|
الكلمة بي حدينا..سيف.
|
الكلمة بي حدينا سيف
والسكّة أقصر ماتكون حين يعبرك قلبا نضيف
حد المعاني البينا .. بين أنا مابقيف
وعند الشواطئ الفاقدة قيف ماليّ كيف
غير قرقرابات الضُحى وكتين تطل عينيك..ضيف. يحلف يفوت..ونحلف عليهو أكان يقيف ماكنّا عارفين إنّو جاي.. ولا سوّالو طيف في الخاطر النسّاي طرق باب الخيال زائر خفيف
وأحلى الضيوف ديل البياخدوك بالقلد قبلما تعنّج عيونن في قليبك بالجَلد تفصل الروح من براويز الجلد
وياااالله وين نلقى المدد
هذي العيون هيَّ المداخل للرويحة وهيَّ بوّابات تدخّل لي كل متاهات الجسد وفي غفوة حسابك للزمن لو كان بمر في لحظة الشارع حضن هذي الخُطى أيّ ريد ماكان بحن وأقسى من هذا المحب ماشفت غير لمّا يتنزّل مطر ينزل على كل البيوتات وعلى بيتنا قصداً مايمر يتكل خديد صفحة سمانا علي كفوف هذي المحن أو لمّا يتلاقن رموشو وتبقى عينيو في سجن برضو أحسن من يزيدن من مراحيمي البقن يندهن طول المنام لي فكرة انو معاك صحن.
والشافك أكيد ما بعرفك.. ومابضاهي البسمعك
والمن كلامك مابتواسي بيقطعك
وماقطع الكلام غير انغماسك في الغياب
وماغيابك غير بدايات الممات
فأرجوك أوضح لو تبين ينهض يقين وأُولد من نهايات الحياة.
ومابين المحرّم والمباح عينيك جد شبعت سماح عينيك شبهاتنا النريدم عينيك بتوازي الحلال ونقترف ذنب النظر ونمرق نعبّي الروح رباح..طالما اولاهو صاح. ومن بواكير الصباح بجدل ضفايري من الحكاوي الشايلة غايات الفلاح وأستبيح عرق الترابلة كما العطر أو خَمرة النَفَس الحلال يسكروا الناس التعابى الفردوا في ضيق أحاويلي وأحاوليك براح.
|
|
|
|
|
|
|
|
|