قبائل الحماسيــن بسأل عن هذه القبائل لاغراض معرفية ؟ ..كان سؤالاً للاخ بدرالدين ..

Quote: ((( الجيزية ))) أم التجرنجية والعبرية والعربية , بقولوا انو اللغات دي كلها أتطورت منها واتفرعت وهي لغة الكنيسة الاثيوبية القديمة التى تحورت عنها التجرنجية ثم الامهرية , الأحباش ( التجراى ) يطلقون على لغتهم ( لغة الجّيز ) أو الكعّز وكلها مقصود بها الجيزية القديمة التى تطورت عنها تلك اللغات وهي من تطورت منها لغاتهم التى تسود أرتريا والهضبة الان التجرنجية والامهرنجة , لدي أهل الهضبة الإثيوبية تعتبر الامهرية هي اللغة الاكثر تداول وحتى من أستقر في اديس من الأحباش يتكلم هذا اللغة في حين أن في ارتريا تجد التجرنجية بتقدير اكبر وبتحسها اكتر حداثة في مفرداته وسهولة في نطقها من نظرائهم في اعالى الهضبة , تجراى إثيوبيا ( الأحباش ) تجد الكلمة كتعريف حصري لهم من كل قوميات إثيوبيا الاخري مقدرة عندهم للغاية , عند نظرائهم تجراى إرتريا تجدها مرفوضة من مسلميهم باعتبارها بتعرف الأحباش المسيحيون أكثر , عن الإثيوبيين مسلمين ومسيحين مقبولة شديد لدي القومية المعنية بيها , الهم التجراى ... الحماسين سفدا والمدا ورقبات وميكال ودوبعات هم تجراى أرتريا أهل أسمره وما جاورها ( حبش أرتريا ) وبتلاقي كتار من البعارضوا نظام اسياس بقولوا عنو نظام ((( الحماسين ))) , وهم أهل استعلاء عرقي زي تجراى إثيوبيا يعني مرات بتلقاهم حتى الأمور التاريخية المثبته بغالطوا فيها لما تقول أصول التجراى مهاجرين من حمير وسبأ كحقيقة معروفة عن تلك الهجرات الاقامه حضارة أكسوم وما في ثقافتهم من أسماء لامكان وشخوص بتطابق مسميات اليمن القديمة للاماكن واسماء الشخوص وأسم يماني من أكتر الاسماء انتشار عند الاحباش مع كده بتلقاهم بعترضوا على الجزئية دي وللمسالة عندهم بتاخد بعد مختلف شرحوا لى الصديق حسين ابراهيم مره _ وهو بتكلم عن التجراى الاثيوبيين _ متفق معه محمد رمضان الارتري لما تقول التجراى مهاجرين من اليمن زي البتقول عنهم أمه مهاجرة ما أصلية في الهضبة والحته دي عند الناس ديل تلقيهم ليها مختلف عننا نحنه ما عندنا مشكلة عادي بنقول دي اصولو عربية وده اصول تركية وممكن كمان تكون حته وجاهه إجتماعية عند الحبش بالذات من ديل ومن ديل بتلقي حساسيتهم في الحته دي وتقبلهم ليها مختلف وبرفضوها لانو في تصورهم هم من أعرق الأجناس الموجودة في المنطقة دي واكثرهم حضارة وعندهم اعتزاز بعرقهم وأشياءهم ملاحظ لا ي زول قريب منهم وفي نفس الوقت برفضوا فكره أنهم ما اصليين في مناطقهم يعني جوها مهاجرين ... ***وراجع منتديات الارتريين بالذات وحتلاحظ البوستات البتتناول السيرة التاريخية لبعض قبائلهم في حته الأصول بتلقي التعامل مع الموضوع بكون بحساسية ما عادية , في ناس بكتبوا في حته أصول القبائل العربية في ارتريا لكين برضوا حتلاحظ زملائهم من البكتبو معاهم في نفس المنابر بتلقوا الكتابات الزي دي بنقد ما عادي ... لو طلع التناول عن الرشايدة , والعفر , وخشه في القبائل البفترضوها حبشية صرفة تستخلص منو تفكير الحبش المعروف البرفض انتسابهم كحبش لغيرهم وبرفض أنتساب غيرهم لهم مالم يكن فعلا منهم *** مع ملاحظة اني ما بكتب من ناحية معرفية لعدم الإلمام أو التخصص لكين بتكلم حسب الواقع ومشاهداتوا والعلاقة البتربطني بالتجراى ( أهل شمال إثيوبيا ) الصداقة والنسب والمعارف من الارتريين بحكم الصداقة أو العمل وديل وديل من الصعوبة تقدر تصل لخطوط فاصلة بينهم لأنهم أصل ولغة وثقافة واحدة وباعجاب غير خافي بناس أعتزازهم بقوميتهم وفخرهم بيها قوي للغاية .