|
|
 آخر زمن ..!! قصيدة لعبد القادر الكتيابي
|
آخر زمن ..!!
عبدالقادر الكتيابي
ــــــــــــــــــ
...آخر زمن ..!! يا دنيا
آآآآآهـ .. آخر زمن ..
مين كان بصدق لو زمان ـ
حكو ليهو بالمحن البقن ؟؟!!
كل الخلوق اتغيرت ..
كل الحقايق .. كل شي ..
ما باقي غير داك السما و هادي الأرض ـ مَدَّ المدى الـ ما اتغيرن ..
كبرت مدن ـ وكأنما كانت بيوت ـ
مخفية في بطن الأرِضْ
نشرت نشور ..
بين يوم وليلة و سيل نفوس
ماجت تجوس جواها في صورة بشر ..
وهي ما بشرْ !!!
آخر زمن ..
يا دنيا آآآه ؟؟
آخر زمن ...
مين كان بصدق لو زمان
شاف شَمْسْ تطلع شان تغيب بس !! وانتهى اليوم والسلام ..
وين الضحى ؟
وين العصير ؟
وين المغيرب و قُبَّة الليل والْحُجا .. ؟
كيف دنيا كاملة بتختفي وتجي دنيا غير ؟
وين الحلم ..؟
طلعت شَمِسْ .. غابت شمَسْ..راح العمير ..
زيَّ الهوا الشايلو الهوا ..!
زي حَلْمة كانت في منام !!
كيف اختلف طَعَمَ الطَعَمْ ؟
كيف اختلف حتى الكلام ؟ !!
بقى من زَبَد ..
مهما كِتِرْ .. ما فيهو خير !!
ما فيهو حبَّة من الصِدِقْ ..
مع اِنو ما بين القَلِبْ واَصْل اللسان يا دوووب ـ أقلَّ من الشِبِر
أو قول شبير !!
لكن بتوحل فيهو خيل .. رايات ملوك .. أقدار رجال .. حتى اللِّحى ..
حتى الكُبار ....
وكأنه ما في رقاد شبر ..
و كأنه ما في سؤال نكير ..!!
حتى الجمال ! الكان محال .. غرَّز معاهم في الوحل ..
راح الغنا وراح الشعر ..
آخر زمن يا دنيا يا آخر زمن ..
مِحَنَكْ تهد حيل الخيال ..
و مروة الروح والبدن
زي الكأنو بدون وعود وبدون رعود ..
وبدون برِقْ ـ
صبَّتْ علي كل الأرِضْ
مطرة فِتَنْ ..
دخلت على كل البلود ..كل البيوت ..
و الدم رخص .. يا دنيا يااا..
آخر زمن ..
يا دنيا هل دنية زمان ..كانت وهم ..؟؟
أم حلمة كانت في منام .. ؟؟!!
آخر زمن ..
يا الله بس
حسن الختام .. !!
|
|
  
|
|
|
|
|
| |
أسامة عبد الجليل
معاوية عبيد الصائم
حبيب نورة
أسامه الكرور
فيس بوك
تويتر
انستقرام
يوتيوب
بنتيريست