|
الحيارى يفوزون بإنتخابات اللجان الشعبيه
|
و لفظ "الحيارى" أطلقه احد المنضوين تحت لواء (الشجرة) لحظة إعلان النتيجه بفوز قائمة التغيير بـ400 صوت مُقابل 26 صوت للمؤتمر الوطني
-- قال معقوله الحيارى ديل يجيبو 400 صوت !! فكان رد الجموع: والله لو ما زمن الاقتراع بقيتو ضيق كان اخدتوها صايمه
|
|
|
|
|
|
|
|
Re: الحيارى يفوزون بإنتخابات اللجان الشعبيه (Re: حسبو عكاشة)
|
عوض كباكه أحد ظرفاء الحي بعد ان تكالبت عليه الظروف و الضرائب و الجبايات فضل ان ينتقل بماكينة الخياطه من سوق امدرمان جوار البوسته الي منزله و اصبح ترزي من منازلهم كما يقول تجده كل مساء يخرج كرسيه الوثير و يُيمم وجهه شطر خور ابو عنجه و يسرح لنا بخياله الي عوالم التاريخ انتو عارفين انا جدي منو ؟ فنتساءل كأننا لا ندري الاجابه, التي هرانا بيها هري منو يااااا كباكه !! انا جدي حمدان ابو عنجه, جاء عسكر بجنوده هنا و سمو الخور دا بإسمو و من ديك و عييييك كباكه احد اعمدة الحي و تجده ملما بجميع جخانين امدرمان بيت بيت لفه لفه, يعشق اثنين و يفديهما بروحه اذا استدعي الامر علي حد قوله (الهلال و حزب الامة) معجب حد الثمالة بالسيد الصادق و تجده ملتزما بحضور ندوة الاربعاء بدار حزب الامه, و يكره حد العمى البرنس هيثم مصطفيو يحمله اي هزيمة للهلال
فاجأنا في احدى صباحات الاسبوع المنصرم قائلا هوي يا وهم انتخابات اللجنه الشعبيه بحي الضباط بعد بكره, لازم الناس دي كلها تجي لانو الناس ديل ما عاملين اعلان عن الزمن بالضبط لازم نرتكز من بدري جنب نادي حي الضباط من اربعه عصُر قالها و نحن في دهشة من امره فهو لا يبرح نطاق منزله إلا للشديد القوي
-- بعد نتيجة الانتخابات كباكه كان منتشي و يردد بصوت جهوري لا بد من يشرق صباح لا بد من يشرق صباح
| |
|
|
|
|
|
|
Re: الحيارى يفوزون بإنتخابات اللجان الشعبيه (Re: حسبو عكاشة)
|
معاوية يا مهكور, رجعت متين انت !
Quote: من يصرح باسم الغلابة...الحيارى... |
الحيارى جهة امدرمان القديمه حيرو ليك الجن الاحمر بانت شرق التغيير ابو عنجه التغيير ابوسعد, المؤتمر الوطني فاز لانو ما عملو اعلان للناس و بعد انتفاضه و دق جرس اتعادت و برضو التغيير و اخيرا حي الضباط التغيير
ابسط يا عم و رسل من البيك الحراق الكوارع بالعدس هرتنا :)
| |
|
|
|
|
|
|
Re: الحيارى يفوزون بإنتخابات اللجان الشعبيه (Re: محمد عبدالرحمن)
|
Quote: انا وكباكه متفقين واختلاف بسيط فى موضوع هيثم مصطفى ..لكن الباقى حذو الحافر بالحافر ..وجاهزين لفداء حزب الامة والهلال ان لزم الامر ....وهذا للمعلومية |
محمد يا حبيب كباكه دا لو لاقيتو حتفق معاه في اي حاجه موضوع هيثم دا عندو ليه منطق, غايتو نحن منطقو ما لفق معانا بخصوص هيثم لكن احتمال يقنعك بعدين موضع فتيل الريحه دا بتقال لمن الواطه تضيق :)
| |
|
|
|
|
|
|
Re: الحيارى يفوزون بإنتخابات اللجان الشعبيه (Re: ismeil abbas)
|
Quote: وشكلك إنت يممت وجهك شطر مكتبة أخونا عكاشة طيب الله ثراه...بقيت تنقى الكلمات. أوعك تتابع لى المثقفاتية خليك فى حالك كده كويس.
تقديرى وسلامى للحميع |
عمو يا راقي شوق شديد يعلم الله سلامك يصل انشاءالله كيفك و الاسرة!! بلغهم تحياتنا
بعدين المثقفاتيه امثال مورتا ديل قدر ما حاولنا نحتك بيهم ما لقينا فرقه :)
| |
|
|
|
|
|
|
Re: الحيارى يفوزون بإنتخابات اللجان الشعبيه (Re: حسبو عكاشة)
|
حطبة, شاب في نهاية العشرينيات من عمره لفظت به احدى جامعات ثورة التعليم (العاضي) الى شارع العطالة العريض فأصبح حاملا لبكلاريوس أربع سنوات بالاضافه لخمس سنوات أُخرى عطالة يعيش مع والدته بعد ان ترك لهم والدهم عليه الرحمة, دكان به كراسي و تلفزيون و كرت الجزيرة, يقتاتون منه حلالا طيبا, ففي الامسيات يمتلئ الدكان عن اخره بسكان الحي و طلاب الداخليات و عمال ورشة المكانيكا التي بالجوار لمشاهدة مباريات الدوريات الاوربيه بجنيه واحد فقط لا غير مريخابي حد العوارة ولا يحتمل الهزيمة فتجده عند كل هزيمة للمريخ راكب الفيل علي طول مع صديقه المحبب (صبره) الذي يتميز ببسطة في الجسم, كرشة و جضوم و ارداف ذات مرة, عند هزيمة المريخ من الهلال بهدفي سادومبا, حضر اليه الرشاشات بعد المباراة و هو معتلي اعلى قمة من الفيل اخذو ينشدون عليه, الهلال ركب الدفار و المريخ اردافو كبار فما كان من حطبة إلا ان استوقفهم قائلا: لالا يا جماعه, دا ما المريخ , دا صبره :)
--- حطبة حينما علم بفوز قائمة الحيارى قال الحمد لله الواحد بعد سته سنين من الجري وراء بطاقة التأمين, الحيارى ديل بكره حيطلعوها لي قال: ياخ ناس اللجنه الفاتو ديل تقول ليهم عايز بطاقة تأمين ينتظروك لمن تموت و يطلعوها ليك شهادة وفاة
(عدل بواسطة حسبو عكاشة on 05-06-2011, 01:08 PM) (عدل بواسطة حسبو عكاشة on 05-06-2011, 03:59 PM)
| |
|
|
|
|
|
|
Re: الحيارى يفوزون بإنتخابات اللجان الشعبيه (Re: Nasr)
|
أحكي يا حسبو... أصلا البلد دي لو عندها أمل حيكون في الحيارى ديل. لقد هرمنا ... هرمنا في انتظار الما حيارى و ما طلعنا بحاجة.
Quote: راكب الفيل علي طول مع صديقه المحبب (صبره) |
لا يفوتني أن أشكر الأخ أشرف الحلبي الذي لولاه لكنت سطحت تسطيحة شديدة هنا... فشكرا له على تثقيفي.
| |
|
|
|
|
|
|
Re: الحيارى يفوزون بإنتخابات اللجان الشعبيه (Re: معاوية عبيد الصائم)
|
حينما ينساب النيل في غير ما عادته و العصافير تغير زقزقتها إلي لون من الصمت الكئيب و تري الناس يخرجون فرادي و زرافات الي اماكن عملهم بوجه محزون!! حينها فقط .... - حينها فقط شيل كوعك دا من كتفي يا أم, و عليك دينك اعفيني منك إنت قايل نفسك (مجدي احمد اباظه)؟ اسمو اسامه انور عكاشه يا لوح, إنت يا معلم راسك بقي خفيييف و بقيت بتعبر سريع ... الاسد لمن يعجز مالو؟ - الغنمايه بتشرب كاسو هاهاهاهاها تشرب كاسو برضو حييييييييينا, إنت بي راسك العامل زي اخر الزقاق دا اصلو ماعندك صبر, خليني اتم ليك الخاطره بتاعتي دي ما تنسيني ليها - هوي يا (كوارع) هوووي ما تشغلا لي انتظر ربيع دااااك شايفو جاي اقعدو اتخاطرو سوا
تطول لحظات انتظارهم لربيع فيتقالدا سوياً صوب دقن الباشا ( شجرة ناس اصطاف) و التي تعد الاكثر ظلاً في الحي, ناهزت عقدين من الزمان و مع ذلك لا تمل من فرد افرعها تحناناً لكل حيران و كل عاطل طالته سياسات الدوله التعسفيه, حتي خالج الناس ظناً انها مسكونه بنبي الله الخضر إختارها لموقعها الرابط ما بين من هم يلوزون بأحزانهم الي اللاوعي و بين (حي فنقر) و ما ادراك ما حي فنقر, المره تدق و الراجل ينقر.
إنت يا (صامولي) ربيع دا الليله شكلو شرب فنقر كلها و جا, عاين ليهو بخيط في الشارع كيف؟ - يخيط شنو يا كوارع!! الزول دا ما شغال ياخ و مما رفدو من الجيش ليهو عشرة سنه ساكي حقوقو و لسه ما طلعت والله كان راجيها دينو ح يطلع, ياخ دي بلد دي... الود كان شاااااطر في المدرسه و فجأه و الزمن قلب عليه: ابوه مات و امو راقده بالشلل و هاك يا دورة البحث عن العلاج ديوان الزكاه ما نفع حتي المحسنين بقو ناشفين, فقال يختصر طريقوو طبق المثل البقول ( إن فشل للطوريه و إن نجح للعسكريه) و خش الجيش و تعال شوف بعد داك شبكو ليك لواء القعقاع المتجه لتحرير توريت و شعارات من نوع: نحن الدنيا الما مسكنا نحن خلودنا هناك في الجنه, الودا إتحمس و مشت فيهو قال اهو برضو نختصر طريقنا للجنه, صاحبك لمن نزل من الطياره في الجنوب قايل نفسو في كولومبيا ريحة البنقو ما تديك الدرب لقي ليك المجاهدين كلهم يد في الزناد و اخري تحمل الكبنقه, قال انا يا دووووب عرفته الناس دي ليه شابكانا لقد شممنا رائحة المسك, و كنا عطاشا فإذا بغيمة ظليله تهطل بالوادي الذي قبالتنا و شربنا حتي بانت نواجزنا, البنقو و احكامو يا معلم ... اها بقي لافيها معاهم اربعه سنين تنتهي سجارة لواء ابودجانه يولعو سجارة الميل اربعين .. بعد داك جابوهو راجع – و قالوعليه فوت فوت – لكن هو ما فوت فوت – و كدا كدا يا الترله و تقول لي ساكي حقوقو, إنت عارف يا صامولي اخوي نحن الكادحين ديل عاملين زي الكبنقه لمن تكون محكومه, اي واحد يجي يشفطنا تماااااام و يدي البعدو, و الغريبه دائماً قعد تكون محكومه لي عساكر و العساكر راسهم ما بجي بسرعه شفطونا طلعو عينا ياخ,,, عشان كدا انا وريت ربيع قولته ليه حقك تحرسو ولا بجيك حقك تقاوي و تقلعو - يقلع ضرسك يا كوارع ياخ قلبته لينا القعده ( في ساحات الفداء) يقلب بطنك إنشاءالله ساحات الفداء شنو!! لسه انا الخاطره بتاعتي القبييييل ما تميتها و ربيع دا شكلو ح يتأخر, اسمعني للنهايه و ما تقاطعني - اها يا كوارع قول قصتك !!
حينما ينساب النيل في غير ما عادته و العصافير تغير زقزقتها إلي لون من الصمت الكئيب و تري الناس يخرجون فرادي و زرافات الي اماكن عملهم بوجه محزون!! حينها فقط حينها فقط اختارت يد المنيه (عصام) و تلقفته في ذات الصباح اثر تسمم احدثه له ذاك السم الهاري الذي ما انفك يشربه ظناً منه انه سينسيه شظف الدنيا... الصبايا و النساء و بائع الصعوط و مناضلات حي فنقر كما كان يحلو له ان يناديهن, جميعهم جزعوا لفراقه الدنيا التي ما لبست تنال منه و تجرده من ابسط حقوقه حتي اسمه الذي هو خاصته جردته منه و اصبح في لمح البصر (كوارع)
--- ثلاث سنوات علي رحيل عصام كوارع رحل قبل ان يشارك اهالي الحي فرحة التغيير
(عدل بواسطة حسبو عكاشة on 05-03-2011, 10:58 PM)
| |
|
|
|
|
|
|
Re: الحيارى يفوزون بإنتخابات اللجان الشعبيه (Re: Elawad)
|
Quote: أصلا البلد دي لو عندها أمل حيكون في الحيارى ديل. لقد هرمنا ... هرمنا في انتظار الما حيارى و ما طلعنا بحاجة.
|
يا العوض الحيارى قالو كلمتهم خلاص و لسه راجين الكتير
Quote: لا يفوتني أن أشكر الأخ أشرف الحلبي الذي لولاه لكنت سطحت تسطيحة شديدة هنا |
أشرف لو بخل عليك في يوم من الايام ما تلاوز حنحيلك للسيد حطبه يديك بعض الدروس من علمو اللدني :)
| |
|
|
|
|
|
|
Re: الحيارى يفوزون بإنتخابات اللجان الشعبيه (Re: Nasr)
|
سلام يا Nasr
Quote: دي الإستفتاء الحقيقي لشعبية حزب المؤتمر والحكومة دي النتيجة حين لا يكون حزب الحكومة قادرا علي الخج
|
اللجنه الشعبيه ليها قرابة العشرين سنه بنفس الناس لا خدمات لا وقوف في صف اهالي الحي عشان كدا النتيجه كانت متوقعه لصالح منو
| |
|
|
|
|
|
|
Re: الحيارى يفوزون بإنتخابات اللجان الشعبيه (Re: البشير دفع الله)
|
Quote: الحمد لله عافية درت
مساهر مالك يا مان نعلك عافية
.بالنسبة لي انا عدم موضوع بس
تحياتي وخلينا نشوفك ولو بالتلفون |
انشاءالله دائما مبسوط و مروق يا البشير بالنسبه للسهر, ياهو بالنهار مرات بكون جري شديد و بتجي تديها غمضه و تصحى تفرق بالليل بيجاي الاسبوع الفات كنت في العباسية في بيت جدك حاج احمد, كلهم طيبين و زينين
| |
|
|
|
|
|
|
Re: الحيارى يفوزون بإنتخابات اللجان الشعبيه (Re: حسبو عكاشة)
|
يا حسبو بلغ الحيارى تهانينا الحيارى عندناعاصرين ليك الجماعه مع الحيطه الإنتخابات كان مفروض تكون الجمعه الفاتت الحيارى جاهزين موية ونور ملو المدرسة محل الإنتخابات طوااالي الجماعة اجلو الإنتخابات واحد من الحيارى قال ليهم نحنا لا عندنا شغل لا قروش لا موضوع يعني لو اجلتوها خمسة سنة حتجو تلقونا قاعدين وراجنكم فأخير ليكم ما تضيعو زمنكم
| |
|
|
|
|
|
|
Re: الحيارى يفوزون بإنتخابات اللجان الشعبيه (Re: محمد عبد الماجد الصايم)
|
الحيارى بأركويت عملوها برضو يا حسبو هاك الإيميل دا من حبيبنا محمد عروه
Quote: يا مورتا قول لى صحبك حسبو الحيارى فى اركويت مربع 45 كسحو الجماعه وعمك الكان رئيس اللجنه لمده عشره سنين بقى يكابس فى الاحتياطى و مالقى وطبعا يعود الفضل لى شله الحيارى ،استنفرو كل المشيشاتيه الفى النادى ،قاعدييييييييين لاشغله لامشغله ،وعمك كان عامل ليهم طابور بطانيه كل يومين ضارب لى دفار الكشه جايي ،لاكن اصحابك حريفين يوم واحد ماقبضوهم بالثابته ياخى نور الدفار دا لما يشلح قبل ان يرتد طرفك تلقى الجماعه شتتو الشيش وطفو المنقد ولمو الكراسى ،طربوش ساى مابخلو حايم ،ناس النظام يجو يشمو ريحه الشيشه ومايلقو ولا ابو النوم ،واحد منهم قال ليهم النادى الا كان ساكنو جان مشيشاتى ،المهم الجماعه اتفقو انو ناس عمك ديل لازم يشتتوهم من اللجنه ماعندهم اى اهداف خفيه فقط اتقاء شر التع.... بتاعتو ،المهم نجحو فى انو يدخلو ليهم زى تلاته كدا من كبار المشيشاتيه الذين مافتئو يشيشون اناء اليل واطراف النهار.
بعدين قول ليه ونستك طاعمه ياخ |
| |
|
|
|
|
|
|
Re: الحيارى يفوزون بإنتخابات اللجان الشعبيه (Re: khaleel)
|
خليل يا عمكQuote: سلام يا حسبو وتعظيم سلام لاهل حي الضباط مشهورين بخفة الدم ايام كاس العالم 82 اطلقو الالقاب علي لاعبي فريق الحي علي الطريقة الايطالية سطليوني وشلوفاتي
|
يا زول حي الضباط دا عالم لزيز جدا كل يوم دراماجديدة و كل قروب عامل غنجه براه و الالقاب ما تديك الدرب تدقس تعمل وهمه بلصقو ليك لقب لمن تموت بكون مباريك واحد كسر ليه كراع واحد في الدافوري سموه (كراع حديد) اسمو الحقيقي منو انا لي هسه ما عارفو :)
Quote: بالمناسبة اين مزمل ضالين |
حي يُرزق و واحد من اعضاء نادي حي الضباط و احد ال 400 الفوق ديك
| |
|
|
|
|
|
|
Re: الحيارى يفوزون بإنتخابات اللجان الشعبيه (Re: مرتضى احمد عبد القادر)
|
Quote: يا مورتا قول لى صحبك حسبو الحيارى فى اركويت مربع 45 كسحو الجماعه وعمك الكان رئيس اللجنه لمده عشره سنين بقى يكابس فى الاحتياطى و مالقى وطبعا يعود الفضل لى شله الحيارى ،استنفرو كل المشيشاتيه الفى النادى ،قاعدييييييييين لاشغله لامشغله ،وعمك كان عامل ليهم طابور بطانيه كل يومين ضارب لى دفار الكشه جايي ،لاكن اصحابك حريفين يوم واحد ماقبضوهم بالثابته ياخى نور الدفار دا لما يشلح قبل ان يرتد طرفك تلقى الجماعه شتتو الشيش وطفو المنقد ولمو الكراسى ،طربوش ساى مابخلو حايم ،ناس النظام يجو يشمو ريحه الشيشه ومايلقو ولا ابو النوم ،واحد منهم قال ليهم النادى الا كان ساكنو جان مشيشاتى ،المهم الجماعه اتفقو انو ناس عمك ديل لازم يشتتوهم من اللجنه ماعندهم اى اهداف خفيه فقط اتقاء شر التع.... بتاعتو ،المهم نجحو فى انو يدخلو ليهم زى تلاته كدا من كبار المشيشاتيه الذين مافتئو يشيشون اناء اليل واطراف النهار.
|
تحية كبيرة لمحمد عروة و للحيارى فرع اركويت ناس اركويت الذ ناس و علي رأسهم مهند نوري و حفيظو و عبدالرحيم الماسك السلاح :)
يا مورتا , قول لي عروة يرش لينا الطلس و الاحناك البهناك كلهاو بالتفاصيل نحن في انتظارك يا محمد يا عروة
| |
|
|
|
|
|
|
Re: الحيارى يفوزون بإنتخابات اللجان الشعبيه (Re: مرتضى احمد عبد القادر)
|
Quote: الحيارى عندناعاصرين ليك الجماعه مع الحيطه الإنتخابات كان مفروض تكون الجمعه الفاتت الحيارى جاهزين موية ونور ملو المدرسة محل الإنتخابات طوااالي الجماعة اجلو الإنتخابات واحد من الحيارى قال ليهم نحنا لا عندنا شغل لا قروش لا موضوع يعني لو اجلتوها خمسة سنة حتجو تلقونا قاعدين وراجنكم فأخير ليكم ما تضيعو زمنكم |
يا مورتا غايتو ناسكم البعرفهم انا ديل عصارين, يا زول ديل معصرة عديل كدا غايتو ناس (ابوكدوك) لو لقو منكم كم نفر كدا كان امورهم اتجهبزت قالو ليهم التصويت ببدأ الساعه سته مساء, لمن وصلو في الزمن المحدد قالو ليهم التصويت دا قفل من اربعه و نص و النتيجه ظهرت
| |
|
|
|
|
|
|
Re: الحيارى يفوزون بإنتخابات اللجان الشعبيه (Re: حسبو عكاشة)
|
دُرية, رُغم فعايل الزمن الذي فاجأها بمحطة الاثنين و سبعين عام, فهي ما زالت كما عمر الزهور, نحلة في تقاطعاتها و تداخلها من بيت لبيت مجامله بصورة مزعجة مما جعل لها قبول كبير في نفوس نساء الحي, بيد انها ساخرة بصورة يمكن ان تتفوق علي كمال ترباس في تهكماته و قفشاته فقد كادت ان تودي بحياة عامل السراير إثر عشراقة احدثها له الضحك بصورة هستيريه من ردها الحاضر حينما مر بجوارها, و هي عادة في الصباح تجلس مع احفادها امام بيتها تحت شجرة النيمة مر و هو ينده بصوت عالي (صلح السراير حديييييد) فألجمته بقولها, يا ولدي انت من زمن الرجال البكسرو السراير!!
-- بعد اعلان النتيجه انطلقت من دُرية زغرودة قوية و صرحت بأنهن فترن من كضب ناس اللجنه الفاتو و وعودهم بالدعم و الاراضي قالت ناس اللجنه كانو كُل ما الرئيس يكون عندو لقاء جماهيري بجو يقولو ليهم الرئيس الليله عندو لقاء معاكم في استاد المريخ او الهلال و حيكون في توزيع اراضي و دعم للاسر المتعففة
| |
|
|
|
|
|
|
Re: الحيارى يفوزون بإنتخابات اللجان الشعبيه (Re: حسبو عكاشة)
|
Quote: بعد نتيجة الانتخابات كباكه كان منتشي و يردد بصوت جهوري لا بد من يشرق صباح لا بد من يشرق صباح |
التحية لكباكا ....التحية لحيارى حى الضباط وابوكدوك وام بدة ... ياخ دا كلام مطمن وكلام زى الورد ويبدو انو سكة الحيارى فتحت ومافى طريقة تقفل قريب .......
اخبار التفاح شنو?
| |
|
|
|
|
|
|
Re: الحيارى يفوزون بإنتخابات اللجان الشعبيه (Re: osama fadlalla)
|
Quote: انتو الحيارى ديل كاسحين كده .. مايكونوا اتعلموا الخج كمان
---------
لكن درية مبالغة .... انا ذاتي قربت تكتلني بالضحك |
يا سمسم, كيفنك خج شنو كمان مع الحيارى ديل بجو عدييييل يستلمو الشغلانة و جنهم و جن الخج
-- درية الله يديها العافية زولة لقطة
| |
|
|
|
|
|
|
Re: الحيارى يفوزون بإنتخابات اللجان الشعبيه (Re: GamarBoBa)
|
Quote: تم تأجيل إنتخابات اللجنه الشعبية للحارة الرابعه بأمبده للمره الثانية وسط هتافات (شباب الرابعة للتغير) قاعدين قاعدين ليوم الدين
|
قاعدين قاعدين ليوم الدين شعار المرحلة بامبدة الرابعة التحية لمجيد الشفت و شلة الضباع اينما كانو
| |
|
|
|
|
|
|
Re: الحيارى يفوزون بإنتخابات اللجان الشعبيه (Re: حسبو عكاشة)
|
جمال كابوس, من اكثر شباب الحي حظوظاً, فهو لم يجلس في مساطب العطالة سوى ثلاث سنوات فقط بعد تخرجه, بعدها قُدر له ان يلتحق باحدى الشركات الخاصة بمرتب يسيل له لُعاب اقرانه في الحي, إذ انه يتقاضي 400 جنية شهرياً تراه ينهض باكرا بكامل هندامه و عطوره الما خمج, يمر بطبلية(باميلي) الذي اضحي كيس التمباك (ابو جنيه) عنده لا يحوي سوى خمس سفات فقط بعد قرار الدولة بتقليص اماكن بيع التمباك, و رُغم ذلك تجد كابوس حاضرا كل صباح لشراء الكيس ابو جنيه, ليس ذلك فحسب بل يتبعه بشراء جريدة قوون الرياضة بالرغم من انه مريخابي شبط كابوس لا يساوره شك انه مدير كبير, بالرغم من محاولة (رامي صاحب مورتا)إقناعه بأن راتبه لا يعدو ان يكون إلا ثمن البنزين عند افقر واحد من اصحاب الولاء بل تعدى ذلك بأن صرح ذات يوم أنه على وشك التقديم لإجازة سنوية يريد ان يُروح بها عن نفسه بماليزيا او مصر فكان رد (رامي) عليه حينها, والله مرتبك ابو 400 جنيه دا, المطار ما يوصلك
-- كابوس لم يسعفه الزمن لحضور الإنتخابات و ابدى غاية سعادته عند وصوله نبأ فوز الحيارى و طفق يصيح, ااااي دا الشُغُل دا الشُغُل
(عدل بواسطة حسبو عكاشة on 05-07-2011, 02:49 PM) (عدل بواسطة حسبو عكاشة on 05-07-2011, 03:07 PM)
| |
|
|
|
|
|
|
Re: الحيارى يفوزون بإنتخابات اللجان الشعبيه (Re: توما)
|
Quote: غايتو الحياري الفازوا عندنا بحيروااا عديل كده أما بعد يا حسبو فقد ضحكت حتي جاتني الحالة الهستيرية الشهيرة يعدلها عليك ياخي محل ما تقبل أنت و الحياري قول آمين |
امييييييييين يا توما, و جمعاً شباب اب روف ناحيتكم استلمو الشغلانة و حيرو ليك الخجاجين في روحهم
| |
|
|
|
|
|
|
| |