قصة الجنيهات المزورة الايام دى شنو؟ (صــــورة)

Quote: اثار موضوع فتح فى منتدى "سودانيز اونلاين" الشهير قبل ايام لقطا يتعلق بفئة الواحد جنيه، الموضوع فتحه احد الاعضاء ويسمى محمد عوض الذى قال: "استقر بى المقام الاسبوع المُنصرم بجوبا وفى احدى جولاتى بالسوق توقفت لشراء بعض الموز واضاف عند محاولتى الدفع بالنقود تفاجأت بالشخص يرفض ويحذرنى من عملة من فئة الجنيه كنت احملها ولا ادرى بالضبط من اين تحصلت عليها، تعلل بأنها من فئة مزورة وان جميع العملات التى تبدأ بحرف ال "AG" مزورة، بعد ذلك الحديث تمعنت جيدا ولاحظت بعض الفرق حقيقة عندما قارنتها مع اخريات، ووجدت ان نوع الورق مُشابه للبلاستيك وان الاطراف غير متساوية فى مُعظم الاحيان،عند النظرة الاولى سوف تعتقد انها غُسلت مع بعض الملابس كما يحدث عادة..احتفظت بهم للذكرى مع الحرص ولكن...تفاجأت بالكم الهائل من هذا النوع من الجنيهات عند عودتي للخرطوم، الباقي الذي يأتيك من الدكان يحتوي على بعض الفئات، الصيدلية "برضو مامقصرة"، محطات الوقود، وتساءل العضو محمد "القصة شنو؟"، عضو اخر يسمى مزمل خيرى ذهب فى السياق وقال "فعلاً .. بعد شفت البوست راجعت جزلانى ولقيت ورقتين من ابو جنيه ولاحظت برضو انو خامة الورق مختلف ..!! الحكاية شنو .؟". اما العضو فايز ود القاضى تساءل قائلا "انا مافهمت الـ AG دي شنو ؟ وهل ماموجودة في الجنيهات التانية ؟يعني هل في حروف مختلفة في الاوراق الما مزورة ؟!! واذا كانت الما مزورة ليها حروف مختلفة فهل الزور الجنيه غلبوا يزور الحروف ؟ ولا في حروف صعبة وحروف سهلة ؟!!واضاف هو الغبي ده يزور جنيه في حضرة العملات الاعلى مقاماً وصرفاً ؟!!" ورد عليه صاحب الموضوع "صدقنى الزول دا حريف... الفئتين ديل اكثر تداولا بين العامة، عشان كدا السوق بيكون مسخن ومافى زول بيجيب ليهم خبر " عضو اخر يسمى شاكر حامد اثرى النقاش بمداخلة مفادها "انا سحبت قروش من البنك الفرنسى واودعتها فى بنك الادخار وعند عملية الايداع اكتشفت الموظفة بالبنك ان هناك عشرة جنيهات مزورة ضمن المبلغ وقامت بتخريم مبلغ العشرة جنيهات بالخرامة وقالت لى اعيدها للبنك الفرنسى وفعلا اعدتها للبنك وكأن لم يكن شيئا مع اننى كنت خايف ان يكون هناك "سين وجيم وبوليس كيس" لكن موظفة البنك الفرنسى امنت اني قبل ربع ساعة سحبت المبلغ من البنك السؤال،واضاف قائلا اذا كان المواطن العادى ممكن تفوت فيهو العملة المزورة البنك ده بيعمل فى شنو يستلم عملة مزورة ويصرفها للمواطن؟. مساهمة الاعضاء فى هذا الموضوع جاءت موضحة بصور الجنيه من ذات الفئة، اذن بنك السودان وحده قادر على الاجابة على هذه التساؤلات، والقصة شنو؟