الفاتح جبرا .. في ذمة الله
نعى اليم ...... سودانيز اون لاين دوت كم تحتسب د. الفاتح يوسف جبرا فى رحمه الله
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: الطيب شيقوق)
|
Quote: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب |
الاخ/الطيب شيقوق حبابك على الرغم من امتناعى عن الكتابة فى البورد منذ فترة, الا ان عنون هذا البوست لفت انتباهى, ودواعى مداخلتى هو "وسم الطباعة" الذى ورد فى عنوان البوست اعلاه وما اعرفه ويعرفه الجميع ان لكل قبيلة وسم يميز ابلها عن ابل القبائل الاخرى ولا يمكن ان يتشابه وسم مع آخر بطبيعة الحال,والا فقد قيمته كختم يميز جمل هذا عن ذاك وسم الطباعة وهو يشبه حرف اليو فى الانجليزية U, هو وسم ابل الزيادية اولاد جابر وهو وسم ابلناويوجد فى كثير من الدول العربيةمنها مصر والاردن وفللسطين وتونس ودول عربية اخرى, حسب ما شاهده وسأل عنه بعض من اقربائى الذين فاجأهم الامر. الى هنا والامر عادى فهناك كان اصل الناس والابل قبل ان يدخلوا السودان قبل دة قرون. ولكن الغريب فى الامر والذى لم اسمعه من قبل وجود وسم الطباعة فى السودان لغير الزيادية اولاد جابر وهو ليس الوشم الوحيد عندنا فهناك اوسام لابناء عمومتنا اولاد جربوع والاود مفضل, وثلاثتهم اخوان اى, (جابر, وجربوع, ومفضل) الاخوان الطيب شيقوق وود المحرب ارجو مدى شاكرا بتفاصيل هذا الوسم اذا سمحتم واى قبيلة تضعة على نوقها وجمالها فى السودان؟؟؟؟
Quote: وحاة النبي جملكم زي المدرب على اقتحام المظاهرات - يشقها ليك منكس ومنكس ومنكس وكمان يلفخ بكراعو الوراء يمين وشمال نامن يخلي الناس تقع وراهو ستيتة . |
يا الطيب يا اخوى الجمل ده "رزق ساقه الله لشباب الثورة فى ميدان التحرير", اتنحر نحرت عدوك وهو لا مؤاخذة بكون بقى غاز طبيعى اتفجر فى العريش....
التعديل لخطأ املائى
(عدل بواسطة محمد المختار الزيادى on 02-05-2011, 04:10 PM)
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: محمد المختار الزيادى)
|
العزيز شيقوق انت مشيت وين يابوي خليت البير لناس سلفاكير يكتبوها في حق ابوهم
من خلال ترددي الكثير علي مناطق السواح بالهرم فانني اشهد ان هذا الجمل لم يرد علي تلك المناطق وانه قادم من نواحي امبابة .. (نهاية درب الاربعين وسوق المواشي) .. الجمال القادمة من الهرم جمال مثقفة وتعرف اصول التعامل مع السواح واولاد الناس .. اما هذا البعير فانه (طائش) ولا يعرف الاتيكيت .. لذلك ارسل في هذه المهمة .. اذن فهو جمل امنجي مرتزق وابن ستين في سبعين ويستاهل كل اللي يجرا له !
Quote: وسم الطباعة وهو يشبه حرف اليو فى الانجليزية U, هو وسم ابل الزيادية اولاد جابر وهو وسم ابلنا |
جميل ما حدثنا به محمد المختار الزيادي عن وسم الزيادية .. ويبدو لي ان حديثه علي صحته يحتاج الي تكملة منه او ممن لهم معرفة اوسع فقد شاهدت في احدي القضايا التي اشتركت في تحقيقها وانا طالب بكلية الشرطة ان الجمل المسروق الذي احضره اللص الي سوق المواشي بالخرطوم بحري كان موسوما بدائرة علي جانب وجهه وكان الوسم كافيا للحكم بملكية الجمل لصاحبه وسجن الحرامي .. الاغرب ان الجمل بعد المحاكمة سار وراء صاحبه حتي خرج من السوق ..
تعال صاد يا اخي الزيادي ولا تترك البورد فهو بحاجة لمن يثرونه بالمفيد مما يختزونون من ثروات.
عمر علي حسن
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: الطيب شيقوق)
|
اخي وعزيزي محمد مختار الزيادي
تحياتي لك ولجميع اهلي الزيادية في غربنا الحبيب
Quote: على الرغم من امتناعى عن الكتابة فى البورد منذ فترة, الا ان عنون هذا البوست لفت انتباهى, ودواعى مداخلتى هو "وسم الطباعة" الذى ورد فى عنوان البوست اعلاه وما اعرفه ويعرفه الجميع ان لكل قبيلة وسم يميز ابلها عن ابل القبائل الاخرى ولا يمكن ان يتشابه وسم مع آخر بطبيعة الحال,والا فقد قيمته كختم يميز جمل هذا عن ذاك وسم الطباعة وهو يشبه حرف اليو فى الانجليزية U, هو وسم ابل الزيادية اولاد جابر وهو وسم ابلناويوجد فى كثير من الدول العربيةمنها مصر والاردن وفللسطين وتونس ودول عربية اخرى, حسب ما شاهده وسأل عنه بعض من اقربائى الذين فاجأهم الامر. الى هنا والامر عادى فهناك كان اصل الناس والابل قبل ان يدخلوا السودان قبل دة قرون. ولكن الغريب فى الامر والذى لم اسمعه من قبل وجود وسم الطباعة فى السودان لغير الزيادية اولاد جابر وهو ليس الوشم الوحيد عندنا فهناك اوسام لابناء عمومتنا اولاد جربوع والاود مفضل, وثلاثتهم اخوان اى, (جابر, وجربوع, ومفضل) |
سبحان الله والله يا محمد اخوي قصدت ادراج مفردة الطباعة في عنوان البوست وانا على يقين ان الكثيرين ان لم يكن جميعهم لا يدركون معناها فلله درك يا اخي وانت تستوقفك هذه الكلمة . نحن من قبيلة رفاعة ولدينا الكثير من الاوسام فيها الطباعة والمحارة والشخلوب والقطفة - ولعلمك اخي محمد عندما كنت اعمل محاميا في السودان كنت اميل كثيرا لاستعمال تلك المفردات لا سيما في قضايا السرقة . الشاهد اخي محمد ان القضاة في السودان لم يكونوا من نفس المنطقة التي يعملون بها وانما يتم نقلهم من الشمالية ودارفور والشرق والجنوب اليها . ولا انسي عندما كنت محاميا في قضية سرقة ومثل شاهد امام محكمة كان قاضيها نقل حديثا من الشمالية فكانت جميع الاسئلة التي اطرحها للشاهد عن هذه الاوسام فغضب القاضي ورمى القلم على الطاولة وقال لي ( يا استاذ انت بتسأل بأي لغة؟) قلت ليهو بسأل بلغة الطباعة و الشخلوب والمحارة انت سارح وين يا مولانا ؟
الطباعة اخي الزيادي موجودة عندنا وبنفس الشكل الذى يستعمل عندكم .
Quote: الاخوان الطيب شيقوق وود المحرب ارجو مدى شاكرا بتفاصيل هذا الوسم اذا سمحتم واى قبيلة تضعة على نوقها وجمالها فى السودان؟؟؟؟ |
عندنا نحن الرفاعيون والقواسمة يا محمد اخوي
معزتي
(عدل بواسطة الطيب شيقوق on 02-06-2011, 09:26 AM)
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: الطيب شيقوق)
|
خالي ابو امير
كيف صحتك وافراد الاسرة الميامين ؟
Quote: انت مشيت وين يابوي خليت البير لناس سلفاكير يكتبوها في حق ابوهم |
البير يا خال عرفت الفيها وغطاها - لقيت عودنا فيها عود انتاية وحياتك ( الله يكفيني شر الجندريات ما يجن ناطات يهجمنى في الكليمة دي - بس هنّ لا يفضلن الاطلاع على بوستات الجمال يا خال !! عشان كدا ختيت في بطني بطيخيييييييي صيفييي)
Quote: اما هذا البعير فانه (طائش) ولا يعرف الاتيكيت .. لذلك ارسل في هذه المهمة .. اذن فهو جمل امنجي مرتزق وابن ستين في سبعين ويستاهل كل اللي يجرا له ! |
ههههههههههههههها اها شفتو كيف بلقط بكراعو وبجميع الاتجاهات .
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: الطيب شيقوق)
|
الطيب!!!
Quote: البير يا خال عرفت الفيها وغطاها - لقيت عودنا فيها عود انتاية وحياتك ( الله يكفيني شر الجندريات ما يجن ناطات يهجمنى في الكليمة دي - بس هنّ لا يفضلن الاطلاع على بوستات الجمال يا خال !! عشان كدا ختيت في بطني بطيخيييييييي صيفييي) |
أههههههههها ده الكلام الما بحلك منه جمل الامن ولا الطباعة ولا ولا
لكن ورطتك الكبيرة فى إصدار الأحكام على بنات آدم "لا يفضلن الاطلاع على بوستات الجمال يا خال" ما تتورط فى هكذا أحكام مثلك ومثل أولاد حواء الذين يتندرون بنقص النساء عشان وعشان. فدحين يا خوي إما أن تسحب الأنتي فيمنست مقولة أعلاه وإلا طالبنا وسيسندنا ود المحرب إن شاء الله بأن ترفع يديك وتقبل على الحيطة حتى يستقيل حسني مبارك.
واعلم حفظك الله أن الجمل لا محالة سوداني الجنسية ولا يهمنا حالة كونه رفاعي واللا بطحاني واللا من حديقة الحيوان. هذا وقد أبلغنا كل جمعيات الرفق بالحيوان لتطالب بمنع تعذيب النوق بالحديد المحمى وقد أجلنا شكوانا لجمعيات الفيمنسم حتى نري نتائج هذا البوست. وفي الختام لا يسعنا إلا أن نشكركم على كريم تفضلكم بإخراجنا من متابعة الجزيرة وأخريات ( هل لاحظت أن صفه الأنوثة تغلب على هذه القنوات) والزغللة ومتابعة الألوف المؤلفة تموج في الميدان ولو لبضع دقائق.
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: الطيب شيقوق)
|
Quote: تحياتي لك ولجميع اهلي الزيادية في غربنا الحبيب سبحان الله والله يا محمد اخوي قصدت ادراج مفردة الطباعة في عنوان البوست وانا على يقين ان الكثيرين ان لم يكن جميعهم لا يدركون معناها فلله درك يا اخي وانت تستوقفك هذه الكلمة . نحن من قبيلة رفاعة ولدينا الكثير من الاوسام فيها الطباعة والمحارة والشخلوب والقطفة - ولعلمك اخي محمد عندما كنت اعمل محاميا في السودان كنت اميل كثيرا لاستعمال تلك المفردات لا سيما في قضايا السرقة . الشاهد اخي محمد ان القضاة في السودان لم يكونوا من نفس المنطقة التي يعملون بها وانما يتم نقلهم من الشمالية ودارفور والشرق والجنوب اليها . ولا انسي عندما كنت محاميا في قضية سرقة ومثل شاهد امام محكمة كان قاضيها نقل حديثا من الشمالية فكانت جميع الاسئلة التي اطرحها للشاهد عن هذه الاوسام فغضب القاضي ورمى القلم على الطاولة وقال لي ( يا استاذ انت بتسأل بأي لغة؟) قلت ليهو بسأل بلغة الطباعة و الشخلوب والمحارة انت سارح وين يا مولانا ؟ الطباعة اخي الزيادي موجودة عندنا وبنفس الشكل الذى يستعمل عندكم . عندنا نحن الرفاعيون والقواسمة يا محمد اخوي |
الاخ/ الطيب شيقوق سلام........... اشكرك على التوضيح, وفعلا سبحان الله وجاى ليك برواقة فى الموضوع ده.
تحياتى
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: عمر علي حسن)
|
Quote: تعال صاد يا اخي الزيادي ولا تترك البورد فهو بحاجة لمن يثرونه بالمفيد مما يختزونون من ثروات. |
الاخ/ عمر علي حسن سلام.......
اشكرك على هذا الاطراء, وليتنى من الذين يثرون البورد بمثل هذه المواضيع, فقد طلبت كثيرا من الباشمهندس بكرى ابو بكر حساب لبعض الاخوان من ابناء عمومتى الذين يعرفون تفاصيل هذه الاشياء اكثر منى لانهم عاشوا حيث الابل والسرحة والنشوق الخ..., ولكنى لم افلح فى ذلك وليته فعل. اما فيما يتعلق بالوسم وموضع البوست فاليك بهذا الخيط لاحد المهتمين بالتراث وما يتعلق بالابل الخ...
http://oneway.maktoobblog.com/17/%D9%82%D8%A8%D9%8A%D9%...4%D8%A3%D9%87%D9%84/
واذا اردت المزيد فما عليك الا ان تكتب فى قوقل هذا الاسم "محمد صالح الزيادى" ستستمتع بهذا الشاب وكتاباته التى تأخذك الى عوالم الصفاء والنقاء حيث البادية بكل تفاصيلهاالتى لا تحصى ولا تعد, وله مدونة مفيدجدا ليته كان بيننا ليثرى هذا الموضوع واخرى كثيرة.
تحياتى
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: الطيب شيقوق)
|
يا ود شيقوق يا رائع.. التحية لك ولمتداخليك الظريفين. أها أخونا خالد شيخ العرب دي ما بنرضى فيه. عشان كدي قلنا نشاركم بي الكلام دي!
بَعَدْ ما قُتّ أَرْقُدْ ، وُنَفْسِي تَحْلَى تروْقْ جِيْتَ البورد لِقَيْتَ حبيبنا ود شيقوق قال خالد بِسَدّرْ للفراعنة النّوْقْ وُدَلّ عليهو بالطَبّاعة والسَفَروْقْ
****
ود شيقوق كلاَمْك فيهو إنّ وْكَانْ شِنْ لَمّ العَرَبْ والُجْوَطة والبُمْبَاْن قالْ خالدْ تَآمَرْ هُوْ واللمْرِيْكَانْ والَجمَلْ الَمسرّجْ "مَيْدِي إنْ سُوْدانْ"*
*****
الله يْكَفّي شَرّ الشّيْنِي والسَكَلابْ ود شيقوق مَرَقْ ضَنّيْتُو عندو حْسَابْ قال شيخ العرب سَدّرْ لنا الإرهاب وغايتو الَمْوَلى إسْتُرْ مِنْ حُكُمْ أوْكَامْبْ
------- * إكتشف المتظاهرون في مصر أن علب البمبان مكتوب عليها "Made in the USA"
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: شعبان شريف)
|
شوشو
Quote: هوي يا شيقا إنت يا عصبجي كمان بقيت مسنحنجي حتى الجمل داك الموسّم بقى بلطجي حالف يمين للثورة قال راح يجهض لكن شباب ما ورّكوه شان ينتج بولاً كتير للسرطنة يستخرج تب عدّموه النقطة شان تاني ما يجي متهجج الساعين كمان عدموهم كل بهرج ثوار يمين راكبين عناد أكترمن اللي حكم تلاتين يجي مسكين قضّاها عمره في سلاحه متدجج |
المسنوح الليلة فاطر بويكييييييييييييييي؟
يا اخي فردتنا عزيز فاقد باسويردو وبكري ما رجعو ليهو لسه
شعبان
والله كلامك صاح شفت الجنز كيف ؟ وحاة الله ما خايل في الجمل الاصهب دا .
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: عبدالفتاح أبوشيمة)
|
Quote: حر عنافي نسل اماتو قاطع الشك |
لا تغرنكم وجاهة هذا البعير الخائن المنطلق ضد ارادة الشعب المصري وعلي ظهره (جنجويد) مصري لابس جينز .. وللذين لا يعلمون فإن الجمل يفهم ويعرف ويرفض ما لا يريد .. ولو انه كان حرا ونسل اماتو قاطع الشك لرمي براكبه وبرك وسط الجماعة داخل الميدان ..
النصر لشباب مصر
Quote: الله يكفيني شر الجندريات ما يجن ناطات يهجمنى في الكليمة دي - بس هنّ لا يفضلن الاطلاع على بوستات الجمال يا خال |
الطيب اخوي انا كلمتك البنات ديل اتكافي شرّهن .. ديل كان اتلمن عليك في البوست دا الا يحلك الحلا بله .. والله الحلا بله ذاتو ما اظنه يحلك ...
Quote: أههههههههها ده الكلام الما بحلك منه جمل الامن ولا الطباعة ولا ولا
|
جاك كلامي؟
Quote: إما أن تسحب الأنتي فيمنست مقولة أعلاه وإلا طالبنا وسيسندنا ود المحرب إن شاء الله بأن ترفع يديك وتقبل على الحيطة حتى يستقيل حسني مبارك |
اسمعي يا اسماء يا بت اخوي .. الزول ده انا خاله لزم وضامنه لي قدام .. حسني مبارك قال يقعد تسعة شهور وشيقوق ما يستاهل يقبّل علي الحيطة لامن يمشي او ربنا ياخده .. دحين فوّتي لينا دي واتفرغي للجماعة البيسجلوا الوسم .. ولعلمك تسجيل الوسم في السودان موجود بحكم انه الشيوح والرعاوية وشيوخ اسواق المواشي كلهم عارفين الاوسام ويميزون بها المدسوسه وسط المراح .
عمر علي حسن
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: عمر علي حسن)
|
Quote: انت ما بتسمعي الواحد بتندر بقول اخوك يا فاطمة او اخوك يا اسماء وبشنق الطاقية في الهامة وبدق كراعو تااح وسط الفسحة وينجلد سوط عشان يوري بنات عمو انو الفارس البيحمي عروضهن .
وماك سمعتي بقولوا هييييييييييييع انا عشاء البايتات ومقنع الكاشفات ؟
الكلام دا فلفليهو بتلقيهو كلو مصطف لجانب حقوق المرأة يا اسماء اختي . |
الطيب! كان فلفلته بطلع مافي صالحك. كدي هاك فلفلة خفيفة كدي هسع الكلام ده قال شنو عن النسوان؟ ولا حاجة. ده واحد استخدم "ضعف" النسوان عشان يشكر روحه دي طريقة لابداء الرجولة ولا علاقة لهابحقوق المرأة. حقيقة الأمر ما هي إلا تكريس (شفت تكريس دي قوية كيف) تكريس لعدم أهمية النساء وحصرهن فى دور تقليدي لا يزيد عن كونهن مساعدات لاظهار رجالة الأخ وود العم. ما شفت الرجال بتعاملوا كيف مع الإغتصابات إبان الحروب. المرأة غير معنية بهذه الجريمة التى تقع عليها بل المعني بهاهم أخوان فاطمة المعني بها هي رجولتهم المتمحورة (تاني واحدة. متمحورة) في النساء. ومتى ما اخترق العدو الأنوثة ذهبت رجولة الرجال. وتبقي النساء حاملات لوصمة الحرب وقدتقتل الواحدة نفسها فس سبيل أن تقي أخوان البنات هزيمة صنعوها بايديهم. ما شفت أخوان البنات الدايرين يقهروا الناس بالشريعة كيف ببدوا بالنسوان؟ واحد جلد واحد رجم وواحد حبس في البيوت؟
الطيب يا أخوي ما تقلب علينا المواجع خلينا مع كوي الجمال والبقر أخير نسمع كلام عمر أخونا ده.
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: الطيب شيقوق)
|
خالي ابو امير
Quote: لا تغرنكم وجاهة هذا البعير الخائن المنطلق ضد ارادة الشعب المصري وعلي ظهره (جنجويد) مصري لابس جينز .. وللذين لا يعلمون فإن الجمل يفهم ويعرف ويرفض ما لا يريد .. ولو انه كان حرا ونسل اماتو قاطع الشك لرمي براكبه وبرك وسط الجماعة داخل الميدان .. |
لا يا خال الجمل دا لا هو حر ولا هو منسل - دا بكون خامشنو من المايقوما ساى وودوهو الاهرامات ياكل في التمور والزيتون والعنب ويشيل السياح والسائحات المرطبات يقدل بيهن زى السايق ليهو عصارة .
دحين حاريهو يفرط ليك في النعمة دي ؟ قال تحرير قال
Quote: الطيب اخوي انا كلمتك البنات ديل اتكافي شرّهن .. ديل كان اتلمن عليك في البوست دا الا يحلك الحلا بله .. والله الحلا بله ذاتو ما اظنه يحلك ... |
والله ولدك يسردب ليهن سااااااااااااااااااى يا خال ما تنزعج
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: الطيب شيقوق)
|
Quote: كان فلفلته بطلع مافي صالحك. كدي هاك فلفلة خفيفة كدي هسع الكلام ده قال شنو عن النسوان؟ ولا حاجة. ده واحد استخدم "ضعف" النسوان عشان يشكر روحه دي طريقة لابداء الرجولة ولا علاقة لهابحقوق المرأة. حقيقة الأمر ما هي إلا تكريس (شفت تكريس دي قوية كيف) تكريس لعدم أهمية النساء وحصرهن فى دور تقليدي لا يزيد عن كونهن مساعدات لاظهار رجالة الأخ وود العم. |
اها يا اسماء هسع علمناكن عشان التحليلات والتكريسات دي ؟. طيب مالكن بتزغردن لما اخوان فاطنة يشنقوا الطاقية وإتنبروا بيكن ( إتنبروا دي حلوة خلاص بتذكرني استاذ دلدوم الختيم اشقر عندما كان قاضي في جنوب كردفان فكان لما يقرأ التهمة charge على المتهم ويقول ( انا القاضي دلدوم الختيم اشقر اوجه اليك تهمة تحت المادة كذا ......) فكان اهلك عرب الحوازمة بقولوا هيييييييييييع دلدوم ما بحكمك الا يتنبر ليك بنفسو اول حاجة ) يا حليل ال committal proceedings ويا حليل ال framimg of charges .
Quote: الطيب يا أخوي ما تقلب علينا المواجع خلينا مع كوي الجمال والبقر أخير نسمع كلام عمر أخونا ده. |
طولي بالك يا اسماء اختي نحن اخوان فاطنة عندنا المرة كانت بقت ........ ما ............ الرأس
خالي عمر اجري تعال الليلة جبتها ليك بي ضقلها
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: الطيب شيقوق)
|
لامِن شُف صورة ها الجمل المُقْتحِم الخلق، طِريت "نجي تود"* زامِلتي غنيت وقُتْ:
ما جلبوك مكادا فوق بِلادي ويمانِيا عام في الخلِق ولِسيدو سوا تمانِيا يِزِمْ وليهو قومه مكنه مِن ألمانيا حليل "نَجّي تود" الهبتو في سانيا
ــــــــــ عام في الخلِق ولِسيدو سوا تمانِيا: عِندما يشِق المُركب الماء بِمُقدِمته، يرسُم هذا التَوغُل شكل العدد 8 ــــــــــ * نجي تود: بالنوبِية تعني "ود الخلا" (بِالله عطِشو لي الجيم الفي "نجي" وشدِدوها).
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: الطيب شيقوق)
|
Quote:
الف سلامة والمنبر عادت اليه نضارته
يعلم الله افتقدناك
والله قدر ما حاولت افتش الصورة الجبتها دي ما لقيتها
يا اخي الف شكر على تلك الصور المعبرة خاااااااالص
|
تسلم ويسلم ذوقك.. الأصل..
تعرف ياخوي معركة داحس والغبراء دي أكثر حدث له اثارة بميدان التحرير.. وهي نقطة التحول التي سجلت خواء النظام وافلاسه..
ناس الحكومة بعد الفضيحة دي حاولوا يشوفوا ليهم مخارجة.. قالوا ناس الجمال ديل هم بتاعين الهرم ونسبة لتوقف وصول السياح اليهم عرفوا السبب من الثوار بميدان التحرير.. عشان كدا جوا يحاربوا من قطع رزقهم.. وحبل الكذب قصير... الشباب عرضوا كارنيهات الأبالة المقبوض عليهم كأسرى.. وطلعوا عساكر..
تحياتي
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: Abdlaziz Eisa)
|
Quote: طولي بالك يا اسماء اختي نحن اخوان فاطنة عندنا المرة كانت بقت ........ ما ............ الرأس
خالي عمر اجري تعال الليلة جبتها ليك بي ضقلها
|
ضقلها براهو ؟ انت جبت الفاس وشق الراس وعايز ليك شبكه والجماعة ديل شبكتهن ما بتنحل ... ابقي مارق علي الطباعة يمكن تخارجنا من تهمة انتماء هذا البعير لاصول سودانية
Quote: الشباب عرضوا كارنيهات الأبالة المقبوض عليهم كأسرى.. وطلعوا عساكر.. |
يادي الخيبة .. لقد كان للهجن والهجانة تاريخ ناصع في الجندية المصرية ويظل الجمل بطلا عربيا ولكن ادخاله في ميدان التحرير سيخصم من رصيد الحب المختزن لاسلافه ونسله.
عمر علي حسن
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: عمر علي حسن)
|
اهداء خاص للاخوان عزام فرح, والطيب شيقوق, وود المحرب, وعمر علي حسن والمرور الكريم
من اغاني الجراري عند الزيادية
دق الصوط ماشكره ساَكت هوشه وسكره سمح الموت والوكره فوق عرقوب البكره
يا سمحات في الدجه وياباينات في اللجه عندك يوم يا ام نجه لا نسام لا عجــــــه
مرقوبه ما بتتآمن عايزه كلاش ام يامن يوم حزموهن قامن حتي القوز إطآمــن
جقله ام زور خدّاعه جادعه رجال جماعه اليوم البرمي الساعه بتكوس لي ورتّاعه
مادة حنجورك...للفرع الما طولك...ربي يكافي شرورك...شايلة الموت في ضهورك
نسمع حس كلابهم .........قلت الجو غيابهم..... الناس النطو حسابهم..........نعل طيبين في رقابهم
حس رصاصهم ولع ما فيهم زول بتخلع بكان كلدنق بتضلع بالفشفاش بتبرع
الشاعر عبد الرحمن مكين ( ابو شوقي ) احد شعراء بادية الزيادية الذين لا يجارون فى الدوبيت والتوية والجرارى... الخ
العنافيه ام كزم ..العالى فيكى الدوف معشوقك بعاين ..ما بقل الشوف الاحزان تمادت والقلب ملهوف وكل دقيقه ينتابو الشعور بالخوف
الليله اب عرج كاش الارض بي اخفافو سوّى علال ملولو من عسف رسّافو جمع البلد قدّامو بالنضّاره كمشو وشافو ده الصّقر الهوى وعملت صفير اطرافو
البندق ملمّع أجمل من عروس القيله الرصاص كتير ..بي سرجي عامل ميله ود ام عاج بادي الخبّه كاكليت ريله رشح دومو وقرن فوق جيدو مثل التيله
امّك شوش ..شرّاده وحليبها محرّم زورك كفّه وفقرك وترها مبرّم حركة خفّك الجيم الحديدو مخرّم نوبه وطار دراويشاً فكيهم كرّم
طاردت السراب لي وصولو عندك نيّه سوّيت الارض قدّامك حفر وهميّه العفش كتمتو ...صيّحت الضيار زنديه السوّيتو يا قنفود كتير ما شويّه
بطنو اتضمّرت واندرج الوتر في قوامو ود ابو عنقره العاتي وقويّه عضامو من اخفافو سوّا علال ورا وقدّامو هزّ الكور ..بكي وضجّه ورطانه كلامو
طير النورس العوام ابيض شبّه ريلاً خبّ ..مزناً كبّ عالي سنام صبح مابيني نوى يعضّيني .. جي ملاقيني زي كافر الافاعي السّام تغيّر كلّو يصاول ضلّو يبشر فوق قفاهو يبلّو عند رغّاكي والتّرزام ...
................................................................................................ حاشيه : العنافيه :الناقه الاصيله (يشبه معشوقته بالناقه الاصيله ) الدوف : الصدر الضيّار : قد السرج ..والقد بكسر القاف هو القديد اي السيور الجلديه التي تستعمل لربط السرج القنفود : عكّاز محدّب ( قرجه ) ويشبه الشاعر حدبة الجمل بحدبة العكّاز
العلال : الغبار الأخفاف : جمع خف وهو اسفل رجل الجمل الكور : السّرج الرغاء : صوت الابل التّرزام : حنين الابل بصوت منخفض
تحياتى
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: الطيب شيقوق)
|
هي يا الطيب زعل شنو أنا الناس البزعل منهم ما بدخل عندهم بالمرة بدخل في بوستك عشان حسك الفكاهي العالي واريحيتك التى تستضيف الفمنستية زي أنا مارقني سمي القدر غداي أمتحانات وأوراق وتصحيح الله وامان الله عربيتي مدفونه في 12 بوصة الليلة ما شفتنى فوت الضقلها يكركب الفوق دي كويس الشفت ردك قبال أقبل مارقة ترى جاك ود الزيادي بي هديته الما خمج خليتكم بى عافية يا عمر أحرس الزول ده ما يجيب له واحدة تغلب الطب والطبيب
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: الطيب شيقوق)
|
Quote: ود الزيادي
جايييييييييييك |
يا ود شيقوق كن جيتنى ولقيتنى مرقت "بكسر القاف" وقبال ما نتلاقى هاك بكا عبد الرحمن مكين ( ابو شوقي ) فى الغزل ووصف المحبوبة
من شُفتك نسيت نفسي ومشيت بي وراكي عجبني جمال عيونك والكفل المعلّي قفاكي يا الصبتيني بــي مس الجنون في هواكي قلبـي فقدتو .يـا السمحه ..واظنّو معاكـي
يا اللادن قوامك ولون اديمك تبرى شعرك عتمة الليل اب نيازكا تجرى يا ام حبا مقلقنى ومقلل صبرى تكتلى فى العشاق من دون قصد ما بتدرى
انجرح الفؤاد والعله زادت عله المشوار طويل ..والحيل البشيل انشل يا معلقنى بحبال الهوى ..وغلبت اتدلى وصبحت مواجه العقد الابت تنحل ..
بعد ما نسيت خلاص اليوم بقيت اتذكر خطر بى بالى انتى معاى وحالى ميسر زمن الحظ مخضر ..ما يبس ..ما اتكدر زمن العز بعيشو ...عند العرب والبندر
البنشاف قريب ورجلى ما بتمشيلو يتبسم بروق مطرا مكمل ليلو الظالمنى واتحيرت فى الاشكيلو حراسو النمر ...الزول البجيهو بشيلو
العنافيه ام كزم ..العالى فيكى الدوف معشوقك بعاين ..ما بقل الشوف الاحزان تمادت والقلب ملهوف وكل دقيقه ينتابو الشعور بالخوف لمحة سنك البرق المعاهو الزيف لو تتبسمى يكب المطر فى الصيف شبيهة البندق النيشانو ليهو عريف يا العاتى اللجوج اللى العقال ما بقيف
حاشيه : 1_العنافيه :الناقه الاصيله (يشبه معشوقته بالناقه الاصيله ) الدوف : الصدر 2-لمحة : بريق الزيف : تيار هواء بارد يصاحب نزول المطر البندق النيشانو ليهو عريف : يقصد الكلاشنكوف العريف :مصغر عُرف بترقيق الراء ..وهو يقصد به مقدمة البندقيه (النيشان ) العاتى ،،اللجوج :كلمات تعنى القوه مع النفور.. العقال : هو قيد يوضع فى رجل الجمل بعد ثنيها حتى لا يسرح بعيدا
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: الطيب شيقوق)
|
Quote:
امّك شوش ..شرّاده وحليبها محرّم زورك كفّه وفقرك وترها مبرّم حركة خفّك الجيم الحديدو مخرّم نوبه وطار دراويشاً فكيهم كرّم
بطنو اتضمّرت واندرج الوتر في قوامو ود ابو عنقره العاتي وقويّه عضامو من اخفافو سوّا علال ورا وقدّامو هزّ الكور ..بكي وضجّه ورطانه كلامو
|
يا للجَمال .. في وصف الجـمال
اخي الزيادي ارجوك تعال صاد ....
Quote: على الرغم من امتناعى عن الكتابة فى البورد منذ فترة |
قال امتناعي عن الكتابة قال .. (جيب) وتعال ياخي .. ولو بكري ما اداهم باسويرد جيب منهم الكلام المرصع بالجواهر ده ونزله بي باسويردك عشان نعمل (فلتره) للطرور المالي السوق وبكري بجيك براه يسأل ويصرف باسويردات وعناوين في المجله كمان .
عمر علي حسن
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: الطيب شيقوق)
|
Quote: وكاني بالشاعر الفحل الصادق حمد الحلال وهو ينشد مسدار قوز رجب ويقول :
شَدَّيتـــو رِكِبْ مِن قـُــــــوز رَجَبْ باكْريَّة
نَفَى شَنْشُــونو* واتْلحَّضْ بَلا الغَازيـِّــــــة*
اسَلَّكْ فيــــهو لامِنْ وَخَّر الظَبْطيـّــــــــة
هَسـّــــعْ حَاكَى لي المِنْ كوستي شََال نَقْليــة
نتمنى ان يجود علينا شعراء المسادير بمسدار ميدان التحرير.. |
شكرا شكرا اخي عبد البديع المبدع
فعلا نحن في حاجة لسماع دوبيت عن الصمود المصري في ميدان التحرير
الخال عمر وين يا اخوانا ؟ عندو ورد (بكسر الواو والراء) ولا شنو؟
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: عمر علي حسن)
|
Quote: يا للجَمال .. في وصف الجـمال
اخي الزيادي ارجوك تعال صاد ....
Quote: على الرغم من امتناعى عن الكتابة فى البورد منذ فترة
قال امتناعي عن الكتابة قال .. (جيب) وتعال ياخي .. ولو بكري ما اداهم باسويرد جيب منهم الكلام المرصع بالجواهر ده ونزله بي باسويردك عشان نعمل (فلتره) للطرور المالي السوق وبكري بجيك براه يسأل ويصرف باسويردات وعناوين في المجله كمان . |
العزيز/ عمر على حسن سلام... الحديث عن وصف الابل عند شعراء البادية يطول ويطول, فما اعذبه رغم صدقة, او كما يقول محمد صالح الزيادى "إذا كان الشعر العربي هو ديوان العرب فإن الإبل عمود مهم من ابجديات هذا الديوان, لعلنا عندما ننتقي من إهتمامات فحول شعراء الزياديه ما يتعلق بالابل فأننا نكون بذلك قد ارجعنا السيف الي غمده والفرع الي اصله, الإبل لم تكن راس مال يتفاخر بها شعراء الزياديه ولكن كانت إلهاما يشكي اليه الشاعر او الشاعره والوصف بعد المشاكاه بالوصف الدقيق"
Quote: جيب منهم الكلام المرصع بالجواهر ده ونزله بي باسويردك |
كده ريحتنى الله يريحك دنيا واخرى, ما بنقدر على كسر الخواطر, ويا ريت بكرى ابوبكر ما يكسر بخاطرنا
واليك مزيدا من الوصف والجمال ************************** لبنك عسيل دافي ولدك حُر عنّافي جيّابة الشّر من مافي تبّرعتي بالصّافي
لبنك سكّر نقّع جيلك كله تفقّع تمُر دريجي الوقّع خسرت ما بتترقّع
جَقله ام زور منعُوله عامَسه الدّور بي طُوله اليوم البرمي شروره بتكوس لي وبتدوره
جقله ام زور خدّاعه جادعه رجال جماعه اليوم البرمي السّاعه بتكوس لي ورتّاعه
مرقوبه البتهلّك في القيمان بتحرّك ام درباً قاسي مدرّك رميتي رجال يا شرّك
الما بقدر لشرورها ما يسعاها يدورها جقله اللاّب بذّورها شايله الشر في صدورها
كيرك هايج بعم ودربك مجاري الدم افرزي لي سيادك كم خليني نجيب النّم
جيابة الشيك بالنوته وكر دربك بي موته يوم الحار والجوطه فارسك نعرف فوته
مرقوبه يا ام جقلاب رمّايه للارقاب فارسِك ركز ما بهاب الموت بدور لو اسباب للمزيد عليك بهذا الخيط http://www.tajooj.com/vb/showthread.php?t=1144
يقول ابو شوقي ليلك طمس الانجم بروقك وجًت رعدك كرً انفجرت سحابتِك سجًت سيلك عمس الوادي وضفادعك ضجًت بارك ( زملِك ) بالضحويه عربِك شدًت كان بتدور زيادة جر الخيط ده http://elzayadi.maktoobblog.com/
تحياتى
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: محمد المختار الزيادى)
|
الله اللللله اللللللللللللللللللللللللللللللللللللللللللللللللللللللللللاه
الا تري معي ان الشاعر كان فوق ظهر هجينه يسير به في خطو لاهو خب ولاهو رمح ، فيهدهد وقع اخفافه قلبه فتفيض البحور علي وزن تلك الخطي ..
انظر اليه وكأن ذراعيه مطبوقان علي جانبي ابطيه ، ويده قابضة علي الرسن دون شد ، وساقاه امامه احداهما مخلوفة فوق الاخري في زهو ، وعمامته تتقافز منها بالجنب حاشية مطرزة كأنها توحي للناقة زمن التوقيع بخف لا يطأ الاحجار ولا يتعثر .. فيحئ الوقع وبحر الشعر توائم .
Quote: مرقوبه البتهلّك في القيمان بتحرّك ام درباً قاسي مدرّك رميتي رجال يا شرّك
|
Quote: مرقوبه يا ام جقلاب رمّايه للارقاب فارسِك ركز ما بهاب الموت بدور لو اسباب
|
اليس هذا علي وزن خطي المرقوبة !
الله اللله أللللللللللللللللللللللللللللللللللللللللللللللاه .. ياخي
عمر علي حسن
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: الطيب شيقوق)
|
اخي عبد البديع المبدع
Quote: ضهــــر قلعة مبـــــارك جيتــــــو تلعب شد محارب اللســـــَّة* والكُرباج وقولة " هد "* علــــــى التالاك إحســـــــــــان رزقو ما بِنْعد يومك كُلـــــّو تمصع ما انلحـــــــــق لك حد
انظر الى تطابق قلعة مبارك مع مظاهرات ميدان التحرير |
يا سلام يا بديع والله كلام جميل وحلو - يا اخوانا جيتو تلعب شد بقصد جيتو عاقل كراع وناقز متلهمو ومنها لعبة شددت المشهورة - يا اخوانا خالي عمر جرب اللعبة دي . انا غايتو كنت زمان بعضى العراقي بسنوني وبعقل الكراع وبجري بيها زى جري جمل ميدان التحرير دا .
والكرباج هههههههههههههها الكرباج هو سفروق مانع بالحيل .
المصعة بقصد بيها مصعة الجمل في الناقة الحايلة تلقاهو رشح البول ودوماتو سايلة ودلاعتو انبوبة
هيييييييع
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: الطيب شيقوق)
|
Quote: معاى يا خال ولا سارح؟ |
معاك معاك .. ومستمخ بلحيل
Quote: - يا اخوانا خالي عمر جرب اللعبة دي |
هيييييع .. امانه ما شدّينا وحرّينا .. انت قايلنا زي ناس امير اللعبهم كله بالريموت كنترول ! خالك ياولد ركبيه وكيعانه وسيقانه ما فيهن سنتي واحد خالي من الجروج .. زي جسم علي الكرار ليس فيه موضع الا وبه طعنة رمح او ضربة سيف .. وساموت علي سريري كما يموت البعير بعد العمر الطويل لي ولك .
عمر علي حسن
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: عمر علي حسن)
|
الطيب سلااااااااااااااام انت تب والله زولنا تعرف الوسم كمان هيع عافيت منك اولاً انا والزيادي اخوان نحن في الزيادية طباعة ووسمنا طباعة كما زكر محمد المختار الزيادية في مصر موجودين كثير لو تذكر مذيعة صوت العرب الشهيرة جمالات الزيادي ومذيع لندن مصطفي الزيادي ود\عبدالرحمن الزيادي لهم اثار كثيرة في مصر في الزمن الماضي احد اجدادي يدعي حمد ابوالبشر محكر سافر الي بيت المقدس للحج في الاردن وجد ناقة عليها وسم الطباعة فسال من اين اتيتم بهذه الناقة اما من مصر او مسروقة فقالوا لة لا هذة الناقة لنا ونحن زيادبة وهذا وسمنا فاستغرب واخذوة مهم الي البادية وقالوا لة نحن 26 خشم بيت هنا
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: الطيب شيقوق)
|
Quote: الخال ابو امير
الزيادي
ابو شيمة
اسكتوا اسكتوا انا الابيات دي بالحيل دوخن راسي
Quote: ليلك طمس الانجم بروقك وجًت رعدك كرً انفجرت سحابتِك سجًت سيلك عمس الوادي وضفادعك ضجًت بارك ( زملِك ) بالضحويه عربِك شدًت |
الطيب/ الطيب سلام......
ابو شوقى رجل مبدع, وشاعر مرهف, استمتع بالبادية وامتعنا بما قاله فيها, فهو شاعر مطبوع ومقتدر,سرح وراء البل, وسرح بخياله شعرا يتقطر عذوبة وفن متأثرا ببادية الزيادية التى ترعرع فيها, له ديوان شعر "دوبيت,واغانى الجرارى والهسيس.. الخ.." طبع فى ليبيا, واعتقد ان طبعته الاول قد نفدت, ولا ادرى هل هناك طبعة ثانية ام لا, اتمنى ان اجد نسخةمنه فقد ضاع منى هذا الكتاب كما العشرات من الكتب التى تستلف ولا تسترد.
كده دقيقة نفتش ليك ما قاله ابو شوقى فى الطبيعة.
تحياتى
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: محمد الامين محمد)
|
خالي عمر
Quote: هيييييع .. امانه ما شدّينا وحرّينا .. انت قايلنا زي ناس امير اللعبهم كله بالريموت كنترول ! خالك ياولد ركبيه وكيعانه وسيقانه ما فيهن سنتي واحد خالي من الجروج .. زي جسم علي الكرار ليس فيه موضع الا وبه طعنة رمح او ضربة سيف .. وساموت علي سريري كما يموت البعير بعد العمر الطويل لي ولك . |
هههههها يا ابوى ناس امير ديل ناس ثورة الياسمين كان قبلوا عليكم بركبوكم التونسية - قال جروح قال!!
ديل بيحتجوا وبدوا العسكري وردة وديل بحتجوا والثرامس شايلنها في الاكتاف زى درعتك لشنطة الدمورية في الكتف زمان
انتوا بتقولوا عووووووووووك اتلموا للمظاهرة اما ديل يا خال كلك كلك كلك كلك (كولهن بكسر الكاف الاولى واللام كمان) على الكي بورد في الفيس بوك وبعد دقائق تشوف القيامة قامت ما تعمل حسابك يوطوك بأرجلهم وهم لا يشعرون .
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: الطيب شيقوق)
|
Quote: سريع اخي الزيادي ما تشحتف روحنا ساى |
هاك يا الطيب ابو شوقى فى وصف الطبيعة,
البرق البشيل شق السحاب الداكن مطرو مغيب القلع ابو جباها ماكن الارام تعج بعد الهدوء الساكن .. من تيقا ومشت ..شمال غرب متراكن ..
خريفك زينه ..حنتوتك شبك متطارح بدان بقرك ..تورهن بجعر قارح معزول بهمك ..مخيل من ضباع وجوارح رتع بى الوعر غنمك نباتك صالح
تحنَى وترزمى ..وتحمى الحوار اللين سحابه مقنطره ..وعكاز سراتك بين يصول فحلك يحادى وبالمصاع متطين يا ام ضرعا مكبس بالحليب متحين..
بدر خريفك ..حنتوتك تشابك نوًر .. مرح طربان غزالك ..بالعتامير شوًر.. فوق قمم الجبال نفش اقطانو هرعك دوًر ... زاهيه جميله ..جلً البارى ابدع ..صوًر ....... جادت دفقت ..سحبك سماكى انقدً سيلك مشط الوادى وزحف بى شده زايد فوق حدودو .انفرش واتمدً اخد يومين كرب ..وأفقك يعد العدًه.. ..... جادت دفقت ..سقت التراب الصايم من تيقا وتغشت البلد المسمى وخايم يجوب الافق طربا طيرك مصيدح حايم يغوص يطفح يسابق الموجه وزك عايم ..
_____________________________ حاشيه : الحنتوت : نوع من النبات الجعير : صوت الثور مخيَل : الخيال قماش قديم يوضع لتخويف الحيوانات المفترسه رتع : سرح فى الخلاء ليأكل العشب . تحنًى وترزمى : الحنين هو صوت الابل المفارقه ..الرزم هو الحنين لكن بصوت منخفض سحابه مقنطره :يقصد السنام السراة :الشحم الذى يغطى الضلوع . المصاع : الهياج ..وفى موسم الهياج يرش الجمل البول على ظهره.. متحين : التحين هو امتلاء شطر الناقه بالحليب الى اقصى درجه ..
العتمور :مفرد عتامير ..وهى الكثبان الرمليه ذات الارتفاع المنخفض الهرع :سحاب سريع الحركه يظهر فى صباحات الخريف بارتفاع منخفض انفرش : اتسع تيقا ؛؛ الوخايم :اسماء مناطق ..
| |
|
|
|
|
|
|
Re: جمل البلطجي المقتحم للمظاهرات المصرية فيهو وسم الطبّاعة بتاعة ناس ود المحرب (Re: محمد المختار الزيادى)
|
Quote: البرق البشيل شق السحاب الداكن مطرو مغيب القلع ابو جباها ماكن الارام تعج بعد الهدوء الساكن .. من تيقا ومشت ..شمال غرب متراكن ..
خريفك زينه ..حنتوتك شبك متطارح بدان بقرك ..تورهن بجعر قارح معزول بهمك ..مخيل من ضباع وجوارح رتع بى الوعر غنمك نباتك صالح
تحنَى وترزمى ..وتحمى الحوار اللين سحابه مقنطره ..وعكاز سراتك بين يصول فحلك يحادى وبالمصاع متطين يا ام ضرعا مكبس بالحليب متحين..
بدر خريفك ..حنتوتك تشابك نوًر .. مرح طربان غزالك ..بالعتامير شوًر.. فوق قمم الجبال نفش اقطانو هرعك دوًر ... زاهيه جميله ..جلً البارى ابدع ..صوًر ....... جادت دفقت ..سحبك سماكى انقدً سيلك مشط الوادى وزحف بى شده زايد فوق حدودو .انفرش واتمدً اخد يومين كرب ..وأفقك يعد العدًه.. ..... جادت دفقت ..سقت التراب الصايم من تيقا وتغشت البلد المسمى وخايم يجوب الافق طربا طيرك مصيدح حايم يغوص يطفح يسابق الموجه وزك عايم .. |
يا سلام اخي الزيادي والله قمة في الابداع
جاييك للشرح البكيفك بس دوامي انتهى وبجيك من البيت
معزتي
| |
|
|
|
|
|
|
|