|
Re: الواقع فى هذا المنبر يقول أن الأعضاء لايقرأون!! (Re: Balla Musa)
|
ااختلف معك يادكتور بله ممكن واحد اتنين يجوا متلبين المنبر قبل يشوفوا الحاصل ويفتحوا مواضيع تكون منطقيه . لكن مامنطقي كلهم يفتحوا مواضيع قبل الاطلاع على المنبر !!!!! الحاجه اللذيذه في ناس بباصوا لبعض يعني واحد يفتح موضوع ويجي واحد تاني يفتح موضوع في نفس المناسبه ويشوت له الرابط بتاع بوسته . تحياتي ومودتي
| |
|
|
|
|
|
|
Re: الواقع فى هذا المنبر يقول أن الأعضاء لايقرأون!! (Re: ناذر محمد الخليفة)
|
Quote: فى الجزائر كان انقلاب عسكرى على الديمقراطية.
أنا لست ضد الإسلاميين الذين يأتون عبر انتخابات حرة ونزيهة وضد أى ديكتاتورية حتى ولو كانت ضد الإسلاميين |
العزيز/ بلة
سلام
كلنا لا نمانع في أن يأتوا عبر الطريق الديمقراطي والذي لا بد أن يظل نظاما يأتي به كل من ينال ثقة الشعب...
في الجزائر بعد أن كانوا قريبين من الفوز قالوا أنهم سيلغون النظام الديمقراطي التعددي.. هؤلاء لا يعرفون الحرية ولايعرفون قيمة الديمقراطية... ولا بعرفون الإلتزام بالقوانين... لذا الجيش كان على حق, فسحقهم شئ ايجابي نتمنى أن يكون في كل مكان..
تحياتي
| |
|
|
|
|
|
|
Re: الواقع فى هذا المنبر يقول أن الأعضاء لايقرأون!! (Re: Abdlaziz Eisa)
|
السلام بلة ومنعم وعزيز كتب منعم Quote: لم تكن نزيهه ولن تكون هنالك قبضة للإسلاميين في المغرب العربي فلو كانت نزيهه لما سكت الشعب كل ذلك الوقت هذه الأنظمة الإسلامية لا تستمد وجودها دائما من قواعدها داخل البلد دوما تلجأ لكل الوسائل التي تبرر الغاية. |
و حجته على عدم نزاهتها هي سكوت الشعب كل ذلك الوقت و كتب عزيز Quote: في الجزائر بعد أن كانوا قريبين من الفوز قالوا أنهم سيلغون النظام الديمقراطي التعددي.. هؤلاء لا يعرفون الحرية ولايعرفون قيمة الديمقراطية... ولا بعرفون الإلتزام بالقوانين... لذا الجيش كان على حق, فسحقهم شئ ايجابي نتمنى أن يكون في كل مكان.. |
صاح الموضوع طال عليه الزمن لكن المبدأ واحد ديمقراطية و قبول الآخر و خيار الأغلبية ... إلخ إلخ لو يسمح دكتور بلة بحرف موضوع البوست اطمع في تكرم الأخوين منعم وعزيز بمزيد من شرح حديثهم
| |
|
|
|
|
|
|
Re: الواقع فى هذا المنبر يقول أن الأعضاء لايقرأون!! (Re: محمد البشرى الخضر)
|
يا منعم قولك ان انتخابات الجزائر ما كانت نزيهة لأن الشعب لم يدعم الاسلاميين بعد ذلك يشبه ان نقول الشعب يؤيد الانقاذ لانه لم ينتفض عليها حتى الان. الاسلاميون في الجزائر فازوا في الانتخابات و استحقوا الحكم تماما كما حدث في تركيا بعد ذلك و قريب بشكل ما مما حدث في فلسطين مع وجود اختلافات. و على حين اثبت الاتراك الاسلاميون استحقاقهم للمشاركة في التحول الديموقراطي فشل الجزائريون. هنا انا بنحاز ضد د. بلة و ودالبشرى و اقول انو اختيار اسلاميو الجزائر للقتال يدل على ان مشاركتهم في الانتخابات لم تكن عن ايمان بالديموقراطية بل كانت لاستغلال الديموقراطية.لذلك لم يكونو مستعدين لتضييع لحظة قوتهم فابرزوا السلاح فورا دفاعا عن سلطتهم.
يا بلة .. في موضوع البوست. حدث رئيسي من احداث تونس حصل امبارح بليل حوالي الساعة عشرة و نص و اتفتحت بيو طشرمية بوست .. الساعة تمنية صباحا في عضو شكلو دابو صحى و فتح موقع الجزيرة لقى الخبر دا شايلو و فتح بيو بوست. قربت اخش اعضيو. تخيل قربت اخش اعضيو دي تنفع عنوان بوست. حامشي افتحو.
| |
|
|
|
|
|
|
Re: الواقع فى هذا المنبر يقول أن الأعضاء لايقرأون!! (Re: حمور زيادة)
|
يا حمور كدي قول بسم الله Quote: هنا انا بنحاز ضد د. بلة و ودالبشرى و اقول انو اختيار اسلاميو الجزائر للقتال يدل على ان مشاركتهم في الانتخابات لم تكن عن ايمان بالديموقراطية بل كانت لاستغلال الديموقراطية.لذلك لم يكونو مستعدين لتضييع لحظة قوتهم فابرزوا السلاح فورا دفاعا عن سلطتهم. |
قبل ما تنحاز ضدي أنا لسة ما قلت حاجة أنا استاذنت بلة لو سمح بتغيير موضوع البوست و طلبت من عزيز ومنعم مزيد من الشرح لحديثهم يعني لسة ما لحقت اقول راي عشان تنحاز ضدو
ثم ياخي ناس جبهة الإنقاذ الجزائرية ما ابرزوا السلاح دفاعا عن سلطتهم , ديل ما شهدوهم زاتوا يضوقوها
_________________
دا عني أما عن بلة فأنا معاك لو عايز تنحاز ضدو اليومين دي لا مخلي ختمية لا انصار لا وهابية لا ملحدين لا ناس باريس يستاهل الإنحياز ضدو
| |
|
|
|
|
|
|
Re: الواقع فى هذا المنبر يقول أن الأعضاء لايقرأون!! (Re: محمد البشرى الخضر)
|
ود البشرى عليك الله البوست دا أحرفو ان شاء الله تسقيه عرقى وتشممو سلسيون..
بس اختانا من ناس القفة والرملة واقعد يابوست خلى يجلدوك!
حمور دا عليك الله أردمو معاك لأنى أنا محاربو..
بس عايز أقول عندى إحساس أن ماحدث للإسلاميين فى الجزائر من تآمر إشترك فيه الجيش وقوى إقليمية ودولية كان له دور كبير فى انتصار العناصر الإنقلابية على العناصر الديمقراطية فى الجبهة الإسلامية القومية فى السودان, ومن بعدها الإنقلاب فى يونيو 1989م.. ربما تكون قرايتى خطأ ولكن تطمين الإسلاميين بنيل حقوقهم عبر الديمقراطية سيقلل كثيرا من اللجوء للعسكر.
| |
|
|
|
|
|
|
Re: الواقع فى هذا المنبر يقول أن الأعضاء لايقرأون!! (Re: Balla Musa)
|
لا حولااا لكن غتاتة شديدة عليكم ياحمور وود البشرى ، في حاجة إسمها لكز ياإخواننا
ياخوانا جبهة الإنقاذ الجزائرية تطير في وكت زي دا خلونا نشوف كيبورداتنا ونحصل الثورة والنضال أنا جني وجن البوستات التمسك الزول هسة الواحد ماصدق إتملصت من بوست علاء داك كلو بسببك ياود البشرى ، ملاحقني ملاحقني مالك حاليا ماعندي غير أقول السبب الذكرتو غير موضوعي ومتعجل وغير مقنع دا لو بخارجني منكم . لكن حكاية غير نزيه أو مشكوك في نزاهتها برجعلكم . لكم التحايا
| |
|
|
|
|
|
|
Re: الواقع فى هذا المنبر يقول أن الأعضاء لايقرأون!! (Re: عبد المنعم ابراهيم الحاج)
|
نرجع لي موضوعنا الاساسي ,, مسأله عدم القراءه .. أو بالاصح , عدم القراءه بتمعن ,,
عارف يا دكتور , تاني يوم في الاستفتاء كنتا عاوزه افتح بوست اسمو (كومبـو), يعني مقتطفات متنوعه لي كم فكره تدور في رأسي بخصوص انفصال الجنوب وكدا , جيت المنبر لقيت كل عضو فاتح ليهو ستطاشر بوست براااهو كدا حلالا زلالا ,, يعني بي حساب المثلثات كدا , في زي خمست تلاف بوست عن الاستفتاء في ذات الوقت ,, والحاجه البتمغس وتهرد الفشفاش , انو كل بوست في الخمس تلاف ديل , فيهو زي خمسه ولا عشره مداخلات وبعد كدا بيغطس ,, ودا طبيعي جدا , لانو سيد البوست ما بيسوقو ,, او بينشغل بالردودفي بوست آخر , او بيقنع منو وينتقل لي فتح بوست آخر عن نفس الموضوع لكن بي عنوان مختلف !!
عارف البوستات الكانت مستمره عن موضوع حيوي جدا زي الاستفتاء , للاسف كانت البوستات البتحصل فيها شكله !! يعني انت تشوف البوست ماشي ومتواصل .. تخش عشان تقرا , تلقى الكلام كلو ###### مشخت بالطريقه دي !!
اتمنيت لو زول واحد فتح بوست (شحمان) كدا , يعمل فيهو تجديد كل يوم , انشالله بي خبر او خبرين ,, احسن لينا ميه مره من لعبه سك سك دي ! المؤسف أكثر , انو في موضوعات حساسه جدا خاصه بالاستفتاء مافي زول اتكلم عنها حتى الان , او حتى تناولها كان ضعيف ,, أو البوست قلب شكله , او البوست اتفتح وراح في الرقلين ! زي حصص البترول .. تقسيم المياه وحصه مصر .. ترسيم الحدود .. الجنوبيون في الشمال والعكس , التنميه في الجنوب ما بعد الانفصال .. ماذا لو حصلت الوحده ؟ .. اتفاقيات المياه واقامه السدود ..مقتطفات من صناديق الاقتراع.. وايييييك!
بالجد اتضايقتا جدا لانو حدث مهم زي دا حايروح شمار في مرقه , وما عارفه لو الناس ما كتبت في الموضوع دا بكثافه وبي صوره محترفه وتوثيقيه حا تكتب متين ..
غايتو الله يخلي لينا الجزيره والعربيه نت ساااااي (^_^)
| |
|
|
|
|
|
|
Re: الواقع فى هذا المنبر يقول أن الأعضاء لايقرأون!! (Re: حمور زيادة)
|
يا منعم يا منعم ياخي في داعي تقفلني كدا يعلم الله مشتهي نقاش المثقفين فترت من الكاكات مع ود الصايم و تنظير
ما عليك يا ريّال نخليك (خلونا نشوف كيبورداتنا ونحصل الثورة والنضال ) ونتلاقى في بوست لايوق تاني إن شاء الله
Quote: السؤال محول لود البشرى |
يا بلة المحن عندك لكن تلديهن إنت ودايرني أنا الألوليهن
دكتور محمد حسن ومن قبله ود المرتضى يا أحباب القوقلاب اقصد به الزملاء معتادي قوقلة الأخبار و المقالات و الحوارات ... إلخ الذين لا يكلفهم البوست سوى قوقل - كوبي - بيست - اختيار عنوان ظريف أما النقلتية فهم احد بطون القوقلاب السالف ذكرهم ينقلون ولا يعون الواحد ينقل ليك المقال بي اخطاؤه الإملائية و أحيانا بإمضاء الكاتب ويتبنى رأي صاحب الكتابة بلاوعي حتى لو ناقض سابق مواقفه المعلنة وما إلى ذلك فلكم العتبى يا اخوان
Quote: حصة مصر محفوظة بموجب الاتفاقيات و القانون الدولي و لا مجال للمساس بها. أرجو من الاخوة في السودان الشقيق الالتفات الى مشاكلهم الداخلية بدلاً عن محاولة خلق مشاكل معنا. |
حد يصحي د.أمين بالعدم بشاشا
| |
|
|
|
|
|
|
Re: الواقع فى هذا المنبر يقول أن الأعضاء لايقرأون!! (Re: محمد البشرى الخضر)
|
عزيزى بلة
ملاحظتك ممتازة. لكن انا عايز اخدها من زاوية تانية. کون ان نسبة عالية من السودانيين لا يقرأون حقيقة كبرى. تلاحظ ذلك عند التعليق على مقالات الكتاب التى تنقل الى هذا الموقع. يعنى احياناأقوم بقراءة التعليقات قبل قراءة المقال نفسه ثم اكتب تعليقا بناء على تعليقات الاخرين. فى احيان كثيرة تقرأ التعليقات ثم عندما تقرأ المقال تحتار هل هذه التعليقات حول هذا المقال ام حول مقال آخر. لا تجد اى صلة او فهم بين ما يتحدث عنه الناس وبين ما يرد فى المقال. يخيل الى ان الناس يتأثرون بالاسم يعنى مثلا اذا شاف اسم بلة موسى وهو لا يحبه لسبب ما يذهب طوالى للتعليق دون قراءة المادة او الفكرة.شوف المثال ده: قبل ايام قريت مقال عنيف لواحد اسمو محجوب بابا يشتم الكاتب مصطفى البطل شتيمة مرة حول مقال كتبه عن على محمود حسنين. ومحجوب بابا هذا يزبد ويطلع وينزل ويقول للبطل ان حسنين رجل عظيم وانك بمحاولتك الاساءة اليه تسئ الى نفسك وكلام من النوع ده. بعدين يا زول مشيت قريت مقال البطل موضع التعليق زاتو. لقيت ان المقال فيه تمجيد شديد لعلى محمود حسنين وانصاف له وتعرية لمن لنافع على نافع الذى اساء اليه ولو ان حسنين لقى المقال ده احتمال يعلقو فى صالون منزله. طيب زى ده تفسره كيف؟ كيف يكتب رجل عن مقال وهو لم يقرأ المقال نفسه وفى الغالب سمع تعليقات عليه من آخرين؟
| |
|
|
|
|
|
|
Re: الواقع فى هذا المنبر يقول أن الأعضاء لايقرأون!! (Re: Balla Musa)
|
Quote: بس عايز أقول عندى إحساس أن ماحدث للإسلاميين فى الجزائر من تآمر إشترك فيه الجيش وقوى إقليمية ودولية كان له دور كبير فى انتصار العناصر الإنقلابية على العناصر الديمقراطية فى الجبهة الإسلامية القومية فى السودان, ومن بعدها الإنقلاب فى يونيو 1989م.. |
بلة سلام انتخابات الجزائر المثيرة الجدل اتت لاحقة لانقلاب اسلاميي السودان بقرابة ثلاث سنوات (مطلع 1992م) فالاصح اذن وفق هذه الرؤية ان الجزائريين خافوا ان يصير حالهم مثل السودان فتغدوا بالاسلاميين
| |
|
|
|
|
|
|
Re: الواقع فى هذا المنبر يقول أن الأعضاء لايقرأون!! (Re: Balla Musa)
|
بلة موسى كلامك منطقي وبوستات كثيرة متشابهة وتدور في نفس الموضوع وأزيدك كمان هنا أنه وبعد عودة الغنوشي من الخارج الاسبوع القادم ستكون هناك تغييرات كبيرة في الثورة التونسية وسوف يسيطر الاسلاميون على كافة المناصب العليا وسيكون هناك تحالف قوي بين النظام الاسلامي الذي سيحكم تونس وبين النظام الاسلامي الذي سيحكم السودان بعد 31 يناير 2011م
| |
|
|
|
|
|
|
|