالنسبة للنسوان الامر متروك لخيارهم الشخصي هن الادي بحالهن في الحالتين واكيد لو كان عمل كخادمات غير مجدي سيتركنه
لكن ده قرارهن ما قرارك ولا قرار السفير خصوصا ما في زول حل ليهن مشكلتهم الانية
Quote: والله دا إنعان في المثالية وحسن الظن ما أكت
في ظل واقع اني بشع وكالح ببقى اي حل خرافي ومحاولة امل حتى لو كانت نسبة تحققه واحد في المليون مشروع ومفهوم
Quote: يا وليد هل تصدق إنو في خادمات بيمشوا هناك بيتموا سنة وسنتين وما بيدوهم قرش أحمر طيلة فترة الشغل يعني شغالات بي بطونهن وزي نظام السخرة وبي وجبة واااحدة في بس في اليوم ..
دي مشكلة تانية حلها بيدكم انتو مؤسسات المجتمع المدني مع السفير الداقي صدرو ده
اعملوا من الكيانات ما يضمن سلامتهم في اماكنكم
او لو خلاص قفلتو ليهم دروبهم
حلو ليهم مشكلتهم الهنا دي لكن ما تحلوها وتمنعوهن باعتبار ما سيكون
ده غير حكم قرقوش ما عندي ليه مسمى
Quote: بحاول أتخيل الحيحصل لنساء الأستوبات وعيالهن أحسن الواحدة تموت من الجوع هي وولدها بدل تجدعو للشارع بالسنين دونما مقابل وبعديها تجي تلقاهو مات مسمم بالسبيرتو دا طبعاً في حال إنها ما إنتحرت وجات السودان في صندوق ..
انت بتحاولي تتخيلي يا تيسير وانا شايف قدام عيني
يا تيسير شافع عمره سنة واحد ... بقيف في تقاطع شايلاه امو من الساعة 11 لحدي المغرب من الجوع والتعب وضربة الشمس نايم الوكت كله
09-20-2011, 03:55 PM
تيسير عووضة تيسير عووضة
تاريخ التسجيل: 12-20-2005
مجموع المشاركات: 7136
Quote: لكن ده قرارهن ما قرارك ولا قرار السفير خصوصا ما في زول حل ليهن مشكلتهم الانية
وليد في حالة كونو خاتيني أنا والسفير في مركب واحدة التقول أنا وزيرة الرعاية الإجتماعية لأ ويطالبني بالحلول كمان! أولاً يا أخي ما عندك حق تطالبني بإيجاد حلول لمشاكل مجتمعية غلبت الرجال البيلدوني .. أنا حلولي الفردية - كمواطنة - القاعدة أقدمها للنساء زي الذكرتهم ديل ما ملزمة إني أجي أقدل ليك بيها هنا ..
ــــــــــ بالمناسبة كلامي الفوق دا كلو عبارة عن رأيي ووجهة نظري الشخصية في هذا الموضوع وليس قرار ولست أنا الجهة التي تسن القرارات ..
الشيخ الفاضل العلامة حمد الجاسر رحمة الله عليه يعرف اهل السودان جيدا ويجلهم ويقدرهم ولقد قابلته في منزله بحياته وجدت منه الكرم والاحترام وذكر لي من عاشره طويلا انه يحب اهل العمائم كثيرا فله الرحمة
هذه البلاد الطاهرة نحبها ونجلها لاجل هواء يمر بناحية الحرمين الشريفين ولكن مهيرة لن تعمل خادمة فيها الا لربها عز وجل .
09-20-2011, 04:08 PM
عرفة محمد سعيد عرفة محمد سعيد
تاريخ التسجيل: 11-08-2009
مجموع المشاركات: 443
شريحة كبيرة من الخريجات والمؤهلات علمياً والغير مؤهلات عاطلات عن العمل لسنوات وسنوات وليس لديهن ادنى مصدر دخل ومعظمهن طافت عليهن فكرة الانتحار بالصبغة.. الغريبة انه كثير من البيوت السودانية فيها شغالة حبشية او آسيوية وبراتب يتراوح من 250 ل 500 الف مبلغ قريب من 400 ريال او قد يزيد ... طيب بدل الهجرة والبهدلة مش اولى للسودانية لمن ارادت ان تكف عن نفسها شر الشحاتة والبهدله العمل في السودان مع اسرة سودانية !!
هل من صعب وجود مكاتب او شركات اقليمية تتخصص في توفير عمالة منزلية سودانية خالصة داخل السودان تحمي حقوق الخادم والمستخدم وتضمن توفير رقابة ومتابعة على العمالة المنزلية !
الخادمة التي تعمل في السعودية وحسب ما رأيت من بعض النماذج تلاقي ما تلاقي من ويلات تأبى علينا كرامتنا ان نراه في اخواتنا ونسكت ....
09-20-2011, 04:50 PM
نوفل عبد الرحيم حسن نوفل عبد الرحيم حسن
تاريخ التسجيل: 02-27-2009
مجموع المشاركات: 2361
Quote: هذا الموضوع نقلته من كتاب ( في الوطن العربي.. رحلات حمد الجاسر) للمرحوم العلامة الشيخ حمد الجاسر الذي زار السودان عام 1978م ، وقابل عمنا المرحوم يونس الدسوقي صاحب مكتبة أفريقيا بأم درمان .. أنظر كيف رد الدسوقي على الجاسر عندما طلب منه (خادمة) لتعمل لديه!
الاخ الاستاذ / مامان لك التحية والعرفان علي المرور الرائع المضمخ برائحة الكتب والعلماء دائما ما أجدني أقارن بين محبة السعوديين لرموزهم أمثال حمد الجاسر / بن باز / طلال مداح / وهكذا وبين التجاهل الكبير الذي نقابل به رموزنا ومن هذا المنطلق فان الانتصار لحواء السودان والدفاع الذي يسجله كل من مروا علي هذا البوست هو نوع من الاحتفاء بعازة وحواء
شكرا جزيلا
09-21-2011, 07:44 AM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
الناس دي ما عارفة الحاصل هنا شنو يا سهام ..!!!! ما عارفة انو في اسرة كامل يومها بتقضية بخمسمية جنية ( الحديدة ديك )تشتري عيشتين وتشرب من سبيل الجيران والكلام ده متكرر اكتر من يوم في الشهر
الناس تقول ليك همنا الاحتمال بتاع انهم قد يتعرضوا لاذى نفسي وجسدي والبنتكلم عنهم ديل حاليا متعرضين للاذي النفسي والجسدي
الغريبة المعترضين على ذهاب السودانيات للعمل في الخليج خادمات في المنازل هم انفسهم اما في الخليج او ذهبوا اليه في وقت من الاوقات
!!!!!!!!!!!! ؟؟؟؟؟؟؟؟؟؟؟؟؟؟؟؟
طيب دولة بالمواصفات دي المقعدكم فيها شنو ؟ والموديكم ليها شنو ؟
حتى في الخليج يوجد اجناس تعمل في خدمة المنازل ومافي زول بقدر يقول ليهم بغم مواطن ولا غيروا الصوماليات!!!!
حد فيكم سمع ليه بي صومالية اتحرش بيها زول ؟؟؟ وامورو سلكت ؟! ولا يقدر !!! والله تاكلو حي
ما اظن السودانيات اقل منهن
في ظني الشخصي الموضوع تأفف ما اكتر فعلا مهنة الخادمة مهنة رزيــلة .. لكنها حلال وشغل ضراع واضطرار
المقترح بتاع اخراج الاحباش وتشغيل السودانيات مكانهم مقترح كويس جدا لكن عاوز شغل كتير
نعلم تماما ان السودانيين والسودانيات يعملون في مهن خارج السودان لا يرضون العمل فيها داخله ده مشكلة اجتماعية عاوزه تغيير مفاهيم في الاول
حتى لو توفرت فرص العمل في الداخل ده
مافي زول عنده حق انو يمنع زول من السفر والعمل الشريف وعوه بالمخاطر وخلوه هو يقرر لكن ما تقرروا عنو خصوصا لو ما كنتو حالين ليه مشاكلو الانية
09-21-2011, 09:35 AM
عبد الباقي الجيلي عبد الباقي الجيلي
تاريخ التسجيل: 06-23-2004
مجموع المشاركات: 1613
على الكرار سلام لدى قناعة راسحة تقول ان الكيزان يتاطابقون مطابقة النعل للنعل افعال واقوال ،حالهم حال حكام البوربون لم يتعلموا شى ولم ينسوا شى. هسه بعد ايراد خبر نفى السفير للامر وفرح البعض هنا وشكروك على ايصال قرار بعض الجهات المسؤولة تقوم تشترها بكلامك الزى كلام نافع ده؟ شن جاب طلب الرزق بالعمل الشريف للاكل بالاثداء؟ علما بان الحكومة المتسلطه فى الخرطوم تدفع عزة دفعا غير رحيم نحو ان تقتات بالاثداء بهذا التسونامى المحموم فى غلاء اسعار الضروريات وارتفاع تكلفة المعيشة. جراء الفساد تارة وتارات اخرى بالسياسات الرعناء والجوع كافر ياعلى... وقديما قال من سمئت عليه كرم الله وجهه انه سوف يعلو بسيفه رقبة الفقر لو كان رجلا متحملا وزره... اللهم ربنا لاتؤاخذنا بمافعل السفهاء منا يارب العالمين،،،
09-21-2011, 05:05 PM
خالد عبد الله محمود خالد عبد الله محمود
تاريخ التسجيل: 11-28-2004
مجموع المشاركات: 5393
شخص لم يعش في الخليج لن يفهم أبداً معني أن تعمل المرأة خادمة في بيت خليجي .. الناس مهما تحكي ما حتقدر توصل المأساة العايشة فيها الشريحة دي ... و الحكاية لو فيها فايدة أو عائد إقتصادي لما أوقفت أندونسيا و الفلبين أستقدام الخادمات ..
أن تموت المرأة في السودان أكرم ( لها) من أن تعيش خادمة في منزل خليجي
كمقيم في الخليج أفتكر إنو من مسئوليتي أوصل المعلومة دي للناس الفي السودان .. نفعت معاهم أوكي .. ما نفعت كمان عملت العلي
المقصودة بالمراة السودانية التي لا تعمل خادمة في البيوت معروفة من اي الفئات والجهات والاصول.. وكان دايرين تصلوا للنتيجة, اطرحوا الهامش السوداني ونساؤها. اما الباقيات فهن السودانيات المقصودات. مع المعذرة فسقوط الجنسية عن الاخريات لزوم السيادة الوطنية لدولة الخلافة العروبسلاموية.
09-21-2011, 11:12 PM
طه جعفر طه جعفر
تاريخ التسجيل: 09-14-2009
مجموع المشاركات: 7360
المقصودة بالمراة السودانية التي لا تعمل خادمة في البيوت معروفة من اي الفئات والجهات والاصول.. وكان دايرين تصلوا للنتيجة, اطرحوا الهامش السوداني ونساؤها. اما الباقيات فهن السودانيات المقصودات. مع المعذرة فسقوط الجنسية عن الاخريات لزوم السيادة الوطنية لدولة الخلافة العروبسلاموية.
شكرا جزيلا استاذ Albino Akoon Ibrahim Akoon
اها جاكم الكلام الجد، اذا كنا نقبل ان تعمل السودانيات كخدم منازل في السودان فما المانع من عملهن في الخليج او السما الاحمر المغتربون يعتقدون ان هذه المهنة ( خادمة منزل) حاطة للقدر و تجرح كبريائهم لذلك لا يريدون من تشاركهن نفس الجواز و المهجر ان تعمل في مهنة تحرجهم، هذا هو تفكيركم و لا يستطيع وهمكم ان يحل محل الواقع فالوهم وهم و الحقيقة حقيقة. الهند في طريقها لان تكون دولة عظمي و سيتم ذلك و لم نسمع في يوم من الايام ان الهنود من الافندية الكبار مترفعين علي اخواتهن اللائي يعملن خدم منازل في الخليج. انا الخليج عشت فيهو و هنالك اي شخص في أي مهنة يتعرض بشكل يومي لامتهان الكرامة و الحط من القدر علي الاقل بذلة انك مقيم في كفالة شخص . الفرق هو في ان سفارات الدول المحترمة تنشط للمطالبة بحقوق اي مواطنة ومواطن من رعاياها حال ان الخليجين تعاملوا معها/ه بصورة غير لائقة و غير قانونية. بعيد كلام استاذنا البينو اكون كلام زي الليل و في الصميم. بلاش نفاق يا جماعة
طه جعفر
09-22-2011, 00:16 AM
منتصر عبد الباسط منتصر عبد الباسط
تاريخ التسجيل: 06-24-2011
مجموع المشاركات: 4165
ليس احتقاراً للمهنة .....فهي مهنة شريفة.... لكن في دول الخليج والسعودية ..الامر سيكون له بعد آخر ستكون اكبر إهانة لحواء السودان ولكل سوداني لو سمحت السلطات بذلك
Quote: ليس احتقاراً للمهنة .....فهي مهنة شريفة.... لكن في دول الخليج والسعودية ..الامر سيكون له بعد آخر ستكون اكبر إهانة لحواء السودان ولكل سوداني لو سمحت السلطات بذلك
خدمة البيوت في السودان كانت محصورة في اثنيات محددة ومجموعات محددة، ونحن لمن كنا صغار اتربينا على احتقار الخدامين والخدامات، ولمن كبرنا ووعينا بقينا ندمانين لي يوم الليلة.
المسألة في المجتمع مبنية على (العنصرية) والاستعلاء، معروف في السودان دا في شغل بتاع (اولاد وبنات ناس) وفي شغل متروك للحثالة والفئات المحتقرة وبعض الاثنيات التى حكم عليها التهميش من الحكومة الوطنية بعدم التعليم ووجود فرص للتعليم.
حان الوقت للخروج من النفخة الكذابة والتذكير بأن قيمة العمل هي قيمة في حد ذاتها.
وليد الشفت
كلامك صاح وازيد عليهو للاخت تيسيير إنو قصة المعاملة السيئة للخادمات في السعودية حلها بسيط، يكون التعاقد واضح، وتكون الخادمة على اتصال بشخص مسؤول عنها (محرمها مثلاً بالنسبة للسعودية) وهذا الشرط يكون واضح ولو حصل اي شئ ممكن مقاضاة المخدم وفضحه على الانترنيت واعتقد ان القوانين الدولية اصبحت اكثر صرامة في هذا الموضوع (الهيومان ترافكنج).
البينو:
نعم حان الوقت لفتح هذه الملفات والتى ستقلل من الإستعلاء والعنصرية والتهميش الذي تمت ممارسته في السودان لعقود بين أغلب المجموعات السودانية، وحان الوقت لتأسيس عقد اجتماعي جديد يقوم على قيم المساواة والعدالة واقتسام السلطة والثروة في السودانين.
لو ربنا طلق سنعود
09-22-2011, 06:58 AM
علي الكرار هاشم علي الكرار هاشم
تاريخ التسجيل: 02-10-2007
مجموع المشاركات: 3710
Quote: لدى قناعة راسحة تقول ان الكيزان يتاطابقون مطابقة النعل للنعل
موضوع عمل المرأة والخادمات شغل الناس بصورة غير مسبوقة وقد تعامل معه الناس بحجمه وأثره لكن لاختلاف الفهم والذوق وحاجة في نفس يعقوب يأبي الأخ ( ود الموج ) إلا أن يفرغ الموضوع من محتواه حتي المثال الذي أجهد نفسه لايراده لم يجد فيه غير النعل للنعل وهذا من ذوقه العالي وقدرته في الاقتباس ويعلم الله ان هناك فصيلة من البشر لا تريد للمرأة إلا أن تكون سلعة في سوق النخاسة العالمي تعرض مفاتنها...وتغري السابلة..وتصبح مثلها مثل معروضات الشارع الرخيصة لكن القول الفصل الذي جعلناهو عنوانا لهذا الموضوع فقد جاء من كل المتابعين حرصا وتعليقا ونقاشا ثرا يحمل هوية واحدة وسمة واحدة وقومية واحدة هي السودان
09-22-2011, 07:18 AM
مازن فيصل هلال مازن فيصل هلال
تاريخ التسجيل: 10-15-2009
مجموع المشاركات: 1003
Quote: علما بان الحكومة المتسلطه فى الخرطوم تدفع عزة دفعا غير رحيم نحو ان تقتات بالاثداء بهذا التسونامى المحموم فى غلاء اسعار الضروريات وارتفاع تكلفة المعيشة. جراء الفساد تارة وتارات اخرى بالسياسات الرعناء والجوع كافر ياعلى... وقديما قال من سمئت عليه كرم الله وجهه انه سوف يعلو بسيفه رقبة الفقر لو كان رجلا متحملا وزره... اللهم ربنا لاتؤاخذنا بمافعل السفهاء منا يارب العالمين،،،
المشكلة العايشين برة -و خاصة بالخليج- اغلبهم ناس وهم , سهوا او عمدا لا يفكرون بمثل هذا المنطق اعلاه- و انا اولهم الاهانة لحواء السودانية مرفوضة اطلاقا- ولكن يجب ان نبداء بمحاربتها من داخل الدار
------ manubia
09-22-2011, 07:26 AM
تيسير عووضة تيسير عووضة
تاريخ التسجيل: 12-20-2005
مجموع المشاركات: 7136
Quote: خدمة البيوت في السودان كانت محصورة في اثنيات محددة ومجموعات محددة، ونحن لمن كنا صغار اتربينا على احتقار الخدامين والخدامات، ولمن كبرنا ووعينا بقينا ندمانين لي يوم الليلة.
ممكن تتكلم عن نفسك يا أخ الصادق لأنو في غيرك كتيرين ما إنتظروا لغاية ما يكبروا ويوعوا حتى يندموا على إحتقار الخدامين والخدامات أذكر وأنا في العاشرة أو أقل وبجهل الطفولة تطاولت وسَخرت من لون امرأة سودانية كريمة كانت تقوم بخدمتنا في المنزل وتقيم معنا بشكل دائم، فما كان من والدتي إلا وأن قامت بضربي "بكمشة" الطعام مما تسبب حينها ودون قصد منها في كسر يدي ولفها في الجبس (لن أنسى ذلك ما حييت) وقالت فيما قالت أن هذه المرأة في مقامي أنا أمك وإحترامها من إحترامي ويجب أن تعتذري لها وإن سامحتك هي سأسامحك أنا، ومن يومها وهي في مقام أمي وخالاتي ومعزتها وإحترامها من إحترامهن .. هذا الدرس المبكر والقاسي علمني منذ ذلك الحين وحتى أموت أن الناس كلهم سواء وليس اللون أو العرق أو حتى الحوجة مدعاة للتحقير والسخرية ..
Quote: المسألة في المجتمع مبنية على (العنصرية) والاستعلاء، معروف في السودان دا في شغل بتاع (اولاد وبنات ناس) وفي شغل متروك للحثالة والفئات المحتقرة وبعض الاثنيات التى حكم عليها التهميش من الحكومة الوطنية بعدم التعليم ووجود فرص للتعليم. حان الوقت للخروج من النفخة الكذابة والتذكير بأن قيمة العمل هي قيمة في حد ذاتها.
هذا الكلام غير دقيق! تاريخياً (وأتكلم هنا عن النساء لأنهن المعنيات في موضوعنا هذا) أول من دخلت مجال التعليم والتمريض والشرطة في السودان كانت المرأة المنحدرة من الهامش في الوقت الذي كان فيه تعليم البنات في السودان عيب وإرسال البنات للمدراس ما حق بنات الناس درسن هن وتعلمن وصارت أشهر الناظرات ورائدات التعليم والتمريض منهن وهذا الكلام ظللت أردده وأصحح به معلومات كل من أراد تصوير نساء الهامش على أنهن جاهلات غير متعلمات وصاحبات مهن هامشية .. الحاجة التانية والمهمة جداً إمرأة الهامش في السودان امرأة منتجة طرقت كل الأبواب التي يمكن أن يأتي منها الرزق الشريف ولا أريد مقارنتها بأخريات أقل إنتاجاً رغم أنهن ينتمين لنفس البلد "السودان" فأكون قد مارست العنصرية من حيث لا أريد ولا أتقصّد ..
مشغولة حالياً ولكن سأعود لو ربنا سهل للرد على بعض النقاط التي أثارها الأخوان ألبينو وطه بالأعلى ..
تحياتي ..
09-22-2011, 10:02 AM
داليا حافظ داليا حافظ
تاريخ التسجيل: 06-06-2008
مجموع المشاركات: 5055
النظرة والمعاملة الدونية لفئة العمال بشكل عام و للعمالة المنزلية بشكل خاص ،من الجهات المحتاجة للعمالة دي زي عيونا قصة محيرة ،القصة دي عايزة شغل وجهود كبيرة والمنظمات الإنسانية قايمة وقاعدة في المسالة دي ، والقصة في تحسن أكيد طالما ان تحت مجهر الضوء وطالما انو بشتكوا وبتكلموا وبكسروا حاجز الخوف .
عن نفسي ما بقدر املي أبدا على شخص أنو ما يشتغل أي شغلة في الدنيا مهما كانت حتى لو ما شريفة ..لسبب واحد أني مافي مكانو ..، ولأني ما بقدر أخليهو يشوف شوفي ، البقدر عليهو أنو أوعيهو بالحاصل والقرار ليهو ..
في الخليج ـ العمالة المنزلية ـ وضعها ما وردي أبدا،..لكن ممكن يكون في عيون ناس الجنة بعينهاحسب فكرتهم / تعليمهم/ واقعهم ..،أبدا ما فارقة معاي أنو يقولوا السودانية ممكن تشتغل خادمة ـ ده شغل ـ والقناعة دي ذاتها ومن باب الصدق وصلت ليهابعد جهد كبير مع نفسي، والبقدر عليهو أني اساهم في أنو السودانية تعرف البيها والعليها والممكن تشوفو وتلاقيهو..، أصرت وعايزة تجرب مالو تجرب حقها..، ممكن حظها يكون كويس ، لو بقى حظها ما كويس أقيف معاها ألف أحمر قدر قدرتي لمن تاخد حقها..
الحاجة المقلقة من وجهة نظري والمحتاجة تدقيق أن تكون المرأة مستغلة من جهة التخديم(مكتب العمالة) ومصورين ليها الواقع كأحلى مايكون، أو ما موضحين ليها كيف تتصرف إذا حصل ليها شيء لاقدر الله ، لأنو ممكن تكون ما واعية كفاية، فتبقى كالمستجير من الرمضاء بالنار ..
09-22-2011, 11:27 AM
Rihab Khalifa Rihab Khalifa
تاريخ التسجيل: 07-07-2006
مجموع المشاركات: 3738
Quote: مافي زول عنده حق انو يمنع زول من السفر والعمل الشريف وعوه بالمخاطر وخلوه هو يقرر لكن ما تقرروا عنو Waleed
ده الكلام المظبوط - يا وليد انت جندري اصيل، لوول "فذكر إنما أنت مذكر لست عليهم بمسيطر" زمن فرض الوصاية علي النساء من ابواب حماية الشرف و معاملتهن كناقصات عن الرجال في قدرتهن علي ادارة امورهن و تقيمهن لما ينفع و ما لا ينفع، انتهي، و التاريخ وضح خطورة فتح باب قصة حماية المراة ده من زمن. لو الكلام اصلا عن حماية الانسان البيعمل في السعودية او الخليج، ليه الحكومة ما منعت مثلا الرعاة السودانيين الرجال من العمل في السعودية او حتي رفضت توصية السعودية الحالية بايفاد السودانيين الرجال و لحدي امبارح القريبة دي اعدمو السعوديين سوداني تحت مسمي الشعوذه؟
و من نفس الابواب دي تحارب الحكومة ستات الشاي و كل من يحاول كسب العيش بطريقة حلال، لانهم بيعرفو احسن من الناس و احوالهم
المراة شاركت في عهد النبي عليه افضل الصلاة و السلام في الهجرة و كذلك في الحروب رغم مشقتهم و خطورتهم مش كان من باب اولي ان يحرمهن رسول الانسانية من المشاركة في الحرب، باسم الخوف عليهن؟ و هو يعلم خطر المشاركة من سبي و قتل و اغتصاب؟
الحكومة قد تستخدم من المبررات ما يلزمها لفعل ما تريد، و تبريراتها عن حماية المراة غير مقنعة في ظل الظلم الحاصل للسودانيين و في نفس البلد السعودية و من نفس شروط الخدمة في السعودية و هي لا توفر حماية برفضها للنساء العمل هناك، النساء ديل طفشن زماااااااااان تحت مسميات اخري. فلتحاول الحكومة تحسين شروط العمل للنساء و الرجال علي حد سواء قدر ما تقدر، و توعي كل من يهاجر ليعمل بالخارج بالمخاطر و لتترك لهم القرار
لو لقيت فرقة ساحكي قصص تخجل عن طرق هجرة غير شرعية تستغل فيها المراة شر استغلال
داليا معاك في قناعتك دي مية المية، التوعية و ترك الحرية للفرد ليختار ما يصلح له
09-22-2011, 01:24 PM
تيسير عووضة تيسير عووضة
تاريخ التسجيل: 12-20-2005
مجموع المشاركات: 7136
في فرق شاسع بين العمل الحر وبين أن تعمل تحت كفالة شخص آخر
ستات الشاي، بائعات الوجبات، وحتى البارتايمرز البيجوا يشتغلوا ولا يغسلوا ويكووا ويمشوا ديل شغلهم في يدهم وملك أنفسهم اللحظة الما يعجبهم فيها وضع طوالي بيفتشوا لأفضل منو، ما زي خدامة مرؤوسة لا تملك حتى إنها تحتفظ بجواز سفرها في يدها ..
مسألة الربط غير الواعي بين الإغتصاب وفقدان الشرف دي غريبة شوية الخوف من الإغتصاب يأتي في المقام الأول لصالح الضحية النفسي والجسدي ولا علاقة له بمفاهيم العفة و"حماية الشرف" وما إلى ذلك والإغتصاب ما إلا يكون من الجهة التي بها ما يمثل الشرف والعفة عند الكثيرين !!
نفس الحكومة التي لم تمنع عمل الرجال الرعاة لم تمنع بالمقابل عمل النساء الطبيبات والمدرسات والمهندسات والحنانات في السعودية لعلمها المسبق بشكل المعاملة الكريمة التي ستلقاها هذه الفئة مقارنة بفئات أخرى، إذن الموضوع من حيث المبدأ ليس موضوع جندر والرجال يسافروا والنسوان يقعدوا بقدر ما هو متعلق بالفئة العاملة وشكل المعاملة الدارج، لو كنا سمعنا بحالات إغتصاب وإنتهاك لآدمية وحياة الرجال الرعاة بنفس الفظاعة التي تحدث مع الآسيويات لطالبنا بحمايتهم أيضاً (دا طبعاً لو غضضنا البصر عن مسألة فيزا الراعي البيسافروا بيها خريجين جامعات وبيمشوا يشتغلوا شغلانيات ما ليها أي علاقة بالرعي ولا الحيوانات من أصلو مما يعني إنها مكسب في رأي كثيرين)
بغض النظر عن رأينا في قوانين تلك الدولة فيما يخص الإعدام والحدود تم إعدام الساحر السوداني لأنه خرج على الدستور السعودي المستمد من الشرع الإسلامي ناس قانونهم كدا يعاقبوا الخارج على القانون بالطريقة البشوفوها هم مناسبة، لكن من غير المعقول أساوي بين خادمات ذهبن لأكل العيش الحلال دونما جريمة إقترفنها أو خروج على قانون البلاد وبين من يعتبر لديهم دستورياً مجرم يستحق الإعدام وأجي أقول هم أصلاً كعبين مع الرجال والنساء !!
09-22-2011, 01:54 PM
مصطفى احمد الضو مصطفى احمد الضو
تاريخ التسجيل: 08-09-2009
مجموع المشاركات: 1632
أعتقد أن الفصل لا زال نصفه الآخر غائب.. فالسفير قال رأيه ولم يتخذ قراراً حتي يفصل.. طرح مبررات للرفض وتحليل للواقع في السودان.. وهذا محمدة لسفيرنا.. وهو ليس بغريب على سفير محترف ومتمرس. أرى ان النصف الآخر يتمثل في سحب الجهة التي التي قالت بذلك وهي (السعودية).. لحديثها.. خاصة بعد قول السفير.. لأنهم لم يطرحوا ذلك على الملأ ما لم تكن هناك مؤشرات لتحقيقه..
إذا سلمنا جدلاً أن هناك رفض واسع من حيث المبدا فلماذا لا يكون هناك وأد للفكرة من المنبع قبل أن تصل الخرطوم ويحدث ما يحدث تحت الطاولة .. من خلال جهود الدبلوماسية الشعبية وما أكثرها في المملكة بالالتقاء بالغرف التجارية ولجان الاستقدام فيها.. للنقاش باستفاضة حول مبررات الرفض حتى تتضح الصورة للجميع.
09-22-2011, 01:55 PM
منتصر عبد الباسط منتصر عبد الباسط
تاريخ التسجيل: 06-24-2011
مجموع المشاركات: 4165
Quote: إنو قصة المعاملة السيئة للخادمات في السعودية حلها بسيط، يكون التعاقد واضح، وتكون الخادمة على اتصال بشخص مسؤول عنها (محرمها مثلاً بالنسبة للسعودية) وهذا الشرط يكون واضح ولو حصل اي شئ ممكن مقاضاة المخدم وفضحه على الانترنيت واعتقد ان القوانين الدولية اصبحت اكثر صرامة في هذا الموضوع (الهيومان ترافكنج).
والله يا أخوي لا بسيط ولا حاجة ....بس إنت لأنك عايش في أمريكا وما متصور الفوارق بين البئتين .... ثم لماذا المخاطرة..وتجريب المجرب ؟!!!. إذا لم تعيش في الخليج أو في السعودية ...فلا تحكم في أمر لا تحسن تصوره ثم ما هي الحاجة التي تدفع لهذا ؟! الأمر ليس فيه من عائد يستحق خوض التجربة والخسائر ستكون أكبر من أضعاف الفائدة المستهدفة.
ان يستهجن احد تصرفات شعب كامل ويدمغهم باسواء التصرفات ثم يظل يعمل لديهم ويخدمهم ؟؟؟!!!!
كل من يعمل في الخليج يحتاج الى كفيل ... خادم كان ام مدير بنك باختلاف هذا الكفيل هل هو شخص ام جهة اعتبارية
نفل الكفيل الذي تتهمه بانتهاك حرمة الخادمات ياهو نفس الوظف البتقابلوا في المكتب .. او مديرك في الشركة او البوليس في الشارع او بتاع الكاشير ففي بقالة او سوبر ماركة على الاقل ياهو نفسه سائق العربية الدفع الرباعي الذي تقابله في اشارات المرور
ناس بكل هذا السوء وحامين الناس يمشوا ليهم
المقعدكم معاهم شنو ؟
لا افهم !!!
09-25-2011, 08:35 AM
تيسير عووضة تيسير عووضة
تاريخ التسجيل: 12-20-2005
مجموع المشاركات: 7136
ان يستهجن احد تصرفات شعب كامل ويدمغهم باسواء التصرفات ثم يظل يعمل لديهم ويخدمهم ؟؟؟!!!!
كل من يعمل في الخليج يحتاج الى كفيل ... خادم كان ام مدير بنك باختلاف هذا الكفيل هل هو شخص ام جهة اعتبارية
نفل الكفيل الذي تتهمه بانتهاك حرمة الخادمات ياهو نفس الوظف البتقابلوا في المكتب .. او مديرك في الشركة او البوليس في الشارع او بتاع الكاشير ففي بقالة او سوبر ماركة على الاقل ياهو نفسه سائق العربية الدفع الرباعي الذي تقابله في اشارات المرور
ناس بكل هذا السوء وحامين الناس يمشوا ليهم
المقعدكم معاهم شنو ؟
لا افهم !!!
لو خليت شخصنتك للمواضيع أصلو ما بتجيك عوجة وممكن الزول يقعد يناقشك لي بعد بكرة هسي أنا ممكن ببساطة أرد ليك على أسئلتك دي بنفس الطريقة وأقول ليك قعاد الخليج ولا لهلهة كل يوم راتبي كذا ودي شهادة الراتب والعيشة بقت صعبة وزادوا اللحمة وزادوا العيش وخلي العيش حرام (دا لو بي نفس منطقك أعلاه)
لا زلت تهرف بما لا تعرف يا وليد!
تحديدي للسعودية في كلامي لأنو قوانين العمل في السعودية ودول الخليج عموماً بما فيها قطر المتطورة به كثير من الثقوب أستثنى منهم الإمارات والتي تتقدم عن باقي دول الخليج الخمسة كثيراً فيما يخص العمل والكفالات يكفي إنك فيها تتمتع بحق الإحتفاظ بجواز سفرك إنت ومن تكفل وحق الدخول والخروج من البلد متى ما شئت دون الرجوع للكفيل وإخطاره ناهيك عن أخذ إذنه الكتابي
* الكفيل بتاعي اللي هو جهة إعتبارية عندها قوانين ومحددات لا يمكن تجاوزها(وممكن أقاضيهم عديل هنا لو أساءوا معاملتي أو أصروا على الإحتفاظ بجواز سفري دونما سبب واضح والقانون هنا في صالح المكفولين على الأغلب) وليست شخص يخضع مصير مكفوليه لمزاج حضرته الشخصي!
أنا دي تيسير - والحمد لله كثيراً - المعاملة الكريمة الكريمة في البلد (الخليجي) الأنا فيهو وزيي آلاف في بلدي ما لقيتها واللحظة اللي مستوى المعاملة دي ينزل درجة طوالي بتيمم بلدي أتذل وأتهان في بلدي ولا أتذل للغريب ..
09-25-2011, 09:04 AM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
لو خليت شخصنتك للمواضيع أصلو ما بتجيك عوجة وممكن الزول يقعد يناقشك لي بعد بكرة هسي أنا ممكن ببساطة أرد ليك على أسئلتك دي بنفس الطريقة وأقول ليك قعاد الخليج ولا لهلهة كل يوم راتبي كذا ودي شهادة الراتب والعيشة بقت صعبة وزادوا اللحمة وزادوا العيش وخلي العيش حرام (دا لو بي نفس منطقك أعلاه)
بل هو بمنطقي اعلاه ولا شي سواه وكلامك سليم قعاد الخليج اخير من لهلهة كل يوم بالنسبة لي زول عنده راتب فما بالك بانسانة ما لاقية شغل
ده البنقول ليكفيه من الصباح .. وغلبك تفهميه بمنطق عديل فهمتيه بمنطق مطاعنه النسوان .. لكن برضو كيوس انو الفهم وصلك ولو حتى بالتريقة
لهلهة كل يوم دي زائدا قاعد الخليج الاحسن ياهو البخلينا نقول ليكم ... خلو الناس تشتغل وتتكسب وما تبقوا اوصياء عليهم خصوصا وانكم من المتمتعين بقعاد الخليج
انتو الحسادة الليكم شنو ؟ ما تقعدوا قعادكم وخلو العاوز يجي يقعد معاكم يجي يقعد .. وطالما انو غير قاصدر وبعرف الصاح من الغلط ولا الصاح والغلط والضار وغير الضار بتعرفوه انتو براكم وده الاهلكم تقعدوا في الخليج
أنا دي تيسير - والحمد لله كثيراً - المعاملة الكريمة الكريمة في البلد (الخليجي) الأنا فيهو وزيي آلاف في بلدي ما لقيتها واللحظة اللي مستوى المعاملة دي ينزل درجة طوالي بتيمم بلدي أتذل وأتهان في بلدي ولا أتذل للغريب ..
اشمعنى يعني لانك تيسير تحديا مخصصين ليك المعاملة دي !؟ ولا كيف ؟
ما يمكن النسوان الما لاقيات شغل وبلهلهن من العيشة بقت صعبة وزادوا اللحمة وزادوا العيش وخلي العيش حرام ... يجن الخليج الفيه العيشة احسن ويلقن نفس معاملك دي ويمكن يلقن معاملة احسن
ولا المعاملة الكويسة دي حصريا عليك انتي فقط ؟
________________ طولي بالك يمه مافي شخصنة ولا يحزنون
09-25-2011, 09:31 AM
تيسير عووضة تيسير عووضة
تاريخ التسجيل: 12-20-2005
مجموع المشاركات: 7136
يعني هسي أنا أقعد أرد على الغلاط بتاعك ولا ألتق جنس التلتيق دا ..
ولا ده ولا ده
طالما انك انت تيسير دي - والحمد لله كثيراً - المعاملة الكريمة الكريمة في البلد (الخليجي) الأنا فيهو وزيي آلاف في بلدي ما لقيتها
البنع شنو المعاملة العاملوك ليها في البلد الخليجي يعاملوها للسودانيات العاوزات يستغل في خدمة البيوت ؟!
هو يعني الخليجين ديل كعبين اساسا ؟ ولا كويسيسن اساسا ؟
ولا كعبين مع وظائف معينة وكويسين مع وظائف اخرى
ولا كعبين مع جنسيات معينة وكويسين مع جنسيات اخرى
خلاصة الكلام طالما انو تمت معاملتك انت واخرين معاملة جيدة احسن من معاملة بلدك حارمة الاخوات العاوزين معاملة زي معامتلك خصوصا انو البلد دي ما عاملتهم كويس ودي حاجة ما بتغلطوا فيها اتنين
لو تسمح لي اسهم شوية في حبة توضيح من وجهة نظري الشخصية ..
يا وليد العمل في مكان لمكان بفرق ..في مؤسسات محترمة ..عقودا واضحة ..وبتحترم موظفيها بشكل كبير ..وفي لأ بالتأكيد..
كذلك في ناس من الحوالينا قمة في الرقي والإحترام وقياسا على ما نراهو من سلوكهم بنقدر نتوقع ممكن معاملتهم مع للعمالة المنزلية في المنازل كيف ..وبالمقابل في ناس لا تثق في طريقة تفكيرهم /وعيهم / تربيتهم و لا تعلم عنهم شيء ..الخ ..وده هنا وفي السودان وفي أي مكان في الدنيا ..
وبشكل عام يا وليد "العمالة المنزلية " شغلهم فيه اشياء قد لا تواجه أي شخص بشتغل في مكان تاني ..
يعني الزول بيدخل عالم مجهول ..في نص خصوصية ناس بلاقيهم في كل مكان في البيت، بدخل غرف نومهم ، وممكن يدخلوا غرفة نومو ، الزول معرض لأي شيء من السب إنتهاء بالإعتداء الجنسي ..، وممكن ما يلاقي أيييي شيء وده وارد جدا ..لكن في حال الإحتمال داك القول 5% ما مفروض يتحضر ليهو؟!، خصوصا في نظرة عكسية من المخدمين نفسهم البعاينو للميد على أنهاء جاية تفسد اولادهم ..او تسرق أزواجهم ..عشان كدة بكونوا قاسين معاها لمن تثبت العكس ..شفت كيف الوضع معقد..؟
والمشكلة ياوليد المخدم بختار منو يشتغل معاهو وفق الـسي في ، لكن العامل ماعندو مجال اختار..وهناالمشكلة ..، في الشغل التاني برضو بطلبوك وفق الـسي في لكنك ما مجبر أبدا تعمل في مكان ما بناسبك ..ولا توافق على شروط ما عاجباك ..
عشان كدة مهم الناس تعرف البيها والعليها وهم بعداك أحرار .. وكان الله من وراء القصد ..
09-25-2011, 11:32 AM
وليد محمد المبارك وليد محمد المبارك
تاريخ التسجيل: 12-04-2004
مجموع المشاركات: 26313
Quote: موضوع عمل المرأة والخادمات شغل الناس بصورة غير مسبوقة وقد تعامل معه الناس بحجمه وأثره لكن لاختلاف الفهم والذوق وحاجة في نفس يعقوب يأبي الأخ ( ود الموج ) إلا أن يفرغ الموضوع من محتواه حتي المثال الذي أجهد نفسه لايراده لم يجد فيه غير النعل للنعل وهذا من ذوقه العالي وقدرته في الاقتباس ويعلم الله ان هناك فصيلة من البشر لا تريد للمرأة إلا أن تكون سلعة في سوق النخاسة العالمي تعرض مفاتنها...وتغري السابلة..وتصبح مثلها مثل معروضات الشارع الرخيصة لكن القول الفصل الذي جعلناهو عنوانا لهذا الموضوع فقد جاء من كل المتابعين حرصا وتعليقا ونقاشا ثرا يحمل هوية واحدة وسمة واحدة وقومية واحدة هي السودان
على الكرار سلام لم تعرف ان ترد الا تشغيبا وكانك لم تفهم مغزى حديثى مع اننا متفقين فى كل شى الا شتارتك،فاين قلت اننى اريد للمرأة ان تكون سلعة ياعلى؟؟.. القصد شتارتك واقحام القول تموت الحرة ولاتأكل بثدييها حيث ان لامكان لاقحام هذه العبارة لان الطلب لم يتحدث عن عاهرات افهمت اصلحك الله.. وانا مصر انت ونافع والبشير وكمال عبيد بتاع الداير حقنه مانصرفها ليه وعبدالرحيم احمد حسين وزير الهناى ضرب فى البتاعه قامت الشغلانه باظت تتحدثون بنفس الشتارة ولافرق بين حديثك وحديثهم... كلام يشبه جديع الحطب من لورى فى فنقة،،،فكلكم
09-25-2011, 02:10 PM
othman mohmmadien othman mohmmadien
تاريخ التسجيل: 12-13-2002
مجموع المشاركات: 4732
ولكن الآمر كواقع حادث في الكثيرمن الدول ومنها سوريا على سبيل المثال وغيرها بل من شرائح من الشعب السوداني لم نكن نظن يوما إمتهانها لهذا العمل...بل في داخل السودان هنالك طالبات جامعيات ولجن هذا المجال....
Quote: الأمر ليس في السماح لهذه المهنة من عدمه ... بل في متابعة القنصلية لشؤون مثل
هذه العاملة وحفظ حقوقها وحل مشاكلها إن وجدت ..
09-25-2011, 09:07 PM
Siham Elmugammar Siham Elmugammar
تاريخ التسجيل: 06-18-2004
مجموع المشاركات: 3488
Quote: المغتربون يعتقدون ان هذه المهنة ( خادمة منزل) حاطة للقدر و تجرح كبريائهم لذلك لا يريدون من تشاركهن نفس الجواز و المهجر ان تعمل في مهنة تحرجهم، هذا هو تفكيركم و لا يستطيع وهمكم ان يحل محل الواقع فالوهم وهم و الحقيقة حقيقة.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة