الاطباء يخلون مستشفى الخرطوم..بعد اعتداء احد افراد القوات النظامية على طبيبة بقسم الحوادث

Quote: لأنو يا الشفيع الحكاية ممكن تقول عليها لانهم محتاجنها بالجد أكتر زول معرض في السودان للدق بعد الزول البشاغل بنات علنا في الشارع هو الطبيب السوداني. الناس ديل ما مؤهلين عشان الدولة ما أهلتهم ودي قضية منفصلة ومقدرة،لكن غالبية الأطباء لما يتعاملوا مع الناس الواحد بفتكر نفسه انو هو انسان عبقري والمفروض الناس تحترمه عشان هو دكتور وقرا الطب.والمريض ده وأهله ناس حيوانات ساي. قبل سنة كان عندي قريبي وقع بجلطة ودوه الحوادث..لاحظ انه ولده طبيب تحت التدريب..جاء نائب الاخصائي الماسك الشفت وركب قسطرة التغذية،في الرئة بدل المعدة...المهم الشقي قريبنا ده قام سحب ليه القسطرة وقال لو نزلت في المعدة ما تعرف شنو. نائب الاخصائي نطا قال شوفوا ليكم زول يركب ليه القسطرة...خارجنا دكتورنا التحت تدريب برة وبديت اتفاهم معاه..أبي كلو كله..مرت ساعة تاني مشيت ليه واعتذرت ليه..ابي برضو قال شوفوا ليكم زول تاني...المهم اتلمينا نحن زي 6 انفار قلنا ليه لو ما ركبت القسطرة ح تتدقا مشي جري جاب المدير الطبي...قلنا انت ذاتك بندقك... قاموا وافقوا لانهم عرفوا انهم حيتدقوا اتضح يا الشفيع الناس ديل ما بعرفوا يركبوا قسطرة وفي جهاز كدة بشبه الكماشة مشينا حنسنا زولة في وحدة تانية مسكت القسطرة كجك نزلتها ومشت.. فالدق حاصل والله....وقريبنا بعد يومين طبعا مات. نجي للسيدة لجنة يا لجنة نحن معاكم قلبا وقالبا في مسألة انو ما بدربوكم وحقوقكم ما بتوفي بيها الحكومة وكل حاجة...مسألة انو عشان دقوا دكتور الباقين ينسحبوا الحركة دي أعقلوا وخلوها لانو المتضرر هو المريض...ركزوا علي مطالبكم العادلة الما بختلفوا فيها اتنين ...نحن معاكم في اي حاجة...برضو بالله مع مطالبكم العادلة ختوا كيف يدوا الاطباء كورس اسمه التعامل مع البشر انشاء علي حسابنا ياخ..حلال عليكم والله. مافي زول بمد يده علي طبيب مالم يستفزوه او ما يقوم بعمله كما نطالب بتعيين بودي قارد شخصي لكل طبيب ...انا لله ياخ هي خربت من شوية وشكرا