|
أوكامبويات – اسكتشات كتابية - عودة اوكامبو لملاحقة المشير البشير
|
قبل سنتين نشرت عدة اسكتشات في المنبر عن أوكامبو والبشير بعنوان أوكامبويات , وهنا أعود لهذه الاسكتشات بمناسبة تصريح أوكامبو مؤخراً بأنه لن يفلت عمر البشير وان طال الزمن . أوكامبويات – اسكتشات كتابية عودة اوكامبو لملاحقة المشير البشير يجلس المشير عمر علي كرسي وثير في غرفته السرية في سكنه السري ممسكاً برأسه بشدة (ومنطط عينيه) وصدره يعلو ويهبط ويسيل زبد من جانبي فمه ويدق سجاد أرضية الغرفة بقدمه , ويصرخ قائلاً : الزول الكافر ده ورآي ورآي , بينما يحيط بالمشير خاصة خاصته ويشتملون علي طبيبه الخصوصي وطبيبه النفسي ونافع وبكري وعبدالرحيم , ويسأله نافع بإشفاق : منو في الكفار ياريس ما اصلهم كتار عدوينك ؟ ويصرخ الريس : أوكامبو ! أوكامبو ! هو في غيرو , ما ده أكبر عدو . أنا قلت ختيتو تحت جزمتي لكن النجس ده بحس بيهو دخل في نافوخي من جوَه . ويتدخل الطبيب النفسي قائلاً : حلمك سعادتك , انت حسه بتشعر بشنو ؟ وان شاء الله نجد ليك الدواء من كل داء . المشير: أنا بحس بشحتفه في روحي ودغمسه في أفكاري وقبضات في صفحتي وهبايب في بطني . الجماعة الحضور بصوت واحد: كفاره يا ريس كفاره يا ريس . المشير: والله احترنا معاكم يا دكاتره ويا معالجين , جربنا دوياتكم كلها والحال في حالو , حتي الطب البلدي جربناه وما خلينا حاجة , وجبنا الفكي حاج منزو وسقانا محاية وكتب لينا حجاب , واستدعينا واحد شيخ قالوا سره باتع اسمو الشيخ أبو لالوبه وعمل لينا رقية وقرأ فوقنا وكلوا ده ما عمل فايده . وتدخل عبدالرحيم قائلاً : وضح إنو سبب القلاقل دي هو أوكامبو وأنا بقترح نرسل ليهو واحد انتحاري يجيب خبرو ويريحنا منو , وأخونا نافع عنده خبره في الحاجات دي . بكري : مع احترامي للأخ نافع لكن الخطة دي ما مضمونة وحقو نتعظ من الحصل في أديس أبابا سنة 1995 في محاولة اغتيال الرئيس حسني مبارك والتي أكد إبراهيم السنوسي أخيراً انها تمت بتخطيط نافع وعلي عثمان باعترافهم امام الترابي بحضوره . الرئيس : كدي خلونا حسه من الكلام ده لأنو حاسي انو راسي حينفقش والمهم الحاصل لي ده ما عايز جنس مخلوق يعرف بيهو وخصوصاً أخونا شيخ علي عثمان لأنو ده زول شال شيخنا الترابي زاتو وما مضمون يعمل شنو تاني لو عرف بحالتي دي . الطبيب : بعد اذنكم يا ساده أنا ح أدي الريس حقنة مهدئه وح ينوم بعدها . وإنفض الجماعة وكل واحد منهم يفكر في مصيره بعد ذهاب البشير بإكامبو أو غيره .
|
|
|
|
|
|