ضُلَّ السارية رفَّاي للبعيــد ومتـرَّك
هضليم الكباس عسكـــر عليهُ وفـرَّك
يا زارع السمـح أولى اليتيم اتحـرَّك
داك ريق الفطيــم لهطان يحن لى درَّك
***
الحي في الوسيـعة دروبو سالكـة وماهلة
يومـاً مرنة مطروحـه ؤمـــرَّات قاحلـة
ما بتدري الوديـعة متيـن تكون الرَّاحلة
سمحة المـدَّة بالدَّس لى اليتيم السَّاهلـة
***
زمـان أوروك يا مخلوق معاني السَّمتـــة
وكان خيـر الانام باليُتمى دايـماً يرتـى
هاتيـن هاتو هـو والتانيـة فيهـا أفتى
في الفـردوس سوا بالــرُّوح ؤثـم الجتـة
***
الولد الأبوهـــو هميـم وأمو نبيهـــة
البت الربــت بيــن أمهـــا ؤواليهـا
ديـل زرع الصحاح محـروس مميز جيـهة
وين عاد اليتيــم سارح وحيد في التيها
***
الجاهل اليتيم وصونـا بى تربايتــو
نرعى ندرجو بيناتنــا تربى قنايتـو
ما ضاق الحنـان دفق اليتـم لى لبايتو
هيلا على اليتيم نتولى نحـن رعايتـو
***
المال شن لزومو إن مـا عــدل للمايلة
والدنيا أم قـدود شبه السحابة الجايلة
في فد مـرَّة ترحل ما بتدوم الزايلــة
هيلا على اليتيـم قبَّال تحــر القايلـة
***
إن مـرَّ اليتيم بيناتنـا نمسـح راسـو
نكسي ننعلتـو نحــن السمـح حُرَّاسـو
في فصل الدروس يمسك كمان كرَّاســو
عز سودانو بكـرة ؤهو البمتن ساسو
***
درفوناً نَتَــف ريشو العـدم قلاهـــو
في الوحـدة وعدم ليم العصير خلاهـو
شـن معنانا إنْ سبناهـو نحن براهـو
نبقى مرقنـا من الذُّوق ؤمـن معناهو
***