الفاتح جبرا .. في ذمة الله
نعى اليم ...... سودانيز اون لاين دوت كم تحتسب د. الفاتح يوسف جبرا فى رحمه الله
|
خُــرج النـور ود شمِّــه سفينـة نــوح
|
صدقني مشتاق للبلد
في كل لحظه عليّ تمر
ضيع سنيني الإغتراب
في الغربه ضيّعت العمر
طاري الديار الطاعمه ديك
زي قهوه في ضُل الضُهُر
كِسرَه ومُلاحه كمان فرِك
جرجير وشطاةً خُدُر
بصلاً مفقَّش بي طرف
سِعن الغُباشه هناك يكُر
خيتين سمِن
تمسح وشيك..
بعد الشبع..
شاياً..
( مَـقَـنَّـن )
فوق.
جمر. . وين المراييق البُطان ؟
كُر من فوتتُن..
يا غربه كُر.
ياشمّه وين باقي العوين؟
لا يبقو في السهله الفقُر؟
- ....
لوكي الصبر..
مالنور دُغُش..
دقش البحر
مالِص عريريقو ويكُر
- ....
- الحوت ؟
- طفش
ما باقي غير صير في الجسُر
يشبهلو مره بنات نعش
أو لمعه في سيف النصُر
في بالو ..
جبادةً تجيب
لو ما بتخيب
كُورين وفوقه عجيل بحر
أو حتي صِيرات ما بتضُر
،،..،،
لملم قسمتو وإتكل
تالا البيوت الفي الحُدُر
....
في خُرجُو.
..
.
برسيم الغنم
(سبروق) عشان بت بابكُر
مُسواك جريد لي (ود فِضيل)
(كرنوفه) لي شاي الضُهُر
ربطة سعف للتايه
ضوّاية الفريق
من يومه شايلالو النذُر
مُنجل بخيت الإتنسي
في تقنت الويكه المسا
نجامتو خُرتاية التمُر
برَّاد وفراراً قديم
ساويهُ لي اوتاد البقر
نِبله وملوده وكوم هنون
هِـلاّ المِسينيح (ود بدُر)
(كركجي) لي نورا وسُعاد
يادوب بيحلمو بالوِلاد
طعم الشهور الأولي مُر
(طاب) للبُطان الدرفنو
عرجونه للدق الجمُر
( قنقر ) عشان ضيف المقيل
شايلو كم عيدان سَمُر
لوبا البليله الفي الخُرُج
والمويتو تهدِّر من فجُر
سوط العنج المو خمج
تيله وصريمه ..
دِفيقات حمر
تمر..هندي..
(حُمبُق). وقُرام طير..
عشان شافعو الخِدير
نبقاً غُلاد شان فاطنه
أو باقي الوِلاد
بِرجوهُ زي ليلة القدُر
بِتِيخه طاعمه .. كم نصيحه
وما مسيخه
(مجقوبه) بي (خُوستُو) ام عِويد
خايف الحَمَار لا يبقي مُر
كشكوش زرازير مِنحشِر
وسط الهناببيل القبيل
مرفوعه للطير والجراد
لا يِنقُد العيش والتمُر
خايفلو من خيبة الحصاد
إن جاب ..
شكر
وإن خاب ..
صبر
مالنور.
بيكفيه،
الأجُـر .
.
|
|
|
|
|
|
|
|
Re: خُــرج النـور ود شمِّــه سفينـة نــوح (Re: فاروق أبوحوه)
|
الله عليك يا فاروق
عوقتنا يا اخي
وترترت الشجن كلو
تسلم يمينك
وووين صاحبنا المصطفى المحمود شان يشوف لينا مباصرة مع اللحن الجاهز دا
دا قلع راسو عديل واحتكار للكلام دا عشان صاحبي كدا بكون عملت ساتر من أسيادا ناس حبيبنا الموصلي وخدر وكل الجميلين
مفروض يباصر لي بعد دا كان انتا كان هو العدادات البتجي من وراها ولا شنو
بالحق استمتعت غاية الاستمتاع بهذا النغم العالي والأفكار المتناثرة في ثنايا هذا العمل الرائع
محبتي وامتناني
| |
|
|
|
|
|
|
Re: خُــرج النـور ود شمِّــه سفينـة نــوح (Re: بله محمد الفاضل)
|
Quote: الله عليك يا فاروق
عوقتنا يا اخي
وترترت الشجن كلو
تسلم يمينك
وووين صاحبنا المصطفى المحمود شان يشوف لينا مباصرة مع اللحن الجاهز دا
دا قلع راسو عديل واحتكار للكلام دا عشان صاحبي كدا بكون عملت ساتر من أسيادا ناس حبيبنا الموصلي وخدر وكل الجميلين
مفروض يباصر لي بعد دا كان انتا كان هو العدادات البتجي من وراها ولا شنو
بالحق استمتعت غاية الاستمتاع بهذا النغم العالي والأفكار المتناثرة في ثنايا هذا العمل الرائع
محبتي وامتناني |
بله يا فاضل..
لو مني مستني (الكلام) يا سلام عليك يا سلام
شن خليت وراك للزينا؟
ياهو الشوق للبلد يا بله يفعل بالروح العجب .
صاحبك محيميد متواري من فتره قول يا لطيف الله يستر لا يكون متشعبط في آله جديده الكمنجة قولنا الله يجير ناس محمديه وعربي فيها
يا زول البحر مفتوح خليهو يغرف ويعزف ويغني زي ما داير وإن جيت للعدادات كمان دي ما تحلم بيها عشان صاحبك دا أنا عارفو بعمل (كبري) نظام تقليل الشجن.
تسلم يا بله علي الدعم
كل الود
| |
|
|
|
|
|
|
|